৭. অরূপধম্মৰৰত্তনৰগ্গো

১. সতিউপ্পজ্জনপঞ্হো

১. রাজা আহ ‘‘ভন্তে নাগসেন, কতিহাকারেহি সতি উপ্পজ্জতী’’তি? ‘‘সত্তরসহাকারেহি, মহারাজ, সতি উপ্পজ্জতী’’তি. ‘‘কতমেহি সত্তরসহাকারেহী’’তি? ‘‘অভিজানতোপি, মহারাজ, সতি উপ্পজ্জতি, কটুমিকাযপি সতি উপ্পজ্জতি, ওল়ারিকৰিঞ্ঞাণতোপি সতি উপ্পজ্জতি, হিতৰিঞ্ঞাণতোপি সতি উপ্পজ্জতি, অহিতৰিঞ্ঞাণতোপি সতি উপ্পজ্জতি, সভাগনিমিত্ততোপি সতি উপ্পজ্জতি, ৰিসভাগনিমিত্ততোপি সতি উপ্পজ্জতি, কথাভিঞ্ঞাণতোপি সতি উপ্পজ্জতি, লক্খণতোপি সতি উপ্পজ্জতি, সারণতোপি সতি উপ্পজ্জতি, মুদ্দাতোপি সতি উপ্পজ্জতি, গণনাতোপি সতি উপ্পজ্জতি, ধারণতোপি সতি উপ্পজ্জতি, ভাৰনতোপি সতি উপ্পজ্জতি, পোত্থকনিবন্ধনতোপি সতি উপ্পজ্জতি, উপনিক্খেপতোপি সতি উপ্পজ্জতি, অনুভূততোপি সতি উপ্পজ্জতীতি.

‘‘কথং অভিজানতো সতি উপ্পজ্জতি? যথা, মহারাজ, আযস্মা চ আনন্দো খুজ্জুত্তরা চ উপাসিকা, যে ৰা পন অঞ্ঞেপি কেচি জাতিস্সরা জাতিং সরন্তি, এৰং অভিজানতো সতি উপ্পজ্জতি.

‘‘কথং কটুমিকায সতি উপ্পজ্জতি? যো পকতিযা মুট্ঠস্সতিকো, পরে চ তং সরাপনত্থং নিবন্ধন্তি, এৰং কটুমিকায সতি উপ্পজ্জতি.

‘‘কথং ওল়ারিকৰিঞ্ঞাণতো সতি উপ্পজ্জতি? যদা রজ্জে ৰা অভিসিত্তো হোতি, সোতাপত্তিফলং ৰা পত্তো হোতি, এৰং ওল়ারিকৰিঞ্ঞাণতো সতি উপ্পজ্জতি.

‘‘কথং হিতৰিঞ্ঞাণতো সতি উপ্পজ্জতি? যম্হি সুখাপিতো, ‘অমুকস্মিং এৰং সুখাপিতো’তি সরতি, এৰং হিতৰিঞ্ঞাণতো সতি উপ্পজ্জতি.

‘‘কথং অহিতৰিঞ্ঞাণতো সতি উপ্পজ্জতি? যম্হি দুক্খাপিতো, ‘অমুকস্মিং এৰং দুক্খাপিতো’তি সরতি, এৰং অহিতৰিঞ্ঞাণতো সতি উপ্পজ্জতি.

‘‘কথং সভাগনিমিত্ততো সতি উপ্পজ্জতি? সদিসং পুগ্গলং দিস্ৰা মাতরং ৰা পিতরং ৰা ভাতরং ৰা ভগিনিং ৰা সরতি, ওট্ঠং ৰা গোণং ৰা গদ্রভং ৰা দিস্ৰা অঞ্ঞং তাদিসং ওট্ঠং ৰা গোণং ৰা গদ্রভং ৰা সরতি, এৰং সভাগনিমিত্ততো সতি উপ্পজ্জতি.

‘‘কথং ৰিসভাগনিমত্ততো সতি উপ্পজ্জতি? অসুকস্স নাম ৰণ্ণো এদিসো, সদ্দো এদিসো, গন্ধো এদিসো, রসো এদিসো, ফোট্ঠব্বো এদিসোতি সরতি, এৰম্পি ৰিসভাগনিমিত্ততোপি সতি উপ্পজ্জতি.

‘‘কথং কথাভিঞ্ঞাণতো সতি উপ্পজ্জতি? যো পকতিযা মুট্ঠস্সতিকো হোতি, তং পরে সরাপেন্তি, তেন সো সরতি, এৰং কথাভিঞ্ঞাণতো সতি উপ্পজ্জতি.

‘‘কথং লক্খণতো সতি উপ্পজ্জতি? যো পকতিযা বলীবদ্দানং অঙ্গেন জানাতি, লক্খণেন জানাতি, এৰং লক্খণতো সতি উপ্পজ্জতি.

‘‘কথং সারণতো সতি উপ্পজ্জতি? যো পকতিযা মুট্ঠস্সতিকো হোতি, যো তং ‘সরাহি ভো, সরাহি ভো’তি পুনপ্পুনং সরাপেতি, এৰং সারণতো সতি উপ্পজ্জতি.

‘‘কথং মুদ্দাতো সতি উপ্পজ্জতি? লিপিযা সিক্খিতত্তা জানাতি ‘ইমস্স অক্খরস্স অনন্তরং ইমং অক্খরং কাতব্ব’ন্তি এৰং মুদ্দাতো সতি উপ্পজ্জতি.

‘‘কথং গণনাতো সতি উপ্পজ্জতি? গণনায সিক্খিতত্তা গণকা বহুম্পি গণেন্তি, এৰং গণনাতো সতি উপ্পজ্জতি.

‘‘কথং ধারণতো সতি উপ্পজ্জতি? ধারণায সিক্খিতত্তা ধারণকা বহুম্পি ধারেন্তি, এৰং ধারণতো সতি উপ্পজ্জতি.

‘‘কথং ভাৰনাতো সতি উপ্পজ্জতি? ইধ ভিক্খু অনেকৰিহিতং পুব্বেনিৰাসং অনুস্সরতি, সেয্যথীদং, একম্পি জাতিং দ্ৰেপি জাতিযো…পে… ইতি সাকারং সউদ্দেসং পুব্বেনিৰাসং অনুস্সরতি, এৰং ভাৰনাতো সতি উপ্পজ্জতি.

‘‘কথং পোত্থকনিবন্ধনতো সতি উপ্পজ্জতি? রাজানো অনুসাসনিযং অস্সরন্তা [অনুস্সরন্তা (সব্বত্থ)] এতং পোত্থকং আহরথাতি, তেন পোত্থকেন অনুস্সরন্তি, এৰং পোত্থকনিবন্ধনতো সতি উপ্পজ্জতি.

‘‘কথং উপনিক্খেপতো সতি উপ্পজ্জতি? উপনিক্খিত্তং ভণ্ডং দিস্ৰা সরতি, এৰং উপনিক্খেপতো সতি উপ্পজ্জতি.

‘‘কথং অনুভূততো সতি উপ্পজ্জতি? দিট্ঠত্তা রূপং সরতি, সুতত্তা সদ্দং সরতি, ঘাযিতত্তা গন্ধং সরতি, সাযিতত্তা রসং সরতি, ফুট্ঠত্তা ফোট্ঠব্বং সরতি, ৰিঞ্ঞাতত্তা ধম্মং সরতি, এৰং অনুভূততো সতি উপ্পজ্জতি. ইমেহি খো, মহারাজ, সত্তরসহাকারেহি সতি উপ্পজ্জতী’’তি.

‘‘কল্লোসি, ভন্তে নাগসেনা’’তি.

সতিউপ্পজ্জনপঞ্হো পঠমো.

