২০. ৰিপ্পযুত্তপচ্চযনিদ্দেসৰণ্ণনা

২০. ৰিপ্পযুত্তপচ্চযনিদ্দেসে রূপিনো ধম্মা অরূপীনন্তি ইদং তাৰ হদযৰত্থুনো চেৰ চক্খুন্দ্রিযাদীনঞ্চ ৰসেন ৰেদিতব্বং. রূপধম্মেসু হি এতেযেৰ ছ কোট্ঠাসা অরূপক্খন্ধানং ৰিপ্পযুত্তপচ্চযেন পচ্চযা হোন্তি. রূপাযতনাদযো পন আরম্মণধম্মা কিঞ্চাপি ৰিপ্পযুত্তধম্মা, ৰিপ্পযুত্তপচ্চযা পন ন হোন্তি. কিং কারণা? সম্পযোগাসঙ্কায অভাৰতো. অরূপিনো হি খন্ধা চক্খাদীনং ৰত্থূনং অব্ভন্তরতো নিক্খমন্তা ৰিয উপ্পজ্জন্তি. তত্থ আসঙ্কা হোতি – ‘‘কিং নু খো এতে এতেহি সম্পযুত্তা, উদাহু ৰিপ্পযুত্তা’’তি. আরম্মণধম্মা পন ৰত্থুনিস্সযেন উপ্পজ্জমানানং আরম্মণমত্তা হোন্তীতি নত্থি তেসু সম্পযোগাসঙ্কা. ইতি সম্পযোগাসঙ্কায অভাৰতো ন তে ৰিপ্পযুত্তপচ্চযা. হদযৰত্থুআদীসু এৰ পনাযং ৰিপ্পযুত্তপচ্চযতা ৰেদিতব্বা. ৰুত্তম্পি চেতং পঞ্হাৰারে – ৰত্থু কুসলানং খন্ধানং ৰিপ্পযুত্তপচ্চযেন পচ্চযো. ৰত্থু অকুসলানং খন্ধানং ৰিপ্পযুত্তপচ্চযেন পচ্চযো. চক্খাযতনং চক্খুৰিঞ্ঞাণস্স ৰিপ্পযুত্তপচ্চযেন পচ্চযো. সোত… ঘান… জিৰ্হা… কাযাযতনং কাযৰিঞ্ঞাণস্স ৰিপ্পযুত্তপচ্চযেন পচ্চযো. ৰত্থু ৰিপাকাব্যাকতানং কিরিযাব্যাকতানং খন্ধানং ৰিপ্পযুত্তপচ্চযেন পচ্চযোতি.

অরূপিনো ধম্মা রূপীনন্তি ইদং পন চতুন্নং খন্ধানং ৰসেন ৰেদিতব্বং. অরূপধম্মেসু হি চত্তারো খন্ধাৰ সহজাতপুরেজাতানং রূপধম্মানং ৰিপ্পযুত্তপচ্চযা হোন্তি, নিব্বানং পন অরূপম্পি সমানং রূপস্স ৰিপ্পযুত্তপচ্চযো ন হোতি. ‘‘চতূহি সম্পযোগো চতূহি ৰিপ্পযোগো’’তি হি ৰুত্তং. ইতি চতুন্নং অরূপক্খন্ধানংযেৰ ৰিপ্পযুত্তপচ্চযতা ৰেদিতব্বা. ৰুত্তম্পি চেতং পঞ্হাৰারে – সহজাতা কুসলা খন্ধা চিত্তসমুট্ঠানানং রূপানং ৰিপ্পযুত্তপচ্চযেন পচ্চযো. পচ্ছাজাতা কুসলা খন্ধা পুরেজাতস্স ইমস্স কাযস্স ৰিপ্পযুত্তপচ্চযেন পচ্চযো. পটিসন্ধিক্খণে ৰিপাকাব্যাকতা খন্ধা কটত্তারূপানং ৰিপ্পযুত্তপচ্চযেন পচ্চযো, খন্ধা ৰত্থুস্সাতি. এৰং তাৰেত্থ পাল়িৰণ্ণনা ৰেদিতব্বা.

