১৭. খুদ্দকৰত্থুৰিভঙ্গো

১. এককমাতিকা

৮৩২. (১)জাতিমদো (২)গোত্তমদো (৩)আরোগ্যমদো (৪)যোব্বনমদো (৫)জীৰিতমদো (৬)লাভমদো (৭)সক্কারমদো (৮) গরুকারমদো (৯) পুরেক্খারমদো (১০) পরিৰারমদো (১১) ভোগমদো (১২) ৰণ্ণমদো (১৩) সুতমদো (১৪) পটিভানমদো (১৫) রত্তঞ্ঞুমদো (১৬) পিণ্ডপাতিকমদো (১৭) অনৰঞ্ঞাতমদো (১৮) ইরিযাপথমদো (১৯) ইদ্ধিমদো (২০) যসমদো (২১) সীলমদো (২২) ঝানমদো (২৩) সিপ্পমদো (২৪) আরোহমদো (২৫) পরিণাহমদো (২৬) সণ্ঠানমদো (২৭) পারিপূরিমদো (২৮)মদো (২৯) পমাদো (৩০) থম্ভো (৩১) সারম্ভো (৩২) অত্রিচ্ছতা (৩৩)মহিচ্ছতা (৩৪) পাপিচ্ছতা (৩৫) সিঙ্গং (৩৬) তিন্তিণং (৩৭) চাপল্যং (৩৮)অসভাগৰুত্তি (৩৯) অরতি (৪০) তন্দী (৪১) ৰিজম্ভিতা (৪২) ভত্তসম্মদো (৪৩) চেতসো চ লীনত্তং [চেতসো লীনত্তং (স্যা.)] (৪৪) কুহনা (৪৫) লপনা (৪৬) নেমিত্তিকতা (৪৭)নিপ্পেসিকতা (৪৮) লাভেন লাভং নিজিগীসনতা [নিজিগিংসনতা (সী.), জিগিংসনতা (স্যা.)] (৪৯) সেয্যোহমস্মীতি মানো (৫০) সদিসোহমস্মীতি মানো (৫১) হীনো হমস্মীতি মানো (৫২) সেয্যস্স সেয্যোহমস্মীতি মানো (৫৩) সেয্যস্স সদিসোহমস্মীতি মানো (৫৪) সেয্যস্স হীনোহমস্মীতি মানো (৫৫) সদিসস্স সেয্যোহমস্মীতি মানো (৫৬) সদিসস্স সদিসোহমস্মীতি মানো (৫৭) সদিসস্স হীনোহমস্মীতি মানো (৫৮) হীনস্স সেয্যোহমস্মীতি মানো (৫৯) হীনস্স সদিসোহমস্মীতি মানো (৬০) হীনস্স হীনোহমস্মীতি মানো (৬১) মানো (৬২) অতিমানো (৬৩) মানাতিমানো (৬৪) ওমানো (৬৫)অধিমানো (৬৬) অস্মিমানো (৬৭) মিচ্ছামানো (৬৮) ঞাতিৰিতক্কো (৬৯)জনপদৰিতক্কো (৭০) অমরৰিতক্কো (৭১) পরানুদ্দযতাপটিসংযুত্তো ৰিতক্কো (৭২) লাভসক্কারসিলোকপটিসংযুত্তো ৰিতক্কো (৭৩) অনৰঞ্ঞত্তিপটিসংযুত্তো ৰিতক্কো

এককং.

২. দুকমাতিকা

৮৩৩. (১) কোধো চ উপনাহো চ (২) মক্খো চ পল়াসো [পলাসো (সী. স্যা.)] চ (৩) ইস্সা চ মচ্ছরিযঞ্চ (৪) মাযা চ সাঠেয্যঞ্চ (৫) অৰিজ্জা চ ভৰতণ্হা চ (৬) ভৰদিট্ঠি চ ৰিভৰদিট্ঠি চ (৭) সস্সতদিট্ঠি চ উচ্ছেদদিট্ঠি চ (৮) অন্তৰাদিট্ঠি চ অনন্তৰাদিট্ঠি চ (৯) পুব্বন্তানুদিট্ঠি চ অপরন্তানুদিট্ঠি চ (১০) অহিরিকঞ্চ অনোত্তপ্পঞ্চ (১১) দোৰচস্সতা চ পাপমিত্ততা চ (১২) অনজ্জৰো চ অমদ্দৰো চ (১৩) অক্খন্তি চ অসোরচ্চঞ্চ (১৪) অসাখল্যঞ্চ অপ্পটিসন্থারো চ (১৫)ইন্দ্রিযেসু অগুত্তদ্ৰারতা চ ভোজনে অমত্তঞ্ঞুতা চ (১৬) মুট্ঠস্সচ্চঞ্চ অসম্পজঞ্ঞঞ্চ (১৭) সীলৰিপত্তি চ দিট্ঠিৰিপত্তি চ (১৮) অজ্ঝত্তসংযোজনঞ্চ বহিদ্ধাসংযোজনঞ্চ

দুকং.

৩. তিকমাতিকা

৮৩৪. (১) তীণি অকুসলমূলানি (২) তযো অকুসলৰিতক্কা (৩) তিস্সো অকুসলসঞ্ঞা (৪) তিস্সো অকুসলধাতুযো (৫) তীণি দুচ্চরিতানি (৬) তযো আসৰা (৭) তীণি সংযোজনানি (৮) তিস্সো তণ্হা (৯) অপরাপি তিস্সো তণ্হা (১০) অপরাপি তিস্সো তণ্হা (১১) তিস্সো এসনা (১২) তিস্সো ৰিধা (১৩) তীণি ভযানি (১৪)তীণি তমানি (১৫) তীণি তিত্থাযতনানি (১৬) তযো কিঞ্চনা (১৭) তীণি অঙ্গণানি (১৮) তীণি মলানি (১৯) তীণি ৰিসমানি (২০) অপরানিপি তীণি ৰিসমানি (২১) তযো অগ্গী (২২) তযো কসাৰা (২৩) অপরেপি তযো কসাৰা (২৪)অস্সাদদিট্ঠি, অত্তানুদিট্ঠি, মিচ্ছাদিট্ঠি (২৫) অরতি, ৰিহেসা, অধম্মচরিযা (২৬)দোৰচস্সতা, পাপমিত্ততা, নানত্তসঞ্ঞা (২৭) উদ্ধচ্চং, কোসজ্জং, পমাদো (২৮) অসন্তুট্ঠিতা, অসম্পজঞ্ঞতা, মহিচ্ছতা (২৯) অহিরিকং, অনোত্তপ্পং, পমাদো (৩০)অনাদরিযং, দোৰচস্সতা, পাপমিত্ততা (৩১) অস্সদ্ধিযং, অৰদঞ্ঞুতা, কোসজ্জং (৩২) উদ্ধচ্চং, অসংৰরো, দুস্সীল্যং (৩৩) অরিযানং অদস্সনকম্যতা, সদ্ধম্মং অসোতুকম্যতা, উপারম্ভচিত্ততা (৩৪) মুট্ঠস্সচ্চং, অসম্পজঞ্ঞং, চেতসো ৰিক্খেপো (৩৫)অযোনিসো মনসিকারো, কুম্মগ্গসেৰনা, চেতসো চ লীনত্তং

তিকং.

