৪. বোধিসত্তধম্মতাপঞ্হো

৪. ‘‘ভন্তে নাগসেন, ভাসিতম্পেতং ভগৰতা ধম্মতাধম্মপরিযাযে ‘পুব্বেৰ বোধিসত্তানং মাতাপিতরো নিযতা হোন্তি, বোধি নিযতা হোতি, অগ্গসাৰকা নিযতা হোন্তি, পুত্তো নিযতো হোতি, উপট্ঠাকো নিযতো হোতী’তি. পুন চ তুম্হে ভণথ ‘তুসিতে কাযে ঠিতো বোধিসত্তো অট্ঠ মহাৰিলোকনানি ৰিলোকেতি, কালং ৰিলোকেতি, দীপং ৰিলোকেতি, দেসং ৰিলোকেতি, কুলং ৰিলোকেতি, জনেত্তিং ৰিলোকেতি, আযুং ৰিলোকেতি, মাসং ৰিলোকেতি, নেক্খম্মং ৰিলোকেতী’তি. ভন্তে নাগসেন, অপরিপক্কে ঞাণে বুজ্ঝনং নত্থি, পরিপক্কে ঞাণে ন সক্কা নিমেসন্তরম্পি আগমেতুং, অনতিক্কমনীযং পরিপক্কমানসং. কস্মা বোধিসত্তো কালং ৰিলোকেহি ‘কম্হি কালে উপ্পজ্জামী’তি. অপরিপক্কে ঞাণে বুজ্ঝনং নত্থি, পরিপক্কে ঞাণে ন সক্কা নিমেসন্তরম্পি আগমেতুং, কস্মা বোধিসত্তো কুলং ৰিলোকেতি ‘কুম্হি কুলে উপ্পজ্জামী’তি. যদি, ভন্তে নাগসেন, পুব্বেৰ বোধিসত্তস্স মাতাপিতরো নিযতা, তেন হি ‘কুলং ৰিলোকেতী’তি যং ৰচনং, তং মিচ্ছা. যদি কুলং ৰিলোকেতি, তেন হি ‘পুব্বেৰ বোধিসত্তস্স মাতাপিতরো নিযতা’তি তম্পি ৰচনং মিচ্ছা. অযম্পি উভতো কোটিকো পঞ্হো তৰানুপ্পত্তো, সো তযা নিব্বাহিতব্বো’’তি.

‘‘নিযতা, মহারাজ, পুব্বেৰ বোধিসত্তস্স মাতাপিতরো, কুলঞ্চ বোধিসত্তো ৰিলোকেতি. কিন্তি পন কুলং ৰিলোকেতি ‘যে মে মাতাপিতরো, তে খত্তিযা উদাহু ব্রাহ্মণা’তি. এৰং কুলং ৰিলোকেতি.

‘‘অট্ঠন্নং, মহারাজ, পুব্বেৰ অনাগতং ওলোকেতব্বং হোতি. কতমেসং অট্ঠন্নং? ৰাণিজস্স, মহারাজ, পুব্বেৰ ৰিক্কযভণ্ডং ওলোকেতব্বং হোতি, হত্থিনাগস্স পুব্বেৰ সোণ্ডায অনাগতো মগ্গো ওলোকেতব্বো হোতি, সাকটিকস্স পুব্বেৰ অনাগতং তিত্থং ওলোকেতব্বং হোতি, নিযামকস্স পুব্বেৰ অনাগতং তীরং ওলোকেত্ৰা নাৰা পেসেতব্বা হোতি, ভিসক্কস্স পুব্বেৰ আযুং ওলোকেত্ৰা আতুরো উপসঙ্কমিতব্বো হোতি, উত্তরসেতুস্স পুব্বেৰ থিরাথিরভাৰং জানিত্ৰা অভিরুহিতব্বং হোতি, ভিক্খুস্স পুব্বেৰ অনাগতং কালং পচ্চৰেক্খিত্ৰা ভোজনং ভুঞ্জিতব্বং হোতি, বোধিসত্তানং পুব্বেৰ কুলং ওলোকেতব্বং হোতি ‘খত্তিযকুলং ৰা ব্রাহ্মণকুলং ৰা’তি. ইমেসং খো, মহারাজ, অট্ঠন্নং পুব্বেৰ অনাগতং ওলোকেতব্বং হোতী’’তি. ‘‘সাধু, ভন্তে নাগসেন, এৰমেতং তথা সম্পটিচ্ছামী’’তি.

বোধিসত্তধম্মতাপঞ্হো চতুত্থো.