৯. দানসুত্তৰণ্ণনা

৯৮. নৰমে দানন্তি দাতব্বং, সৰত্থুকা ৰা চেতনা দানং, সম্পত্তিপরিচ্চাগস্সেতং অধিৰচনং. আমিসদানন্তি চত্তারো পচ্চযা দেয্যভাৰৰসেন আমিসদানং নাম. তে হি তণ্হাদীহি আমসিতব্বতো আমিসন্তি ৰুচ্চন্তি. তেসং ৰা পরিচ্চাগচেতনা আমিসদানং. ধম্মদানন্তি ইধেকচ্চো ‘‘ইমে ধম্মা কুসলা, ইমে ধম্মা অকুসলা, ইমে ধম্মা সাৰজ্জা, ইমে ধম্মা অনৰজ্জা, ইমে ৰিঞ্ঞুগরহিতা, ইমে ৰিঞ্ঞুপ্পসত্থা; ইমে সমত্তা সমাদিন্না অহিতায দুক্খায সংৰত্তন্তি, ইমে হিতায সুখায সংৰত্তন্তী’’তি কুসলাকুসলকম্মপথে ৰিভজন্তো কম্মকম্মৰিপাকে ইধলোকপরলোকে পচ্চক্খতো দস্সেন্তো ৰিয পাকটং করোন্তো অকুসলেহি ধম্মেহি নিৰত্তাপেন্তো, কুসলেসু ধম্মেসু পতিট্ঠাপেন্তো, ধম্মং দেসেতি, ইদং ধম্মদানং. যো পন ‘‘ইমে ধম্মা অভিঞ্ঞেয্যা, ইমে পরিঞ্ঞেয্যা, ইমে পহাতব্বা, ইমে সচ্ছিকাতব্বা, ইমে ভাৰেতব্বা’’তি সচ্চানি ৰিভাৰেন্তো অমতাধিগমায পটিপত্তিধম্মং দেসেতি, ইদং সিখাপ্পত্তং ধম্মদানং নাম. এতদগ্গন্তি এতং অগ্গং. যদিদন্তি যং ইদং ধম্মদানং ৰুত্তং, এতং ইমেসু দ্ৰীসু দানেসু অগ্গং সেট্ঠং উত্তমং. ৰিৰট্টগামিধম্মদানঞ্হি নিস্সায সব্বানত্থতো পরিমুচ্চতি, সকলং ৰট্টদুক্খং অতিক্কমতি. লোকিযং পন ধম্মদানং সব্বেসং দানানং নিদানং সব্বসম্পত্তীনং মূলং. তেনাহ –

‘‘সব্বদানং ধম্মদানং জিনাতি, সব্বরসং ধম্মরসো জিনাতি;

সব্বরতিং ধম্মরতী জিনাতি, তণ্হক্খযো সব্বদুক্খং জিনাতী’’তি. (ধ. প. ৩৫৪) –

অভযদানমেত্থ ধম্মদানেনেৰ সঙ্গহিতন্তি দট্ঠব্বং.

সাধারণভোগিতাধিপ্পাযেন অত্তনা পরিভুঞ্জিতব্বতো চতুপচ্চযতো সযমেৰ অভুঞ্জিত্ৰা পরেসং সংৰিভজনং আমিসসংৰিভাগো. সাধারণভোগিতাধিপ্পাযেনেৰ অত্তনা ৰিদিতস্স অধিগতস্স ধম্মস্স অপ্পোস্সুক্কো অহুত্ৰা পরেসং উপদেসো ধম্মসংৰিভাগো. চতূহি পচ্চযেহি চতূহি চ সঙ্গহৰত্থূহি পরেসং অনুগ্গণ্হনং অনুকম্পনং আমিসানুগ্গহো. ৰুত্তনযেনেৰ ধম্মেন পরেসং অনুগ্গণ্হনং অনুকম্পনং ধম্মানুগ্গহো. সেসং ৰুত্তনযমেৰ.