৪. চতুক্কমাতিকা

৮৩৫. (১) চত্তারো আসৰা (২) চত্তারো গন্থা (৩) চত্তারো ওঘা (৪) চত্তারো যোগা (৫) চত্তারি উপাদানানি (৬) চত্তারো তণ্হুপ্পাদা (৭) চত্তারি অগতিগমনানি (৮) চত্তারো ৰিপরিযাসা [ৰিপরিযেসা (সী. স্যা. ক.)] (৯) চত্তারো অনরিযৰোহারা (১০) অপরেপি চত্তারো অনরিযৰোহারা (১১) চত্তারি দুচ্চরিতানি (১২) অপরানিপি চত্তারি দুচ্চরিতানি (১৩)চত্তারি ভযানি (১৪) অপরানিপি চত্তারি ভযানি (১৫) চতস্সো দিট্ঠিযো

চতুক্কং.

৫. পঞ্চকমাতিকা

৮৩৬. (১) পঞ্চোরম্ভাগিযানি সংযোজনানি (২) পঞ্চুদ্ধম্ভাগিযানি সংযোজনানি (৩) পঞ্চ মচ্ছরিযানি (৪) পঞ্চ সঙ্গা (৫) পঞ্চ সল্লা (৬) পঞ্চ চেতোখিলা (৭)পঞ্চ চেতসোৰিনিবন্ধা [চেতসোৰিনিবদ্ধা (ক.)] (৮) পঞ্চ নীৰরণানি (৯) পঞ্চ কম্মানি আনন্তরিকানি (১০) পঞ্চ দিট্ঠিযো (১১) পঞ্চ ৰেরা (১২) পঞ্চ ব্যসনা (১৩) পঞ্চ অক্খন্তিযা আদীনৰা (১৪) পঞ্চ ভযানি (১৫) পঞ্চ দিট্ঠধম্মনিব্বানৰাদা

পঞ্চকং.

৬. ছক্কমাতিকা

৮৩৭. (১) ছ ৰিৰাদমূলানি (২) ছ ছন্দরাগা (৩) ছ ৰিরোধৰত্থূনি (৪) ছ তণ্হাকাযা (৫) ছ অগারৰা (৬) ছ পরিহানিযা ধম্মা (৭) অপরেপি ছ পরিহানিযা ধম্মা (৮) ছ সোমনস্সুপৰিচারা (৯) ছ দোমনস্সুপৰিচারা (১০) ছ উপেক্খুপৰিচারা (১১) ছ গেহসিতানি সোমনস্সানি (১২) ছ গেহসিতানি দোমনস্সানি (১৩) ছ গেহসিতা উপেক্খা (১৪) ছ দিট্ঠিযো

ছক্কং.

৭. সত্তকমাতিকা

৮৩৮. (১) সত্ত অনুসযা (২) সত্ত সংযোজনানি (৩) সত্ত পরিযুট্ঠানানি (৪)সত্ত অসদ্ধম্মা (৫) সত্ত দুচ্চরিতানি (৬) সত্ত মানা (৭) সত্ত দিট্ঠিযো

সত্তকং.

৮. অট্ঠকমাতিকা

৮৩৯. (১) অট্ঠ কিলেসৰত্থূনি (২) অট্ঠ কুসীতৰত্থূনি (৩) অট্ঠসু লোকধম্মেসু চিত্তস্স পটিঘাতো (৪) অট্ঠ অনরিযৰোহারা (৫) অট্ঠ মিচ্ছত্তা (৬) অট্ঠ পুরিসদোসা (৭) অট্ঠ অসঞ্ঞিৰাদা (৮) অট্ঠ নেৰসঞ্ঞিনাসঞ্ঞিৰাদা

অট্ঠকং.

৯. নৰকমাতিকা

৮৪০. (১) নৰ আঘাতৰত্থূনি (২) নৰ পুরিসমলানি (৩) নৰৰিধা মানা (৪)নৰ তণ্হামূলকা ধম্মা (৫) নৰ ইঞ্জিতানি (৬) নৰ মঞ্ঞিতানি (৭) নৰ ফন্দিতানি (৮) নৰ পপঞ্চিতানি (৯) নৰ সঙ্খতানি

নৰকং.

১০. দসকমাতিকা

৮৪১. (১) দস কিলেসৰত্থূনি (২) দস আঘাতৰত্থূনি (৩) দস অকুসলকম্মপথা (৪) দস সংযোজনানি (৫) দস মিচ্ছত্তা (৬) দসৰত্থুকা মিচ্ছাদিট্ঠি (৭) দসৰত্থুকা অন্তগ্গাহিকা দিট্ঠি

দসকং.

৮৪২. অট্ঠারস তণ্হাৰিচরিতানি অজ্ঝত্তিকস্স উপাদায, অট্ঠারস তণ্হাৰিচরিতানি বাহিরস্স উপাদায, তদেকজ্ঝং অভিসঞ্ঞূহিত্ৰা অভিসঙ্খিপিত্ৰা ছত্তিংস তণ্হাৰিচরিতানি হোন্তি. ইতি অতীতানি ছত্তিংস তণ্হাৰিচরিতানি, অনাগতানি ছত্তিংস তণ্হাৰিচরিতানি, পচ্চুপ্পন্নানি ছত্তিংস তণ্হাৰিচরিতানি, তদেকজ্ঝং অভিসঞ্ঞূহিত্ৰা অভিসঙ্খিপিত্ৰা অট্ঠ তণ্হাৰিচরিতসতং হোতি. যানি চ দ্ৰাসট্ঠি দিট্ঠিগতানি ব্রহ্মজালে ৰেয্যাকরণে ৰুত্তানি ভগৰতা.

মাতিকা.

