৭. কুসলাকুসলসমৰিসমপঞ্হো

৭. ‘‘ভন্তে নাগসেন ‘কুসলকারিস্সপি অকুসলকারিস্সপি ৰিপাকো সমসমো, উদাহু কোচি ৰিসেসো অত্থী’তি? ‘‘অত্থি, মহারাজ, কুসলস্স চ অকুসলস্স চ ৰিসেসো, কুসলং, মহারাজ, সুখৰিপাকং সগ্গসংৰত্তনিকং, অকুসলং দুক্খৰিপাকং নিরযসংৰত্তনিক’’ন্তি.

‘‘ভন্তে নাগসেন, তুম্হে ভণথ ‘দেৰদত্তো একন্তকণ্হো, একন্তকণ্হেহি ধম্মেহি সমন্নাগতো, বোধিসত্তো একন্তসুক্কো, একন্তসুক্কেহি ধম্মেহি সমন্নাগতো’তি. পুন চ দেৰদত্তো ভৰে ভৰে যসেন চ পক্খেন চ বোধিসত্তেন সমসমো হোতি, কদাচি অধিকতরো ৰা. যদা দেৰদত্তো নগরে বারাণসিযং ব্রহ্মদত্তস্স রঞ্ঞো পুরোহিতপুত্তো অহোসি, তদা বোধিসত্তো ছৰকচণ্ডালো অহোসি ৰিজ্জাধরো, ৰিজ্জং পরিজপ্পিত্ৰা অকালে অম্বফলানি নিব্বত্তেসি, এত্থ তাৰ বোধিসত্তো দেৰদত্ততো জাতিযা নিহীনো যসেন চ নিহীনো.

‘‘পুন চপরং যদা দেৰদত্তো রাজা অহোসি মহা মহীপতি সব্বকামসমঙ্গী, তদা বোধিসত্তো তস্সূপভোগো অহোসি হত্থিনাগো সব্বলক্খণসম্পন্নো, তস্স চারুগতিৰিলাসং অসহমানো রাজা ৰধমিচ্ছন্তো হত্থাচরিযং এৰমৰোচ ‘অসিক্খিতো তে, আচরিয, হত্থিনাগো, তস্স আকাসগমনং নাম কারণং করোহী’তি, তত্থপি তাৰ বোধিসত্তো দেৰদত্ততো জাতিযা নিহীনো লামকো তিরচ্ছানগতো.

‘‘পুন চপরং যদা দেৰদত্তো মনুস্সো অহোসি পৰনে নট্ঠাযিকো, তদা বোধিসত্তো মহাপথৰী নাম মক্কটো অহোসি, এত্থপি তাৰ দিস্সতি ৰিসেসো মনুস্সস্স চ তিরচ্ছানগতস্স চ, তত্থপি তাৰ বোধিসত্তো দেৰদত্ততো জাতিযা নিহীনো.

‘‘পুন চপরং যদা দেৰদত্তো মনুস্সো অহোসি সোণুত্তরো নাম নেসাদো বলৰা বলৰতরো নাগবলো, তদা বোধিসত্তো ছদ্দন্তো নাম নাগরাজা অহোসি. তদা সো লুদ্দকো তং হত্থিনাগং ঘাতেসি, তত্থপি তাৰ দেৰদত্তোৰ অধিকতরো.

‘‘পুন চপরং যদা দেৰদত্তো মনুস্সো অহোসি ৰনচরকো অনিকেতৰাসী, তদা বোধিসত্তো সকুণো অহোসি তিত্তিরো মন্তজ্ঝাযী, তদাপি সো ৰনচরকো তং সকুণং ঘাতেসি, তত্থপি তাৰ দেৰদত্তোৰ জাতিযা অধিকতরো.

