৬. অসুভানুপস্সীসুত্তৰণ্ণনা

৮৫. ছট্ঠে অসুভানুপস্সীতি অসুভং অনুপস্সন্তা দ্ৰত্তিংসাকারৰসেন চেৰ উদ্ধুমাতকাদীসু গহিতনিমিত্তস্স উপসংহরণৰসেন চ কাযস্মিং অসুভং অসুভাকারং অনুপস্সকা হুত্ৰা ৰিহরথ. আনাপানস্সতীতি আনাপানে সতি, তং আরব্ভ পৰত্তা সতি, অস্সাসপস্সাসপরিগ্গাহিকা সতীতি অত্থো. ৰুত্তঞ্হেতং ‘‘আনন্তি অস্সাসো, নো পস্সাসো. পানন্তি পস্সাসো, নো অস্সাসো’’তিআদি (পটি. ম. ১.১৬০).

ৰোতি তুম্হাকং. অজ্ঝত্তন্তি ইধ গোচরজ্ঝত্তং অধিপ্পেতং. পরিমুখন্তি অভিমুখং. সূপট্ঠিতাতি সুট্ঠু উপট্ঠিতা. ইদং ৰুত্তং হোতি – আনাপানস্সতি চ তুম্হাকং কম্মট্ঠানাভিমুখং সুট্ঠু উপট্ঠিতা হোতূতি. অথ ৰা পরিমুখন্তি পরিগ্গহিতনিয্যানং. ৰুত্তঞ্হেতং পটিসম্ভিদাযং – ‘‘পরীতি পরিগ্গহট্ঠো, মুখন্তি নিয্যানট্ঠো, সতীতি উপট্ঠানট্ঠো, তেন ৰুচ্চতি পরিমুখং সতি’’ন্তি (পটি. ম. ১.১৬৪). ইমিনা চতুসতিপট্ঠানসোল়সপ্পভেদা আনাপানস্সতিকম্মট্ঠানভাৰনা দস্সিতাতি দট্ঠব্বা.

এৰং সঙ্খেপেনেৰ রাগচরিতৰিতক্কচরিতানং সপ্পাযং পটিকূলমনসিকারকাযানুপস্সনাৰসেন সমথকম্মট্ঠানং ৰিপস্সনাকম্মট্ঠানঞ্চ উপদিসিত্ৰা ইদানি সুদ্ধৰিপস্সনাকম্মট্ঠানমেৰ দস্সেন্তো ‘‘সব্বসঙ্খারেসু অনিচ্চানুপস্সিনো ৰিহরথা’’তি আহ. তত্থ অনিচ্চং, অনিচ্চলক্খণং, অনিচ্চানুপস্সনা, অনিচ্চানুপস্সীতি ইদং চতুক্কং ৰেদিতব্বং. হুত্ৰা, অভাৰতো, উদযব্বযযোগতো, তাৰকালিকতো, নিচ্চপটিক্খেপতো চ খন্ধপঞ্চকং অনিচ্চং নাম. তস্স যো হুত্ৰা অভাৰাকারো, তং অনিচ্চলক্খণং নাম. তং আরব্ভ পৰত্তা ৰিপস্সনা অনিচ্চানুপস্সনা. তং অনিচ্চন্তি ৰিপস্সকো অনিচ্চানুপস্সী. এত্থ চ একাদসৰিধা অসুভকথা পঠমজ্ঝানং পাপেত্ৰা, সোল়সৰত্থুকা চ আনাপানকথা চতুত্থজ্ঝানং পাপেত্ৰা, ৰিপস্সনাকথা চ ৰিত্থারতো ৰত্তব্বা, সা পন সব্বাকারতো ৰিসুদ্ধিমগ্গে (ৰিসুদ্ধি. ২.৭৩৭-৭৪০) কথিতাতি তত্থ ৰুত্তনযেনেৰ ৰেদিতব্বা.

