৮. অমরাদেৰীপঞ্হো

৮. ‘‘ভন্তে নাগসেন, ভাসিতম্পেতং ভগৰতা –

‘‘‘সচে লভেথ খণং ৰা রহো ৰা, নিমন্তকং [নিৰাতকং (কুণালজাতকে)] ৰাপি লভেথ তাদিসং;

সব্বাৰ [সব্বাপি (সী. পী.)] ইত্থী কযিরুং [করেয্যুং (সী. পী. ক.)] নু পাপং, অঞ্ঞং অলদ্ধা পীঠসপ্পিনা সদ্ধি’ন্তি.

‘‘পুন চ কথীযতি ‘মহোসধস্স ভরিযা অমরা নাম ইত্থী গামকে ঠপিতা পৰুত্থপতিকা রহো নিসিন্না ৰিৰিত্তা রাজপ্পটিসমং সামিকং করিত্ৰা সহস্সেন নিমন্তীযমানা পাপং নাকাসী’তি. যদি, ভন্তে নাগসেন, ভগৰতা ভণিতং ‘সচে…পে… সদ্ধি’ন্তি তেন হি ‘মহোসধস্স ভরিযা…পে… নাকাসী’তি যং ৰচনং, তং মিচ্ছা. যদি মহোসধস্স ভরিযা…পে… নাকাসি, তেন হি ‘সচে…পে… সদ্ধি’ন্তি তম্পি ৰচনং মিচ্ছা. অযম্পি উভতো কোটিকো পঞ্হো তৰানুপ্পত্তো, সো তযা নিব্বাহিতব্বো’’তি.

‘‘ভাসিতম্পেতং, মহারাজ, ভগৰতা ‘সচে…পে… সদ্ধি’ন্তি. কথীযতি চ ‘মহোসধস্স ভরিযা …পে… নাকাসী’তি. করেয্য সা, মহারাজ, ইত্থী সহস্সং লভমানা তাদিসেন পুরিসেন সদ্ধিং পাপকম্মং, ন সা করেয্য সচে খণং ৰা রহো ৰা নিমন্তকং ৰাপি তাদিসং লভেয্য, ৰিচিনন্তী সা, মহারাজ, অমরা ইত্থী ন অদ্দস খণং ৰা রহো ৰা নিমন্তকং ৰাপি তাদিসং.

‘‘ইধ লোকে গরহভযা খণং ন পস্সি, পরলোকে নিরযভযা খণং ন পস্সি, কটুকৰিপাকং পাপন্তি খণং ন পস্সি, পিযং অমুঞ্চিতুকামা খণং ন পস্সি, সামিকস্স গরুকতায খণং ন পস্সি, ধম্মং অপচাযন্তী খণং ন পস্সি, অনরিযং গরহন্তী খণং ন পস্সি, কিরিযং অভিন্দিতুকামা খণং ন পস্সি. এৰরূপেহি বহূহি কারণেহি খণং ন পস্সি.

‘‘রহোপি সা লোকে ৰিচিনিত্ৰা অপস্সন্তী পাপং নাকাসি. সচে সা মনুস্সেহি রহো লভেয্য, অথ অমনুস্সেহি রহো ন লভেয্য. সচে অমনুস্সেহি রহো লভেয্য, অথ পরচিত্তৰিদূহি পব্বজিতেহি রহো ন লভেয্য. সচে পরচিত্তৰিদূহি পব্বজিতেহি রহো লভেয্য, অথ পরচিত্তৰিদূনীহি দেৰতাহি রহো ন লভেয্য. সচে পরচিত্তৰিদূনীহি দেৰতাহি রহো লভেয্য, অত্তনাৰ পাপেহি রহো ন লভেয্য. সচে অত্তনাৰ পাপেহি রহো লভেয্য, অথ অধম্মেন রহো ন লভেয্য. এৰরূপেহি বহুৰিধেহি কারণেহি রহো অলভিত্ৰা পাপং নাকাসি.

‘‘নিমন্তকম্পি সা লোকে ৰিচিনিত্ৰা তাদিসং অলভন্তী পাপং নাকাসি. মহোসধো, মহারাজ, পণ্ডিতো অট্ঠৰীসতিযা অঙ্গেহি সমন্নাগতো. কতমেহি অট্ঠৰীসতিযা অঙ্গেহি সমন্নাগতো? মহোসধো, মহারাজ, সূরো হিরিমা ওত্তপ্পী সপক্খো মিত্তসম্পন্নো খমো সীলৰা সচ্চৰাদী সোচেয্যসম্পন্নো অক্কোধনো অনতিমানী অনুসূযকো ৰীরিযৰা আযূহকো সঙ্গাহকো সংৰিভাগী সখিলো নিৰাতৰুত্তি সণ্হো অসঠো অমাযাৰী অতিবুদ্ধিসম্পন্নো কিত্তিমা ৰিজ্জাসম্পন্নো হিতেসী উপনিস্সিতানং পত্থিতো সব্বজনস্স ধনৰা যসৰা. মহোসধো, মহারাজ, পণ্ডিতো ইমেহি অট্ঠৰীসতিযা অঙ্গেহি সমন্নাগতো. সা অঞ্ঞং তাদিসং নিমন্তকং অলভিত্ৰা পাপং নাকাসী’’তি. ‘‘সাধু, ভন্তে নাগসেন, এৰমেতং তথা সম্পটিচ্ছামী’’তি.

অমরাদেৰীপঞ্হো অট্ঠমো.