৪. পচ্চনীযানুলোমৰণ্ণনা

৪৯-৫২. ইদানি পচ্চনীযানুলোমং হোতি. তং দস্সেতুং সিযা কুসলং ধম্মং পটিচ্চ কুসলো ধম্মো উপ্পজ্জেয্য নহেতুপচ্চযা আরম্মণপচ্চযাতিআদি আরদ্ধং. তত্থ অনুলোমপচ্চনীযপুচ্ছাহি সমপ্পমাণো এৰ পুচ্ছাপরিচ্ছেদো. একমূলকাদীসু চেত্থ যা পুচ্ছা পাল়িযং আগতা, যা চ ন আগতা, তা সব্বা হেট্ঠা ৰুত্তনযানুসারেনেৰ ৰেদিতব্বা.

তিকঞ্চ পট্ঠানৰরং…পে… ছ পচ্চনীযানুলোমম্হি নযা সুগম্ভীরাতি এত্থাপি হেট্ঠা ৰুত্তনযেনেৰ দ্ৰে পচ্চযানুলোমানি – ধম্মপচ্চনীযানুলোমং পচ্চযপচ্চনীযানুলোমঞ্চ. তত্থ ‘‘কুসলা ধম্মা’’তি এৰং অভিধম্মমাতিকাপদেহি সঙ্গহিতানং ধম্মানং ‘‘নকুসলং ধম্মং পটিচ্চ কুসলো ধম্মো’’তি পচ্চনীযানুলোমদেসনাৰসেন পৰত্তং ধম্মপচ্চনীযানুলোমং নাম. ‘‘নহেতুপচ্চযা আরম্মণপচ্চযা’’তি এৰং চতুৰীসতিযা পচ্চযেসু লব্ভমানপদানং পচ্চযপচ্চনীযানুলোমদেসনাৰসেন পৰত্তং পচ্চযপচ্চনীযানুলোমং নাম. তত্থ হেট্ঠা অট্ঠকথাযং ‘‘তিকঞ্চ পট্ঠানৰরং…পে… ছ পচ্চনীযানুলোমম্হি নযা সুগম্ভীরা’’তি অযং গাথা ধম্মপচ্চনীযানুলোমং সন্ধায ৰুত্তা. ইধ পন অযং গাথা ধম্মানুলোমেযেৰ পচ্চযপচ্চনীযানুলোমং সন্ধায ৰুত্তা. তস্মা ‘‘ছ পচ্চনীযানুলোমম্হি নযা সুগম্ভীরা’’তি অট্ঠকথায ধম্মপচ্চনীযানুলোমে তিকপট্ঠানাদযো ছ নযা সুগম্ভীরাতি এৰমত্থো ৰেদিতব্বো. ইমস্মিং পনোকাসে নহেতুপচ্চযা আরম্মণপচ্চযাতি এৰং পৰত্তে পচ্চযপচ্চনীযানুলোমে এতে ধম্মানুলোমেযেৰ তিকপট্ঠানাদযো ছ নযা সুগম্ভীরাতি এৰমত্থো ৰেদিতব্বো.

তেসু অনুলোমতিকপট্ঠানেযেৰ কুসলত্তিকমত্তস্সপি ৰসেন অযং ইমস্মিং পটিচ্চৰারস্স পণ্ণত্তিৰারে সঙ্খিপিত্ৰা পুচ্ছাপভেদো দস্সিতো. সেসেসু পন তিকেসু সেসপট্ঠানেসু চ একাপি পুচ্ছা ন দস্সিতা. ততো পরেসু পন সহজাতৰারাদীসু কুসলত্তিকস্সপি ৰসেন পুচ্ছং অনুদ্ধরিত্ৰা লব্ভমানকৰসেন ৰিস্সজ্জনমেৰ দস্সিতং. ‘‘ছ পচ্চনীযানুলোমম্হি নযা সুগম্ভীরা’’তি ৰচনতো পন ইমস্মিং পচ্চযপচ্চনীযানুলোমে ছপি এতে পট্ঠাননযা পুচ্ছাৰসেন উদ্ধরিত্ৰা দস্সেতব্বা. পট্ঠানং ৰণ্ণযন্তানঞ্হি আচরিযানং ভারো এসোতি.

পুচ্ছাৰারৰণ্ণনা নিট্ঠিতা.