২. বুদ্ধগুণসতিপটিলাভপঞ্হো

২. রাজা আহ ‘‘ভন্তে নাগসেন, তুম্হে এতং ভণথ ‘যো ৰস্সসতং অকুসলং করেয্য, মরণকালে চ একং বুদ্ধগুণং সতিং পটিলভেয্য, সো দেৰেসু উপ্পজ্জেয্যা’তি এতং ন সদ্দহামি, এৰঞ্চ পন ৰদেথ ‘এতেন পাণাতিপাতেন নিরযে উপ্পজ্জেয্যা’তি এতম্পি ন সদ্দহামী’’তি.

‘‘তং কিং মঞ্ঞসি, মহারাজ, খুদ্দকোপি পাসাণো ৰিনা নাৰায উদকে উপ্পিলৰেয্যা’’তি. ‘‘ন হি, ভন্তে’’তি. ‘‘কিং নু খো, মহারাজ, ৰাহসতম্পি পাসাণানং নাৰায আরোপিতং উদকে উপ্পিলৰেয্যা’’তি? ‘‘আম, ভন্তে’’তি. ‘‘যথা, মহারাজ, নাৰা, এৰং কুসলানি কম্মানি দট্ঠব্বানী’’তি.

‘‘কল্লোসি, ভন্তে নাগসেনা’’তি.

বুদ্ধগুণসতিপটিলাভপঞ্হো দুতিযো.

৩. দুক্খপ্পহানৰাযমপঞ্হো

৩. রাজা আহ ‘‘ভন্তে নাগসেন, কিং তুম্হে অতীতস্স দুক্খস্স পহানায ৰাযমথা’’তি? ‘‘ন হি, মহারাজা’’তি. ‘‘কিং পন, ভন্তে, অনাগতস্স দুক্খস্স পহানায ৰাযমথা’’তি? ‘‘ন হি, মহারাজা’’তি. ‘‘কিং পন পচ্চুপ্পন্নস্স দুক্খস্স পহানায ৰাযমথা’’তি? ‘‘ন হি, মহারাজা’’তি. ‘‘যদি তুম্হে ন অতীতস্স দুক্খস্স পহানায ৰাযমথ, ন অনাগতস্স দুক্খস্স পহানায ৰাযমথ, ন পচ্চুপ্পন্নস্স দুক্খস্স পহানায ৰাযমথ, অথ কিমত্থায ৰাযমথা’’তি. থেরো আহ ‘কিন্তি, মহারাজ, ইদঞ্চ দুক্খং নিরুজ্ঝেয্য, অঞ্ঞঞ্চ দুক্খং নুপ্পজ্জেয্যা’তি এতদত্থায ৰাযমামা’’তি.

‘‘অত্থি পন তে, ভন্তে নাগসেন, অনাগতং দুক্খ’’ন্তি? ‘‘নত্থি [কথা. ৮২৮, ৮২৯ পস্সিতব্বং], মহারাজা’’তি ‘‘তুম্হে খো, ভন্তে নাগসেন, অতিপণ্ডিতা, যে তুম্হে অসন্তানং অনাগতানং দুক্খানং পহানায ৰাযমথা’’তি? ‘‘অত্থি পন তে, মহারাজ, কেচি পটিরাজানো পচ্চত্থিকা পচ্চামিত্তা পচ্চুপট্ঠিতা হোন্তী’’তি? ‘‘আম, ভন্তে, অত্থী’’তি. ‘‘কিংনু খো, মহারাজ, তদা তুম্হে পরিখং খণাপেয্যাথ, পাকারং চিনাপেয্যাথ গোপুরং কারাপেয্যাথ, অট্টালকং কারাপেয্যাথ, ধঞ্ঞং অতিহরাপেয্যাথা’’তি? ‘‘ন হি, ভন্তে, পটিকচ্চেৰ তং পটিযত্তং হোতী’’তি. ‘‘কিং তুম্হে, মহারাজ, তদা হত্থিস্মিং সিক্খেয্যাথ, অস্সস্মিং সিক্খেয্যাথ, রথস্মিং সিক্খেয্যাথ, ধনুস্মিং সিক্খেয্যাথ, থরুস্মিং সিক্খেয্যাথা’’তি? ‘‘ন হি, ভন্তে, পটিকচ্চেৰ তং সিক্খিতং হোতী’’তি. ‘‘কিস্সত্থাযা’’তি? ‘‘অনাগতানং, ভন্তে, ভযানং পটিবাহনত্থাযা’’তি. ‘‘কিং নু খো, মহারাজ, অত্থি অনাগতং ভয’’ন্তি? ‘‘নত্থি, ভন্তে’’তি. ‘‘তুম্হে চ খো, মহারাজ, অতিপণ্ডিতা, যে তুম্হে অসন্তানং অনাগতানং ভযানং পটিবাহনত্থায পটিযাদেথা’’তি.

‘‘ভিয্যো ওপম্মং করোহীতি. ‘‘তং কিং মঞ্ঞসি, মহারাজ, যদা ত্ৰং পিপাসিতো ভৰেয্যাসি, তদা ত্ৰং উদপানং খণাপেয্যাসি, পোক্খরণিং খণাপেয্যাসি, তল়াকং খণাপেয্যাসি ‘পানীযং পিৰিস্সামী’’’তি? ‘‘ন হি, ভন্তে, পটিকচ্চেৰ তং পটিযত্তং হোতী’’তি. ‘‘কিস্সত্থাযা’’তি? ‘‘অনাগতানং, ভন্তে, পিপাসানং পটিবাহনত্থায পটিযত্তং হোতী’’তি. ‘‘অত্থি পন, মহারাজ, অনাগতা পিপাসা’’তি? ‘‘নত্থি, ভন্তে’’তি. ‘‘তুম্হে খো, মহারাজ, অতিপণ্ডিতা, যে তুম্হে অসন্তানং অনাগতানং পিপাসানং পটিবাহনত্থায তং পটিযাদেথা’’তি.

‘‘ভিয্যো ওপম্মং করোহী’’তি. ‘‘তং কিং মঞ্ঞসি, মহারাজ, যদা ত্ৰং বুভুক্খিতো ভৰেয্যাসি, তদা ত্ৰং খেত্তং কসাপেয্যাসি, সালিং ৰপাপেয্যাসি ‘ভত্তং ভুঞ্জিস্সামী’’’তি? ‘‘ন হি, ভন্তে, পটিকচ্চেৰ তং পটিযত্তং হোতী’’তি. ‘‘কিস্সত্থাযা’’তি. ‘‘অনাগতানং, ভন্তে, বুভুক্খানং পটিবাহনত্থাযা’’তি. ‘‘অত্থি পন, মহারাজ, অনাগতা বুভুক্খা’’তি? ‘‘নত্থি, ভন্তে’’তি. ‘‘তুম্হে খো, মহারাজ, অতিপণ্ডিতা, যে তুম্হে অসন্তানং অনাগতানং বুভুক্খানং পটিবাহনত্থায পটিযাদেথা’’তি.

‘‘কল্লোসি, ভন্তে নাগসেনা’’তি.

দুক্খপ্পহানৰাযমপঞ্হো ততিযো.

৪. ব্রহ্মলোকপঞ্হো

৪. রাজা আহ ‘‘ভন্তে নাগসেন, কীৰদূরো ইতো ব্রহ্মলোকো’’তি? ‘‘দূরো খো, মহারাজ, ইতো ব্রহ্মলোকো কূটাগারমত্তা সিলা তম্হা পতিতা অহোরত্তেন অট্ঠচত্তালীসযোজনসহস্সানি ভস্সমানা চতূহি মাসেহি পথৰিযং পতিট্ঠহেয্যা’’তি.

