১৮. ধম্মহদযৰিভঙ্গো

১. সব্বসঙ্গাহিকৰারো

৯৭৮. কতি খন্ধা, কতি আযতনানি, কতি ধাতুযো, কতি সচ্চানি, কতি ইন্দ্রিযানি, কতি হেতূ, কতি আহারা, কতি ফস্সা, কতি ৰেদনা, কতি সঞ্ঞা, কতি চেতনা, কতি চিত্তানি?

পঞ্চক্খন্ধা, দ্ৰাদসাযতনানি, অট্ঠারস ধাতুযো, চত্তারি সচ্চানি, বাৰীসতিন্দ্রিযানি, নৰ হেতূ, চত্তারো আহারা, সত্ত ফস্সা, সত্ত ৰেদনা, সত্ত সঞ্ঞা, সত্ত চেতনা, সত্ত চিত্তানি.

৯৭৯. তত্থ কতমে পঞ্চক্খন্ধা? রূপক্খন্ধো, ৰেদনাক্খন্ধো, সঞ্ঞাক্খন্ধো, সঙ্খারক্খন্ধো, ৰিঞ্ঞাণক্খন্ধো – ইমে ৰুচ্চন্তি ‘‘পঞ্চক্খন্ধা’’.

৯৮০. তত্থ কতমানি দ্ৰাদসাযতনানি? চক্খাযতনং, রূপাযতনং, সোতাযতনং, সদ্দাযতনং, ঘানাযতনং, গন্ধাযতনং, জিৰ্হাযতনং, রসাযতনং, কাযাযতনং, ফোট্ঠব্বাযতনং, মনাযতনং, ধম্মাযতনং – ইমানি ৰুচ্চন্তি ‘‘দ্ৰাদসাযতনানি’’.

৯৮১. তত্থ কতমা অট্ঠারস ধাতুযো? চক্খুধাতু, রূপধাতু, চক্খুৰিঞ্ঞাণধাতু, সোতধাতু, সদ্দধাতু, সোতৰিঞ্ঞাণধাতু, ঘানধাতু, গন্ধধাতু, ঘানৰিঞ্ঞাণধাতু, জিৰ্হাধাতু, রসধাতু, জিৰ্হাৰিঞ্ঞাণধাতু, কাযধাতু, ফোট্ঠব্বধাতু, কাযৰিঞ্ঞাণধাতু, মনোধাতু, ধম্মধাতু, মনোৰিঞ্ঞাণধাতু – ইমা ৰুচ্চন্তি ‘‘অট্ঠারস ধাতুযো’’.

৯৮২. তত্থ কতমানি চত্তারি সচ্চানি? দুক্খসচ্চং, সমুদযসচ্চং, নিরোধসচ্চং, মগ্গসচ্চং – ইমানি ৰুচ্চন্তি ‘‘চত্তারি সচ্চানি’’.

৯৮৩. তত্থ কতমানি বাৰীসতিন্দ্রিযানি? চক্খুন্দ্রিযং, সোতিন্দ্রিযং, ঘানিন্দ্রিযং, জিৰ্হিন্দ্রিযং, কাযিন্দ্রিযং, মনিন্দ্রিযং, ইত্থিন্দ্রিযং, পুরিসিন্দ্রিযং, জীৰিতিন্দ্রিযং, সুখিন্দ্রিযং, দুক্খিন্দ্রিযং, সোমনস্সিন্দ্রিযং, দোমনস্সিন্দ্রিযং, উপেক্খিন্দ্রিযং, সদ্ধিন্দ্রিযং, ৰীরিযিন্দ্রিযং, সতিন্দ্রিযং, সমাধিন্দ্রিযং, পঞ্ঞিন্দ্রিযং, অনঞ্ঞাতঞ্ঞস্সামীতিন্দ্রিযং, অঞ্ঞিন্দ্রিযং, অঞ্ঞাতাৰিন্দ্রিযং – ইমানি ৰুচ্চন্তি ‘‘বাৰীসতিন্দ্রিযানি’’.

৯৮৪. তত্থ কতমে নৰ হেতূ? তযো কুসলহেতূ, তযো অকুসলহেতূ, তযো অব্যাকতহেতূ.

তত্থ কতমে তযো কুসলহেতূ? অলোভো কুসলহেতু, অদোসো কুসলহেতু, অমোহো কুসলহেতু – ইমে তযো কুসলহেতূ.

তত্থ কতমে তযো অকুসলহেতূ? লোভো অকুসলহেতু, দোসো অকুসলহেতু, মোহো অকুসলহেতু – ইমে তযো অকুসলহেতূ.

