২. ধম্মৰিনযপটিচ্ছন্নাপটিচ্ছন্নপঞ্হো

২. ‘‘ভন্তে নাগসেন, ভাসিতম্পেতং ভগৰতা ‘তথাগতপ্পৰেদিতো, ভিক্খৰে, ধম্মৰিনযো ৰিৰটো ৰিরোচতি নো পটিচ্ছন্নো’তি. পুন চ পাতিমোক্খুদ্দেসো কেৰলঞ্চ ৰিনযপিটকং পিহিতং পটিচ্ছন্নং. যদি, ভন্তে নাগসেন, জিনসাসনে যুত্তং ৰা পত্তং ৰা সমযং লভেথ, ৰিনযপণ্ণত্তি ৰিৰটা সোভেয্য. কেন কারণেন? কেৰলং তত্থ সিক্খা সংযমো নিযমো সীলগুণআচারপণ্ণত্তি অত্থরসো ধম্মরসো ৰিমুত্তিরসো. যদি, ভন্তে নাগসেন, ভগৰতা ভণিতং ‘তথাগতপ্পৰেদিতো, ভিক্খৰে, ধম্মৰিনযো ৰিৰটো ৰিরোচতি নো পটিচ্ছন্নো’তি, তেন হি ‘পাতিমোক্খুদ্দেসো কেৰলঞ্চ ৰিনযপিটকং পিহিতং পটিচ্ছন্ন’ন্তি যং ৰচনং, তং মিচ্ছা. যদি পাতিমোক্খুদ্দেসো কেৰলঞ্চ ৰিনযপিটকং পিহিতং পটিচ্ছন্নং, তেন হি ‘তথাগতপ্পৰেদিতো, ভিক্খৰে, ধম্মৰিনযো ৰিৰটো ৰিরোচতি নো পটিচ্ছন্নো’তি তম্পি ৰচনং মিচ্ছা. অযম্পি উভতো কোটিকো পঞ্হো তৰানুপ্পত্তো, সো তযা নিব্বাহিতব্বো’’তি.

‘‘ভাসিতম্পেতং, মহারাজ, ভগৰতা ‘তথাগতপ্পৰেদিতো, ভিক্খৰে, ধম্মৰিনযো ৰিৰটো ৰিরোচতি নো পটিচ্ছন্নো’তি. পুন চ পাতিমোক্খুদ্দেসো কেৰলঞ্চ ৰিনযপিটকং পিহিতং পটিচ্ছন্নং, তঞ্চ পন ন সব্বেসং, সীমং কত্ৰা পিহিতং.

‘‘তিৰিধেন, মহারাজ, ভগৰতা পাতিমোক্খুদ্দেসো সীমং কত্ৰা পিহিতো, পুব্বকানং তথাগতানং ৰংসৰসেন পাতিমোক্খুদ্দেসো সীমং কত্ৰা পিহিতো, ধম্মস্স গরুকত্তা পিহিতো, ভিক্খুভূমিযা গরুকত্তা পিহিতো.

‘‘কথং পুব্বকানং তথাগতানং ৰংসৰসেন পাতিমোক্খুদ্দেসো সীমং কত্ৰা পিহিতো, এসো ৰংসো, মহারাজ, সব্বেসং পুব্বকানং তথাগতানং যদিদং ভিক্খুমজ্ঝে পাতিমোক্খুদ্দেসো অৰসেসানং পিহিতো. যথা, মহারাজ, খত্তিযানং খত্তিযমাযা খত্তিযেসু যেৰ চরতি, এৰমেতং খত্তিযানং লোকস্স পৰেণী অৰসেসানং পিহিতা. এৰমেৰ খো, মহারাজ, এসো ৰংসো সব্বেসং পুব্বকানং তথাগতানং যদিদং ভিক্খুমজ্ঝে পাতিমোক্খুদ্দেসো অৰসেসানং পিহিতো.

