৮. অন্ধকরণসুত্তৰণ্ণনা

৮৭. অট্ঠমে অকুসলৰিতক্কাতি অকোসল্লসম্ভূতা ৰিতক্কা. অন্ধকরণাতিআদীসু যস্স সযং উপ্পজ্জন্তি, তং যথাভূতদস্সননিৰারণেন অন্ধং করোন্তীতি অন্ধকরণা. ন পঞ্ঞাচক্খুং করোন্তীতি অচক্খুকরণা. অঞ্ঞাণং করোন্তীতি অঞ্ঞাণকরণা. পঞ্ঞানিরোধিকাতি কম্মস্সকতাপঞ্ঞা, ঝানপঞ্ঞা, ৰিপস্সনাপঞ্ঞাতি ইমা তিস্সো পঞ্ঞা অপ্পৰত্তিকরণেন নিরোধেন্তীতি পঞ্ঞানিরোধিকা. অনিট্ঠফলদাযকত্তা দুক্খসঙ্খাতস্স ৰিঘাতস্স পক্খে ৰত্তন্তীতি ৰিঘাতপক্খিকা. কিলেসনিব্বানং ন সংৰত্তযন্তীতি অনিব্বানসংৰত্তনিকা.

কামৰিতক্কোতি কামপটিসংযুত্তো ৰিতক্কো. সো হি কিলেসকামসহিতো হুত্ৰা ৰত্থুকামেসু পৰত্ততি. ব্যাপাদপটিসংযুত্তো ৰিতক্কো ব্যাপাদৰিতক্কো. ৰিহিংসাপটিসংযুত্তো ৰিতক্কো ৰিহিংসাৰিতক্কো. ইমে দ্ৰে চ সত্তেসুপি সঙ্খারেসুপি উপ্পজ্জন্তি. কামৰিতক্কো হি পিযমনাপে সত্তে ৰা সঙ্খারে ৰা ৰিতক্কেন্তস্স উপ্পজ্জতি, ব্যাপাদৰিতক্কো অপ্পিযে অমনাপে সত্তে ৰা সঙ্খারে ৰা কুজ্ঝিত্ৰা ওলোকনকালতো পট্ঠায যাৰ নাসনা উপ্পজ্জতি, ৰিহিংসাৰিতক্কো সঙ্খারেসু ন উপ্পজ্জতি, সঙ্খারা দুক্খাপেতব্বা নাম নত্থি, ‘‘ইমে সত্তা হঞ্ঞন্তু ৰা বজ্ঝন্তু ৰা উচ্ছিজ্জন্তু ৰা ৰিনস্সন্তু ৰা মা ৰা অহেসু’’ন্তি চিন্তনকালে পন সত্তেসু উপ্পজ্জতি.

ইমেযেৰ পন কামসঙ্কপ্পাদযো. অত্থতো হি কামৰিতক্কাদীনং কামসঙ্কপ্পাদীনঞ্চ নানাকরণং নত্থি, তংসম্পযুত্তা পন সঞ্ঞাদযো কামসঞ্ঞাদযো. কামধাতুআদীনং পন যস্মা পাল়িযং –

‘‘কামপটিসংযুত্তো তক্কো ৰিতক্কো…পে… মিচ্ছাসঙ্কপ্পো, অযং ৰুচ্চতি কামধাতু, সব্বেপি অকুসলা ধম্মা কামধাতু. ব্যাপাদপটিসংযুত্তো তক্কো ৰিতক্কো…পে… মিচ্ছাসঙ্কপ্পো, অযং ৰুচ্চতি ব্যাপাদধাতু. দসসু আঘাতৰত্থূসু চিত্তস্স আঘাতো পটিঘাতো…পে… অনত্তমনতা চিত্তস্স, অযং ৰুচ্চতি ব্যাপাদধাতু. ৰিহিংসাপটিসংযুত্তো তক্কো ৰিতক্কো মিচ্ছাসঙ্কপ্পো, অযং ৰুচ্চতি ৰিহিংসাধাতু. ইধেকচ্চো পাণিনা ৰা লেড্ডুনা ৰা দণ্ডেন ৰা সত্থেন ৰা রজ্জুযা ৰা অঞ্ঞতরঞ্ঞতরেন সত্তে ৰিহেঠেতি, অযং ৰিহিংসাধাতূ’’তি (ৰিভ. ১৮২, ৯১০) –

আগতত্তা ৰিসেসো লব্ভতি.

তত্থ দ্ৰে কথা সব্বসঙ্গাহিকা চ অসম্ভিন্না চ. তত্থ কামধাতুযা গহিতায ইতরা দ্ৰেপি গহিতা নাম হোন্তি. ততো পন নীহরিত্ৰা অযং ব্যাপাদধাতু, অযং ৰিহিংসাধাতূতি দস্সেতীতি অযং সব্বসঙ্গাহিকা নাম. কামধাতুং কথেন্তো পন ভগৰা ব্যাপাদধাতুং ব্যাপাদধাতুট্ঠানে, ৰিহিংসাধাতুং ৰিহিংসাধাতুট্ঠানে ঠপেত্ৰাৰ অৰসেসং কামধাতু নামাতি কথেসীতি অযং অসম্ভিন্নকথা নাম.

