১০. ধম্মদেসনায অপ্পোস্সুক্কপঞ্হো

১০. ‘‘ভন্তে নাগসেন, তুম্হে ভণথ ‘তথাগতেন চতূহি চ অসঙ্খ্যেয্যেহি কপ্পানং সতসহস্সেন চ এত্থন্তরে সব্বঞ্ঞুতঞাণং পরিপাচিতং মহতো জনকাযস্স সমুদ্ধরণাযা’তি. পুন চ ‘সব্বঞ্ঞুতং পত্তস্স অপ্পোস্সুক্কতায চিত্তং নমি, নো ধম্মদেসনাযা’তি.

‘‘যথা নাম, ভন্তে নাগসেন, ইস্সাসো ৰা ইস্সাসন্তেৰাসী ৰা বহুকে দিৰসে সঙ্গামত্থায উপাসনং সিক্খিত্ৰা সম্পত্তে মহাযুদ্ধে ওসক্কেয্য, এৰমেৰ খো, ভন্তে নাগসেন, তথাগতেন চতূহি চ অসঙ্খ্যেয্যেহি কপ্পানং সতসহস্সেন চ এত্থন্তরে সব্বঞ্ঞুতঞাণং পরিপাচেত্ৰা মহতো জনকাযস্স সমুদ্ধরণায সব্বঞ্ঞুতং পত্তেন ধম্মদেসনায ওসক্কিতং.

‘‘যথা ৰা পন, ভন্তে নাগসেন, মল্লো ৰা মল্লন্তেৰাসী ৰা বহুকে দিৰসে নিব্বুদ্ধং সিক্খিত্ৰা সম্পত্তে মল্লযুদ্ধে ওসক্কেয্য, এৰমেৰ খো, ভন্তে নাগসেন, তথাগতেন চতূহি চ অসঙ্খ্যেয্যেহি কপ্পানং সতসহস্সেন চ এত্থন্তরে সব্বঞ্ঞুতঞাণং পরিপাচেত্ৰা মহতো জনকাযস্স সমুদ্ধরণায সব্বঞ্ঞুতং পত্তেন ধম্মদেসনায ওসক্কিতং.

‘‘কিং নু খো, ভন্তে নাগসেন, তথাগতেন ভযা ওসক্কিতং, উদাহু অপাকটতায ওসক্কিতং, উদাহু দুব্বলতায ওসক্কিতং, উদাহু অসব্বঞ্ঞুতায ওসক্কিতং, কিং তত্থ কারণং, ইঙ্ঘ মে ত্ৰং কারণং ব্রূহি কঙ্খাৰিতরণায. যদি, ভন্তে নাগসেন, তথাগতেন চতূহি চ অসঙ্খ্যেয্যেহি কপ্পানং সতসহস্সেন চ এত্থন্তরে সব্বঞ্ঞুতঞাণং পরিপাচিতং মহতো জনকাযস্স সমুদ্ধরণায, তেন হি ‘সব্বঞ্ঞুতং পত্তস্স অপ্পোস্সুক্কতায চিত্তং নমি, নো ধম্মদেসনাযা’তি যং ৰচনং, তং মিচ্ছা. যদি সব্বঞ্ঞুতং পত্তস্স অপ্পোস্সুক্কতায চিত্তং নমি নো ধম্মদেসনায, তেন হি ‘তথাগতেন চতূহি চ অসঙ্খ্যেয্যেতি কপ্পানং সতসহস্সেন চ এত্থন্তরে সব্বঞ্ঞুতঞাণং পরিপাচিতং মহতো জনকাযস্স সমুদ্ধরণাযা’তি তম্পি ৰচনং মিচ্ছা. অযম্পি উভতো কোটিকো পঞ্হো গম্ভীরো দুন্নিব্বেঠো তৰানুপ্পত্তো, সো তযা নিব্বাহিতব্বো’’তি.

‘‘পরিপাচিতঞ্চ, মহারাজ, তথাগতেন চতূহি চ অসঙ্খ্যেয্যেহি কপ্পানং সতসহস্সেন চ এত্থন্তরে সব্বঞ্ঞুতঞাণং মহতো জনকাযস্স সমুদ্ধরণায, পত্তসব্বঞ্ঞুতস্স চ অপ্পোস্সুক্কতায চিত্তং নমি, নো ধম্মদেসনায. তঞ্চ পন ধম্মস্স গম্ভীরনিপুণদুদ্দসদুরনুবোধসুখুমদুপ্পটিৰেধতং সত্তানঞ্চ আলযারামতং সক্কাযদিট্ঠিযা দল়্হসুগ্গহিততঞ্চ দিস্ৰা ‘কিং নু খো, কথং নু খো’তি অপ্পোস্সুক্কতায চিত্তং নমি, নো ধম্মদেসনায, সত্তানং পটিৰেধচিন্তনমানসং যেৰেতং.

