১৫. ৰিঞ্ঞাণনানত্থপঞ্হো

১৫. রাজা আহ ‘‘ভন্তে নাগসেন, ‘ৰিঞ্ঞাণ’ন্তি ৰা ‘পঞ্ঞা’তি ৰা ‘ভূতস্মিং জীৰো’তি ৰা ইমে ধম্মা নানত্থা চেৰ নানাব্যঞ্জনা চ, উদাহু একত্থা ব্যঞ্জনমেৰ নান’’ন্তি? ‘‘ৰিজাননলক্খণং, মহারাজ, ৰিঞ্ঞাণং, পজাননলক্খণা পঞ্ঞা, ভূতস্মিং জীৰো নুপলব্ভতী’’তি. ‘‘যদি জীৰো নুপলব্ভতি, অথ কো চরহি চক্খুনা রূপং পস্সতি, সোতেন সদ্দং সুণাতি, ঘানেন গন্ধং ঘাযতি, জিৰ্হায রসং সাযতি, কাযেন ফোট্ঠব্বং ফুসতি, মনসা ধম্মং ৰিজানাতী’’তি? থেরো আহ ‘‘যদি জীৰো চক্খুনা রূপং পস্সতি…পে… মনসা ধম্মং ৰিজানাতি, সো জীৰো চক্খুদ্ৰারেসু উপ্পাটিতেসু মহন্তেন আকাসেন বহিমুখো সুট্ঠুতরং রূপং পস্সেয্য, সোতেসু উপ্পাটিতেসু, ঘানে উপ্পাটিতে, জিৰ্হায উপ্পাটিতায, কাযে উপ্পাটিতে মহন্তেন আকাসেন সুট্ঠুতরং সদ্দং সুণেয্য, গন্ধং ঘাযেয্য, রসং সাযেয্য, ফোট্ঠব্বং ফুসেয্যা’’তি? ‘‘ন হি, ভন্তে’’তি. ‘‘তেন হি, মহারাজ, ভূতস্মিং জীৰো নুপলব্ভতী’’তি.

‘‘কল্লোসি, ভন্তে নাগসেনা’’তি.

ৰিঞ্ঞাণনানত্থপঞ্হো পন্নরসমো.