‘‘ভন্তে নাগসেন, তুম্হে এৰং ভণথ ‘সেয্যথাপি বলৰা পুরিসো সমিঞ্জিতং ৰা বাহং পসারেয্য, পসারিতং ৰা বাহং সমিঞ্জেয্য, এৰমেৰ ইদ্ধিমা ভিক্খু চেতোৰসিপ্পত্তো জম্বুদীপে অন্তরহিতো ব্রহ্মলোকে পাতুভৰেয্যা’তি এতং ৰচনং ন সদ্দহামি, এৰং অতিসীঘং তাৰ বহূনি যোজনসতানি গচ্ছিস্সতী’’তি.

থেরো আহ ‘‘কুহিং পন, মহারাজ, তৰ জাতভূমী’’তি? ‘‘অত্থি, ভন্তে, অলসন্দো নাম দীপো, তত্থাহং জাতো’’তি. ‘‘কীৰ দূরো, মহারাজ, ইতো অলসন্দো হোতী’’তি? ‘‘দ্ৰিমত্তানি, ভন্তে, যোজনসতানী’’তি. ‘‘অভিজানাসি নু ত্ৰং, মহারাজ, তত্থ কিঞ্চিদেৰ করণীযং করিত্ৰা সরিতা’’তি? ‘‘আম, ভন্তে, সরামী’’তি. ‘‘লহুং খো ত্ৰং, মহারাজ, গতোসি দ্ৰিমত্তানি যোজনসতানী’’তি.

‘‘কল্লোসি, ভন্তে নাগসেনা’’তি.

ব্রহ্মলোকপঞ্হো চতুত্থো.

৫. দ্ৰিন্নং লোকুপ্পন্নানং সমকভাৰপঞ্হো

৫. রাজা আহ ‘‘ভন্তে নাগসেন, যো ইধ কালঙ্কতো ব্রহ্মলোকে উপ্পজ্জেয্য, যো চ ইধ কালঙ্কতো কস্মীরে উপ্পজ্জেয্য, কো চিরতরং কো সীঘতর’’ন্তি? ‘‘সমকং, মহারাজা’’তি.

‘‘ওপম্মং করোহী’’তি. ‘‘কুহিং পন, মহারাজ, তৰ জাতনগর’’ন্তি? ‘‘অত্থি, ভন্তে, কলসিগামো নাম, তত্থাহং জাতো’’তি. ‘‘কীৰ দূরো, মহারাজ, ইতো কলসিগামো হোতী’’তি. ‘‘দ্ৰিমত্তানি, ভন্তে, যোজনসতানী’’তি. ‘‘কীৰ দূরং, মহারাজ, ইতো কস্মীরং হোতী’’তি? ‘‘দ্ৰাদস, ভন্তে, যোজনানী’’তি. ‘‘ইঙ্ঘ, ত্ৰং মহারাজ, কলসিগামং চিন্তেহী’’তি. ‘‘চিন্তিতো, ভন্তে’’তি. ‘‘ইঙ্ঘ, ত্ৰং মহারাজ, কস্মীরং চিন্তেহী’’তি. ‘‘চিন্তিতং ভন্তে’’তি. ‘‘কতমং নু খো, মহারাজ, চিরেন চিন্তিতং, কতমং সীঘতর’’ন্তি? ‘‘সমকং ভন্তে’’তি. ‘‘এৰমেৰ খো, মহারাজ, যো ইধ কালঙ্কতো ব্রহ্মলোকে উপ্পজ্জেয্য, যো চ ইধ কালঙ্কতো কস্মীরে উপ্পজ্জেয্য, সমকং যেৰ উপ্পজ্জন্তী’’তি.

‘‘ভিয্যো ওপম্মং করোহী’’তি. ‘‘তং কিং মঞ্ঞসি, মহারাজ, দ্ৰে সকুণা আকাসেন গচ্ছেয্যুং, তেসু একো উচ্চে রুক্খে নিসীদেয্য, একো নীচে রুক্খে নিসীদেয্য, তেসং সমকং পতিট্ঠিতানং কতমস্স ছাযা পঠমতরং পথৰিযং পতিট্ঠহেয্য, কতমস্স ছাযা চিরেন পথৰিযং পতিট্ঠহেয্যা’’তি? ‘‘সমকং, ভন্তে’’তি. ‘‘এৰমেৰ খো, মহারাজ, যো ইধ কালঙ্কতো ব্রহ্মলোকে উপ্পজ্জেয্য, যো চ ইধ কালঙ্কতো কস্মীরে উপ্পজ্জেয্য, সমকং যেৰ উপ্পজ্জন্তী’’তি.

‘‘কল্লোসি, ভন্তে নাগসেনা’’তি.

দ্ৰিন্নং লোকুপ্পন্নানং সমকভাৰপঞ্হো পঞ্চমো.

৬. বোজ্ঝঙ্গপঞ্হো

৬. রাজা আহ ‘‘কতি নু খো, ভন্তে নাগসেন, বোজ্ঝঙ্গা’’তি? ‘‘সত্ত খো, মহারাজ, বোজ্ঝঙ্গা’’তি. ‘‘কতিহি পন, ভন্তে, বোজ্ঝঙ্গেহি বুজ্ঝতী’’তি? ‘‘একেন খো, মহারাজ, বোজ্ঝঙ্গেন বুজ্ঝতি ধম্মৰিচযসম্বোজ্ঝঙ্গেনা’’তি. ‘‘অথ কিস্স নু খো, ভন্তে, ৰুচ্চন্তি ‘সত্ত বোজ্ঝঙ্গা’’’তি? ‘‘তং কিং মঞ্ঞসি, মহারাজ, অসি কোসিযা পক্খিত্তো অগ্গহিতো হত্থেন উস্সহতি ছেজ্জং ছিন্দিতু’’ন্তি. ‘‘ন হি, ভন্তে’’তি. ‘‘এৰমেৰ খো, মহারাজ, ধম্মৰিচযসম্বোজ্ঝঙ্গেন ৰিনা ছহি বোজ্ঝঙ্গেহি ন বুজ্ঝতী’’তি.

‘‘কল্লোসি, ভন্তে নাগসেনা’’তি.

বোজ্ঝঙ্গপঞ্হো ছট্ঠো.

৭. পাপপুঞ্ঞানং অপ্পানপ্পভাৰপঞ্হো

৭. রাজা আহ ‘‘ভন্তে নাগসেন, কতরং নু খো বহুতরং পুঞ্ঞং ৰা অপুঞ্ঞং ৰা’’তি? ‘‘পুঞ্ঞং খো, মহারাজ, বহুতরং, অপুঞ্ঞং থোক’’ন্তি. ‘‘কেন কারণেনা’’তি? ‘‘অপুঞ্ঞং খো, মহারাজ, করোন্তো ৰিপ্পটিসারী হোতি ‘পাপকম্মং মযা কত’ন্তি, তেন পাপং ন ৰড্ঢতি. পুঞ্ঞং খো, মহারাজ, করোন্তো অৰিপ্পটিসারী হোতি, অৰিপ্পটিসারিনো পামোজ্জং জাযতি, পমুদিতস্স পীতি জাযতি, পীতিমনস্স কাযো পস্সম্ভতি, পস্সদ্ধকাযো সুখং ৰেদেতি, সুখিনো চিত্তং সমাধিযতি, সমাহিতো যথাভূতং পজানাতি, তেন কারণেন পুঞ্ঞং ৰড্ঢতি. পুরিসো খো, মহারাজ, ছিন্নহত্থপাদো ভগৰতো একং উপ্পলহত্থং দত্ৰা একনৰুতিকপ্পানি ৰিনিপাতং ন গচ্ছিস্সতি. ইমিনাপি, মহারাজ, কারণেন ভণামি ‘পুঞ্ঞং বহুতরং, অপুঞ্ঞং থোক’’’ন্তি.

