২. সক্কারসুত্তৰণ্ণনা

৮১. দুতিযে সক্কারেনাতি সক্কারেন হেতুভূতেন, অথ ৰা সক্কারেনাতি সক্কারহেতুনা, সক্কারহেতুকেন ৰা. সক্কারঞ্হি নিস্সায ইধেকচ্চে পুগ্গলা পাপিচ্ছা ইচ্ছাপকতা ইচ্ছাচারে ঠত্ৰা ‘‘সক্কারং নিব্বত্তেস্সামা’’তি অনেকৰিহিতং অনেসনং অপ্পতিরূপং আপজ্জিত্ৰা ইতো চুতা অপাযেসু নিব্বত্তন্তি, অপরে যথাসক্কারং লভিত্ৰা তন্নিমিত্তং মানমদমচ্ছরিযাদিৰসেন পমাদং আপজ্জিত্ৰা ইতো চুতা অপাযেসু নিব্বত্তন্তি. যং সন্ধায ৰুত্তং – ‘‘সক্কারেন অভিভূতা পরিযাদিন্নচিত্তা’’তি. তত্থ অভিভূতাতি অজ্ঝোত্থটা. পরিযাদিন্নচিত্তাতি খেপিতচিত্তা, ইচ্ছাচারেন মানমদাদিনা চ খযং পাপিতকুসলচিত্তা. অথ ৰা পরিযাদিন্নচিত্তাতি পরিতো আদিন্নচিত্তা, ৰুত্তপ্পকারেন অকুসলকোট্ঠাসেন যথা কুসলচিত্তস্স উপ্পত্তিৰারো ন হোতি, এৰং সমন্ততো গহিতচিত্তসন্তানাতি অত্থো. অসক্কারেনাতি হীল়েত্ৰা পরিভৰিত্ৰা পরেহি অত্তনি পৰত্তিতেন অসক্কারেন হেতুনা, অসক্কারহেতুকেন ৰা মানাদিনা. সক্কারেন চ অসক্কারেন চাতি কেহিচি পৰত্তিতেন সক্কারেন কেহিচি পৰত্তিতেন অসক্কারেন চ. যে হি কেহিচি পঠমং সক্কতা হুত্ৰা তেহিযেৰ অসারভাৰং ঞত্ৰা পচ্ছা অসক্কতা হোন্তি, তাদিসে সন্ধায ৰুত্তং ‘‘সক্কারেন চ অসক্কারেন চা’’তি.

এত্থ সক্কারেন অভিভূতা দেৰদত্তাদযো নিদস্সেতব্বা. ৰুত্তম্পি চেতং –

‘‘ফলং ৰে কদলিং হন্তি, ফলং ৰেল়ুং ফলং নল়ং;

সক্কারো কাপুরিসং হন্তি, গব্ভো অস্সতরিং যথা’’তি. (সং. নি. ১.১৮৩; অ. নি. ৪.৬৮; চূল়ৰ. ৩৩৫);

সাধূনং উপরি কতেন অসক্কারেন অভিভূতা দণ্ডকীরাজকালিঙ্গরাজমজ্ঝরাজাদযো নিদস্সেতব্বা. ৰুত্তম্পি চেতং –

‘‘কিসঞ্হি ৰচ্ছং অৰকিরিয দণ্ডকী,

উচ্ছিন্নমূলো সজনো সরট্ঠো;

কুক্কুল়নামে নিরযম্হি পচ্চতি,

তস্স ফুলিঙ্গানি পতন্তি কাযে.

‘‘যো সঞ্ঞতে পব্বজিতে অৰঞ্চযি,

ধম্মং ভণন্তে সমণে অদূসকে;

তং নাল়িকেরং সুনখা পরত্থ,

সঙ্গম্ম খাদন্তি ৰিফন্দমানং’’. (জা. ২.১৭.৭০-৭১);

‘‘উপহচ্চ মনং মজ্ঝো, মাতঙ্গস্মিং যসস্সিনে;

সপারিসজ্জো উচ্ছিন্নো, মজ্ঝারঞ্ঞং তদা অহূ’’তি. (জা. ২.১৯.৯৬);

সক্কারেন চ অসক্কারেন চ অভিভূতা অঞ্ঞতিত্থিযা নাটপুত্তাদযো নিদস্সেতব্বা.

গাথাসু উভযন্তি উভযেন সক্কারেন চ অসক্কারেন চ. সমাধি ন ৰিকম্পতীতি ন চলতি, একগ্গভাৰেন তিট্ঠতি. কস্স পন ন চলতীতি আহ ‘‘অপ্পমাদৰিহারিনো’’তি. যো পমাদকরধম্মানং রাগাদীনং সুট্ঠু পহীনত্তা অপ্পমাদৰিহারী অরহা, তস্স. সো হি লোকধম্মেহি ন ৰিকম্পতি. সুখুমদিট্ঠিৰিপস্সকন্তি ফলসমাপত্তিঅত্থং সুখুমায দিট্ঠিযা পঞ্ঞায অভিণ্হং পৰত্তৰিপস্সনত্তা সুখুমদিট্ঠিৰিপস্সকং. উপাদানক্খযারামন্তি চতুন্নং উপাদানানং খযং পরিযোসানভূতং অরহত্তফলং আরমিতব্বং এতস্সাতি উপাদানক্খযারামং. সেসং ৰুত্তনযমেৰ.

দুতিযসুত্তৰণ্ণনা নিট্ঠিতা.