তত্থ কতমে তযো অব্যাকতহেতূ? কুসলানং ৰা ধম্মানং ৰিপাকতো কিরিযাব্যাকতেসু ৰা ধম্মেসু অলোভো, অদোসো, অমোহো – ইমে তযো অব্যাকতহেতূ. ইমে ৰুচ্চন্তি ‘‘নৰ হেতূ’’.

৯৮৫. তত্থ কতমে চত্তারো আহারা? কবল়ীকারাহারো [কবল়িংকারো আহারো (সী. স্যা.)], ফস্সাহারো, মনোসঞ্চেতনাহারো, ৰিঞ্ঞাণাহারো – ইমে ৰুচ্চন্তি ‘‘চত্তারো আহারা’’.

৯৮৬. তত্থ কতমে সত্ত ফস্সা? চক্খুসম্ফস্সো, সোতসম্ফস্সো, ঘানসম্ফস্সো, জিৰ্হাসম্ফস্সো, কাযসম্ফস্সো, মনোধাতুসম্ফস্সো, মনোৰিঞ্ঞাণধাতুসম্ফস্সো – ইমে ৰুচ্চন্তি ‘‘সত্ত ফস্সা’’.

৯৮৭. তত্থ কতমা সত্ত ৰেদনা? চক্খুসম্ফস্সজা ৰেদনা, সোতসম্ফস্সজা ৰেদনা, ঘানসম্ফস্সজা ৰেদনা, জিৰ্হাসম্ফস্সজা ৰেদনা, কাযসম্ফস্সজা ৰেদনা, মনোধাতুসম্ফস্সজা ৰেদনা, মনোৰিঞ্ঞাণধাতুসম্ফস্সজা ৰেদনা – ইমা ৰুচ্চন্তি ‘‘সত্ত ৰেদনা’’.

৯৮৮. তত্থ কতমা সত্ত সঞ্ঞা? চক্খুসম্ফস্সজা সঞ্ঞা, সোতসম্ফস্সজা সঞ্ঞা, ঘানসম্ফস্সজা সঞ্ঞা, জিৰ্হাসম্ফস্সজা সঞ্ঞা, কাযসম্ফস্সজা সঞ্ঞা, মনোধাতুসম্ফস্সজা সঞ্ঞা, মনোৰিঞ্ঞাণধাতুসম্ফস্সজা সঞ্ঞা – ইমা ৰুচ্চন্তি ‘‘সত্ত সঞ্ঞা’’.

৯৮৯. তত্থ কতমা সত্ত চেতনা? চক্খুসম্ফস্সজা চেতনা, সোতসম্ফস্সজা চেতনা, ঘানসম্ফস্সজা চেতনা, জিৰ্হাসম্ফস্সজা চেতনা, কাযসম্ফস্সজা চেতনা, মনোধাতুসম্ফস্সজা চেতনা, মনোৰিঞ্ঞাণধাতুসম্ফস্সজা চেতনা – ইমা ৰুচ্চন্তি ‘‘সত্ত চেতনা’’.

৯৯০. তত্থ কতমানি সত্ত চিত্তানি? চক্খুৰিঞ্ঞাণং, সোতৰিঞ্ঞাণং, ঘানৰিঞ্ঞাণং, জিৰ্হাৰিঞ্ঞাণং, কাযৰিঞ্ঞাণং, মনোধাতু, মনোৰিঞ্ঞাণধাতু – ইমানি ৰুচ্চন্তি ‘‘সত্ত চিত্তানি’’.

২. উপ্পত্তানুপ্পত্তিৰারো

১. কামধাতু

৯৯১. কামধাতুযা কতি খন্ধা, কতি আযতনানি, কতি ধাতুযো, কতি সচ্চানি, কতি ইন্দ্রিযানি, কতি হেতূ, কতি আহারা, কতি ফস্সা, কতি ৰেদনা, কতি সঞ্ঞা, কতি চেতনা, কতি চিত্তানি?

কামধাতুযা পঞ্চক্খন্ধা, দ্ৰাদসাযতনানি, অট্ঠারস ধাতুযো, তীণি সচ্চানি, বাৰীসতিন্দ্রিযানি, নৰ হেতূ, চত্তারো আহারা, সত্ত ফস্সা, সত্ত ৰেদনা, সত্ত সঞ্ঞা, সত্ত চেতনা, সত্ত চিত্তানি.

৯৯২. তত্থ কতমে কামধাতুযা পঞ্চক্খন্ধা? রূপক্খন্ধো, ৰেদনাক্খন্ধো, সঞ্ঞাক্খন্ধো, সঙ্খারক্খন্ধো, ৰিঞ্ঞাণক্খন্ধো – ইমে ৰুচ্চন্তি ‘‘কামধাতুযা পঞ্চক্খন্ধা’’.

