৮. নিস্সযপচ্চযনিদ্দেসৰণ্ণনা

৮. নিস্সযপচ্চযনিদ্দেসে সহজাতপচ্চযনিদ্দেসস্স পুরিমানং পঞ্চন্নং কোট্ঠাসানং ৰসেন সহজাতনিস্সযনযং দস্সেত্ৰা পুন ছট্ঠেন কোট্ঠাসেন পুরেজাতনিস্সযনযং দস্সেতুং চক্খাযতনং চক্খুৰিঞ্ঞাণধাতুযাতিআদি আরদ্ধং. তত্থ যং রূপং নিস্সাযাতি ৰত্থুরূপং সন্ধায ৰুত্তং. তঞ্হি নিস্সায তিৰিধা মনোধাতু, ঠপেত্ৰা অরূপৰিপাকং দ্ৰাসত্ততিৰিধা মনোৰিঞ্ঞাণধাতূতি ইমানি পঞ্চসত্ততি চিত্তানি ৰত্তন্তীতি অযং তাৰেত্থ পাল়িৰণ্ণনা. অযম্পি নিস্সযপচ্চযো জাতিৰসেন কুসলাদিভেদতো পঞ্চধাৰ ভিজ্জতি. তত্থ কুসলো ভূমিতো চতুব্বিধোৰ অকুসলো একৰিধো ৰিপাকো চতুব্বিধো, কিরিযসঙ্খাতো তিৰিধো, রূপং একৰিধমেৰাতি এৰমেত্থ নানপ্পকারভেদতো ৰিঞ্ঞাতব্বো ৰিনিচ্ছযো.

এৰং ভিন্নে পনেত্থ চতুভূমকম্পি কুসলং পঞ্চৰোকারে সম্পযুত্তক্খন্ধানঞ্চেৰ চিত্তসমুট্ঠানরূপস্স চ নিস্সযপচ্চযেন পচ্চযো হোতি. তথা অকুসলং. যং পনেত্থ আরুপ্পে উপ্পজ্জতি, তং অরূপধম্মানঞ্ঞেৰ নিস্সযপচ্চযো হোতি. কামাৰচররূপাৰচরৰিপাকং পৰত্তে সম্পযুত্তধম্মানঞ্চেৰ চিত্তসমুট্ঠানরূপস্স চ, পটিসন্ধিযং কটত্তারূপস্সাপি নিস্সযপচ্চযো হোতি. অরূপাৰচরৰিপাকং সম্পযুত্তক্খন্ধানংযেৰ হোতি. লোকুত্তরৰিপাকং পঞ্চৰোকারে; সম্পযুত্তকানঞ্চেৰ চিত্তসমুট্ঠানরূপস্স চ, চতুৰোকারে অরূপস্সেৰ নিস্সযপচ্চযো হোতি. কামাৰচরঅরূপাৰচরকিরিযা পঞ্চৰোকারে সম্পযুত্তকানঞ্চেৰ চিত্তসমুট্ঠানরূপস্স চ নিস্সযপচ্চযো হোতি, চতুৰোকারে অরূপানঞ্ঞেৰ. রূপাৰচরকিরিযা সম্পযুত্তকানঞ্চেৰ চিত্তসমুট্ঠানরূপস্স চ একন্তেন নিস্সযপচ্চযো হোতি.

চতুসমুট্ঠানিকরূপস্স চ কম্মসমুট্ঠানরূপে একং মহাভূতং তিণ্ণং, তীণি একস্স, দ্ৰে দ্ৰিন্নং মহাভূতানং, মহাভূতা উপাদারূপানং, ৰত্থুরূপং পঞ্চৰোকারভৰে চতুভূমককুসলস্স, অকুসলস্স, ঠপেত্ৰা আরুপ্পৰিপাকঞ্চেৰ দ্ৰে পঞ্চৰিঞ্ঞাণানি চ সেসতেভূমকৰিপাকস্স, তেভূমককিরিযস্সাতি ইমেসং চতুন্নং ধম্মরাসীনং নিস্সযপচ্চযো হোতি. চক্খাযতনাদীনি পঞ্চ সসম্পযুত্তানং চক্খুৰিঞ্ঞাণাদীনং নিস্সযপচ্চযো হোতি. উতুচিত্তাহারসমুট্ঠানেসু পন মহাভূতা মহাভূতানঞ্চেৰ উপাদারূপস্স চ নিস্সযপচ্চযেন পচ্চযোতি এৰমেত্থ পচ্চযুপ্পন্নতোপি ৰিঞ্ঞাতব্বো ৰিনিচ্ছযোতি.

নিস্সযপচ্চযনিদ্দেসৰণ্ণনা.