‘‘কল্লোসি, ভন্তে নাগসেনা’’তি.

পাপপুঞ্ঞানং অপ্পানপ্পভাৰপঞ্হো সত্তমো.

৮. জানন্তাজানন্তপাপকরণপঞ্হো

৮. রাজা আহ ‘‘ভন্তে নাগসেন, যো জানন্তো পাপকম্মং করোতি, যো অজানন্তো পাপকম্মং করোতি, কস্স বহুতরং অপুঞ্ঞ’’ন্তি? থেরো আহ ‘‘যো খো, মহারাজ, অজানন্তো পাপকম্মং করোতি, তস্স বহুতরং অপুঞ্ঞ’’ন্তি. ‘‘তেন হি, ভন্তে নাগসেন, যো অম্হাকং রাজপুত্তো ৰা রাজমহামত্তো ৰা অজানন্তো পাপকম্মং করোতি, তং মযং দিগুণং দণ্ডেমা’’তি? ‘‘তং কিং মঞ্ঞসি, মহারাজ, তত্তং অযোগুল়ং আদিত্তং সম্পজ্জলিতং সজোতিভূতং একো জানন্তো গণ্হেয্য, একো অজানন্তো গণ্হেয্য, কতমো [কস্স (ক.)] বলৰতরং ডয্হেয্যা’’তি. ‘‘যো খো, ভন্তে, অজানন্তো গণ্হেয্য, সো [তস্স (পী. ক.)] বলৰতরং ডয্হেয্যা’’তি. ‘‘এৰমেৰ খো, মহারাজ, যো অজানন্তো পাপকম্মং করোতি, তস্স বহুতরং অপুঞ্ঞ’’ন্তি.

‘‘কল্লোসি, ভন্তে নাগসেনা’’তি.

জানন্তাজানন্তপাপকরণপঞ্হো অট্ঠমো.

৯. উত্তরকুরুকাদিগমনপঞ্হো

৯. রাজা আহ ‘‘ভন্তে নাগসেন, অত্থি কোচি, যো ইমিনা সরীরেন উত্তরকুরুং ৰা গচ্ছেয্য, ব্রহ্মলোকং ৰা, অঞ্ঞং ৰা পন দীপ’’ন্তি? ‘‘অত্থি, মহারাজ, যো ইমিনা চাতুম্মহাভূতিকেন কাযেন উত্তরকুরুং ৰা গচ্ছেয্য, ব্রহ্মলোকং ৰা, অঞ্ঞং ৰা পন দীপ’’ন্তি.

‘‘কথং, ভন্তে নাগসেন, ইমিনা চাতুম্মহাভূতিকেন কাযেন উত্তরকুরুং ৰা গচ্ছেয্য, ব্রহ্মলোকং ৰা, অঞ্ঞং ৰা পন দীপ’’ন্তি? ‘‘অভিজানাসি নু, ত্ৰং মহারাজ, ইমিস্সা পথৰিযা ৰিদত্থিং ৰা রতনং ৰা লঙ্ঘিতা’’তি? ‘‘আম, ভন্তে, অভিজানামি ‘অহং, ভন্তে নাগসেন, অট্ঠপি রতনিযো লঙ্ঘেমী’’’তি. ‘‘কথং, ত্ৰং মহারাজ, অট্ঠপি রতনিযো লঙ্ঘেসী’’তি? ‘‘অহঞ্হি, ভন্তে, চিত্তং উপ্পাদেমি ‘এত্থ নিপতিস্সামী’তি সহ চিত্তুপ্পাদেন কাযো মে লহুকো হোতী’’তি. ‘‘এৰমেৰ খো, মহারাজ, ইদ্ধিমা ভিক্খু চেতোৰসিপ্পত্তো কাযং চিত্তে সমারোপেত্ৰা চিত্তৰসেন ৰেহাসং গচ্ছতী’’তি.

‘‘কল্লোসি, ভন্তে নাগসেনা’’তি.

উত্তরকুরুকাদিগমনপঞ্হো নৰমো.

১০. দীঘট্ঠিপঞ্হো

১০. রাজা আহ ‘‘ভন্তে নাগসেন, তুম্হে এৰং ভণথ ‘অট্ঠিকানি দীঘানি যোজনসতিকানিপী’তি, রুক্খোপি তাৰ নত্থি যোজনসতিকো, কুতো পন অট্ঠিকানি দীঘানি যোজনসতিকানি ভৰিস্সন্তী’’তি?

‘‘তং কিং মঞ্ঞসি, মহারাজ, সুতং তে ‘মহাসমুদ্দে পঞ্চযোজনসতিকাপি মচ্ছা অত্থী’’’তি? ‘‘আম, ভন্তে, সুত’’ন্তি. ‘‘ননু মহারাজ, পঞ্চযোজনসতিকস্স মচ্ছস্স অট্ঠিকানি দীঘানি ভৰিস্সন্তি যোজনসতিকানিপী’’তি?

‘‘কল্লোসি, ভন্তে নাগসেনা’’তি.

দীঘট্ঠিপঞ্হো দসমো.

১১. অস্সাসপস্সাসনিরোধপঞ্হো

১১. রাজা আহ ‘‘ভন্তে নাগসেন, তুম্হে এৰং ভণথ ‘সক্কা অস্সাসপস্সাসে নিরোধেতু’’’ন্তি? ‘‘আম, মহারাজ, সক্কা অস্সাসপস্সাসে নিরোধেতু’’ন্তি. ‘‘কথং, ভন্তে নাগসেন, সক্কা অস্সাসপস্সাসে নিরোধেতু’’ন্তি. ‘‘তং কিং মঞ্ঞসি, মহারাজ, সুতপুব্বো তে কোচি কাকচ্ছমানো’’তি. ‘‘আম, ভন্তে, সুতপুব্বো’’তি. ‘‘কিং নু খো, মহারাজ, সো সদ্দো কাযে নমিতে ৰিরমেয্যা’’তি. ‘‘আম, ভন্তে, ৰিরমেয্যা’’তি. ‘‘সো হি নাম, মহারাজ, সদ্দো অভাৰিতকাযস্স অভাৰিতসীলস্স অভাৰিতচিত্তস্স অভাৰিতপঞ্ঞস্স কাযে নমিতে ৰিরমিস্সতি, কিং পন ভাৰিতকাযস্স ভাৰিতসীলস্স ভাৰিতচিত্তস্স ভাৰিতপঞ্ঞস্স চতুত্থজ্ঝানং সমাপন্নস্স অস্সাসপস্সাসা ন নিরুজ্ঝিস্সন্তী’’তি.

‘‘কল্লোসি, ভন্তে নাগসেনা’’তি.

অস্সাসপস্সাসনিরোধপঞ্হো একাদসমো.

১২. সমুদ্দপঞ্হো

১২. রাজা আহ ‘‘ভন্তে নাগসেন, ‘সমুদ্দো সমুদ্দো’তি ৰুচ্চতি, কেন কারণেন উদকং ‘সমুদ্দো’তি ৰুচ্চতী’’তি? থেরো আহ ‘‘যত্তকং, মহারাজ, উদকং, তত্তকং লোণং. যত্তকং লোণং, তত্তকং উদকং. তস্মা ‘সমুদ্দো’তি ৰুচ্চতী’’তি.

‘‘কল্লোসি, ভন্তে নাগসেনা’’তি.

সমুদ্দপঞ্হো দ্ৰাদসমো.

১৩. সমুদ্দএকরসপঞ্হো

১৩. রাজা আহ ‘‘ভন্তে নাগসেন, কেন কারণেন সমুদ্দো একরসো লোণরসো’’তি? ‘‘চিরসণ্ঠিতত্তা খো, মহারাজ, উদকস্স সমুদ্দো একরসো লোণরসো’’তি.

