১৬. অরূপধম্মৰৰত্থানদুক্করপঞ্হো

১৬. রাজা আহ ‘‘ভন্তে নাগসেন, দুক্করং নু খো ভগৰতা কত’’ন্তি? থেরো আহ ‘‘দুক্করং, মহারাজ, ভগৰতা কত’’ন্তি. ‘‘কিং পন, ভন্তে নাগসেন, ভগৰতা দুক্করং কত’’ন্তি. ‘‘দুক্করং, মহারাজ, ভগৰতা কতং ইমেসং অরূপীনং চিত্তচেতসিকানং ধম্মানং একারম্মণে ৰত্তমানানং ৰৰত্থানং অক্খাতং ‘অযং ফস্সো, অযং ৰেদনা, অযং সঞ্ঞা, অযং চেতনা, ইদং চিত্ত’’’ন্তি.

‘‘ওপম্মং করোহী’’তি. ‘‘যথা, মহারাজ, কোচিদেৰ পুরিসো নাৰায মহাসমুদ্দং অজ্ঝোগাহেত্ৰা হত্থপুটেন উদকং গহেত্ৰা জিৰ্হায সাযিত্ৰা জানেয্য নু খো, মহারাজ, সো পুরিসো ‘‘ইদং গঙ্গায উদকং, ইদং যমুনায উদকং, ইদং অচিরৰতিযা উদকং, ইদং সরভুযা উদকং, ইদং মহিযা উদক’’’ন্তি? ‘‘দুক্করং, ভন্তে, জানিতু’’ন্তি. ‘‘ইতো দুক্করতরং খো, মহারাজ, ভগৰতা কতং ইমেসং অরূপীনং চিত্তচেতসিকানং ধম্মানং একারম্মণে ৰত্তমানানং ৰৰত্থানং অক্খাতং ‘অযং ফস্সো, অযং ৰেদনা, অযং সঞ্ঞা, অযং চেতনা, ইদং চিত্ত’’’ন্তি. ‘‘সুট্ঠু, ভন্তে’’তি রাজা অব্ভানুমোদীতি.

অরূপধম্মৰৰত্থানদুক্করপঞ্হো সোল়সমো.

অরূপধম্মৰৰত্থানৰগ্গো সত্তমো.

ইমস্মিং ৰগ্গে সোল়স পঞ্হা.