‘‘পুন চপরং যদা দেৰদত্তো কলাবু নাম কাসিরাজা [কাসিকরাজা (ক.)] অহোসি, তদা বোধিসত্তো তাপসো অহোসি খন্তিৰাদী. তদা সো রাজা তস্স তাপসস্স কুদ্ধো হত্থপাদে ৰংসকল়ীরে ৰিয ছেদাপেসি, তত্থপি তাৰ দেৰদত্তো যেৰ অধিকতরো জাতিযা চ যসেন চ.

‘‘পুন চপরং যদা দেৰদত্তো মনুস্সো অহোসি ৰনচরো, তদা বোধিসত্তো নন্দিযো নাম ৰানরিন্দো অহোসি, তদাপি সো ৰনচরো তং ৰানরিন্দং ঘাতেসি সদ্ধিং মাতরা কনিট্ঠভাতিকেন চ, তত্থপি তাৰ দেৰদত্তো যেৰ অধিকতরো জাতিযা.

‘‘পুন চপরং যদা দেৰদত্তো মনুস্সো অহোসি অচেলকো কারম্ভিযো নাম, তদা বোধিসত্তো পণ্ডরকো নাম নাগরাজা অহোসি, তত্থপি তাৰ দেৰদত্তো যেৰ অধিকতরো জাতিযা.

‘‘পুন চপরং যদা দেৰদত্তো মনুস্সো অহোসি পৰনে জটিলকো, তদা বোধিসত্তো তচ্ছকো নাম মহাসূকরো অহোসি, তত্থপি তাৰ দেৰদত্তো যেৰ জাতিযা অধিকতরো.

‘‘পুন চপরং যদা দেৰদত্তো চেতীসু সূরপরিচরো নাম রাজা অহোসি উপরি পুরিসমত্তে গগনে ৰেহাসঙ্গমো, তদা বোধিসত্তো কপিলো নাম ব্রাহ্মণো অহোসি, তত্থপি তাৰ দেৰদত্তো যেৰ অধিকতরো জাতিযা চ যসেন চ.

‘‘পুন চপরং যদা দেৰদত্তো মনুস্সো অহোসি সামো নাম, তদা বোধিসত্তো রুরু নাম মিগরাজা অহোসি, তত্থপি তাৰ দেৰদত্তো যেৰ জাতিযা অধিকতরো.

‘‘পুন চপরং যদা দেৰদত্তো মনুস্সো অহোসি লুদ্দকো পৰনচরো, তদা বোধিসত্তো হত্থিনাগো অহোসি, সো লুদ্দকো তস্স হত্থিনাগস্স সত্তক্খত্তুং দন্তে ছিন্দিত্ৰা হরি, তত্থপি তাৰ দেৰদত্তো যেৰ যোনিযা অধিকতরো.

‘‘পুন চপরং যদা দেৰদত্তো সিঙ্গালো অহোসি খত্তিযধম্মো, সো যাৰতা জম্বুদীপে পদেসরাজানো তে সব্বে অনুযুত্তে অকাসি, তদা বোধিসত্তো ৰিধুরো নাম পণ্ডিতো অহোসি, তত্থপি তাৰ দেৰদত্তো যেৰ যসেন অধিকতরো.

‘‘পুন চপরং যদা দেৰদত্তো হত্থিনাগো হুত্ৰা লটুকিকায সকুণিকায পুত্তকে ঘাতেসি, তদা বোধিসত্তোপি হত্থিনাগো অহোসি যূথপতি, তত্থ তাৰ উভোপি তে সমসমা অহেসুং.

‘‘পুন চপরং যদা দেৰদত্তো যক্খো অহোসি অধম্মো নাম, তদা বোধিসত্তোপি যক্খো অহোসি ধম্মো নাম, তত্থপি তাৰ উভোপি সমসমা অহেসুং.

‘‘পুন চপরং যদা দেৰদত্তো নাৰিকো অহোসি পঞ্চন্নং কুলসতানং ইস্সরো, তদা বোধিসত্তোপি নাৰিকো অহোসি পঞ্চন্নং কুলসতানং ইস্সরো, তত্থপি তাৰ উভোপি সমসমা অহেসুং.

