৭. অঞ্ঞমঞ্ঞপচ্চযনিদ্দেসৰণ্ণনা

৭. অঞ্ঞমঞ্ঞপচ্চযনিদ্দেসে সহজাতপচ্চযনিদ্দেসস্স পুরিমানং তিণ্ণং কোট্ঠাসানং ৰসেন পাল়ি আগতা. তস্সা তত্থ ৰুত্তসদিসাৰ ৰণ্ণনাতি পুন ন গহিতা. অযম্পি চ অঞ্ঞমঞ্ঞপচ্চযো জাতিৰসেন কুসলো অকুসলো ৰিপাকো কিরিযং রূপন্তি পঞ্চধা ভিন্নো. তত্থ কুসলো ভূমিতো চতুব্বিধো. সব্বং পুরিমসদিসমেৰাতি এৰমেত্থ নানপ্পকারভেদতো ৰিঞ্ঞাতব্বো ৰিনিচ্ছযো.

এৰং ভিন্নে পনেত্থ সব্বম্পি চতুভূমকং কুসলং অত্তনা সম্পযুত্তধম্মানং অঞ্ঞমঞ্ঞপচ্চযেন পচ্চযো. তথা অকুসলং. ৰিপাকে পন কামাৰচররূপাৰচরৰিপাকং পটিসন্ধিযং ৰত্থুরূপস্স, পৰত্তে সম্পযুত্তধম্মানঞ্ঞেৰ. অরূপাৰচরলোকুত্তরৰিপাকং অত্তনা সম্পযুত্তধম্মানঞ্ঞেৰ অঞ্ঞমঞ্ঞপচ্চযেন পচ্চযো. সব্বম্পি কিরিযং সম্পযুত্তধম্মানঞ্ঞেৰ অঞ্ঞমঞ্ঞপচ্চযেন পচ্চযো. চতুসমুট্ঠানিকরূপস্স কম্মসমুট্ঠানে একং মহাভূতং তিণ্ণং, তীণি একস্স, দ্ৰে দ্ৰিন্নং মহাভূতানং অঞ্ঞমঞ্ঞপচ্চযেন পচ্চযো. কামাৰচররূপাৰচরপটিসন্ধিযং ৰত্থুরূপং ৰিপাকক্খন্ধানং অঞ্ঞমঞ্ঞপচ্চযেন পচ্চযো. উতুচিত্তাহারসমুট্ঠানেসু মহাভূতানেৰ মহাভূতানং অঞ্ঞমঞ্ঞপচ্চযেন পচ্চযোতি এৰমেত্থ পচ্চযুপ্পন্নতোপি ৰিঞ্ঞাতব্বো ৰিনিচ্ছযোতি.

অঞ্ঞমঞ্ঞপচ্চযনিদ্দেসৰণ্ণনা.