১৩. কম্মপচ্চযনিদ্দেসৰণ্ণনা

১৩. কম্মপচ্চযনিদ্দেসে কম্মন্তি চেতনাকম্মমেৰ. কটত্তা চ রূপানন্তি কম্মস্স কটত্তা উপ্পন্নরূপানং. কম্মপচ্চযেনাতি অনেকানম্পি কপ্পকোটীনং মত্থকে অত্তনো ফলং উপ্পাদেতুং সমত্থেন নানাক্খণিককম্মপচ্চযেনাতি অত্থো. কুসলাকুসলঞ্হি কম্মং অত্তনো পৰত্তিক্খণে ফলং ন দেতি. যদি দদেয্য, যং মনুস্সো দেৰলোকূপগং কুসলকম্মং করোতি, তস্সানুভাৰেন তস্মিংযেৰ খণে দেৰো ভৰেয্য. যস্মিং পন খণে তং কতং, ততো অঞ্ঞস্মিং খণে অৰিজ্জমানম্পি কেৰলং কটত্তাযেৰ দিট্ঠেৰ ধম্মে উপপজ্জে ৰা অপরে ৰা পরিযাযে অৰসেসপচ্চযসমাযোগে সতি ফলং উপ্পাদেতি নিরুদ্ধাপি পুরিমসিপ্পাদিকিরিযা ৰিয কালন্তরে পচ্ছিমসিপ্পাদিকিরিযায. তস্মা নানাক্খণিককম্মপচ্চযোতি ৰুচ্চতি. চেতনা সম্পযুত্তকানং ধম্মানন্তি যা কাচি চেতনা অত্তনা সম্পযুত্তকানং ধম্মানং. তংসমুট্ঠানানন্তি ইমিনা পটিসন্ধিক্খণে কটত্তারূপম্পি গণ্হাতি. কম্মপচ্চযেনাতি ইদং সহজাতচেতনং সন্ধায ৰুত্তং. কুসলাদীসু হি যা কাচি সহজাতচেতনা সেসধম্মানং চিত্তপযোগসঙ্খাতেন কিরিযাভাৰেন উপকারিকা হোতি. তস্মা সহজাতকম্মপচ্চযোতি ৰুচ্চতি. অযং তাৰেত্থ পাল়িৰণ্ণনা.

অযং পন কম্মপচ্চযো অত্থতো চতুভূমিকচেতনামত্তমেৰ. সো হি জাতিভেদতো কুসলো অকুসলো ৰিপাকো কিরিযাতি চতুধা ভিজ্জতি. তত্থ কুসলো ভূমিতো কামাৰচরাদিৰসেন চতুধা ভিজ্জতি. অকুসলো একধাৰ ৰিপাকো চতুধা, কিরিযা তিধাৰাতি এৰমেত্থ নানপ্পকারভেদতো ৰিঞ্ঞাতব্বো ৰিনিচ্ছযো.

এৰং ভিন্নে পনেত্থ সহজাতা কামাৰচরকুসলচেতনা পঞ্চৰোকারে অত্তনা সম্পযুত্তধম্মানঞ্চেৰ চিত্তসমুট্ঠানরূপস্স চ, চতুৰোকারে সম্পযুত্তক্খন্ধানঞ্ঞেৰ সহজাতকম্মপচ্চযো হোতি. উপ্পজ্জিত্ৰা নিরুদ্ধা পন অত্তনো ৰিপাকানং খন্ধানং কটত্তা চ রূপানং নানাক্খণিককম্মপচ্চযেন পচ্চযো হোতি. সা চ খো পঞ্চৰোকারেযেৰ, ন অঞ্ঞত্থ. সহজাতা রূপাৰচরকুসলচেতনা অত্তনা সম্পযুত্তধম্মানঞ্চেৰ চিত্তসমুট্ঠানরূপানঞ্চ একন্তেনেৰ সহজাতকম্মপচ্চযেন পচ্চযো. উপ্পজ্জিত্ৰা নিরুদ্ধা পন অত্তনো ৰিপাকানঞ্চেৰ কটত্তারূপানঞ্চ নানাক্খণিককম্মপচ্চযেন পচ্চযো. অরূপাৰচরা পন লোকুত্তরা চ সহজাতা কুসলচেতনা পঞ্চৰোকারে অত্তনা সম্পযুত্তধম্মানঞ্চেৰ চিত্তসমুট্ঠানরূপানঞ্চ, চতুৰোকারে সম্পযুত্তক্খন্ধানঞ্ঞেৰ সহজাতকম্মপচ্চযেন পচ্চযো. উপ্পজ্জিত্ৰা নিরুদ্ধা পনেসা দুৰিধাপি অত্তনো অত্তনো ৰিপাকক্খন্ধানঞ্ঞেৰ নানাক্খণিককম্মপচ্চযেন পচ্চযো. সহজাতা অকুসলচেতনা পঞ্চৰোকারে অত্তনা সম্পযুত্তক্খন্ধানঞ্চেৰ চিত্তসমুট্ঠানরূপানঞ্চ চতুৰোকারে অরূপক্খন্ধানঞ্ঞেৰ সহজাতকম্মপচ্চযেন পচ্চযো. উপ্পজ্জিত্ৰা নিরুদ্ধা পন ৰিপাকক্খন্ধানঞ্চেৰ কটত্তারূপানঞ্চ নানাক্খণিককম্মপচ্চযেন পচ্চযো.

কামাৰচররূপাৰচরতো ৰিপাকচেতনা অত্তনা সম্পযুত্তধম্মানং পৰত্তে চিত্তসমুট্ঠানরূপানং, পটিসন্ধিযং কটত্তারূপানঞ্চ সহজাতকম্মপচ্চযেন পচ্চযো. অরূপাৰচরৰিপাকচেতনা অত্তনা সম্পযুত্তধম্মানঞ্ঞেৰ সহজাতকম্মপচ্চযেন পচ্চযো. লোকুত্তরৰিপাকচেতনা পঞ্চৰোকারে অত্তনা সম্পযুত্তধম্মানঞ্চেৰ চিত্তসমুট্ঠানরূপস্স চ, চতুৰোকারে অরূপস্সেৰ সহজাতকম্মপচ্চযেন পচ্চযো. তেভূমিকা কিরিযচেতনা পঞ্চৰোকারে সম্পযুত্তধম্মানঞ্চেৰ চিত্তসমুট্ঠানরূপস্স চ সহজাতকম্মপচ্চযেন পচ্চযো. যা পনেত্থ আরুপ্পে উপ্পজ্জতি, সা অরূপধম্মানঞ্ঞেৰ সহজাতকম্মপচ্চযেন পচ্চযোতি এৰমেত্থ পচ্চযুপ্পন্নতোপি ৰিঞ্ঞাতব্বো ৰিনিচ্ছযোতি.

কম্মপচ্চযনিদ্দেসৰণ্ণনা.