ইদানি অসুভানুপস্সনাদীহি নিপ্ফাদেতব্বং ফলৰিসেসং দস্সেতুং ‘‘অসুভানুপস্সীন’’ন্তিআদিমাহ. তত্থ সুভায ধাতুযাতি সুভভাৰে, সুভনিমিত্তেতি অত্থো. রাগানুসযোতি সুভারম্মণে উপ্পজ্জনারহো কামরাগানুসযো. সো কেসাদীসু উদ্ধুমাতকাদীসু ৰা অসুভানুপস্সীনং অসুভনিমিত্তং গহেত্ৰা তত্থ পঠমজ্ঝানং নিব্বত্তেত্ৰা তং পাদকং কত্ৰা ৰিপস্সনং পট্ঠপেত্ৰা অধিগতেন অনাগামিমগ্গেন পহীযতি, সব্বসো সমুচ্ছিন্দীযতীতি অত্থো. ৰুত্তঞ্হেতং ‘‘অসুভা ভাৰেতব্বা কামরাগস্স পহানাযা’’তি (অ. নি. ৯.৩; উদা. ৩১). বাহিরাতি বহিদ্ধাৰত্থুকত্তা অনত্থাৰহত্তা চ বাহিরা বহিভূতা. ৰিতক্কাসযাতি কামসঙ্কপ্পাদিমিচ্ছাৰিতক্কা. তে হি অপ্পহীনা আসযানুগতা সতি পচ্চযসমৰাযে উপ্পজ্জনতো ৰিতক্কাসযাতি ৰুত্তা. কামৰিতক্কো চেত্থ কামরাগগ্গহণেন গহিতো এৰাতি তদৰসেসা ৰিতক্কা এৰ ৰুত্তাতি ৰেদিতব্বা. ৰিঘাতপক্খিকাতি দুক্খভাগিযা, ইচ্ছাৰিঘাতনিব্বত্তনকা ৰা. তে ন হোন্তীতি তে পহীযন্তি. ব্যাপাদৰিতক্কো, ৰিহিংসাৰিতক্কো, ঞাতিৰিতক্কো, জনপদৰিতক্কো, অমরাৰিতক্কো, অনৰঞ্ঞত্তিপটিসংযুত্তো ৰিতক্কো, লাভসক্কারসিলোকপটিসংযুত্তো ৰিতক্কো, পরানুদ্দযতাপটিসংযুত্তো ৰিতক্কোতি অট্ঠ, কামৰিতক্কেন সদ্ধিং নৰৰিধা মহাৰিতক্কা আনাপানস্সতিসমাধিনা তন্নিস্সিতায চ ৰিপস্সনায পুব্বভাগে ৰিক্খম্ভিতা. তং পাদকং কত্ৰা অধিগতেন অরিযমগ্গেন যথারহং অনৰসেসতো পহীযন্তি. ৰুত্তম্পি চেতং ‘‘আনাপানস্সতি ভাৰেতব্বা ৰিতক্কুপচ্ছেদাযা’’তি (অ. নি. ৯.৩; উদা. ৩১).

যা অৰিজ্জা, সা পহীযতীতি যা সচ্চসভাৰপটিচ্ছাদিনী সব্বানত্থকারী সকলস্স ৰট্টদুক্খস্স মূলভূতা অৰিজ্জা, সা অনিচ্চানুপস্সীনং ৰিহরতং সমুচ্ছিজ্জতি. ইদং কির ভগৰতা অনিচ্চাকারতো ৰুট্ঠিতস্স সুক্খৰিপস্সকখীণাসৰস্স ৰসেন ৰুত্তং. তস্সাযং সঙ্খেপত্থো – তেভূমকেসু সব্বসঙ্খারেসু অনিচ্চাদিতো সম্মসনং পট্ঠপেত্ৰা ৰিপস্সন্তানং যদা অনিচ্চন্তি পৰত্তমানা ৰুট্ঠানগামিনীৰিপস্সনা মগ্গেন ঘটীযতি, অনুক্কমেন অরহত্তমগ্গো উপ্পজ্জতি, তেসং অনিচ্চানুপস্সীনং ৰিহরতং অৰিজ্জা অনৰসেসতো পহীযতি, অরহত্তমগ্গৰিজ্জা উপ্পজ্জতীতি. অনিচ্চানুপস্সীনং ৰিহরতন্তি ইদং অনিচ্চলক্খণস্স তেসং পাকটভাৰতো ইতরস্স লক্খণদ্ৰযস্স গহণে উপাযভাৰতো ৰা ৰুত্তং, ন পন একস্সেৰ লক্খণস্স অনুপস্সিতব্বতো. ৰুত্তঞ্হেতং ‘‘যদনিচ্চং তং দুক্খং, যং দুক্খং তদনত্তা’’তি (সং. নি. ৩.১৫). অপরম্পি ৰুত্তং ‘‘অনিচ্চসঞ্ঞিনো হি, মেঘিয, অনত্তসঞ্ঞা সণ্ঠাতি, অনত্তসঞ্ঞী অস্মিমানসমুগ্ঘাতং পাপুণাতী’’তি.

গাথাসু আনাপানে পটিস্সতোতি আনাপাননিমিত্তস্মিং পটি পটি সতো, উপট্ঠিতস্সতীতি অত্থো. পস্সন্তি আসৰক্খযঞাণচক্খুনা সঙ্খারূপসমং নিব্বানং পস্সন্তো. আতাপী সব্বদাতি অন্তরাৰোসানং অনাপজ্জিত্ৰা অসুভানুপস্সনাদীসু সততং আতাপী যুত্তপ্পযুত্তো, ততো এৰ যতো ৰাযমমানো, নিযতো ৰা সম্মত্তনিযামেন তত্থ সব্বসঙ্খারসমথে নিব্বানে অরহত্তফলৰিমুত্তিযা ৰিমুচ্চতি. সেসং ৰুত্তনযমেৰ.

ছট্ঠসুত্তৰণ্ণনা নিট্ঠিতা.