৯. ছবুদ্ধধম্মৰারৰণ্ণনা

৩৮. বুদ্ধধম্মৰারে দিযড্ঢসতন্তি ছক্খত্তুং পঞ্চৰীসতি সতঞ্চ পঞ্ঞাসঞ্চ হোন্তি, তদ্দিগুণা নিরুত্তিযো তদ্দিগুণানি ঞাণানি. পটিসম্ভিদাধিকরণেতি পটিসম্ভিদাধিকারে. অড্ঢনৰধম্মসতানীতি পঠমং ৰুত্তেসু চতূসু সচ্চেসু সট্ঠি, চতূসু সতিপট্ঠানেসু সট্ঠি, চতূসু সম্মপ্পধানেসু সট্ঠি, সত্তবোধিসত্তৰেয্যাকরণেসু সত্ততি, অভিঞ্ঞট্ঠাদীসু পঞ্চসু পঞ্চৰীসসতং, খন্ধট্ঠাদীসু পঞ্চসু পঞ্চৰীসসতং, পুন চতূসু অরিযসচ্চেসু সতং, চতূসু পটিসম্ভিদাসু সতং, ছসু বুদ্ধধম্মেসু দিযড্ঢসতন্তি এৰং অট্ঠসতানি চ পঞ্ঞাসঞ্চ ধম্মা হোন্তি. এৰং অত্থাপি তত্তকা এৰ হোন্তি. এৰমেৰ সচ্চাদীসু তীসু ঠানেসু ৰীসসতং নিরুত্তিযো, সত্তসু ৰেয্যাকরণেসু চত্তারীসসতং নিরুত্তিযো, অভিঞ্ঞট্ঠাদীসু খন্ধট্ঠাদীসু চ অড্ঢতেয্যানি অড্ঢতেয্যানি নিরুত্তিসতানি, অরিযসচ্চেসু পটিসম্ভিদাসু চ দ্ৰে দ্ৰে নিরুত্তিসতানি, বুদ্ধধম্মেসু তীণি নিরুত্তিসতানীতি এৰং নিরুত্তিসহস্সঞ্চ সত্তনিরুত্তিসতানি চ হোন্তি. এৰমেৰ সচ্চাদীসু তীসু ঠানেসু চত্তারীসাধিকানি দ্ৰে দ্ৰে ঞাণসতানি, সত্তসু ৰেয্যাকরণেসু অসীতিঅধিকানি দ্ৰে ঞাণসতানি, অভিঞ্ঞট্ঠাদীসু খন্ধট্ঠাদীসু চ পঞ্চপঞ্চঞাণসতানি, সচ্চেসু পটিসম্ভিদাসু চ চত্তারি চত্তারি ঞাণসতানি, বুদ্ধধম্মেসু ছ ঞাণসতানীতি এৰং তীণি চ ঞাণসহস্সানি চত্তারি চ ঞাণসতানি হোন্তীতি.

পটিসম্ভিদাকথাৰণ্ণনা নিট্ঠিতা.