১. এককনিদ্দেসো

(১) জাতিমদো

৮৪৩. তত্থ কতমো জাতিমদো? জাতিং পটিচ্চ মদো মজ্জনা মজ্জিতত্তং মানো মঞ্ঞনা মঞ্ঞিতত্তং উন্নতি উন্নামো [উণ্ণতি উণ্ণামো (স্যা. ক.) ধ. স. ১১২১] ধজো সম্পগ্গাহো কেতুকম্যতা চিত্তস্স – অযং ৰুচ্চতি ‘‘জাতিমদো’’.

(২-২৭) গোত্তমদাদী

৮৪৪. তত্থ কতমো গোত্তমদো? গোত্তং পটিচ্চ…পে… আরোগ্যং পটিচ্চ…পে… যোব্বনং পটিচ্চ…পে… জীৰিতং পটিচ্চ…পে… লাভং পটিচ্চ…পে… সক্কারং পটিচ্চ…পে… গরুকারং পটিচ্চ…পে… পুরেক্খারং পটিচ্চ…পে… পরিৰারং পটিচ্চ…পে… ভোগং পটিচ্চ…পে… ৰণ্ণং পটিচ্চ…পে… সুতং পটিচ্চ…পে… পটিভানং পটিচ্চ…পে… রত্তঞ্ঞুতং পটিচ্চ…পে… পিণ্ডপাতিকত্তং পটিচ্চ…পে… অনৰঞ্ঞাতং পটিচ্চ…পে… ইরিযাপথং পটিচ্চ…পে… ইদ্ধিং পটিচ্চ…পে… যসং পটিচ্চ…পে… সীলং পটিচ্চ…পে… ঝানং পটিচ্চ…পে… সিপ্পং পটিচ্চ…পে… আরোহং পটিচ্চ…পে… পরিণাহং পটিচ্চ…পে… সণ্ঠানং পটিচ্চ…পে… পারিপূরিং পটিচ্চ মদো মজ্জনা মজ্জিতত্তং মানো মঞ্ঞনা মঞ্ঞিতত্তং উন্নতি উন্নামো ধজো সম্পগ্গাহো কেতুকম্যতা চিত্তস্স – অযং ৰুচ্চতি ‘‘পারিপূরিমদো’’.

(২৮) মদো

৮৪৫. তত্থ কতমো মদো? যো মদো মজ্জনা মজ্জিতত্তং মানো মঞ্ঞনা মঞ্ঞিতত্তং উন্নতি উন্নামো ধজো সম্পগ্গাহো কেতুকম্যতা চিত্তস্স – অযং ৰুচ্চতি ‘‘মদো’’.

(২৯) পমাদো

৮৪৬. তত্থ কতমো পমাদো? কাযদুচ্চরিতে ৰা ৰচীদুচ্চরিতে ৰা মনোদুচ্চরিতে ৰা পঞ্চসু ৰা কামগুণেসু চিত্তস্স ৰোস্সগ্গো ৰোস্সগ্গানুপ্পদানং কুসলানং ৰা ধম্মানং ভাৰনায অসক্কচ্চকিরিযতা অসাতচ্চকিরিযতা অনট্ঠিতকিরিযতা ওলীনৰুত্তিতা নিক্খিত্তছন্দতা নিক্খিত্তধুরতা অনাসেৰনা অভাৰনা অবহুলীকম্মং অনধিট্ঠানং অননুযোগো পমাদো, যো এৰরূপো পমাদো পমজ্জনা পমজ্জিতত্তং – অযং ৰুচ্চতি ‘‘পমাদো’’.

(৩০) থম্ভো

৮৪৭. তত্থ কতমো থম্ভো? যো থম্ভো থম্ভনা থম্ভিতত্তং কক্খল়িযং ফারুসিযং উজুচিত্ততা অমুদুতা – অযং ৰুচ্চতি ‘‘থম্ভো’’.

(৩১) সারম্ভো

৮৪৮. তত্থ কতমো সারম্ভো? যো সারম্ভো পটিসারম্ভো সারম্ভনা পটিসারম্ভনা পটিসারম্ভিতত্তং – অযং ৰুচ্চতি ‘‘সারম্ভো’’.

(৩২) অত্রিচ্ছতা

৮৪৯. তত্থ কতমা অত্রিচ্ছতা? ইতরীতরচীৰরপিণ্ডপাতসেনাসনগিলানপ্পচ্চযভেসজ্জপরিক্খারেহি পঞ্চহি ৰা কামগুণেহি অসন্তুট্ঠস্স ভিয্যোকম্যতা, যা এৰরূপা ইচ্ছা ইচ্ছাগতা অত্রিচ্ছতা রাগো সারাগো চিত্তস্স সারাগো – অযং ৰুচ্চতি ‘‘অত্রিচ্ছতা’’.

(৩৩) মহিচ্ছতা

৮৫০. তত্থ কতমা মহিচ্ছতা? ইতরীতরচীৰরপিণ্ডপাতসেনাসনগিলানপ্পচ্চযভেসজ্জপরিক্খারেহি পঞ্চহি ৰা কামগুণেহি অসন্তুট্ঠস্স ভিয্যোকম্যতা, যা এৰরূপা ইচ্ছা ইচ্ছাগতা মহিচ্ছতা রাগো সারাগো চিত্তস্স সারাগো – অযং ৰুচ্চতি ‘‘মহিচ্ছতা’’.

(৩৪) পাপিচ্ছতা

৮৫১. তত্থ কতমা পাপিচ্ছতা? ইধেকচ্চো অস্সদ্ধো সমানো ‘‘সদ্ধোতি মং জনো জানাতূ’’তি ইচ্ছতি, দুস্সীলো সমানো ‘‘সীলৰাতি মং জনো জানাতূ’’তি ইচ্ছতি, অপ্পস্সুতো সমানো ‘‘বহুস্সুতোতি মং জনো জানাতূ’’তি ইচ্ছতি, সঙ্গণিকারামো সমানো ‘‘পৰিৰিত্তোতি মং জনো জানাতূ’’তি ইচ্ছতি, কুসীতো সমানো ‘‘আরদ্ধৰীরিযোতি মং জনো জানাতূ’’তি ইচ্ছতি, মুট্ঠস্সতী সমানো ‘‘উপট্ঠিতস্সতীতি মং জনো জানাতূ’’তি ইচ্ছতি, অসমাহিতো সমানো ‘‘সমাহিতোতি মং জনো জানাতূ’’তি ইচ্ছতি, দুপ্পঞ্ঞো সমানো ‘‘পঞ্ঞৰাতি মং জনো জানাতূ’’তি ইচ্ছতি, অখীণাসৰো সমানো ‘‘খীণাসৰোতি মং জনো জানাতূ’’তি ইচ্ছতি – যা এৰরূপা ইচ্ছা ইচ্ছাগতা পাপিচ্ছতা রাগো সারাগো চিত্তস্স সারাগো – অযং ৰুচ্চতি ‘‘পাপিচ্ছতা’’.