‘‘কল্লোসি, ভন্তে নাগসেনা’’তি.

সমুদ্দএকরসপঞ্হো তেরসমো.

১৪. সুখুমপঞ্হো

১৪. রাজা আহ ‘‘ভন্তে নাগসেন, সক্কা সব্বং সুখুমং ছিন্দিতু’’ন্তি? ‘‘আম, মহারাজ, সক্কা সব্বং সুখুমং ছিন্দিতু’’ন্তি. ‘‘কিং পন, ভন্তে, সব্বং সুখুম’’ন্তি? ‘‘ধম্মো খো, মহারাজ, সব্বসুখুমো, ন খো, মহারাজ, ধম্মা সব্বে সুখুমা, ‘সুখুম’ন্তি ৰা ‘থূল’ন্তি ৰা ধম্মানমেতমধিৰচনং. যং কিঞ্চি ছিন্দিতব্বং, সব্বং তং পঞ্ঞায ছিন্দতি, নত্থি দুতিযং পঞ্ঞায ছেদন’’ন্তি.

‘‘কল্লোসি, ভন্তে নাগসেনা’’তি.

সুখুমপঞ্হো চুদ্দসমো.

১৫. ৰিঞ্ঞাণনানত্থপঞ্হো

১৫. রাজা আহ ‘‘ভন্তে নাগসেন, ‘ৰিঞ্ঞাণ’ন্তি ৰা ‘পঞ্ঞা’তি ৰা ‘ভূতস্মিং জীৰো’তি ৰা ইমে ধম্মা নানত্থা চেৰ নানাব্যঞ্জনা চ, উদাহু একত্থা ব্যঞ্জনমেৰ নান’’ন্তি? ‘‘ৰিজাননলক্খণং, মহারাজ, ৰিঞ্ঞাণং, পজাননলক্খণা পঞ্ঞা, ভূতস্মিং জীৰো নুপলব্ভতী’’তি. ‘‘যদি জীৰো নুপলব্ভতি, অথ কো চরহি চক্খুনা রূপং পস্সতি, সোতেন সদ্দং সুণাতি, ঘানেন গন্ধং ঘাযতি, জিৰ্হায রসং সাযতি, কাযেন ফোট্ঠব্বং ফুসতি, মনসা ধম্মং ৰিজানাতী’’তি? থেরো আহ ‘‘যদি জীৰো চক্খুনা রূপং পস্সতি…পে… মনসা ধম্মং ৰিজানাতি, সো জীৰো চক্খুদ্ৰারেসু উপ্পাটিতেসু মহন্তেন আকাসেন বহিমুখো সুট্ঠুতরং রূপং পস্সেয্য, সোতেসু উপ্পাটিতেসু, ঘানে উপ্পাটিতে, জিৰ্হায উপ্পাটিতায, কাযে উপ্পাটিতে মহন্তেন আকাসেন সুট্ঠুতরং সদ্দং সুণেয্য, গন্ধং ঘাযেয্য, রসং সাযেয্য, ফোট্ঠব্বং ফুসেয্যা’’তি? ‘‘ন হি, ভন্তে’’তি. ‘‘তেন হি, মহারাজ, ভূতস্মিং জীৰো নুপলব্ভতী’’তি.

‘‘কল্লোসি, ভন্তে নাগসেনা’’তি.

ৰিঞ্ঞাণনানত্থপঞ্হো পন্নরসমো.

১৬. অরূপধম্মৰৰত্থানদুক্করপঞ্হো

১৬. রাজা আহ ‘‘ভন্তে নাগসেন, দুক্করং নু খো ভগৰতা কত’’ন্তি? থেরো আহ ‘‘দুক্করং, মহারাজ, ভগৰতা কত’’ন্তি. ‘‘কিং পন, ভন্তে নাগসেন, ভগৰতা দুক্করং কত’’ন্তি. ‘‘দুক্করং, মহারাজ, ভগৰতা কতং ইমেসং অরূপীনং চিত্তচেতসিকানং ধম্মানং একারম্মণে ৰত্তমানানং ৰৰত্থানং অক্খাতং ‘অযং ফস্সো, অযং ৰেদনা, অযং সঞ্ঞা, অযং চেতনা, ইদং চিত্ত’’’ন্তি.

‘‘ওপম্মং করোহী’’তি. ‘‘যথা, মহারাজ, কোচিদেৰ পুরিসো নাৰায মহাসমুদ্দং অজ্ঝোগাহেত্ৰা হত্থপুটেন উদকং গহেত্ৰা জিৰ্হায সাযিত্ৰা জানেয্য নু খো, মহারাজ, সো পুরিসো ‘‘ইদং গঙ্গায উদকং, ইদং যমুনায উদকং, ইদং অচিরৰতিযা উদকং, ইদং সরভুযা উদকং, ইদং মহিযা উদক’’’ন্তি? ‘‘দুক্করং, ভন্তে, জানিতু’’ন্তি. ‘‘ইতো দুক্করতরং খো, মহারাজ, ভগৰতা কতং ইমেসং অরূপীনং চিত্তচেতসিকানং ধম্মানং একারম্মণে ৰত্তমানানং ৰৰত্থানং অক্খাতং ‘অযং ফস্সো, অযং ৰেদনা, অযং সঞ্ঞা, অযং চেতনা, ইদং চিত্ত’’’ন্তি. ‘‘সুট্ঠু, ভন্তে’’তি রাজা অব্ভানুমোদীতি.

অরূপধম্মৰৰত্থানদুক্করপঞ্হো সোল়সমো.

অরূপধম্মৰৰত্থানৰগ্গো সত্তমো.

ইমস্মিং ৰগ্গে সোল়স পঞ্হা.

মিলিন্দপঞ্হপুচ্ছাৰিসজ্জনা

থেরো আহ ‘‘জানাসি খো, মহারাজ, সম্পতি কা ৰেলা’’তি? ‘‘আম, ভন্তে, জানামি ‘সম্পতি পঠমো যামো অতিক্কন্তো, মজ্ঝিমো যামো পৰত্ততি, উক্কা পদীপীযন্তি, চত্তারি পটাকানি আণত্তানি গমিস্সন্তি ভণ্ডতো রাজদেয্যানী’’’তি.

যোনকা এৰমাহংসু ‘‘কল্লোসি, মহারাজ, পণ্ডিতো থেরো’’তি. ‘‘আম, ভণে, পণ্ডিতো থেরো, এদিসো আচরিযো ভৰেয্য মাদিসো চ অন্তেৰাসী, নচিরস্সেৰ পণ্ডিতো ধম্মং আজানেয্যা’’তি. তস্স পঞ্হৰেয্যাকরণেন তুট্ঠো রাজা থেরং নাগসেনং সতসহস্সগ্ঘনকেন কম্বলেন অচ্ছাদেত্ৰা ‘‘ভন্তে নাগসেন, অজ্জতগ্গে তে অট্ঠসতং ভত্তং পঞ্ঞপেমি, যং কিঞ্চি অন্তেপুরে কপ্পিযং, তেন চ পৰারেমী’’তি আহ. অলং মহারাজ জীৰামী’’তি. ‘‘জানামি, ভন্তে নাগসেন, জীৰসি, অপি চ অত্তানঞ্চ রক্খ, মমঞ্চ রক্খাহী’’তি. ‘‘কথং অত্তানং রক্খসি, ‘নাগসেনো মিলিন্দং রাজানং পসাদেতি, ন চ কিঞ্চি অলভী’তি পরাপৰাদো [পরপ্পৰাদো (ক.)] আগচ্ছেয্যাতি, এৰং অত্তানং রক্খ. কথং মমং রক্খসি, ‘মিলিন্দো রাজা পসন্নো পসন্নাকারং ন করোতী’তি পরাপৰাদো আগচ্ছেয্যাতি, এৰং মমং রক্খাহী’’তি. ‘‘তথা হোতু, মহারাজা’’তি. ‘‘সেয্যথাপি, ভন্তে, সীহো মিগরাজা সুৰণ্ণপঞ্জরে পক্খিত্তোপি বহিমুখো যেৰ হোতি, এৰমেৰ খো অহং, ভন্তে, কিঞ্চাপি অগারং অজ্ঝাৰসামি বহিমুখো যেৰ পন অচ্ছামি. সচে অহং, ভন্তে, অগারস্মা অনাগারিযং পব্বজেয্যং, ন চিরং জীৰেয্যং, বহূ মে পচ্চত্থিকা’’তি.

