৩. মুসাৰাদগরুলহুভাৰপঞ্হো

৩. ‘‘ভন্তে নাগসেন, ভাসিতম্পেতং ভগৰতা ‘সম্পজানমুসাৰাদে পারাজিকো হোতী’তি. পুন চ ভণিতং ‘সম্পজানমুসাৰাদে লহুকং আপত্তিং আপজ্জতি একস্স সন্তিকে দেসনাৰত্থুক’ন্তি. ভন্তে নাগসেন, কো পনেত্থ ৰিসেসো, কিং কারণং, যঞ্চেকেন মুসাৰাদেন উচ্ছিজ্জতি, যঞ্চেকেন মুসাৰাদেন সতেকিচ্ছো হোতি? যদি, ভন্তে নাগসেন, ভগৰতা ভণিতং ‘সম্পজানমুসাৰাদে পারাজিকো হোতী’তি, তেন হি ‘সম্পজানমুসাৰাদে লহুকং আপত্তিং আপজ্জতি একস্স সন্তিকে দেসনাৰত্থুক’ন্তি যং ৰচনং, তং মিচ্ছা. যদি তথাগতেন ভণিতং ‘সম্পজানমুসাৰাদে লহুকং আপত্তিং আপজ্জতি একস্স সন্তিকে দেসনাৰত্থুক’ন্তি, তেন হি ‘সম্পজানমুসাৰাদে পারাজিকো হোতী’তি তম্পি ৰচনং মিচ্ছা. অযম্পি উভতো কোটিকো পঞ্হো তৰানুপ্পত্তো, সো তযা নিব্বাহিতব্বো’’তি.

‘‘ভাসিতম্পেতং, মহারাজ, ভগৰতা ‘সম্পজানমুসাৰাদে পারাজিকো হোতী’তি. ভণিতঞ্চ ‘সম্পজানমুসাৰাদে লহুকং আপত্তিং আপজ্জতি একস্স সন্তিকে দেসনাৰত্থুক’ন্তি, তঞ্চ পন ৰত্থুৰসেন গরুকলহুকং হোতি. তং কিং মঞ্ঞসি, মহারাজ, ইধ কোচি পুরিসো পরস্স পাণিনা পহারং দদেয্য, তস্স তুম্হে কিং দণ্ডং ধারেথা’’তি? ‘‘যদি সো, ভন্তে, আহ ‘নক্খমামী’তি, তস্স মযং অক্খমমানে কহাপণং হরাপেমা’’তি ‘‘ইধ পন, মহারাজ, সো যেৰ পুরিসো তৰ পাণিনা পহারং দদেয্য, তস্স পন কো দণ্ডো’’তি? ‘‘হত্থম্পিস্স, ভন্তে, ছেদাপেয্যাম, পাদম্পি ছেদাপেয্যাম, যাৰ সীসং কল়ীরচ্ছেজ্জং ছেদাপেয্যাম, সব্বম্পি তং গেহং ৰিলুম্পাপেয্যাম, উভতোপক্খে [উভতোপস্সে (সী. পী. ক.)] যাৰ সত্তমং কুলং সমুগ্ঘাতাপেয্যামা’’তি. ‘‘কো পনেত্থ, মহারাজ, ৰিসেসো, কিং কারণং, যং একস্স পাণিপ্পহারে সুখুমো কহাপণো দণ্ডো, যং তৰ পাণিপ্পহারে হত্থচ্ছেজ্জং পাদচ্ছেজ্জং যাৰ কল়ীরচ্ছেজ্জং সব্বগেহাদানং উভতোপক্খে যাৰ সত্তমকুলা সমুগ্ঘাতো’’তি? ‘‘মনুস্সন্তরেন, ভন্তে’’তি. ‘‘এৰমেৰ খো, মহারাজ, সম্পজানমুসাৰাদো ৰত্থুৰসেন গরুকলহুকো হোতী’’তি. ‘‘সাধু, ভন্তে নাগসেন, এৰমেতং তথা সম্পটিচ্ছামী’’তি.

মুসাৰাদগরুলহুভাৰপঞ্হো ততিযো.