(৩৫) সিঙ্গং

৮৫২. তত্থ কতমং সিঙ্গং? যং সিঙ্গং সিঙ্গারতা চাতুরতা চাতুরিযং পরিক্খত্ততা পারিক্খত্তিযং – ইদং ৰুচ্চতি ‘‘সিঙ্গং’’.

(৩৬) তিন্তিণং

৮৫৩. তত্থ কতমং তিন্তিণং? যং তিন্তিণং তিন্তিণাযনা তিন্তিণাযিতত্তং লোলুপ্পং লোলুপ্পাযনা লোলুপ্পাযিতত্তং পুচ্ছঞ্জিকতা সাধুকম্যতা – ইদং ৰুচ্চতি ‘‘তিন্তিণং’’.

(৩৭) চাপল্যং

৮৫৪. তত্থ কতমং চাপল্যং? চীৰরমণ্ডনা পত্তমণ্ডনা সেনাসনমণ্ডনা ইমস্স ৰা পূতিকাযস্স বাহিরানং ৰা পরিক্খারানং মণ্ডনা ৰিভূসনা কেল়না পরিকেল়না গিদ্ধিকতা গিদ্ধিকত্তং চপলতা চাপল্যং – ইদং ৰুচ্চতি ‘‘চাপল্যং’’.

(৩৮) অসভাগৰুত্তি

৮৫৫. তত্থ কতমং অসভাগৰুত্তি? মাতরি ৰা পিতরি ৰা জেট্ঠে ৰা ভাতরি ৰা আচরিযেসু ৰা উপজ্ঝাযে ৰা বুদ্ধে ৰা সাৰকেসু ৰা অঞ্ঞতরঞ্ঞতরেসু গরুট্ঠানিযেসু ৰিপ্পটিকূলগ্গাহিতা ৰিপচ্চনীকসাততা অনাদরিযং অনাদরিযতা অগারৰতা অপ্পতিস্সৰতা – অযং ৰুচ্চতি ‘‘অসভাগৰুত্তি’’.

(৩৯) অরতি

৮৫৬. তত্থ কতমা অরতি? পন্তেসু ৰা সেনাসনেসু অঞ্ঞতরঞ্ঞতরেসু ৰা অধিকুসলেসু ধম্মেসু অরতি অরতিতা অনভিরতি অনভিরমণা উক্কণ্ঠিতা পরিতস্সিতা – অযং ৰুচ্চতি ‘‘অরতি’’.

(৪০) তন্দী

৮৫৭. তত্থ কতমা তন্দী? যা তন্দী তন্দিযনা তন্দিমনকতা আলস্যং আলস্যাযনা আলস্যাযিতত্তং – অযং ৰুচ্চতি ‘‘তন্দী’’.

(৪১) ৰিজম্ভিতা

৮৫৮. তত্থ কতমা ৰিজম্ভিতা? যা কাযস্স জম্ভনা ৰিজম্ভনা আনমনা ৰিনমনা সন্নমনা পণমনা ব্যাধিযকং – অযং ৰুচ্চতি ‘‘ৰিজম্ভিতা’’.

(৪২) ভত্তসম্মদো

৮৫৯. তত্থ কতমো ভত্তসম্মদো? যা ভুত্তাৰিস্স ভত্তমুচ্ছা ভত্তকিলমথো ভত্তপরিল়াহো কাযদুট্ঠুল্লং – অযং ৰুচ্চতি ‘‘ভত্তসম্মদো’’.

(৪৩) চেতসো চ লীনত্তং

৮৬০. তত্থ কতমং চেতসো চ লীনত্তং? যা চিত্তস্স অকল্যতা অকম্মঞ্ঞতা ওলীযনা সল্লীযনা লীনং লীযনা লীযিতত্তং থিনং থীযনা থীযিতত্তং চিত্তস্স – ইদং ৰুচ্চতি ‘‘চেতসো চ লীনত্তং’’.

(৪৪) কুহনা

৮৬১. তত্থ কতমা কুহনা? লাভসক্কারসিলোকসন্নিস্সিতস্স পাপিচ্ছস্স ইচ্ছাপকতস্স পচ্চযপটিসেৰনসঙ্খাতেন [পচ্চযপটিসেধনসঙ্খাতেন (সী.)] ৰা সামন্তজপ্পিতেন ৰা ইরিযাপথস্স ৰা অঠপনা [আঠপনা (ক.)] ঠপনা সণ্ঠপনা ভাকুটিতা ভাকুটিযং কুহনা কুহাযনা কুহিতত্তং – অযং ৰুচ্চতি ‘‘কুহনা’’.

(৪৫) লপনা

৮৬২. তত্থ কতমা লপনা? লাভসক্কারসিলোকসন্নিস্সিতস্স পাপিচ্ছস্স ইচ্ছাপকতস্স যা পরেসং আলপনা লপনা সল্লপনা উল্লপনা সমুল্লপনা উন্নহনা সমুন্নহনা উক্কাচনা সমুক্কাচনা অনুপ্পিযভাণিতা চাটুকম্যতা মুগ্গসূপ্যতা পারিভটযতা – অযং ৰুচ্চতি ‘‘লপনা’’.

(৪৬) নেমিত্তিকতা

৮৬৩. তত্থ কতমা নেমিত্তিকতা? লাভসক্কারসিলোকসন্নিস্সিতস্স পাপিচ্ছস্স ইচ্ছাপকতস্স যং পরেসং নিমিত্তং নিমিত্তকম্মং ওভাসো ওভাসকম্মং সামন্তজপ্পা পরিকথা – অযং ৰুচ্চতি ‘‘নেমিত্তিকতা’’.

(৪৭) নিপ্পেসিকতা

৮৬৪. তত্থ কতমা নিপ্পেসিকতা? লাভসক্কারসিলোকসন্নিস্সিতস্স পাপিচ্ছস্স ইচ্ছাপকতস্স যা পরেসং অক্কোসনা ৰম্ভনা গরহণা উক্খেপনা সমুক্খেপনা খিপনা সঙ্খিপনা পাপনা সম্পাপনা অৰণ্ণহারিকা পরপিট্ঠিমংসিকতা – অযং ৰুচ্চতি ‘‘নিপ্পেসিকতা’’.

