১৪. ৰিপাকপচ্চযনিদ্দেসৰণ্ণনা

১৪. ৰিপাকপচ্চযনিদ্দেসে ৰিপাকা চত্তারো খন্ধাতি যস্মা কম্মসমুট্ঠানাপি রূপা ৰিপাকা ন হোন্তি, তস্মা ‘‘ৰিপাকা’’তি ৰত্ৰা ‘‘চত্তারো খন্ধা’’তি ৰুত্তং. এৰং অযং পাল়ি অরূপধম্মানঞ্ঞেৰ ৰিপাকপচ্চযৰসেন আগতা. পঞ্হাৰারে পন ‘‘ৰিপাকাব্যাকতো একো খন্ধো তিণ্ণং খন্ধানং চিত্তসমুট্ঠানানঞ্চ রূপানং ৰিপাকপচ্চযেন পচ্চযো. পটিসন্ধিক্খণে ৰিপাকাব্যাকতো একো খন্ধো তিণ্ণন্নং খন্ধানং কটত্তা চ রূপানং ৰিপাকপচ্চযেন পচ্চযো’’তি আগতত্তা চিত্তসমুট্ঠানকম্মসমুট্ঠানরূপানম্পি ৰিপাকপচ্চযো লব্ভতি. ইধ পন সাৰসেসৰসেন দেসনা কতাতি অযং তাৰেত্থ পাল়িৰণ্ণনা. অযং পন ৰিপাকপচ্চযো ৰিপাকভাৰেন জাতিতো একৰিধো, ভূমিভেদতো কামাৰচরাদিৰসেন চতুধা ভিজ্জতীতি এৰমেত্থ নানপ্পকারভেদতো ৰিঞ্ঞাতব্বো ৰিনিচ্ছযো.

এৰং ভিন্নে পনেত্থ কামাৰচররূপাৰচরৰিপাকো অত্তনা সম্পযুত্তধম্মানং পৰত্তে চিত্তসমুট্ঠানরূপানং পটিসন্ধিযং কটত্তারূপানঞ্চ ৰিপাকপচ্চযো হোতি. অরূপাৰচরৰিপাকো সম্পযুত্তধম্মানঞ্ঞেৰ. লোকুত্তরৰিপাকো পঞ্চৰোকারে সম্পযুত্তধম্মানঞ্চেৰ চিত্তসমুট্ঠানরূপস্স চ, চতুৰোকারে সম্পযুত্তক্খন্ধানঞ্ঞেৰ ৰিপাকপচ্চযো হোতীতি এৰমেত্থ পচ্চযুপ্পন্নতোপি ৰিঞ্ঞাতব্বো ৰিনিচ্ছযোতি.

ৰিপাকপচ্চযনিদ্দেসৰণ্ণনা.