‘‘পুন চপরং যদা দেৰদত্তো সত্থৰাহো অহোসি পঞ্চন্নং সকটসতানং ইস্সরো, তদা বোধিসত্তোপি সত্থৰাহো অহোসি পঞ্চন্নং সকটসতানং ইস্সরো, তত্থপি তাৰ উভোপি সমসমা অহেসুং.

‘‘পুন চপরং যদা দেৰদত্তো সাখো নাম মিগরাজা অহোসি, তদা বোধিসত্তোপি নিগ্রোধো নাম মিগরাজা অহোসি, তত্থপি তাৰ উভোপি সমসমা অহেসুং.

‘‘পুন চপরং যদা দেৰদত্তো সাখো নাম সেনাপতি অহোসি, তদা বোধিসত্তোপি নিগ্রোধো নাম রাজা অহোসি, তত্থপি তাৰ উভোপি সমসমা অহেসুং.

‘‘পুন চপরং যদা দেৰদত্তো খণ্ডহালো নাম ব্রাহ্মণো অহোসি, তদা বোধিসত্তো চন্দো নাম রাজকুমারো অহোসি, তদা সো খণ্ডহালো যেৰ অধিকতরো.

‘‘পুন চপরং যদা দেৰদত্তো ব্রহ্মদত্তো নাম রাজা অহোসি, তদা বোধিসত্তো তস্স পুত্তো মহাপদুমো নাম কুমারো অহোসি, তদা সো রাজা সকপুত্তং চোরপপাতে খিপাপেসি, যতো কুতোচি পিতাৰ পুত্তানং অধিকতরো হোতি ৰিসিট্ঠোতি, তত্থপি তাৰ দেৰদত্তো যেৰ অধিকতরো.

‘‘পুন চপরং যদা দেৰদত্তো মহাপতাপো নাম রাজা অহোসি, তদা বোধিসত্তো তস্স পুত্তো ধম্মপালো নাম কুমারো অহোসি, তদা সো রাজা সকপুত্তস্স হত্থপাদে সীসঞ্চ ছেদাপেসি, তত্থপি তাৰ দেৰদত্তো যেৰ উত্তরো অধিকতরো.

অজ্জেতরহি উভোপি সক্যকুলে জাযিংসু. বোধিসত্তো বুদ্ধো অহোসি সব্বঞ্ঞূ লোকনাযকো, দেৰদত্তো তস্স দেৰাতিদেৰস্স সাসনে পব্বজিত্ৰা ইদ্ধিং নিব্বত্তেত্ৰা বুদ্ধালযং অকাসি. কিং নু খো, ভন্তে নাগসেন, যং মযা ভণিতং, তং সব্বং তথং উদাহু ৰিতথ’’ন্তি?

‘‘যং ত্ৰং, মহারাজ, বহুৰিধং কারণং ওসারেসি, সব্বং তং তথেৰ, নো অঞ্ঞথা’’তি. ‘‘যদি, ভন্তে নাগসেন, কণ্হোপি সুক্কোপি সমসমগতিকা হোন্তি, তেন হি কুসলম্পি অকুসলম্পি সমসমৰিপাকং হোতী’’তি? ‘‘ন হি, মহারাজ, কুসলম্পি অকুসলম্পি সমসমৰিপাকং হোতি, ন হি, মহারাজ, দেৰদত্তো সব্বজনেহি পটিৰিরুদ্ধো, বোধিসত্তেনেৰ পটিৰিরুদ্ধো. যো তস্স বোধিসত্তেন পটিৰিরুদ্ধো, সো তস্মিং তস্মিং যেৰ ভৰে পচ্চতি ফলং দেতি. দেৰদত্তোপি, মহারাজ, ইস্সরিযে ঠিতো জনপদেসু আরক্খং দেতি, সেতুং সভং পুঞ্ঞসালং কারেতি, সমণব্রাহ্মণানং কপণদ্ধিকৰণিব্বকানং নাথানাথানং যথাপণিহিতং দানং দেতি. তস্স সো ৰিপাকেন ভৰে ভৰে সম্পত্তিযো পটিলভতি. কস্সেতং, মহারাজ, সক্কা ৰত্তুং ৰিনা দানেন দমেন সংযমেন উপোসথকম্মেন সম্পত্তিং অনুভৰিস্সতীতি?

