৯. অরহন্তঅভাযনপঞ্হো

৯. ‘‘ভন্তে নাগসেন, ভাসিতম্পেতং ভগৰতা ‘ৰিগতভযসন্তাসা অরহন্তো’তি. পুন চ নগরে রাজগহে ধনপালকং হত্থিং ভগৰতি ওপতন্তং দিস্ৰা পঞ্চ খীণাসৰসতানি পরিচ্চজিত্ৰা জিনৰরং পক্কন্তানি দিসাৰিদিসং একং ঠপেত্ৰা থেরং আনন্দং. কিং নু খো, ভন্তে নাগসেন, তে অরহন্তো ভযা পক্কন্তা, পঞ্ঞাযিস্সতি সকেন কম্মেনাতি দসবলং পাতেতুকামা পক্কন্তা, উদাহু তথাগতস্স অতুলং ৰিপুলমসমং পাটিহারিযং দট্ঠুকামা পক্কন্তা? যদি, ভন্তে নাগসেন, ভগৰতা ভণিতং ‘ৰিগতভযসন্তাসা অরহন্তো’তি, তেন হি ‘নগরে…পে… আনন্দ’ন্তি যং ৰচনং তং মিচ্ছা. যদি নগরে রাজগহে ধনপালকং হত্থিং ভগৰতি ওপতন্তং দিস্ৰা পঞ্চ খীণাসৰসতানি পরিচ্চজিত্ৰা জিনৰরং পক্কন্তানি দিসাৰিদিসং একং ঠপেত্ৰা থেরং আনন্দং, তেন হি ‘ৰিগতভযসন্তাসা অরহন্তো’তি তম্পি ৰচনং মিচ্ছা. অযম্পি উভতো কোটিকো পঞ্হো তৰানুপ্পত্তো, সো তযা নিব্বাহিতব্বো’’তি.

‘‘ভাসিতম্পেতং, মহারাজ, ভগৰতা ‘ৰিগতভযসন্তাসা অরহন্তো’তি, নগরে রাজগহে ধনপালকং হত্থিং ভগৰতি ওপতন্তং দিস্ৰা পঞ্চ খীণাসৰসতানি পরিচ্চজিত্ৰা জিনৰরং পক্কন্তানি দিসাৰিদিসং একং ঠপেত্ৰা থেরং আনন্দং, তঞ্চ পন ন ভযা, নাপি ভগৰন্তং পাতেতুকামতায.

‘‘যেন পন, মহারাজ, হেতুনা অরহন্তো ভাযেয্যুং ৰা তাসেয্যুং ৰা, সো হেতু অরহন্তানং সমুচ্ছিন্নো, তস্মা ৰিগতভযসন্তাসা অরহন্তো, ভাযতি নু, মহারাজ, মহাপথৰী খণন্তেপি ভিন্দন্তেপি ধারেন্তেপি সমুদ্দপব্বতগিরিসিখরেতি? ‘‘ন হি, ভন্তে’’তি. ‘‘কেন কারণেন মহারাজা’’তি? ‘‘নত্থি, ভন্তে, মহাপথৰিযা সো হেতু, যেন হেতুনা মহাপথৰী ভাযেয্য ৰা তাসেয্য ৰা’’তি. ‘‘এৰমেৰ খো, মহারাজ, নত্থি অরহন্তানং সো হেতু, যেন হেতুনা অরহন্তো ভাযেয্যুং ৰা তাসেয্যুং ৰা.

‘‘ভাযতি নু, মহারাজ, গিরিসিখরং ছিন্দন্তে ৰা ভিন্দন্তে ৰা পতন্তে ৰা অগ্গিনা দহন্তে ৰা’’তি? ‘‘ন হি, ভন্তে’’তি. ‘‘কেন কারণেন মহারাজা’’তি? ‘‘নত্থি, ভন্তে, গিরিসিখরস্স সো হেতু, যেন হেতুনা গিরিসিখরং ভাযেয্য ৰা তাসেয্য ৰা’’তি. ‘‘এৰমেৰ খো, মহারাজ, নত্থি অরহন্তানং সো হেতু, যেন হেতুনা অরহন্তো ভাযেয্যুং ৰা তাসেয্যুং ৰা.

‘‘যদিপি, মহারাজ, লোকধাতুসতসহস্সেসু যে কেচি সত্তনিকাযপরিযাপন্না সব্বেপি তে সত্তিহত্থা একং অরহন্তং উপধাৰিত্ৰা তাসেয্যুং, ন ভৰেয্য অরহতো চিত্তস্স কিঞ্চি অঞ্ঞথত্তং. কিং কারণং? অট্ঠানমনৰকাসতায.

‘‘অপি চ, মহারাজ, তেসং খীণাসৰানং এৰং চেতোপরিৰিতক্কো অহোসি ‘অজ্জ নরৰরপৰরে জিনৰরৰসভে নগরৰরমনুপ্পৰিট্ঠে ৰীথিযা ধনপালকো হত্থী আপতিস্সতি, অসংসযমতিদেৰদেৰং উপট্ঠাকো ন পরিচ্চজিস্সতি, যদি মযং সব্বেপি ভগৰন্তং ন পরিচ্চজিস্সাম, আনন্দস্স গুণো পাকটো ন ভৰিস্সতি, ন হেৰ চ তথাগতং সমুপগমিস্সতি হত্থিনাগো, হন্দ মযং অপগচ্ছাম, এৰমিদং মহতো জনকাযস্স কিলেসবন্ধনমোক্খো ভৰিস্সতি, আনন্দস্স চ গুণো পাকটো ভৰিস্সতী’তি. এৰং তে অরহন্তো আনিসংসং দিস্ৰা দিসাৰিদিসং পক্কন্তা’’তি. ‘‘সুৰিভত্তো, ভন্তে নাগসেন, পঞ্হো, এৰমেতং নত্থি অরহন্তানং ভযং ৰা সন্তাসো ৰা, আনিসংসং দিস্ৰা অরহন্তো পক্কন্তা দিসাৰিদিস’’ন্তি.

অরহন্তঅভাযনপঞ্হো নৰমো.