তত্থ কতমানি কামধাতুযা দ্ৰাদসাযতনানি? চক্খাযতনং, রূপাযতনং, সোতাযতনং, সদ্দাযতনং, ঘানাযতনং, গন্ধাযতনং, জিৰ্হাযতনং, রসাযতনং, কাযাযতনং, ফোট্ঠব্বাযতনং, মনাযতনং, ধম্মাযতনং – ইমানি ৰুচ্চন্তি ‘‘কামধাতুযা দ্ৰাদসাযতনানি’’.

তত্থ কতমা কামধাতুযা অট্ঠারস ধাতুযো? চক্খুধাতু, রূপধাতু, চক্খুৰিঞ্ঞাণধাতু, সোতধাতু, সদ্দধাতু, সোতৰিঞ্ঞাণধাতু, ঘানধাতু, গন্ধধাতু, ঘানৰিঞ্ঞাণধাতু, জিৰ্হাধাতু, রসধাতু, জিৰ্হাৰিঞ্ঞাণধাতু, কাযধাতু, ফোট্ঠব্বধাতু, কাযৰিঞ্ঞাণধাতু, মনোধাতু, ধম্মধাতু, মনোৰিঞ্ঞাণধাতু – ইমা ৰুচ্চন্তি ‘‘কামধাতুযা অট্ঠারস ধাতুযো’’.

তত্থ কতমানি কামধাতুযা তীণি সচ্চানি? দুক্খসচ্চং, সমুদযসচ্চং, মগ্গসচ্চং – ইমানি ৰুচ্চন্তি ‘‘কামধাতুযা তীণি সচ্চানি’’.

তত্থ কতমানি কামধাতুযা বাৰীসতিন্দ্রিযানি? চক্খুন্দ্রিযং, সোতিন্দ্রিযং…পে… অঞ্ঞাতাৰিন্দ্রিযং – ইমানি ৰুচ্চন্তি ‘‘কামধাতুযা বাৰীসতিন্দ্রিযানি’’.

তত্থ কতমে কামধাতুযা নৰ হেতূ? তযো কুসলহেতূ, তযো অকুসলহেতূ, তযো অব্যাকতহেতূ…পে… ইমে ৰুচ্চন্তি ‘‘কামধাতুযা নৰ হেতূ’’.

তত্থ কতমে কামধাতুযা চত্তারো আহারা? কবল়ীকারাহারো, ফস্সাহারো, মনোসঞ্চেতনাহারো, ৰিঞ্ঞাণাহারো – ইমে ৰুচ্চন্তি ‘‘কামধাতুযা চত্তারো আহারা’’.

তত্থ কতমে কামধাতুযা সত্ত ফস্সা? চক্খুসম্ফস্সো সোতসম্ফস্সো, ঘানসম্ফস্সো, জিৰ্হাসম্ফস্সো, কাযসম্ফস্সো, মনোধাতুসম্ফস্সো, মনোৰিঞ্ঞাণধাতুসম্ফস্সো – ইমে ৰুচ্চন্তি ‘‘কামধাতুযা সত্ত ফস্সা’’.

তত্থ কতমা কামধাতুযা সত্ত ৰেদনা? চক্খুসম্ফস্সজা ৰেদনা, সোতসম্ফস্সজা ৰেদনা, ঘানসম্ফস্সজা ৰেদনা, জিৰ্হাসম্ফস্সজা ৰেদনা, কাযসম্ফস্সজা ৰেদনা, মনোধাতুসম্ফস্সজা ৰেদনা, মনোৰিঞ্ঞাণধাতুসম্ফস্সজা ৰেদনা – ইমা ৰুচ্চত্তি ‘‘কামধাতুযা সত্ত ৰেদনা’’.

তত্থ কতমা কামধাতুযা সত্ত সঞ্ঞা? চক্খুসম্ফস্সজা সঞ্ঞা, সোতসম্ফস্সজা সঞ্ঞা, ঘানসম্ফস্সজা সঞ্ঞা, জিৰ্হাসম্ফস্সজা সঞ্ঞা, কাযসম্ফস্সজা সঞ্ঞা, মনোধাতুসম্ফস্সজা সঞ্ঞা, মনোৰিঞ্ঞাণধাতুসম্ফস্সজা সঞ্ঞা – ইমা ৰুচ্চন্তি ‘‘কামধাতুযা সত্ত সঞ্ঞা’’.