‘‘যং পন ত্ৰং, মহারাজ, এৰং ৰদেসি ‘দেৰদত্তো চ বোধিসত্তো চ একতো অনুপরিৰত্তন্তী’তি, সো ন জাতিসতস্স অচ্চযেন সমাগমো অহোসি, ন জাতিসহস্সস্স অচ্চযেন, ন জাতিসতসহস্সস্স অচ্চযেন, কদাচি করহচি বহূনং অহোরত্তানং অচ্চযেন সমাগমো অহোসি. যং পনেতং, মহারাজ, ভগৰতা কাণকচ্ছপোপমং উপদস্সিতং মনুস্সত্তপ্পটিলাভায, তথূপমং, মহারাজ, ইমেসং সমাগমং ধারেহি.

‘‘ন, মহারাজ, বোধিসত্তস্স দেৰদত্তেনেৰ সদ্ধিং সমাগমো অহোসি, থেরোপি, মহারাজ, সারিপুত্তো অনেকেসু জাতিসতসহস্সেসু বোধিসত্তস্স পিতা অহোসি, মহাপিতা অহোসি, চূল়পিতা অহোসি, ভাতা অহোসি, পুত্তো অহোসি, ভাগিনেয্যো অহোসি, মিত্তো অহোসি.

‘‘বোধিসত্তোপি, মহারাজ, অনেকেসু জাতিসতসহস্সেসু থেরস্স সারিপুত্তস্স পিতা অহোসি, মহাপিতা অহোসি, চূল়পিতা অহোসি, ভাতা অহোসি, পুত্তো অহোসি, ভাগিনেয্যো অহোসি, মিত্তো অহোসি, সব্বেপি, মহারাজ, সত্তনিকাযপরিযাপন্না সংসারসোতমনুগতা সংসারসোতেন ৰুয্হন্তা অপ্পিযেহিপি পিযেহিপি সমাগচ্ছন্তি. যথা, মহারাজ, উদকং সোতেন ৰুয্হমানং সুচিঅসুচিকল্যাণপাপকেন সমাগচ্ছতি, এৰমেৰ খো, মহারাজ, সব্বেপি সত্তনিকাযপরিযাপন্না সংসারসোতমনুগতা সংসারসোতেন ৰুয্হন্তা অপ্পিযেহিপি পিযেহিপি সমাগচ্ছন্তি. দেৰদত্তো, মহারাজ, যক্খো সমানো অত্তনা অধম্মো পরে অধম্মে নিযোজেত্ৰা সত্তপঞ্ঞাসৰস্সকোটিযো সট্ঠি চ ৰস্সসতসহস্সানি মহানিরযে পচ্চি, বোধিসত্তোপি, মহারাজ, যক্খো সমানো অত্তনা ধম্মো পরে ধম্মে নিযোজেত্ৰা সত্তপঞ্ঞাসৰস্সকোটিযো সট্ঠি চ ৰস্সসতসহস্সানি সগ্গে মোদি সব্বকামসমঙ্গী, অপি চ, মহারাজ, দেৰদত্তো ইমস্মিং ভৰে বুদ্ধং অনাসাদনীযমাসাদযিত্ৰা সমগ্গঞ্চ সঙ্ঘং ভিন্দিত্ৰা পথৰিং পাৰিসি, তথাগতো বুজ্ঝিত্ৰা সব্বধম্মে পরিনিব্বুতো উপধিসঙ্খযে’’তি. ‘‘সাধু, ভন্তে নাগসেন, এৰমেতং তথা সম্পটিচ্ছামী’’তি.

কুসলাকুসলসমৰিসমপঞ্হো সত্তমো.