২. বুদ্ধগুণসতিপটিলাভপঞ্হো

২. রাজা আহ ‘‘ভন্তে নাগসেন, তুম্হে এতং ভণথ ‘যো ৰস্সসতং অকুসলং করেয্য, মরণকালে চ একং বুদ্ধগুণং সতিং পটিলভেয্য, সো দেৰেসু উপ্পজ্জেয্যা’তি এতং ন সদ্দহামি, এৰঞ্চ পন ৰদেথ ‘এতেন পাণাতিপাতেন নিরযে উপ্পজ্জেয্যা’তি এতম্পি ন সদ্দহামী’’তি.

‘‘তং কিং মঞ্ঞসি, মহারাজ, খুদ্দকোপি পাসাণো ৰিনা নাৰায উদকে উপ্পিলৰেয্যা’’তি. ‘‘ন হি, ভন্তে’’তি. ‘‘কিং নু খো, মহারাজ, ৰাহসতম্পি পাসাণানং নাৰায আরোপিতং উদকে উপ্পিলৰেয্যা’’তি? ‘‘আম, ভন্তে’’তি. ‘‘যথা, মহারাজ, নাৰা, এৰং কুসলানি কম্মানি দট্ঠব্বানী’’তি.

‘‘কল্লোসি, ভন্তে নাগসেনা’’তি.

বুদ্ধগুণসতিপটিলাভপঞ্হো দুতিযো.