(৪৮) লাভেন লাভং নিজিগীসনতা

৮৬৫. তত্থ কতমা লাভেন লাভং নিজিগীসনতা? লাভসক্কারসিলোকসন্নিস্সিতো পাপিচ্ছো ইচ্ছাপকতো ইতো লদ্ধং আমিসং অমুত্র হরতি অমুত্র ৰা লদ্ধং আমিসং ইধ আহরতি, যা এৰরূপা আমিসস্স এট্ঠি গৰেট্ঠি পরিযেট্ঠি এসনা গৰেসনা পরিযেসনা – অযং ৰুচ্চতি ‘‘লাভেন লাভং নিজিগীসনতা’’.

(৪৯) সেয্যোহমস্মীতি মানো

৮৬৬. তত্থ কতমো সেয্যোহমস্মীতি মানো? ইধেকচ্চো জাতিযা ৰা গোত্তেন ৰা কোলপুত্তিযেন ৰা ৰণ্ণপোক্খরতায ৰা ধনেন ৰা অজ্ঝেনেন ৰা কম্মাযতনেন ৰা সিপ্পাযতনেন ৰা ৰিজ্জাট্ঠানেন [ৰিজ্জট্ঠানেন (স্যা.)] ৰা সুতেন ৰা পটিভানেন ৰা অঞ্ঞতরঞ্ঞতরেন ৰত্থুনা মানং জপ্পেতি, যো এৰরূপো মানো মঞ্ঞনা মঞ্ঞিতত্তং উন্নতি উন্নামো ধজো সম্পগ্গাহো কেতুকম্যতা চিত্তস্স – অযং ৰুচ্চতি ‘‘সেয্যোহমস্মীতি মানো’’.

(৫০) সদিসোহমস্মীতি মানো

৮৬৭. তত্থ কতমো সদিসোহমস্মীতি মানো? ইধেকচ্চো জাতিযা ৰা গোত্তেন ৰা কোলপুত্তিযেন ৰা ৰণ্ণপোক্খরতায ৰা ধনেন ৰা অজ্ঝেনেন ৰা কম্মাযতনেন ৰা সিপ্পাযতনেন ৰা ৰিজ্জাট্ঠানেন ৰা সুতেন ৰা পটিভানেন ৰা অঞ্ঞতরঞ্ঞতরেন ৰত্থুনা মানং জপ্পেতি, যো এৰরূপো মানো মঞ্ঞনা মঞ্ঞিতত্তং উন্নতি উন্নামো ধজো সম্পগ্গাহো কেতুকম্যতা চিত্তস্স – অযং ৰুচ্চতি ‘‘সদিসোহমস্মীতি মানো’’.

(৫১) হীনোহমস্মীতি মানো

৮৬৮. তত্থ কতমো হীনোহমস্মীতি মানো? ইধেকচ্চো জাতিযা ৰা গোত্তেন ৰা কোলপুত্তিযেন ৰা ৰণ্ণপোক্খরতায ৰা ধনেন ৰা অজ্ঝেনেন ৰা কম্মাযতনেন ৰা সিপ্পাযতনেন ৰা ৰিজ্জাট্ঠানেন ৰা সুতেন ৰা পটিভানেন ৰা অঞ্ঞতরঞ্ঞতরেন ৰত্থুনা ওমানং জপ্পেতি, যো এৰরূপো ওমানো ওমঞ্ঞনা ওমঞ্ঞিতত্তং হীল়না ওহীল়না ওহীল়িতত্তং অত্তুঞ্ঞা অত্তৰঞ্ঞা অত্তপরিভৰো – অযং ৰুচ্চতি ‘‘হীনোহমস্মীতি মানো’’.

(৫২) সেয্যস্স সেয্যোহমস্মীতি মানো

৮৬৯. তত্থ কতমো সেয্যস্স সেয্যোহমস্মীতি মানো? ইধেকচ্চো সেয্যো হোতি জাতিযা ৰা গোত্তেন ৰা কোলপুত্তিযেন ৰা ৰণ্ণপোক্খরতায ৰা ধনেন ৰা অজ্ঝেনেন ৰা কম্মাযতনেন ৰা সিপ্পাযতনেন ৰা ৰিজ্জাট্ঠানেন ৰা সুতেন ৰা পটিভানেন ৰা অঞ্ঞতরঞ্ঞতরেন ৰত্থুনা পরেহি সেয্যং অত্তানং দহতি; সো তং নিস্সায মানং জপ্পেতি. যো এৰরূপো মানো মঞ্ঞনা মঞ্ঞিতত্তং উন্নতি উন্নামো ধজো সম্পগ্গাহো কেতুকম্যতা চিত্তস্স – অযং ৰুচ্চতি ‘‘সেয্যস্স সেয্যোহমস্মীতি মানো’’.

(৫৩) সেয্যস্স সদিসোহমস্মীতি মানো

৮৭০. তত্থ কতমো সেয্যস্স সদিসোহমস্মীতি মানো? ইধেকচ্চো সেয্যো হোতি জাতিযা ৰা গোত্তেন ৰা কোলপুত্তিযেন ৰা ৰণ্ণপোক্খরতায ৰা ধনেন ৰা অজ্ঝেনেন ৰা কম্মাযতনেন ৰা সিপ্পাযতনেন ৰা ৰিজ্জাট্ঠানেন ৰা সুতেন ৰা পটিভানেন ৰা অঞ্ঞতরঞ্ঞতরেন ৰত্থুনা পরেহি সদিসং অত্তানং দহতি; সো তং নিস্সায মানং জপ্পেতি. যো এৰরূপো মানো মঞ্ঞনা মঞ্ঞিতত্তং উন্নতি উন্নামো ধজো সম্পগ্গাহো কেতুকম্যতা চিত্তস্স – অযং ৰুচ্চতি ‘‘সেয্যস্স সদিসোহমস্মীতি মানো’’.

(৫৪) সেয্যস্স হীনোহমস্মীতি মানো

৮৭১. তত্থ কতমো সেয্যস্স হীনোহমস্মীতি মানো? ইধেকচ্চো সেয্যো হোতি জাতিযা ৰা গোত্তেন ৰা কোলপুত্তিযেন ৰা ৰণ্ণপোক্খরতায ৰা ধনেন ৰা অজ্ঝেনেন ৰা কম্মাযতনেন ৰা সিপ্পাযতনেন ৰা ৰিজ্জাট্ঠানেন ৰা সুতেন ৰা পটিভানেন ৰা অঞ্ঞতরঞ্ঞতরেন ৰত্থুনা পরেহি হীনং অত্তানং দহতি; সো তং নিস্সায ওমানং জপ্পেতি. যো এৰরূপো ওমানো ওমঞ্ঞনা ওমঞ্ঞিতত্তং হীল়না ওহীল়না ওহীল়িতত্তং অত্তুঞ্ঞা অত্তৰঞ্ঞা অত্তপরিভৰো – অযং ৰুচ্চতি ‘‘সেয্যস্স হীনোহমস্মীতি মানো’’.