‘‘যথা, মহারাজ, ভিসক্কো সল্লকত্তো অনেকব্যাধিপরিপীল়িতং নরং উপসঙ্কমিত্ৰা এৰং চিন্তযতি ‘কেন নু খো উপক্কমেন কতমেন ৰা ভেসজ্জেন ইমস্স ব্যাধি ৰূপসমেয্যা’তি, এৰমেৰ খো, মহারাজ, তথাগতস্স সব্বকিলেসব্যাধিপরিপীল়িতং জনং ধম্মস্স চ গম্ভীরনিপুণদুদ্দসদুরনুবোধসুখুমদুপ্পটিৰেধতং দিস্ৰা ‘কিং নু খো, কথং নু খো’তি অপ্পোস্সুক্কতায চিত্তং নমি, নো ধম্মদেসনায, সত্তানং পটিৰেধচিন্তনমানসং যেৰেতং.

‘‘যথা, মহারাজ, রঞ্ঞো খত্তিযস্স মুদ্ধাৰসিত্তস্স দোৰারিকঅনীকট্ঠপারিসজ্জনেগমভটবল [বলত্থ (সী. পী.)] অমচ্চরাজঞ্ঞরাজূপজীৰিনে জনে দিস্ৰা এৰং চিত্তমুপ্পজ্জেয্য ‘কিং নু খো, কথং নু খো ইমে সঙ্গণ্হিস্সামী’তি, এৰমেৰ খো, মহারাজ, তথাগতস্স ধম্মস্স গম্ভীরনিপুণদুদ্দসদুরনুবোধসুখুমদুপ্পটিৰেধতং সত্তানঞ্চ আলযারামতং সক্কাযদিট্ঠিযা দল়্হসুগ্গহিততঞ্চ দিস্ৰা ‘কিং নু খো, কথং নু খো’তি অপ্পোস্সুক্কতায চিত্তং নমি, নো ধম্মদেসনায, সত্তানং পটিৰেধচিন্তনমানসং যেৰেতং.

‘‘অপি চ, মহারাজ, সব্বেসং তথাগতানং ধম্মতা এসা, যং ব্রহ্মুনা আযাচিতা ধম্মং দেসেন্তি. তত্থ পন কিং কারণং? যে তেন সমযেন মনুস্সা তাপসপরিব্বাজকা সমণব্রাহ্মণা, সব্বেতে ব্রহ্মদেৰতা হোন্তি ব্রহ্মগরুকা ব্রহ্মপরাযণা, তস্মা তস্স বলৰতো যসৰতো ঞাতস্স পঞ্ঞাতস্স উত্তরস্স অচ্চুগ্গতস্স ওনমনেন সদেৰকো লোকো ওনমিস্সতি ওকপ্পেস্সতি অধিমুচ্চিস্সতীতি ইমিনা চ, মহারাজ, কারণেন তথাগতা ব্রহ্মুনা আযাচিতা ধম্মং দেসেন্তি.

‘‘যথা, মহারাজ, কোচি রাজা ৰা রাজমহামত্তো ৰা যস্স ওনমতি অপচিতিং করোতি, বলৰতরস্স তস্স ওনমনেন অৰসেসা জনতা ওনমতি অপচিতিং করোতি, এৰমেৰ খো, মহারাজ, ব্রহ্মে ওনমিতে তথাগতানং সদেৰকো লোকো ওনমিস্সতি, পূজিতপূজকো মহারাজ, লোকো, তস্মা সো ব্রহ্মা সব্বেসং তথাগতানং আযাচতি ধম্মদেসনায, তেন চ কারণেন তথাগতা ব্রহ্মুনা আযাচিতা ধম্মং দেসেন্তী’’তি. ‘‘সাধু, ভন্তে নাগসেন, সুনিব্বেঠিতো পঞ্হো, অতিভদ্রকং ৰেয্যাকরণং, এৰমেতং তথা সম্পটিচ্ছামী’’তি.

ধম্মদেসনায অপ্পোস্সুক্কপঞ্হো দসমো.