গাথাসু যমাহু দানং পরমন্তি যং দানং চিত্তখেত্তদেয্যধম্মানং উল়ারভাৰেন পরমং উত্তমং, ভোগসম্পত্তিআদীনং ৰা পূরণতো ফলনতো, পরস্স ৰা লোভমচ্ছরিযাদিকস্স পটিপক্খস্স মদ্দনতো হিংসনতো ‘‘পরম’’ন্তি বুদ্ধা ভগৰন্তো আহু. অনুত্তরন্তি যং দানং চেতনাদিসম্পত্তিযা সাতিসযপৰত্তিযা অগ্গভাৰেন অগ্গৰিপাকত্তা চ উত্তররহিতং অনুত্তরভাৰসাধনং চাতি আহু. যং সংৰিভাগন্তি এত্থাপি ‘‘পরমং অনুত্তর’’ন্তি পদদ্ৰযং আনেত্ৰা যোজেতব্বং. অৰণ্ণযীতি কিত্তযি, ‘‘ভোজনং, ভিক্খৰে, দদমানো দাযকো পটিগ্গাহকানং পঞ্চ ঠানানি দেতী’’তিআদিনা (অ. নি. ৫.৩৭), ‘‘এৰং চে, ভিক্খৰে, সত্তা জানেয্যুং দানসংৰিভাগস্স ৰিপাক’’ন্তিআদিনা (ইতিৰু. ২৬) চ পসংসযি. যথা পন দানং সংৰিভাগো চ পরমং অনুত্তরঞ্চ হোতি, তং দস্সেতুং ‘‘অগ্গম্হী’’তিআদি ৰুত্তং. তত্থ অগ্গম্হীতি সীলাদিগুণৰিসেসযোগেন সেট্ঠে অনুত্তরে পুঞ্ঞক্খেত্তে সম্মাসম্বুদ্ধে অরিযসঙ্ঘে চ. পসন্নচিত্তোতি কম্মফলসদ্ধায রতনত্তযসদ্ধায চ চিত্তং পসাদেন্তো ওকপ্পেন্তো. চিত্তসম্পত্তিযা হি খেত্তসম্পত্তিযা চ পরিত্তেপি দেয্যধম্মে দানং মহানুভাৰং হোতি মহাজুতিকং মহাৰিপ্ফারং. ৰুত্তঞ্হেতং –

‘‘নত্থি চিত্তে পসন্নম্হি, অপ্পকা নাম দক্খিণা;

তথাগতে ৰা সম্বুদ্ধে, অথ ৰা তস্স সাৰকে’’তি. (ৰি. ৰ. ৮০৪; নেত্তি. ৯৫);

ৰিঞ্ঞূতি সপ্পঞ্ঞো. পজানন্তি সম্মদেৰ দানফলং দানানিসংসং পজানন্তো. কো ন যজেথ কালেতি যুত্তপ্পত্তকালে কো নাম দানং ন দদেয্য? সদ্ধা, দেয্যধম্মো, পটিগ্গাহকাতি ইমেসং তিণ্ণং সম্মুখিভূতকালেযেৰ হি দানং সম্ভৰতি, ন অঞ্ঞথা, পটিগ্গাহকানং ৰা দাতুং যুত্তকালে.

এৰং পঠমগাথায আমিসদানসংৰিভাগানুগ্গহে দস্সেত্ৰা ইদানি ধম্মদানসংৰিভাগানুগ্গহে দস্সেতুং ‘‘যে চেৰ ভাসন্তী’’তি দুতিযগাথমাহ. তত্থ উভযন্তি ‘‘ভাসন্তি সুণন্তী’’তি ৰুত্তা দেসকা পটিগ্গাহকাতি উভযং. অযং পনেত্থ সঙ্খেপত্থো – যে সুগতস্স ভগৰতো সাসনে সদ্ধম্মে পসন্নচিত্তা ৰিমুত্তাযতনসীসে ঠত্ৰা দেসেন্তি পটিগ্গণ্হন্তি চ, তেসং দেসকপটিগ্গাহকানং সো ধম্মদানধম্মসংৰিভাগধম্মানুগ্গহসঙ্খাতো অত্থো. পরমত্থসাধনতো পরমো. তণ্হাসংকিলেসাদিসব্বসংকিলেসমলৰিসোধনেন ৰিসুজ্ঝতি. কীদিসানং? যে অপ্পমত্তা সুগতস্স সাসনে. যে চ –

‘‘সব্বপাপস্স অকরণং, কুসলস্স উপসম্পদা;

সচিত্তপরিযোদপনং, এতং বুদ্ধান সাসন’’ন্তি. (দী. নি. ২.৯০; ধ. প. ১৮৩) –

সঙ্খেপতো এৰং পকাসিতে সম্মাসম্বুদ্ধস্স সাসনে ওৰাদে অনুসিট্ঠিযং অপ্পমত্তা অধিসীলসিক্খাদযো সক্কচ্চং সম্পাদেন্তি. তেসং ৰিসুজ্ঝতি, অরহত্তফলৰিসুদ্ধিযা অতিৰিয ৰোদাযতীতি.

নৰমসুত্তৰণ্ণনা নিট্ঠিতা.