অযং পন ৰিপ্পযুত্তপচ্চযো নাম সঙ্খেপতো পঞ্চৰোকারভৰে ৰত্তমানা রূপারূপধম্মা. তেসু রূপং ৰত্থুনো চক্খাদীনঞ্চ ৰসেন ছধা ভিন্নং, অরূপং পঞ্চৰোকারভৰে উপ্পন্নকুসলাকুসলৰিপাককিরিযৰসেন চতুধা ভিন্নং. তস্স ভূমিতো কামাৰচরাদিৰসেন চতুধা, একধা, তিধা, তিধাতি একদসধা ভেদো হোতি. আরুপ্পৰিপাকঞ্হি ৰিপ্পযুত্তপচ্চযো ন হোতীতি এৰমেত্থ নানপ্পকারভেদতো ৰিঞ্ঞাতব্বো ৰিনিচ্ছযো.

এৰং ভিন্নে পনেত্থ পঞ্চৰোকারভৰে উপ্পন্নং চতুভূমকম্পি কুসলং অকুসলঞ্চ অত্তনা সমুট্ঠাপিতচিত্তসমুট্ঠানরূপস্স সহজাতৰিপ্পযুত্তপচ্চযেন পচ্চযো হোতি. উপ্পাদক্খণং পন অতিক্কমিত্ৰা ঠিতিক্খণং পত্তস্স পুরেজাতস্স চতুসমুট্ঠানিকতিসমুট্ঠানিকরূপকাযস্স পচ্ছাজাতৰিপ্পযুত্তপচ্চযেন পচ্চযো হোতি. এত্থ চ তিসমুট্ঠানিককাযোতি আহারসমুট্ঠানস্স অভাৰতো ব্রহ্মপারিসজ্জাদীনং কাযো ৰেদিতব্বো. কামাৰচররূপাৰচরৰিপাকং পন পৰত্তে চিত্তসমুট্ঠানরূপস্স, পটিসন্ধিযং কটত্তারূপস্স চ সহজাতৰিপ্পযুত্তপচ্চযেন পচ্চযো হোতি. লোকুত্তরৰিপাকং চিত্তসমুট্ঠানরূপস্সেৰ. তিৰিধম্পি পনেতং পুরেজাতস্স চতুসমুট্ঠানিকতিসমুট্ঠানিককাযস্স পচ্ছাজাতৰিপ্পযুত্তপচ্চযেন পচ্চযো. তেভূমকম্পি কিরিযং চিত্তসমুট্ঠানস্স সহজাতৰিপ্পযুত্তপচ্চযেন পচ্চযো, পুরেজাতস্স চতুসমুট্ঠানিকতিসমুট্ঠানিককাযস্স পচ্ছাজাতৰিপ্পযুত্তপচ্চযেন পচ্চযো. ছধা ঠিতেসু পন রূপেসু ৰত্থুরূপং পটিসন্ধিক্খণে কামাৰচররূপাৰচরৰিপাকানং সহজাতৰিপ্পযুত্তপচ্চযেন পচ্চযো, পৰত্তে উপ্পজ্জমানানং চতুভূমককুসলানং অকুসলানং দ্ৰিপঞ্চৰিঞ্ঞাণৰজ্জানং তেভূমকৰিপাকানং তেভূমককিরিযানঞ্চ পুরেজাতৰিপ্পযুত্তপচ্চযেন পচ্চযো. চক্খাযতনাদীনি চক্খুৰিঞ্ঞাণাদীনং পুরেজাতৰিপ্পযুত্তপচ্চযেন পচ্চযোতি এৰমেত্থ পচ্চযুপ্পন্নতোপি ৰিঞ্ঞাতব্বো ৰিনিচ্ছযোতি.

ৰিপ্পযুত্তপচ্চযনিদ্দেসৰণ্ণনা.