(৩৫. ক) অযোনিসো মনসিকারো

৯৩৬. তত্থ কতমো অযোনিসো মনসিকারো? অনিচ্চে ‘‘নিচ্চ’’ন্তি অযোনিসো মনসিকারো, দুক্খে ‘‘সুখ’’ন্তি অযোনিসো মনসিকারো, অনত্তনি ‘‘অত্তা’’তি অযোনিসো মনসিকারো, অসুভে ‘‘সুভ’’ন্তি অযোনিসো মনসিকারো, সচ্চৰিপ্পটিকুলেন ৰা চিত্তস্স আৰট্টনা অনাৰট্টনা আভোগো সমন্নাহারো মনসিকারো – অযং ৰুচ্চতি ‘‘অযোনিসো মনসিকারো’’.

(খ) কুম্মগ্গসেৰনা

তত্থ কতমা কুম্মগ্গসেৰনা? তত্থ কতমো কুম্মগ্গো? মিচ্ছাদিট্ঠি, মিচ্ছাসঙ্কপ্পো, মিচ্ছাৰাচা, মিচ্ছাকম্মন্তো, মিচ্ছাআজীৰো, মিচ্ছাৰাযামো, মিচ্ছাসতি, মিচ্ছাসমাধি – অযং ৰুচ্চতি ‘‘কুম্মগ্গো’’. যা ইমস্স কুম্মগ্গস্স সেৰনা নিসেৰনা সংসেৰনা ভজনা সম্ভজনা ভত্তি সম্ভত্তি তংসম্পৰঙ্কতা – অযং ৰুচ্চতি ‘‘কুম্মগ্গসেৰনা’’.

(গ) চেতসো চ লীনত্তং

তত্থ কতমং চেতসো চ লীনত্তং? যা চিত্তস্স অকল্যতা অকম্মঞ্ঞতা ওলীযনা সল্লীযনা লীনং লীযনা লীযিতত্তং থিনং থিযনা থিযিতত্তং চিত্তস্স – ইদং ৰুচ্চতি ‘‘চেতসো চ লীনত্তং’’.

তিকং.