অথ খো আযস্মা নাগসেনো মিলিন্দস্স রঞ্ঞো পঞ্হং ৰিসজ্জেত্ৰা উট্ঠাযাসনা সঙ্ঘারামং অগমাসি. অচিরপক্কন্তে চ আযস্মন্তে নাগসেনে মিলিন্দস্স রঞ্ঞো এতদহোসি ‘‘কিং মযা পুচ্ছিতং, কিং ভদন্তেন নাগসেনেন ৰিসজ্জিত’’ন্তি? অথ খো মিলিন্দস্স রঞ্ঞো এতদহোসি ‘‘সব্বং মযা সুপুচ্ছিতং, সব্বং ভদন্তেন নাগসেনেন সুৰিসজ্জিত’’ন্তি. আযস্মতোপি নাগসেনস্স সঙ্ঘারামগতস্স এতদহোসি ‘‘কিং মিলিন্দেন রঞ্ঞা পুচ্ছিতং, কিং মযা ৰিসজ্জিত’’ন্তি. অথ খো আযস্মতো নাগসেনস্স এতদহোসি ‘‘সব্বং মিলিন্দেন রঞ্ঞা সুপুচ্ছিতং, সব্বং মযা সুৰিসজ্জিত’’ন্তি.

অথ খো আযস্মা নাগসেনো তস্সা রত্তিযা অচ্চযেন পুব্বণ্হসমযং নিৰাসেত্ৰা পত্তচীৰরমাদায যেন মিলিন্দস্স রঞ্ঞো নিৰেসনং তেনুপসঙ্কমি, উপসঙ্কমিত্ৰা পঞ্ঞত্তে আসনে নিসীদি. অথ খো মিলিন্দো রাজা আযস্মন্তং নাগসেনং অভিৰাদেত্ৰা একমন্তং নিসীদি, একমন্তং নিসিন্নো খো মিলিন্দো রাজা আযস্মন্তং নাগসেনং এতদৰোচ –

‘‘মা খো ভদন্তস্স এৰং অহোসি ‘নাগসেনো মযা পঞ্হং পুচ্ছিতো’তি তেনেৰ সোমনস্সেন তং রত্তাৰসেসং ৰীতিনামেসীতি ন তে এৰং দট্ঠব্বং. তস্স ময্হং, ভন্তে, তং রত্তাৰসেসং এতদহোসি ‘কিং মযা পুচ্ছিতং, কিং ভদন্তেন ৰিসজ্জিত’ন্তি, ‘সব্বং মযা সুপুচ্ছিতং, সব্বং ভদন্তেন সুৰিসজ্জিত’’’ন্তি.

থেরোপি এৰমাহ – ‘‘মা খো মহারাজস্স এৰং অহোসি ‘মিলিন্দস্স রঞ্ঞো মযা পঞ্হো ৰিসজ্জিতো’তি তেনেৰ সোমনস্সেন তং রত্তাৰসেসং ৰীতিনামেসীতি ন তে এৰং দট্ঠব্বং. তস্স ময্হং, মহারাজ, তং রত্তাৰসেসং এতদহোসি ‘কিং মিলিন্দেন রঞ্ঞা পুচ্ছিতং, কিং মযা ৰিসজ্জিত’ন্তি, ‘সব্বং মিলিন্দেন রঞ্ঞা সুপুচ্ছিতং, সব্বং মযা সুৰিসজ্জিত’’’ন্তি ইতিহ তে মহানাগা অঞ্ঞমঞ্ঞস্স সুভাসিতং সমনুমোদিংসূতি.

মিলিন্দপঞ্হপুচ্ছাৰিসজ্জনা নিট্ঠিতা.

মেণ্ডকপঞ্হারম্ভকথা

অট্ঠমন্তপরিৰজ্জনীযট্ঠানানি

ভস্সপ্পৰাদো [ভস্সপ্পৰেদী (সী. পী.)] ৰেতণ্ডী, অতিবুদ্ধি ৰিচক্খণো;

মিলিন্দো ঞাণভেদায, নাগসেনমুপাগমি.

ৰসন্তো তস্স ছাযায, পরিপুচ্ছং পুনপ্পুনং;

পভিন্নবুদ্ধি হুত্ৰান, সোপি আসি তিপেটকো.

নৰঙ্গং অনুমজ্জন্তো, রত্তিভাগে রহোগতো;

অদ্দক্খি মেণ্ডকে পঞ্হে, দুন্নিৰেঠে সনিগ্গহে.

‘‘পরিযাযভাসিতং অত্থি, অত্থি সন্ধাযভাসিতং;

সভাৰভাসিতং অত্থি, ধম্মরাজস্স সাসনে.

‘‘তেসমত্থং অৰিঞ্ঞায, মেণ্ডকে জিনভাসিতে;

অনাগতম্হি অদ্ধানে, ৰিগ্গহো তত্থ হেস্সতি.

‘‘হন্দ কথিং পসাদেত্ৰা, ছেজ্জাপেস্সামি মেণ্ডকে;

তস্স নিদ্দিট্ঠমগ্গেন, নিদ্দিসিস্সন্ত্যনাগতে’’তি.

অথ খো মিলিন্দো রাজা পভাতায রত্তিযা উদ্ধস্তে [উট্ঠিতে (স্যা.), উগ্গতে (সী. পী.)] অরুণে সীসং ন্হত্ৰা সিরসি অঞ্জলিং পগ্গহেত্ৰা অতীতানাগতপচ্চুপ্পন্নে সম্মাসম্বুদ্ধে অনুস্সরিত্ৰা অট্ঠ ৰত্তপদানি সমাদিযি ‘‘ইতো মে অনাগতানি সত্ত দিৰসানি অট্ঠ গুণে সমাদিযিত্ৰা তপো চরিতব্বো ভৰিস্সতি, সোহং চিণ্ণতপো সমানো আচরিযং আরাধেত্ৰা মেণ্ডকে পঞ্হে পুচ্ছিস্সামী’’তি. অথ খো মিলিন্দো রাজা পকতিদুস্সযুগং অপনেত্ৰা আভরণানি চ ওমুঞ্চিত্ৰা কাসাৰং নিৰাসেত্ৰা মুণ্ডকপটিসীসকং সীসে পটিমুঞ্চিত্ৰা মুনিভাৰমুপগন্ত্ৰা অট্ঠ গুণে সমাদিযি ‘‘ইমং সত্তাহং মযা ন রাজত্থো অনুসাসিতব্বো, ন রাগূপসঞ্হিতং চিত্তং উপ্পাদেতব্বং, ন দোসূপসঞ্হিতং চিত্তং উপ্পাদেতব্বং, ন মোহূপসঞ্হিতং চিত্তং উপ্পাদেতব্বং, দাসকম্মকরপোরিসে জনেপি নিৰাতৰুত্তিনা ভৰিতব্বং, কাযিকং ৰাচসিকং অনুরক্খিতব্বং, ছপি আযতনানি নিরৰসেসতো অনুরক্খিতব্বানি, মেত্তাভাৰনায মানসং পক্খিপিতব্ব’’ন্তি. ইমে অট্ঠ গুণে সমাদিযিত্ৰা তেস্ৰেৰ অট্ঠসু গুণেসু মানসং পতিট্ঠপেত্ৰা বহি অনিক্খমিত্ৰা সত্তাহং ৰীতিনামেত্ৰা অট্ঠমে দিৰসে পভাতায রত্তিযা পগেৰ পাতরাসং কত্ৰা ওক্খিত্তচক্খু মিতভাণী সুসণ্ঠিতেন ইরিযাপথেন অৰিক্খিত্তেন চিত্তেন হট্ঠেন উদগ্গেন ৰিপ্পসন্নেন থেরং নাগসেনং উপসঙ্কমিত্ৰা থেরস্স পাদে সিরসা ৰন্দিত্ৰা একমন্তং ঠিতো ইদমৰোচ –