(৫৫) সদিসস্স সেয্যোহমস্মীতি মানো

৮৭২. তত্থ কতমো সদিসস্স সেয্যোহমস্মীতি মানো? ইধেকচ্চো সদিসো হোতি জাতিযা ৰা গোত্তেন ৰা কোলপুত্তিযেন ৰা…পে… অঞ্ঞতরঞ্ঞতরেন ৰত্থুনা পরেহি সেয্যং অত্তানং দহতি; সো তং নিস্সায মানং জপ্পেতি. যো এৰরূপো মানো মঞ্ঞনা মঞ্ঞিতত্তং…পে… কেতুকম্যতা চিত্তস্স – অযং ৰুচ্চতি ‘‘সদিসস্স সেয্যোহমস্মীতি মানো’’.

(৫৬) সদিসস্স সদিসোহমস্মীতি মানো

৮৭৩. তত্থ কতমো সদিসস্স সদিসোহমস্মীতি মানো? ইধেকচ্চো সদিসো হোতি জাতিযা ৰা গোত্তেন ৰা কোলপুত্তিযেন ৰা…পে… অঞ্ঞতরঞ্ঞতরেন ৰত্থুনা পরেহি সদিসং অত্তানং দহতি; সো তং নিস্সায মানং জপ্পেতি. যো এৰরূপো মানো মঞ্ঞনা মঞ্ঞিতত্তং উন্নতি উন্নামো ধজো সম্পগ্গাহো কেতুকম্যতা চিত্তস্স – অযং ৰুচ্চতি ‘‘সদিসস্স সদিসোহমস্মীতি মানো’’.

(৫৭) সদিসস্স হীনোহমস্মীতি মানো

৮৭৪. তত্থ কতমো সদিসস্স হীনোহমস্মীতি মানো? ইধেকচ্চো সদিসো হোতি জাতিযা ৰা গোত্তেন ৰা কোলপুত্তিযেন ৰা…পে… অঞ্ঞতরঞ্ঞতরেন ৰত্থুনা পরেহি হীনং অত্তানং দহতি; সো তং নিস্সায ওমানং জপ্পেতি. যো এৰরূপো ওমানো ওমঞ্ঞনা ওমঞ্ঞিতত্তং হীল়না ওহীল়না ওহীল়িতত্তং অত্তুঞ্ঞা অত্তৰঞ্ঞা অত্তপরিভৰো – অযং ৰুচ্চতি ‘‘সদিসস্স হীনোহমস্মীতি মানো’’.

(৫৮) হীনস্স সেয্যোহমস্মীতি মানো

৮৭৫. তত্থ কতমো হীনস্স সেয্যোহমস্মীতি মানো? ইধেকচ্চো হীনো হোতি জাতিযা ৰা গোত্তেন ৰা কোলপুত্তিযেন ৰা…পে… অঞ্ঞতরঞ্ঞতরেন ৰত্থুনা পরেহি সেয্যং অত্তানং দহতি; সো তং নিস্সায মানং জপ্পেতি. যো এৰরূপো মানো মঞ্ঞনা মঞ্ঞিতত্তং উন্নতি উন্নামো ধজো সম্পগ্গাহো কেতুকম্যতা চিত্তস্স – অযং ৰুচ্চতি ‘‘হীনস্স সেয্যোহমস্মীতি মানো’’.

(৫৯) হীনস্স সদিসোহমস্মীতি মানো

৮৭৬. তত্থ কতমো হীনস্স সদিসোহমস্মীতি মানো? ইধেকচ্চো হীনো হোতি জাতিযা ৰা গোত্তেন ৰা কোলপুত্তিযেন ৰা…পে… অঞ্ঞতরঞ্ঞতরেন ৰত্থুনা পরেহি সদিসং অত্তানং দহতি; সো তং নিস্সায মানং জপ্পেতি. যো এৰরূপো মানো মঞ্ঞনা মঞ্ঞিতত্তং উন্নতি উন্নামো ধজো সম্পগ্গাহো কেতুকম্যতা চিত্তস্স – অযং ৰুচ্চতি ‘‘হীনস্স সদিসোহমস্মীতি মানো’’.

(৬০) হীনস্স হীনোহমস্মীতি মানো

৮৭৭. তত্থ কতমো হীনস্স হীনোহমস্মীতি মানো? ইধেকচ্চো হীনো হোতি জাতিযা ৰা গোত্তেন ৰা কোলপুত্তিযেন ৰা…পে… অঞ্ঞতরঞ্ঞতরেন ৰত্থুনা পরেহি সদিসং অত্তানং দহতি; সো তং নিস্সায ওমানং জপ্পেতি. যো এৰরূপো ওমানো ওমঞ্ঞনা ওমঞ্ঞিতত্তং হীল়না ওহীল়না ওহীল়িতত্তং অত্তুঞ্ঞা অত্তৰঞ্ঞা অত্তপরিভৰো – অযং ৰুচ্চতি ‘‘হীনস্স হীনোহমস্মীতি মানো’’.

(৬১) মানো

৮৭৮. তত্থ কতমো মানো? যো মানো মঞ্ঞনা মঞ্ঞিতত্তং উন্নতি উন্নামো ধজো সম্পগ্গাহো কেতুকম্যতা চিত্তস্স – অযং ৰুচ্চতি ‘‘মানো’’.

(৬২) অতিমানো

৮৭৯. তত্থ কতমো অতিমানো? ইধেকচ্চো জাতিযা ৰা গোত্তেন ৰা কোলপুত্তিযেন ৰা…পে… অঞ্ঞতরঞ্ঞতরেন ৰত্থুনা পরেহি অত্তানং অতিমঞ্ঞতি. যো এৰরূপো মানো মঞ্ঞনা মঞ্ঞিতত্তং উন্নতি উন্নামো ধজো সম্পগ্গাহো কেতুকম্যতা চিত্তস্স – অযং ৰুচ্চতি ‘‘অতিমানো’’.