‘‘যথা ৰা পন, মহারাজ, মহিযা গণা ৰত্তন্তি, সেয্যথিদং, মল্লা অতোণা পব্বতা ধম্মগিরিযা ব্রহ্মগিরিযা নটকা নচ্চকা লঙ্ঘকা পিসাচা মণিভদ্দা পুণ্ণবদ্ধা চন্দিমসূরিযা সিরিদেৰতা কালিদেৰতা, সিৰা ৰসুদেৰা ঘনিকা অসিপাসা ভদ্দিপুত্তাতি, তেসং তেসং রহস্সং তেসু তেসু গণেসু যেৰ চরতি, অৰসেসানং পিহিতং. এৰমেৰ খো, মহারাজ, এসো ৰংসো সব্বেসং পুব্বকানং তথাগতানং যদিদং ভিক্খুমজ্ঝে পাতিমোক্খুদ্দেসো অৰসেসানং পিহিতো. এৰং পুব্বকানং তথাগতানং ৰংসৰসেন পাতিমোক্খুদ্দেসো সীমং কত্ৰা পিহিতো.

‘‘কথং ধম্মস্স গরুকত্তা পাতিমোক্খুদ্দেসো সীমং কত্ৰা পিহিতো? ধম্মো, মহারাজ, গরুকো ভারিযো, তত্থ সম্মত্তকারী অঞ্ঞং আরাধেতি, তং তত্থ পরম্পরাসম্মত্তকারিতায পাপুণাতি, ন তং তত্থ পরম্পরাসম্মত্তকারিতায পাপুণাতি, মা চাযং সারধম্মো ৰরধম্মো অসম্মত্তকারীনং হত্থগতো ওঞ্ঞাতো অৰঞ্ঞাতো হীল়িতো খীল়িতো গরহিতো ভৰতু, মা চাযং সারধম্মো ৰরধম্মো দুজ্জনগতো ওঞ্ঞাতো অৰঞ্ঞাতো হীল়িতো খীল়িতো গরহিতো ভৰতূতি. এৰং ধম্মস্স গরুকত্তা পাতিমোক্খুদ্দেসো সীমং কত্ৰা পিহিতো.

‘‘যথা, মহারাজ, সারৰরপৰরঅভিজাতজাতিমন্তরত্তলোহিতচন্দনং নাম সৰরপুরমনুগতং ওঞ্ঞাতং অৰঞ্ঞাতং হীল়িতং খীল়িতং গরহিতং ভৰতি, এৰমেৰ খো, মহারাজ, মা চাযং সারধম্মো ৰরধম্মো পরম্পরাঅসম্মত্তকারীনং হত্থগতো ওঞ্ঞাতো অৰঞ্ঞাতো হীল়িতো খীল়িতো গরহিতো ভৰতু, মা চাযং সারধম্মো ৰরধম্মো দুজ্জনগতো ওঞ্ঞাতো অৰঞ্ঞাতো হীল়িতো খীল়িতো গরহিতো ভৰতূতি. এৰং ধম্মস্স গরুকত্তা পাতিমোক্খুদ্দেসো সীমং কত্ৰা পিহিতো.

‘‘কথং ভিক্খুভূমিযা গরুকত্তা পাতিমোক্খুদ্দেসো সীমং কত্ৰা পিহিতো, ভিক্খুভাৰো খো, মহারাজ, লোকে অতুলিযো অপ্পমাণো অনগ্ঘিযো, ন সক্কা কেনচি অগ্ঘাপেতুং তুলেতুং পরিমেতুং, মাযং এৰরূপে ভিক্খুভাৰে ঠিতো লোকেন সমসমো ভৰতূতি ভিক্খূনং যেৰ অন্তরে পাতিমোক্খুদ্দেসো চরতি. যথা, মহারাজ, লোকে ৰরপৰরভণ্ডং ৰত্থং ৰা অত্থরণং ৰা গজতুরঙ্গরথসুৰণ্ণরজতমণিমুত্তাইত্থিরতনাদীনি ৰা ৰিজিতকম্মসূরা ৰা [নিজ্জিতকম্মসূরা ৰা (সী. পী.)] সব্বে তে রাজানমুপগচ্ছন্তি, এৰমেৰ খো, মহারাজ, যাৰতা লোকে [লোকে সিক্খা (সী. পী.)] সুগতাগমপরিযত্তিআচারসংযমসীলসংৰরগুণা, সব্বে তে ভিক্খুসঙ্ঘমুপগতা ভৰন্তি. এৰং ভিক্খুভূমিযা গরুকত্তা পাতিমোক্খুদ্দেসো সীমং কত্ৰা পিহিতো’’তি. ‘‘সাধু, ভন্তে নাগসেন, এৰমেতং তথা সম্পিটিচ্ছামী’’তি.

ধম্মৰিনযপটিচ্ছন্নাপটিচ্ছন্নপঞ্হো দুতিযো.