সুক্কপক্খে ৰুত্তৰিপরিযাযেন অত্থো ৰেদিতব্বো. নেক্খম্মপটিসংযুত্তো ৰিতক্কো নেক্খম্মৰিতক্কো. সো অসুভপুব্বভাগে কামাৰচরো হোতি, অসুভজ্ঝানে রূপাৰচরো, তং ঝানং পাদকং কত্ৰা উপ্পন্নমগ্গফলকালে লোকুত্তরো. অব্যাপাদপটিসংযুত্তো ৰিতক্কো অব্যাপাদৰিতক্কো. সো মেত্তাপুব্বভাগে কামাৰচরো হোতি, মেত্তাঝানে রূপাৰচরো, তং ঝানং পাদকং কত্ৰা উপ্পন্নমগ্গফলকালে লোকুত্তরো. অৰিহিংসাপটিসংযুত্তো ৰিতক্কো অৰিহিংসাৰিতক্কো. সো করুণাপুব্বভাগে কামাৰচরো, করুণাজ্ঝানে রূপাৰচরো, তং ঝানং পাদকং কত্ৰা উপ্পন্নমগ্গফলকালে লোকুত্তরো. যদা পন অলোভো সীসং হোতি, তদা ইতরে দ্ৰে তদন্ৰাযিকা হোন্তি. যদা মেত্তা সীসং হোতি, তদা ইতরে দ্ৰে তদন্ৰাযিকা হোন্তি. যদা করুণা সীসং হোতি, তদা ইতরে দ্ৰে তদন্ৰাযিকা হোন্তি.

ইমেযেৰ পন নেক্খম্মসঙ্কপ্পাদযো. অত্থতো হি নেক্খম্মৰিতক্কাদীনং নেক্খম্মসঙ্কপ্পাদীনঞ্চ নানাকরণং নত্থি, তংসম্পযুত্তা পন সঞ্ঞাদযো নেক্খম্মসঞ্ঞাদযো. নেক্খম্মধাতুআদীনং পন যস্মা পাল়িযং –

‘‘নেক্খম্মপটিসংযুত্তো তক্কো ৰিতক্কো সঙ্কপ্পো, অযং ৰুচ্চতি নেক্খম্মধাতু, সব্বেপি কুসলা ধম্মা নেক্খম্মধাতু. অব্যাপাদপটিসংযুত্তো তক্কো ৰিতক্কো সঙ্কপ্পো, অযং ৰুচ্চতি অব্যাপাদধাতু. যা সত্তেসু মেত্তি মেত্তাযনা মেত্তাচেতোৰিমুত্তি, অযং ৰুচ্চতি অব্যাপাদধাতু. অৰিহিংসাপটিসংযুত্তো তক্কো ৰিতক্কো সঙ্কপ্পো – অযং ৰুচ্চতি অৰিহিংসাধাতু. যা সত্তেসু করুণা করুণাযনা করুণাচেতোৰিমুত্তি – অযং ৰুচ্চতি অৰিহিংসাধাতূ’’তি. (ৰিভ. ১৮২) –

আগতত্তা ৰিসেসো লব্ভতি. ইধাপি সব্বসঙ্গাহিকা, অসম্ভিন্নাতি দ্ৰে কথা ৰুত্তনযেনেৰ ৰেদিতব্বা. সেসং সুৰিঞ্ঞেয্যমেৰ.

গাথাসু ৰিতক্কযেতি ৰিতক্কেয্য. নিরাকরেতি অত্তনো সন্তানতো নীহরেয্য ৰিনোদেয্য, পজহেয্যাতি অত্থো. সৰে ৰিতক্কানি ৰিচারিতানি, সমেতি ৰুট্ঠীৰ রজং সমূহতন্তি যথা নাম গিম্হানং পচ্ছিমে মাসে পথৰিযং সমূহতং সমন্ততো উট্ঠিতং রজং মহতো অকালমেঘস্স ৰস্সতো ৰুট্ঠি ঠানসো ৰূপসমেতি, এৰমেৰ সো যোগাৰচরো ৰিতক্কানি মিচ্ছাৰিতক্কে চ ৰিচারিতানি তংসম্পযুত্তৰিচারে চ সমেতি ৰূপসমেতি সমুচ্ছিন্দতি. তথাভূতো চ ৰিতক্কূপসমেন চেতসা সব্বেসং মিচ্ছাৰিতক্কানং উপসমনতো ৰিতক্কূপসমেন অরিযমগ্গচিত্তেন. ইধেৰ দিট্ঠেৰ ধম্মে, সন্তিপদং নিব্বানং, সমজ্ঝগা সমধিগতো হোতীতি.

অট্ঠমসুত্তৰণ্ণনা নিট্ঠিতা.