‘‘অত্থি মে, ভন্তে নাগসেন, কোচি অত্থো তুম্হেহি সদ্ধিং মন্তযিতব্বো, ন তত্থ অঞ্ঞো কোচি ততিযো ইচ্ছিতব্বো, সুঞ্ঞে ওকাসে পৰিৰিত্তে অরঞ্ঞে অট্ঠঙ্গুপাগতে সমণসারুপ্পে. তত্থ সো পঞ্হো পুচ্ছিতব্বো ভৰিস্সতি, তত্থ মে গুয্হং ন কাতব্বং ন রহস্সকং, অরহামহং রহস্সকং সুণিতুং সুমন্তনে উপগতে, উপমাযপি সো অত্থো উপপরিক্খিতব্বো, যথা কিং ৰিয, যথা নাম, ভন্তে নাগসেন, মহাপথৰী নিক্খেপং অরহতি নিক্খেপে উপগতে. এৰমেৰ খো, ভন্তে নাগসেন, অরহামহং রহস্সকং সুণিতুং সুমন্তনে উপগতে’’তি. গরুনা সহ পৰিৰিত্তপৰনং পৰিসিত্ৰা ইদমৰোচ – ‘‘ভন্তে নাগসেন, ইধ পুরিসেন মন্তযিতুকামেন অট্ঠ ঠানানি পরিৰজ্জযিতব্বানি ভৰন্তি, ন তেসু ঠানেসু ৰিঞ্ঞূ পুরিসো অত্থং মন্তেতি, মন্তিতোপি অত্থো পরিপততি ন সম্ভৰতি. কতমানি অট্ঠ ঠানানি? ৰিসমট্ঠানং পরিৰজ্জনীযং, সভযং পরিৰজ্জনীযং, অতিৰাতট্ঠানং পরিৰজ্জনীযং, পটিচ্ছন্নট্ঠানং পরিৰজ্জনীযং, দেৰট্ঠানং পরিৰজ্জনীযং, পন্থো পরিৰজ্জনীযো, সঙ্গামো [সঙ্কমো (সী. পী.)] পরিৰজ্জনীযো, উদকতিত্থং পরিৰজ্জনীযং. ইমানি অট্ঠ ঠানানি পরিৰজ্জনীযানী’’তি.

থেরো আহ ‘‘কো দোসো ৰিসমট্ঠানে, সভযে, অতিৰাতে, পটিচ্ছন্নে, দেৰট্ঠানে, পন্থে, সঙ্গামে, উদকতিত্থে’’তি? ‘‘ৰিসমে, ভন্তে নাগসেন, মন্তিতো অত্থো ৰিকিরতি ৰিধমতি পগ্ঘরতি ন সম্ভৰতি, সভযে মনো সন্তস্সতি, সন্তস্সিতো ন সম্মা অত্থং সমনুপস্সতি, অতিৰাতে সদ্দো অৰিভূতো হোতি, পটিচ্ছন্নে উপস্সুতিং তিট্ঠন্তি, দেৰট্ঠানে মন্তিতো অত্থো গরুকং পরিণমতি, পন্থে মন্তিতো অত্থো তুচ্ছো ভৰতি, সঙ্গামে চঞ্চলো ভৰতি, উদকতিত্থে পাকটো ভৰতি. ভৰতীহ –

‘‘‘ৰিসমং সভযং অতিৰাতো, পটিচ্ছন্নং দেৰনিস্সিতং;

পন্থো চ সঙ্গামো তিত্থং, অট্ঠেতে পরিৰজ্জিযা’’’তি.

অট্ঠ মন্তনস্স পরিৰজ্জনীযট্ঠানানি.

অট্ঠমন্তৰিনাসকপুগ্গলা

‘‘ভন্তে নাগসেন, অট্ঠিমে পুগ্গলা মন্তিযমানা মন্তিতং অত্থং ব্যাপাদেন্তি. কতমে অট্ঠ? রাগচরিতো দোসচরিতো মোহচরিতো মানচরিতো লুদ্ধো অলসো একচিন্তী বালোতি. ইমে অট্ঠ পুগ্গলা মন্তিতং অত্থং ব্যাপাদেন্তী’’তি.

থেরো আহ ‘‘তেসং কো দোসো’’তি? ‘‘রাগচরিতো, ভন্তে নাগসেন, রাগৰসেন মন্তিতং অত্থং ব্যাপাদেতি, দোসচরিতো দোসৰসেন মন্তিতং অত্থং ব্যাপাদেতি, মোহচরিতো মোহৰসেন মন্তিতং অত্থং ব্যাপাদেতি, মানচরিতো মানৰসেন মন্তিতং অত্থং ব্যাপাদেতি, লুদ্ধো লোভৰসেন মন্তিতং অত্থং ব্যাপাদেতি, অলসো অলসতায মন্তিতং অত্থং ব্যাপাদেতি, একচিন্তী একচিন্তিতায মন্তিতং অত্থং ব্যাপাদেতি, বালো বালতায মন্তিতং অত্থং ব্যাপাদেতি. ভৰতীহ –

‘‘‘রত্তো দুট্ঠো চ মূল়্হো চ, মানী লুদ্ধো তথালসো;

একচিন্তী চ বালো চ, এতে অত্থৰিনাসকা’’’তি.

অট্ঠ মন্তৰিনাসকপুগ্গলা.

নৰগুয্হমন্তৰিধংসকং

‘‘ভন্তে নাগসেন, নৰিমে পুগ্গলা মন্তিতং গুয্হং ৰিৰরন্তি ন ধারেন্তি. কতমে নৰ? রাগচরিতো দোসচরিতো মোহচরিতো ভীরুকো আমিসগরুকো ইত্থী সোণ্ডো পণ্ডকো দারকো’’তি.

থেরো আহ ‘‘তেসং কো দোসো’’তি? ‘‘রাগচরিতো, ভন্তে নাগসেন, রাগৰসেন মন্তিতং গুয্হং ৰিৰরতি ন ধারেতি, দোসচরিতো, ভন্তে, দোসৰসেন মন্তিতং গুয্হং ৰিৰরতি ন ধারেতি, মূল়্হো মোহৰসেন মন্তিতং গুয্হং ৰিৰরতি ন ধারেতি, ভীরুকো ভযৰসেন মন্তিতং গুয্হং ৰিৰরতি ন ধারেতি, আমিসগরুকো আমিসহেতু মন্তিতং গুয্হং ৰিৰরতি ন ধারেতি, ইত্থী পঞ্ঞায ইত্তরতায মন্তিতং গুয্হং ৰিৰরতি ন ধারেতি, সোণ্ডিকো সুরালোলতায মন্তিতং গুয্হং ৰিৰরতি ন ধারেতি, পণ্ডকো অনেকংসিকতায মন্তিতং গুয্হং ৰিৰরতি ন ধারেতি, দারকো চপলতায মন্তিতং গুয্হং ৰিৰরতি ন ধারেতি. ভৰতীহ –

‘‘‘রত্তো দুট্ঠো চ মূল়্হো চ, ভীরু আমিসগরুকো [আমিসচক্খুকো (সী. পী.)];

ইত্থী সোণ্ডো পণ্ডকো চ, নৰমো ভৰতি দারকো.