(৬৩) মানাতিমানো

৮৮০. তত্থ কতমো মানাতিমানো? ইধেকচ্চো জাতিযা ৰা গোত্তেন ৰা কোলপুত্তিযেন ৰা…পে… অঞ্ঞতরঞ্ঞতরেন ৰত্থুনা পুব্বকালং পরেহি সদিসং অত্তানং দহতি, অপরকালং অত্তানং সেয্যং দহতি. যো এৰরূপো মানো মঞ্ঞনা মঞ্ঞিতত্তং উন্নতি উন্নামো ধজো সম্পগ্গাহো কেতুকম্যতা চিত্তস্স – অযং ৰুচ্চতি ‘‘মানাতিমানো’’.

(৬৪) ওমানো

৮৮১. তত্থ কতমো ওমানো? ইধেকচ্চো জাতিযা ৰা গোত্তেন ৰা কোলপুত্তিযেন ৰা ৰণ্ণপোক্খরতায ৰা ধনেন ৰা অজ্ঝেনেন ৰা কম্মাযতনেন ৰা সিপ্পাযতনেন ৰা ৰিজ্জাট্ঠানেন ৰা সুতেন ৰা পটিভানেন ৰা অঞ্ঞতরঞ্ঞতরেন ৰত্থুনা ওমানং জপ্পেতি. যো এৰরূপো ওমানো ওমঞ্ঞনা ওমঞ্ঞিতত্তং হীল়না ওহীল়না ওহীল়িতত্তং অত্তুঞ্ঞা অত্তৰঞ্ঞা অত্তপরিভৰো – অযং ৰুচ্চতি ‘‘ওমানো’’.

(৬৫) অধিমানো

৮৮২. তত্থ কতমো অধিমানো? অপ্পত্তে পত্তসঞ্ঞিতা, অকতে কতসঞ্ঞিতা, অনধিগতে অধিগতসঞ্ঞিতা, অসচ্ছিকতে সচ্ছিকতসঞ্ঞিতা, যো এৰরূপো মানো মঞ্ঞনা মঞ্ঞিতত্তং উন্নতি উন্নামো ধজো সম্পগ্গাহো কেতুকম্যতা চিত্তস্স – অযং ৰুচ্চতি ‘‘অধিমানো’’.

(৬৬) অস্মিমানো

৮৮৩. তত্থ কতমো অস্মিমানো? রূপং অস্মীতি মানো, অস্মীতি ছন্দো, অস্মীতি অনুসযো, ৰেদনা…পে… সঞ্ঞা…পে… সঙ্খারা…পে… ৰিঞ্ঞাণং অস্মীতি মানো, অস্মীতি ছন্দো, অস্মীতি অনুসযো, যো এৰরূপো মানো মঞ্ঞনা মঞ্ঞিতত্তং উন্নতি উন্নামো ধজো সম্পগ্গাহো কেতুকম্যতা চিত্তস্স – অযং ৰুচ্চতি ‘‘অস্মিমানো’’.

(৬৭) মিচ্ছামানো

৮৮৪. তত্থ কতমো মিচ্ছামানো? ইধেকচ্চো পাপকেন ৰা কম্মাযতনেন পাপকেন ৰা সিপ্পাযতনেন পাপকেন ৰা ৰিজ্জাট্ঠানেন পাপকেন ৰা সুতেন পাপকেন ৰা পটিভানেন পাপকেন ৰা সীলেন পাপকেন ৰা ৰতেন পাপকেন ৰা সীলব্বতেন পাপিকায ৰা দিট্ঠিযা অঞ্ঞতরঞ্ঞতরেন ৰত্থুনা মানং জপ্পেতি, যো এৰরূপো মানো মঞ্ঞনা মঞ্ঞিতত্তং উন্নতি উন্নামো ধজো সম্পগ্গাহো কেতুকম্যতা চিত্তস্স – অযং ৰুচ্চতি ‘‘মিচ্ছামানো’’.

(৬৮) ঞাতিৰিতক্কো

৮৮৫. তত্থ কতমো ঞাতিৰিতক্কো? ঞাতকে আরব্ভ গেহসিতো তক্কো ৰিতক্কো মিচ্ছাসঙ্কপ্পো – অযং ৰুচ্চতি ‘‘ঞাতিৰিতক্কো’’.

(৬৯) জনপদৰিতক্কো

৮৮৬. তত্থ কতমো জনপদৰিতক্কো? জনপদং আরব্ভ গেহসিতো তক্কো ৰিতক্কো মিচ্ছাসঙ্কপ্পো – অযং ৰুচ্চতি ‘‘জনপদৰিতক্কো’’.

(৭০) অমরৰিতক্কো

৮৮৭. তত্থ কতমো অমরৰিতক্কো? দুক্করকারিতাপটিসংযুত্তো ৰা দিট্ঠিগতপটিসংযুত্তো ৰা গেহসিতো তক্কো ৰিতক্কো মিচ্ছাসঙ্কপ্পো – অযং ৰুচ্চতি ‘‘অমরৰিতক্কো’’.

(৭১) পরানুদ্দযতাপটিসংযুত্তো ৰিতক্কো

৮৮৮. তত্থ কতমো পরানুদ্দযতাপটিসংযুত্তো ৰিতক্কো? ইধেকচ্চো গিহীহি সংসট্ঠো ৰিহরতি সহনন্দী সহসোকী, সুখিতেসু সুখিতো, দুক্খিতেসু দুক্খিতো, উপ্পন্নেসু কিচ্চকরণীযেসু অত্তনা ৰা যোগং আপজ্জতি. যো তত্থ গেহসিতো তক্কো ৰিতক্কো মিচ্ছাসঙ্কপ্পো – অযং ৰুচ্চতি ‘‘পরানুদ্দযতাপটিসংযুত্তো ৰিতক্কো’’.

(৭২) লাভাদিপটিসংযুত্তো ৰিতক্কো

৮৮৯. তত্থ কতমো লাভসক্কারসিলোকপটিসংযুত্তো ৰিতক্কো? লাভসক্কারসিলোকং আরব্ভ গেহসিতো তক্কো ৰিতক্কো মিচ্ছাসঙ্কপ্পো – অযং ৰুচ্চতি ‘‘লাভসক্কারসিলোকপটিসংযুত্তো ৰিতক্কো’’.

(৭৩) অনৰঞ্ঞত্তিপটিসংযুত্তো ৰিতক্কো

৮৯০. তত্থ কতমো অনৰঞ্ঞত্তিপটিসংযুত্তো ৰিতক্কো? ইধেকচ্চো জাতিযা ৰা গোত্তেন ৰা কোলপুত্তিযেন ৰা ৰণ্ণপোক্খরতায ৰা ধনেন ৰা অজ্ঝেনেন ৰা কম্মাযতনেন ৰা সিপ্পাযতনেন ৰা ৰিজ্জাট্ঠানেন ৰা সুতেন ৰা পটিভানেন ৰা অঞ্ঞতরঞ্ঞতরেন ৰত্থুনা মা মং পরে অৰজানিংসূতি. যো তত্থ গেহসিতো তক্কো ৰিতক্কো মিচ্ছাসঙ্কপ্পো – অযং ৰুচ্চতি ‘‘অনৰঞ্ঞত্তিপটিসংযুত্তো ৰিতক্কো’’.

