১০. বুদ্ধসব্বঞ্ঞুভাৰপঞ্হো

১০. ‘‘ভন্তে নাগসেন, তুম্হে ভণথ ‘তথাগতো সব্বঞ্ঞূ’তি. পুন চ ভণথ ‘তথাগতেন সারিপুত্তমোগ্গল্লানপ্পমুখে ভিক্খুসঙ্ঘে পণামিতে চাতুমেয্যকা চ সক্যা ব্রহ্মা চ সহম্পতি বীজূপমঞ্চ ৰচ্ছতরুণূপমঞ্চ উপদস্সেত্ৰা ভগৰন্তং পসাদেসুং খমাপেসুং নিজ্ঝত্তং অকংসূ’তি. কিং নু খো, ভন্তে নাগসেন, অঞ্ঞাতা তা উপমা তথাগতস্স, যাহি তথাগতো উপমাহি ওরতো খমিতো উপসন্তো নিজ্ঝত্তং গতো? যদি, ভন্তে নাগসেন, তথাগতস্স তা উপমা অঞ্ঞাতা, তেন হি বুদ্ধো অসব্বঞ্ঞূ, যদি ঞাতা, তেন হি ওকস্স পসয্হ ৰীমংসাপেক্খো পণামেসি, তেন হি তস্স অকারুঞ্ঞতা সম্ভৰতি. অযম্পি উভতো কোটিকো পঞ্হো তৰানুপ্পত্তো, সো তযা নিব্বাহিতব্বো’’তি.

‘‘সব্বঞ্ঞূ, মহারাজ, তথাগতো, তাহি চ উপমাহি ভগৰা পসন্নো ওরতো খমিতো উপসন্তো নিজ্ঝত্তং গতো. ধম্মস্সামী, মহারাজ, তথাগতো, তথাগতপ্পৰেদিতেহেৰ তে ওপম্মেহি তথাগতং আরাধেসুং তোসেসুং পসাদেসুং, তেসঞ্চ তথাগতো পসন্নো ‘সাধূ’তি অব্ভানুমোদি.

‘‘যথা, মহারাজ, ইত্থী সামিকস্স সন্তকেনেৰ ধনেন সামিকং আরাধেতি তোসেতি পসাদেতি, তঞ্চ সামিকো ‘সাধূ’তি অব্ভানুমোদতি, এৰমেৰ খো, মহারাজ, চাতুমেয্যকা চ সক্যা ব্রহ্মা চ সহম্পতি তথাগতপ্পৰেদিতেহেৰ ওপম্মেহি তথাগতং আরাধেসুং তোসেসুং পসাদেসুং, তেসঞ্চ তথাগতো পসন্নো ‘সাধূ’তি অব্ভানুমোদি.

‘‘যথা ৰা পন, মহারাজ, কপ্পকো রঞ্ঞো সন্তকেনেৰ সুৰণ্ণফণকেন রঞ্ঞো উত্তমঙ্গং পসাধযমানো রাজানং আরাধেতি তোসেতি পসাদেতি, তস্স চ রাজা পসন্নো ‘সাধূ’তি অব্ভানুমোদতি, যথিচ্ছিতমনুপ্পদেতি, এৰমেৰ খো, মহারাজ, চাতুমেয্যকা চ সক্যা ব্রহ্মা চ সহম্পতি তথাগতপ্পৰেদিতেহেৰ ওপম্মেহি তথাগতং আরাধেসুং তোসেসুং পসাদেসুং, তেসঞ্চ তথাগতো পসন্নো ‘সাধূ’তি অব্ভানুমোদি.

‘‘যথা ৰা পন, মহারাজ, সদ্ধিৰিহারিকো উপজ্ঝাযাভতং পিণ্ডপাতং গহেত্ৰা উপজ্ঝাযস্স উপনামেন্তো উপজ্ঝাযং আরাধেতি তোসেতি পসাদেতি, তঞ্চ উপজ্ঝাযো পসন্নো ‘সাধূ’তি অব্ভানুমোদতি, এৰমেৰ খো, মহারাজ, চাতুমেয্যকা চ সক্যা ব্রহ্মা চ সহম্পতি তথাগতপ্পৰেদিতেহেৰ ওপম্মেহি তথাগতং আরাধেসুং তোসেসুং পসাদেসুং, তেসঞ্চ তথাগতো পসন্নো ‘সাধূ’তি অব্ভানুমোদিত্ৰা সব্বদুক্খপরিমুত্তিযা ধম্মং দেসেসী’’তি. ‘‘সাধু, ভন্তে নাগসেন, এৰমেতং তথা সম্পটিচ্ছামীতি.

বুদ্ধসব্বঞ্ঞুভাৰপঞ্হো দসমো.

সব্বঞ্ঞুতঞাণৰগ্গো চতুত্থো.

ইমস্মিং ৰগ্গে দস পঞ্হা.