‘‘নৰেতে পুগ্গলা লোকে, ইত্তরা চলিতা চলা;

এতেহি মন্তিতং গুয্হং, খিপ্পং ভৰতি পাকট’’’ন্তি.

নৰ গুয্হমন্তৰিধংসকা পুগ্গলা.

অট্ঠ পঞ্ঞাপটিলাভকারণং

‘‘ভন্তে নাগসেন, অট্ঠহি কারণেহি বুদ্ধি পরিণমতি পরিপাকং গচ্ছতি. কতমেহি অট্ঠহি? ৰযপরিণামেন বুদ্ধি পরিণমতি পরিপাকং গচ্ছতি, যসপরিণামেন বুদ্ধি পরিণমতি পরিপাকং গচ্ছতি, পরিপুচ্ছায বুদ্ধি পরিণমতি পরিপাকং গচ্ছতি, তিত্থসংৰাসেন বুদ্ধি পরিণমতি পরিপাকং গচ্ছতি, যোনিসো মনসিকারেন বুদ্ধি পরিণমতি পরিপাকং গচ্ছতি, সাকচ্ছায বুদ্ধি পরিণমতি পরিপাকং গচ্ছতি, স্নেহূপসেৰনেন বুদ্ধি পরিণমতি পরিপাকং গচ্ছতি, পতিরূপদেসৰাসেন বুদ্ধি পরিণমতি পরিপাকং গচ্ছতি. ভৰতীহ –

‘‘‘ৰযেন যসপুচ্ছাহি, তিত্থৰাসেন যোনিসো;

সাকচ্ছা স্নেহসংসেৰা, পতিরূপৰসেন চ.

‘‘এতানি অট্ঠ ঠানানি, বুদ্ধিৰিসদকারণা;

যেসং এতানি সম্ভোন্তি, তেসং বুদ্ধি পভিজ্জতী’’’তি.

অট্ঠ পঞ্ঞাপটিলাভকারণানি.

আচরিযগুণং

‘‘ভন্তে নাগসেন, অযং ভূমিভাগো অট্ঠ মন্তদোসৰিৰজ্জিতো, অহঞ্চ লোকে পরমো মন্তিসহাযো [মন্তসহাযো (সী.)], গুয্হমনুরক্খী চাহং যাৰাহং জীৰিস্সামি তাৰ গুয্হমনুরক্খিস্সামি, অট্ঠহি চ মে কারণেহি বুদ্ধি পরিণামং গতা, দুল্লভো এতরহি মাদিসো অন্তেৰাসী, সম্মা পটিপন্নে অন্তেৰাসিকে যে আচরিযানং পঞ্চৰীসতি আচরিযগুণা, তেহি গুণেহি আচরিযেন সম্মা পটিপজ্জিতব্বং. কতমে পঞ্চৰীসতি গুণা?

‘‘ইধ, ভন্তে নাগসেন, আচরিযেন অন্তেৰাসিম্হি সততং সমিতং আরক্খা উপট্ঠপেতব্বা, অসেৰনসেৰনা জানিতব্বা, পমত্তাপ্পমত্তা জানিতব্বা, সেয্যৰকাসো জানিতব্বো, গেলঞ্ঞং জানিতব্বং, ভোজনস্স [ভোজনীযং (স্যা.)] লদ্ধালদ্ধং জানিতব্বং, ৰিসেসো জানিতব্বো, পত্তগতং সংৰিভজিতব্বং, অস্সাসিতব্বো ‘মা ভাযি, অত্থো তে অভিক্কমতী’তি, ‘ইমিনা পুগ্গলেন পটিচরতী’তি [পটিচরাহীতি (ক.)] পটিচারো জানিতব্বো, গামে পটিচারো জানিতব্বো, ৰিহারে পটিচারো জানিতব্বো, ন তেন হাসো দৰো কাতব্বো [ন তেন সহ সল্লাপো কাতব্বো (সী. পী.)], তেন সহ আলাপো কাতব্বো, ছিদ্দং দিস্ৰা অধিৰাসেতব্বং, সক্কচ্চকারিনা ভৰিতব্বং, অখণ্ডকারিনা ভৰিতব্বং, অরহস্সকারিনা ভৰিতব্বং, নিরৰসেসকারিনা ভৰিতব্বং, ‘জনেমিমং [জানেমিমং (স্যা.)] সিপ্পেসূ’তি জনকচিত্তং উপট্ঠপেতব্বং, ‘কথং অযং ন পরিহাযেয্যা’তি ৰড্ঢিচিত্তং উপট্ঠপেতব্বং, ‘বলৰং ইমং করোমি সিক্খাবলেনা’তি চিত্তং উপট্ঠপেতব্বং, মেত্তচিত্তং উপট্ঠপেতব্বং, আপদাসু ন ৰিজহিতব্বং, করণীযে নপ্পমজ্জিতব্বং, খলিতে ধম্মেন পগ্গহেতব্বোতি. ইমে খো, ভন্তে, পঞ্চৰীসতি আচরিযস্স আচরিযগুণা, তেহি গুণেহি মযি সম্মা পটিপজ্জস্সু, সংসযো মে, ভন্তে, উপ্পন্নো, অত্থি মেণ্ডকপঞ্হা জিনভাসিতা, অনাগতে অদ্ধানে তত্থ ৰিগ্গহো উপ্পজ্জিস্সতি, অনাগতে চ অদ্ধানে দুল্লভা ভৰিস্সন্তি তুম্হাদিসা বুদ্ধিমন্তো, তেসু মে পঞ্হেসু চক্খুং দেহি পরৰাদানং নিগ্গহাযা’’তি.

উপাসকগুণং

থেরো ‘‘সাধূ’’তি সম্পটিচ্ছিত্ৰা দস উপাসকস্স উপাসকগুণে পরিদীপেসি. ‘‘দস ইমে, মহারাজ, উপাসকস্স উপাসকগুণা. কতমে দস, ইধ, মহারাজ, উপাসকো সঙ্ঘেন সমানসুখদুক্খো হোতি, ধম্মাধিপতেয্যো হোতি, যথাবলং সংৰিভাগরতো হোতি, জিনসাসনপরিহানিং দিস্ৰা অভিৰড্ঢিযা ৰাযমতি. সম্মাদিট্ঠিকো হোতি, অপগতকোতূহলমঙ্গলিকো জীৰিতহেতুপি ন অঞ্ঞং সত্থারং উদ্দিসতি, কাযিকৰাচসিকঞ্চস্স রক্খিতং হোতি, সমগ্গারামো হোতি সমগ্গরতো, অনুসূযকো হোতি, ন চ কুহনৰসেন সাসনে চরতি, বুদ্ধং সরণং গতো হোতি, ধম্মং সরণং গতো হোতি, সঙ্ঘং সরণং গতো হোতি. ইমে খো, মহারাজ, দস উপাসকস্স উপাসকগুণা, তে সব্বে গুণা তযি সংৰিজ্জন্তি, তং তে যুত্তং পত্তং অনুচ্ছৰিকং পতিরূপং যং ত্ৰং জিনসাসনপরিহানিং দিস্ৰা অভিৰড্ঢিং ইচ্ছসি, করোমি তে ওকাসং, পুচ্ছ মং ত্ৰং যথাসুখ’’ন্তি.

মেণ্ডকপঞ্হারম্ভকথা নিট্ঠিতা.