১০. পুরেজাতপচ্চযনিদ্দেসৰণ্ণনা

১০. পুরেজাতপচ্চযনিদ্দেসে পুরেজাতপচ্চযেন পচ্চযোতি এত্থ পুরেজাতং নাম যস্স পচ্চযো হোতি, ততো পুরিমতরং জাতং জাতিক্খণং অতিক্কমিত্ৰা ঠিতিক্খণপ্পত্তং. চক্খাযতনন্তিআদি ৰত্থুপুরেজাতৰসেন ৰুত্তং. রূপাযতনন্তিআদি আরম্মণপুরেজাতৰসেন. কিঞ্চিকালে পুরেজাতপচ্চযেনাতি পৰত্তিং সন্ধায ৰুত্তং. কিঞ্চিকালে ন পুরেজাতপচ্চযেনাতি পটিসন্ধিং সন্ধায ৰুত্তং. এৰং সব্বথাপি পঞ্চদ্ৰারে ৰত্থারম্মণৰসেন, মনোদ্ৰারে ৰত্থুৰসেনেৰাযং পাল়ি আগতা, পঞ্হাৰারে পন ‘‘আরম্মণপুরেজাতং – সেক্খা ৰা পুথুজ্জনা ৰা চক্খুং অনিচ্চতো দুক্খতো অনত্ততো ৰিপস্সন্তী’’তি আগতত্তা মনোদ্ৰারেপি আরম্মণপুরেজাতং লব্ভতেৰ. ইধ পন সাৰসেসৰসেন দেসনা কতাতি অযং তাৰেত্থ পাল়িৰণ্ণনা.

অযং পন পুরেজাতপচ্চযো সুদ্ধরূপমেৰ হোতি. তঞ্চ খো উপ্পাদক্খণং অতিক্কমিত্ৰা ঠিতিপ্পত্তং অট্ঠারসৰিধং রূপরূপমেৰ. তং সব্বম্পি ৰত্থুপুরেজাতং আরম্মণপুরেজাতন্তি দ্ৰিধা ঠিতং. তত্থ চক্খাযতনং…পে… কাযাযতনং ৰত্থুরূপন্তি ইদং ৰত্থুপুরেজাতং নাম. সেসং ইমায পাল়িযা আগতঞ্চ অনাগতঞ্চ ৰণ্ণো সদ্দো গন্ধো রসো চতস্সো ধাতুযো তীণি ইন্দ্রিযানি কবল়ীকারো আহারোতি দ্ৰাদসৰিধং রূপং আরম্মণপুরেজাতপচ্চযো নামাতি এৰমেত্থ নানপ্পকারভেদতো ৰিঞ্ঞাতব্বো ৰিনিচ্ছযো.

এৰং ভিন্নে পনেত্থ চক্খাযতনং দ্ৰিন্নং চক্খুৰিঞ্ঞাণানং পুরেজাতপচ্চযেন পচ্চযো, তথা ইতরানি চত্তারি সোতৰিঞ্ঞাণাদীনং. ৰত্থুরূপং পন ঠপেত্ৰা দ্ৰিপঞ্চৰিঞ্ঞাণানি চত্তারো চ আরুপ্পৰিপাকে সেসানং সব্বেসম্পি চতুভূমকানং কুসলাকুসলাব্যাকতানং চিত্তচেতসিকানং পুরেজাতপচ্চযো হোতি. রূপাদীনি পন পঞ্চারম্মণানি দ্ৰিপঞ্চৰিঞ্ঞাণানঞ্চেৰ মনোধাতূনঞ্চ একন্তেনেৰ পুরেজাতপচ্চযা হোন্তি. অট্ঠারসৰিধম্পি পনেতং রূপরূপং কামাৰচরকুসলস্স রূপাৰচরতো অভিঞ্ঞাকুসলস্স অকুসলস্স তদারম্মণভাৰিনো কামাৰচরৰিপাকস্স কামাৰচরকিরিযস্স রূপাৰচরতো অভিঞ্ঞাকিরিযস্সাতি ইমেসং ছন্নং রাসীনং পুরেজাতপচ্চযো হোতীতি এৰমেত্থ পচ্চযুপ্পন্নতোপি ৰিঞ্ঞাতব্বো ৰিনিচ্ছযোতি.

পুরেজাতপচ্চযনিদ্দেসৰণ্ণনা.