১৫. আহারপচ্চযনিদ্দেসৰণ্ণনা

১৫. আহারপচ্চযনিদ্দেসে কবল়ীকারো আহারোতি চতুসন্ততিসমুট্ঠানে রূপে ওজা আহারো নাম. সো পন যস্মা কবল়ং করিত্ৰা অজ্ঝোহরিতোৰ আহারকিচ্চং করোতি, ন বহি ঠিতো, তস্মা আহারোতি অৰত্ৰা ‘‘কবল়ীকারো আহারো’’তি ৰুত্তং. কবল়ং করিত্ৰা অজ্ঝোহরিতব্বৰত্থুকত্তা ৰা কবল়ীকারোতি নামমেতং তস্স. অরূপিনো আহারাতি ফস্সচেতনাৰিঞ্ঞাণাহারা. তংসমুট্ঠানানন্তি ইধাপি কম্মসমুট্ঠানানি গহিতানেৰ. ৰুত্তঞ্হেতং পঞ্হাৰারে – পটিসন্ধিক্খণে ৰিপাকাব্যাকতা আহারা সম্পযুত্তকানং খন্ধানং কটত্তা চ রূপানং আহারপচ্চযেন পচ্চযোতি. অযং তাৰেত্থ পাল়িৰণ্ণনা.

অযং পন আহারপচ্চযো সঙ্খেপতো কবল়ীকারো আহারো, ফস্সো, চেতনা, ৰিঞ্ঞাণন্তি চত্তারোৰ ধম্মা হোন্তি. তত্থ ঠপেত্ৰা কবল়ীকারাহারং সেসা তযো অরূপাহারা জাতিৰসেন কুসলাকুসলৰিপাককিরিযভেদতো চতুধা ভিজ্জন্তি. পুন ভূমিভেদেন কুসলো চতুধা, অকুসলো একধা, ৰিপাকো চতুধা, কিরিযা তিধাতি এৰং অনেকধা ভিজ্জন্তি. কবল়ীকারাহারো পন জাতিতো অব্যাকতো, ভূমিতো কামাৰচরোৰাতি এৰমেত্থ নানপ্পকারভেদতো ৰিঞ্ঞাতব্বো ৰিনিচ্ছযো.

এৰং ভিন্নে পনেত্থ চতুভূমকাপি তযো কুসলাহারা পঞ্চৰোকারে অত্তনা সম্পযুত্তধম্মানঞ্চেৰ চিত্তসমুট্ঠানরূপস্স চ আহারপচ্চযেন পচ্চযো, ঠপেত্ৰা পন রূপাৰচরং অৰসেসা আরুপ্পে সম্পযুত্তধম্মানঞ্ঞেৰ আহারপচ্চযেন পচ্চযো. অকুসলাহারেসুপি এসেৰ নযো. চতুভূমকৰিপাকাহারা পন সব্বত্থ সম্পযুত্তকানং আহারপচ্চযা হোন্তি. কামাৰচররূপাৰচরৰিপাকা পনেত্থ পঞ্চৰোকারে উপ্পজ্জমানা পৰত্তে চিত্তসমুট্ঠানরূপস্স পটিসন্ধিযং কটত্তারূপস্সাপি আহারপচ্চযা হোন্তি. লোকুত্তরা পন চিত্তসমুট্ঠানরূপস্সেৰ, আরুপ্পে উপ্পন্না রূপস্স পচ্চযা ন হোন্তি. তেভূমকাপি তযো কিরিযাহারা পঞ্চৰোকারে সম্পযুত্তধম্মানঞ্চেৰ চিত্তসমুট্ঠানরূপস্স চ, কামাৰচরারূপাৰচরা পন আরুপ্পে সম্পযুত্তধম্মানঞ্ঞেৰ আহারপচ্চযেন পচ্চযো. চতুসন্ততিসমুট্ঠানো কবল়ীকারাহারো কিঞ্চাপি ‘‘ইমস্স কাযস্সা’’তি অৰিসেসতো ৰুত্তো, ৰিসেসতো পনাযমেত্থ আহারসমুট্ঠানরূপস্স জনকো চেৰ অনুপালকো চ হুত্ৰা আহারপচ্চযেন পচ্চযো হোতি, সেসতিসন্ততিসমুট্ঠানস্স অনুপালকোৰ হুত্ৰা আহারপচ্চযেন পচ্চযো হোতীতি এৰমেত্থ পচ্চযুপ্পন্নতোপি ৰিঞ্ঞাতব্বো ৰিনিচ্ছযোতি.

আহারপচ্চযনিদ্দেসৰণ্ণনা.