১১. পচ্ছাজাতপচ্চযনিদ্দেসৰণ্ণনা

১১. পচ্ছাজাতপচ্চযনিদ্দেসে পচ্ছাজাতাতি যস্স কাযস্স পচ্চযা হোন্তি, তস্মিং উপ্পজ্জিত্ৰা ঠিতে জাতা. পুরেজাতস্সাতি তেসং উপ্পাদতো পঠমতরং জাতস্স জাতিক্খণং অতিক্কমিত্ৰা ঠিতিপ্পত্তস্স. ইমস্স কাযস্সাতি ইমস্স চতুসমুট্ঠানিকতিসমুট্ঠানিকভূতউপাদারূপসঙ্খাতস্স কাযস্স. এত্থ চ তিসমুট্ঠানিককাযোতি আহারসমুট্ঠানস্স অভাৰতো ব্রহ্মপারিসজ্জাদীনং কাযো ৰেদিতব্বো. অযমেত্থ পাল়িৰণ্ণনা. অযং পন পচ্ছাজাতপচ্চযো নাম সঙ্খেপতো ঠপেত্ৰা আরুপ্পৰিপাকে অৰসেসা চতুভূমকা অরূপক্খন্ধা. সো জাতিৰসেন কুসলাকুসলৰিপাককিরিযভেদেন চতুধা ভিজ্জতীতি এৰমেত্থ নানপ্পকারভেদতো ৰিঞ্ঞাতব্বো ৰিনিচ্ছযো.

এৰং ভিন্নে পনেত্থ পঞ্চৰোকারভৰে উপ্পন্নং চতুভূমককুসলঞ্চ অকুসলঞ্চ উপ্পাদক্খণং অতিক্কমিত্ৰা ঠিতিপ্পত্তস্স চতুসমুট্ঠানিকতিসমুট্ঠানিকরূপকাযস্স পচ্ছাজাতপচ্চযো হোতি. ৰিপাকেপি ঠপেত্ৰা পটিসন্ধিৰিপাকং অৰসেসো কামাৰচররূপাৰচরৰিপাকো তস্সেৰ একন্তেন পচ্ছাজাতপচ্চযো হোতি. লোকুত্তরোপি পঞ্চৰোকারে উপ্পন্নৰিপাকো তস্সেৰ পচ্ছাজাতপচ্চযো হোতি. তেভূমককিরিযাপি পঞ্চৰোকারে উপ্পন্নাৰ ৰুত্তপ্পকারস্স কাযস্স পচ্ছাজাতপচ্চযো হোতীতি এৰমেত্থ পচ্চযুপ্পন্নতোপি ৰিঞ্ঞাতব্বো ৰিনিচ্ছযোতি.

পচ্ছাজাতপচ্চযনিদ্দেসৰণ্ণনা.