৫. দারুসাকটিকপুত্তৰত্থু

সুপ্পবুদ্ধন্তি ইমং ধম্মদেসনং সত্থা ৰেল়ুৰনে ৰিহরন্তো দারুসাকটিকস্স পুত্তং আরব্ভ কথেসি.

রাজগহস্মিঞ্হি সম্মাদিট্ঠিকপুত্তো মিচ্ছাদিট্ঠিকপুত্তোতি দ্ৰে দারকা অভিক্খণং গুল়কীল়ং কীল়ন্তি. তেসু সম্মাদিট্ঠিকপুত্তো গুল়ং খিপমানো বুদ্ধানুস্সতিং আৰজ্জেত্ৰা ‘‘নমো বুদ্ধস্সা’’তি ৰত্ৰা ৰত্ৰা গুল়ং খিপতি. ইতরো তিত্থিযগুণে উদ্দিসিত্ৰা ‘‘নমো অরহন্তান’’ন্তি ৰত্ৰা ৰত্ৰা খিপতি. তেসু সম্মাদিট্ঠিকস্স পুত্তো জিনাতি, ইতরো পন পরাজযতি. সো তস্স কিরিযং দিস্ৰা ‘‘অযং এৰং অনুস্সরিত্ৰা এৰং ৰত্ৰা গুল়ং খিপন্তো মমং জিনাতি, অহম্পি এৰরূপং করিস্সামী’’তি বুদ্ধানুস্সতিযং পরিচযমকাসি. অথেকদিৰসং তস্স পিতা সকটং যোজেত্ৰা দারূনং অত্থায গচ্ছন্তো তম্পি দারকং আদায গন্ত্ৰা অটৰিযং দারূনং সকটং পূরেত্ৰা আগচ্ছন্তো বহিনগরে সুসানসামন্তে উদকফাসুকট্ঠানে গোণে মোচেত্ৰা ভত্তৰিস্সগ্গমকাসি. অথস্স তে গোণা সাযন্হসমযে নগরং পৰিসন্তেন গোগণেন সদ্ধিং নগরমেৰ পৰিসিংসু. সাকটিকোপি গোণে অনুবন্ধন্তো নগরং পৰিসিত্ৰা সাযং গোণে দিস্ৰা আদায নিক্খমন্তো দ্ৰারং ন সম্পাপুণি. তস্মিঞ্হি অসম্পত্তেযেৰ দ্ৰারং পিহিতং.

অথস্স পুত্তো এককোৰ রত্তিভাগে সকটস্স হেট্ঠা নিপজ্জিত্ৰা নিদ্দং ওক্কমি. রাজগহং পন পকতিযাপি অমনুস্সবহুলং. অযঞ্চ সুসানসন্তিকে নিপন্নো. তত্থ নং দ্ৰে অমনুস্সা পস্সিংসু. একো সাসনস্স পটিকণ্ডকো মিচ্ছাদিট্ঠিকো, একো সম্মাদিট্ঠিকো. তেসু মিচ্ছাদিট্ঠিকো আহ – ‘‘অযং নো ভক্খো, ইমং খাদিস্সামা’’তি. ইতরো ‘‘অলং মা তে রুচ্চী’’তি নিৰারেতি. সো তেন নিৰারিযমানোপি তস্স ৰচনং অনাদিযিত্ৰা দারকং পাদেসু গহেত্ৰা আকড্ঢি. সো বুদ্ধানুস্সতিযা পরিচিতত্তা তস্মিং খণে ‘‘নমো বুদ্ধস্সা’’তি আহ. অমনুস্সো মহাভযভীতো পটিক্কমিত্ৰা অট্ঠাসি. অথ নং ইতরো ‘‘অম্হেহি অকিচ্চং কতং, দণ্ডকম্মং তস্স করোমা’’তি ৰত্ৰা তং রক্খমানো অট্ঠাসি. মিচ্ছাদিট্ঠিকো নগরং পৰিসিত্ৰা রঞ্ঞো ভোজনপাতিং পূরেত্ৰা ভোজনং আহরি. অথ নং উভোপি তস্স মাতাপিতরো ৰিয হুত্ৰা উপট্ঠাপেত্ৰা ভোজেত্ৰা ‘‘ইমানি অক্খরানি রাজাৰ পস্সতু, মা অঞ্ঞো’’তি তং পৰত্তিং পকাসেন্তা যক্খানুভাৰেন ভোজনপাতিযং অক্খরানি ছিন্দিত্ৰা পাতিং দারুসকটে পক্খিপিত্ৰা সব্বরত্তিং আরক্খং কত্ৰা পক্কমিংসু.