এককং.

২. দুকনিদ্দেসো

(১) কোধো চ উপনাহো চ

৮৯১. (ক) তত্থ কতমো কোধো? যো কোধো কুজ্ঝনা কুজ্ঝিতত্তং দোসো দুস্সনা দুস্সিতত্তং ব্যাপত্তি ব্যাপজ্জনা ব্যাপজ্জিতত্তং ৰিরোধো পটিৰিরোধো চণ্ডিক্কং অসুরোপো অনত্তমনতা চিত্তস্স – অযং ৰুচ্চতি ‘‘কোধো’’.

(খ) তত্থ কতমো উপনাহো? পুব্বকালং কোধো, অপরকালং উপনাহো. যো এৰরূপো উপনাহো উপনয্হনা উপনয্হিতত্তং অট্ঠপনা ঠপনা সণ্ঠপনা অনুসংসন্দনা অনুপ্পবন্ধনা দল়্হীকম্মং কোধস্স – অযং ৰুচ্চতি ‘‘উপনাহো’’.

(২) মক্খো চ পল়াসো চ

৮৯২. (ক) তত্থ কতমো মক্খো? যো মক্খো মক্খাযনা মক্খাযিতত্তং [মক্খিযনা মক্খিযিতত্তং (সী. ক.)] নিট্ঠুরিযং নিট্ঠুরিযকম্মং – অযং ৰুচ্চতি ‘‘মক্খো’’.

(খ) তত্থ কতমো পল়াসো? যো পল়াসো পল়াসাযনা [পলাসাযনা পলাসাযিতত্তং (স্যা.)] পল়াসাহারো ৰিৰাদট্ঠানং যুগগ্গাহো অপ্পটিনিস্সগ্গো – অযং ৰুচ্চতি ‘‘পল়াসো’’.

(৩) ইস্সা চ মচ্ছরিযঞ্চ

৮৯৩. (ক) তত্থ কতমা ইস্সা? যা পরলাভসক্কারগরুকারমাননৰন্দনপূজনাসু ইস্সা ইস্সাযনা ইস্সাযিতত্তং উসূযা উসূযনা উসূযিতত্তং – অযং ৰুচ্চতি ‘‘ইস্সা’’.

(খ) তত্থ কতমং মচ্ছরিযং? পঞ্চ মচ্ছরিযানি – আৰাসমচ্ছরিযং, কুলমচ্ছরিযং, লাভমচ্ছরিযং, ৰণ্ণমচ্ছরিযং, ধম্মমচ্ছরিযং. যং এৰরূপং মচ্ছেরং মচ্ছরাযনা মচ্ছরাযিতত্তং ৰেৰিচ্ছং কদরিযং কটুকঞ্চুকতা অগ্গহিতত্তং [পগ্গহিতত্তং (সী. ক.) ধ. স. ১১২৭] চিত্তস্স – ইদং ৰুচ্চতি ‘‘মচ্ছরিযং’’.

(৪) মাযা চ সাঠেয্যঞ্চ

৮৯৪. (ক) তত্থ কতমা মাযা? ইধেকচ্চো কাযেন দুচ্চরিতং চরিত্ৰা, ৰাচায দুচ্চরিতং চরিত্ৰা, মনসা দুচ্চরিতং চরিত্ৰা তস্স পটিচ্ছাদনহেতুং পাপিকং ইচ্ছং পণিদহতি. ‘‘মা মং জঞ্ঞা’’তি ইচ্ছতি. ‘‘মা মং জঞ্ঞা’’তি সঙ্কপ্পেতি. ‘‘মা মং জঞ্ঞা’’তি ৰাচং ভাসতি. ‘‘মা মং জঞ্ঞা’’তি কাযেন পরক্কমতি. যা এৰরূপা মাযা মাযাৰিতা অচ্চাসরা ৰঞ্চনা নিকতি ৰিকিরণা পরিহরণা গূহনা পরিগূহনা ছাদনা পটিচ্ছাদনা অনুত্তানীকম্মং অনাৰিকম্মং ৰোচ্ছাদনা পাপকিরিযা – অযং ৰুচ্চতি ‘‘মাযা’’.

(খ) তত্থ কতমং সাঠেয্যং? ইধেকচ্চো সঠো হোতি পরিসঠো. যং তত্থ সঠং সঠতা সাঠেয্যং কক্করতা কক্করিযং [কক্খল়তা কক্খল়িযং (স্যা.)] পরিক্খত্ততা পারিক্খত্তিযং – ইদং ৰুচ্চতি ‘‘সাঠেয্যং’’.

(৫) অৰিজ্জা চ ভৰতণ্হা চ

৮৯৫. (ক) তত্থ কতমা অৰিজ্জা? যং অঞ্ঞাণং অদস্সনং…পে… অৰিজ্জালঙ্গী মোহো অকুসলমূলং – অযং ৰুচ্চতি ‘‘অৰিজ্জা’’.

(খ) তত্থ কতমা ভৰতণ্হা? যো ভৰেসু ভৰচ্ছন্দো ভৰরাগো ভৰনন্দী ভৰতণ্হা ভৰসিনেহো ভৰপরিল়াহো ভৰমুচ্ছা ভৰজ্ঝোসানং – অযং ৰুচ্চতি ‘‘ভৰতণ্হা’’.

(৬) ভৰদিট্ঠি চ ৰিভৰদিট্ঠি চ

৮৯৬. (ক) তত্থ কতমা ভৰদিট্ঠি? ‘‘ভৰিস্সতি অত্তা চ লোকো চা’’তি – যা এৰরূপা দিট্ঠি দিট্ঠিগতং…পে… ৰিপরিযাসগ্গাহো – অযং ৰুচ্চতি ‘‘ভৰদিট্ঠি’’.

(খ) তত্থ কতমা ৰিভৰদিট্ঠি? ‘‘ন ভৰিস্সতি অত্তা চ লোকো চা’’তি – যা এৰরূপা দিট্ঠি দিট্ঠিগতং…পে… ৰিপরিযাসগ্গাহো – অযং ৰুচ্চতি ৰিভৰদিট্ঠি.