পুনদিৰসে ‘‘রাজকুলতো চোরেহি ভোজনভণ্ডং অৰহট’’ন্তি কোলাহলং করোন্তা দ্ৰারানি পিদহিত্ৰা ওলোকেন্তা তত্থ অপস্সন্তা নগরা নিক্খমিত্ৰা ইতো চিতো চ ওলোকেন্তা দারুসকটে সুৰণ্ণপাতিং দিস্ৰা ‘‘অযং চোরো’’তি তং দারকং গহেত্ৰা রঞ্ঞো দস্সেসুং. রাজা অক্খরানি দিস্ৰা ‘‘কিং এতং, তাতা’’তি পুচ্ছিত্ৰা ‘‘নাহং, দেৰ, জানামি, মাতাপিতরো মে আগন্ত্ৰা রত্তিং ভোজেত্ৰা রক্খমানা অট্ঠংসু, অহম্পি মাতাপিতরো মং রক্খন্তীতি নিব্ভযোৰ নিদ্দং উপগতো. এত্তকং অহং জানামী’’তি. অথস্স মাতাপিতরোপি তং ঠানং আগমংসু. রাজা তং পৰত্তিং ঞত্ৰা তে তযোপি জনে আদায সত্থু সন্তিকং গন্ত্ৰা সব্বং আরোচেত্ৰা ‘‘কিং নু খো, ভন্তে, বুদ্ধানুস্সতি এৰ রক্খা হোতি, উদাহু ধম্মানুস্সতিআদযোপী’’তি পুচ্ছি. অথস্স সত্থা, ‘‘মহারাজ, ন কেৰলং বুদ্ধানুস্সতিযেৰ রক্খা, যেসং পন ছব্বিধেন চিত্তং সুভাৰিতং, তেসং অঞ্ঞেন রক্খাৰরণেন ৰা মন্তোসধেহি ৰা কিচ্চং নত্থী’’তি ৰত্ৰা ছ ঠানানি দস্সেন্তো ইমা গাথা অভাসি.

২৯৬. ‘‘সুপ্পবুদ্ধং পবুজ্ঝন্তি, সদা গোতমসাৰকা;

যেসং দিৰা চ রত্তো চ, নিচ্চং বুদ্ধগতা সতি.

২৯৭. ‘‘সুপ্পবুদ্ধং পবুজ্ঝন্তি, সদা গোতমসাৰকা;

যেসং দিৰা চ রত্তো চ, নিচ্চং ধম্মগতা সতি.

২৯৮. ‘‘সুপ্পবুদ্ধং পবুজ্ঝন্তি, সদা গোতমসাৰকা;

যেসং দিৰা চ রত্তো চ, নিচ্চং সঙ্ঘগতা সতি.

২৯৯. ‘‘সুপ্পবুদ্ধং পবুজ্ঝন্তি, সদা গোতমসাৰকা;

যেসং দিৰা চ রত্তো চ, নিচ্চং কাযগতা সতি.

৩০০. ‘‘সুপ্পবুদ্ধং পবুজ্ঝন্তি, সদা গোতমসাৰকা;

যেসং দিৰা চ রত্তো চ, অহিংসায রতো মনো.

৩০১. ‘‘সুপ্পবুদ্ধং পবুজ্ঝন্তি, সদা গোতমসাৰকা;

যেসং দিৰা চ রত্তো চ, ভাৰনায রতো মনো’’তি.

তত্থ সুপ্পবুদ্ধং পবুজ্ঝন্তীতি বুদ্ধগতং সতিং গহেত্ৰা সুপন্তা, গহেত্ৰাযেৰ চ পবুজ্ঝন্তা সুপ্পবুদ্ধং পবুজ্ঝন্তি নাম. সদা গোতমসাৰকাতি গোতমগোত্তস্স বুদ্ধস্স সৰনন্তে জাতত্তা তস্সেৰ অনুসাসনিযা সৰনতায গোতমসাৰকা. বুদ্ধগতা সতীতি যেসং ‘‘ইতিপি সো ভগৰা’’তিআদিপ্পভেদে বুদ্ধগুণে আরব্ভ উপ্পজ্জমানা সতি নিচ্চকালং অত্থি, তে সদাপি সুপ্পবুদ্ধং পবুজ্ঝন্তীতি অত্থো. তথা অসক্কোন্তা পন একদিৰসং তীসু কালেসু দ্ৰীসু কালেসু একস্মিম্পি কালে বুদ্ধানুস্সতিং মনসি করোন্তা সুপ্পবুদ্ধং পবুজ্ঝন্তিযেৰ নাম. ধম্মগতা সতীতি ‘‘স্ৰাখাতো ভগৰতা ধম্মো’’তিআদিপ্পভেদে ধম্মগুণে আরব্ভ উপ্পজ্জমানা সতি. সঙ্ঘগতা সতীতি ‘‘সুপ্পটিপন্নো ভগৰতো সাৰকসঙ্ঘো’’তিআদিপ্পভেদে সঙ্ঘগুণে আরব্ভ উপ্পজ্জমানা সতি. কাযগতা সতীতি দ্ৰত্তিংসাকারৰসেন ৰা নৰসিৰথিকাৰসেন ৰা চতুধাতুৰৰত্থানৰসেন ৰা অজ্ঝত্তনীলকসিণাদিরূপজ্ঝানৰসেন ৰা উপ্পজ্জমানা সতি. অহিংসায রতোতি ‘‘সো করুণাসহগতেন চেতসা একং দিসং ফরিত্ৰা ৰিহরতী’’তি (ৰিভ. ৬৪২) এৰং ৰুত্তায করুণাভাৰনায রতো. ভাৰনাযাতি মেত্তাভাৰনায. কিঞ্চাপি হেট্ঠা করুণাভাৰনায ৰুত্তত্তা ইধ সব্বাপি অৰসেসা ভাৰনা নাম, ইধ পন মেত্তাভাৰনাৰ অধিপ্পেতা. সেসং পঠমগাথায ৰুত্তনযেনেৰ ৰেদিতব্বং.

দেসনাৰসানে দারকো সদ্ধিং মাতাপিতূহি সোতাপত্তিফলে পতিট্ঠহি. পচ্ছা পন পব্বজিত্ৰা সব্বেপি অরহত্তং পাপুণিংসু, সম্পত্তানম্পি সাত্থিকা ধম্মদেসনা অহোসীতি.

দারুসাকটিকপুত্তৰত্থু পঞ্চমং.