তত্থ কতমা কামধাতুযা সত্ত চেতনা? চক্খুসম্ফস্সজা চেতনা, সোতসম্ফস্সজা চেতনা, ঘানসম্ফস্সজা চেতনা, জিৰ্হাসম্ফস্সজা চেতনা, কাযসম্ফস্সজা চেতনা, মনোধাতুসম্ফস্সজা চেতনা, মনোৰিঞ্ঞাণধাতুসম্ফস্সজা চেতনা – ইমা ৰুচ্চন্তি ‘‘কামধাতুযা সত্ত চেতনা’’.

তত্থ কতমানি কামধাতুযা সত্ত চিত্তানি? চক্খুৰিঞ্ঞাণং, সোতৰিঞ্ঞাণং, ঘানৰিঞ্ঞাণং, জিৰ্হাৰিঞ্ঞাণং, কাযৰিঞ্ঞাণং, মনোধাতু, মনোৰিঞ্ঞাণধাতু – ইমানি ৰুচ্চন্তি ‘‘কামধাতুযা সত্ত চিত্তানি’’.

২. রূপধাতু

৯৯৩. রূপধাতুযা কতি খন্ধা, কতি আযতনা, কতি ধাতুযো, কতি সচ্চানি, কতি ইন্দ্রিযানি…পে… কতি চিত্তানি?

রূপধাতুযা পঞ্চক্খন্ধা, ছ আযতনানি, নৰ ধাতুযো, তীণি সচ্চানি, চুদ্দসিন্দ্রিযানি, অট্ঠ হেতূ, তযো আহারা, চত্তারো ফস্সা, চতস্সো ৰেদনা, চতস্সো সঞ্ঞা, চতস্সো চেতনা, চত্তারি চিত্তানি.

৯৯৪. তত্থ কতমে রূপধাতুযা পঞ্চক্খন্ধা? রূপক্খন্ধো, ৰেদনাক্খন্ধো, সঞ্ঞাক্খন্ধো, সঙ্খারক্খন্ধো, ৰিঞ্ঞাণক্খন্ধো – ইমে ৰুচ্চন্তি ‘‘রূপধাতুযা পঞ্চক্খন্ধা’’.

তত্থ কতমানি রূপধাতুযা ছ আযতনানি? চক্খাযতনং, রূপাযতনং, সোতাযতনং, সদ্দাযতনং, মনাযতনং, ধম্মাযতনং – ইমানি ৰুচ্চন্তি ‘‘রূপধাতুযা ছ আযতনানি’’.

তত্থ কতমা রূপধাতুযা নৰ ধাতুযো? চক্খুধাতু, রূপধাতু, চক্খুৰিঞ্ঞাণধাতু, সোতধাতু, সদ্দধাতু, সোতৰিঞ্ঞাণধাতু, মনোধাতু, ধম্মধাতু, মনোৰিঞ্ঞাণধাতু – ইমা ৰুচ্চন্তি ‘‘রূপধাতুযা নৰ ধাতুযো’’.

তত্থ কতমানি রূপধাতুযা তীণি সচ্চানি? দুক্খসচ্চং, সমুদযসচ্চং, মগ্গসচ্চং – ইমানি ৰুচ্চন্তি ‘‘রূপধাতুযা তীণি সচ্চানি’’.

তত্থ কতমানি রূপধাতুযা চুদ্দসিন্দ্রিযানি? চক্খুন্দ্রিযং, সোতিন্দ্রিযং, মনিন্দ্রিযং, জীৰিতিন্দ্রিযং, সোমনস্সিন্দ্রিযং, উপেক্খিন্দ্রিযং, সদ্ধিন্দ্রিযং, ৰীরিযিন্দ্রিযং, সতিন্দ্রিযং, সমাধিন্দ্রিযং, পঞ্ঞিন্দ্রিযং, অনঞ্ঞাতঞ্ঞস্সামীতিন্দ্রিযং, অঞ্ঞিন্দ্রিযং, অঞ্ঞাতাৰিন্দ্রিযং – ইমানি ৰুচ্চন্তি ‘‘রূপধাতুযা চুদ্দসিন্দ্রিযানি’’.

তত্থ কতমে রূপধাতুযা অট্ঠ হেতূ? তযো কুসলহেতূ, দ্ৰে অকুসলহেতূ, তযো অব্যাকতহেতূ.

তত্থ কতমে দ্ৰে অকুসলহেতূ? লোভো অকুসলহেতু, মোহো অকুসলহেতু – ইমে দ্ৰে অকুসলহেতূ.

তত্থ কতমে তযো অব্যাকতহেতূ? কুসলানং ৰা ধম্মানং ৰিপাকতো কিরিযাব্যাকতেসু ৰা ধম্মেসু অলোভো, অদোসো, অমোহো – ইমে তযো অব্যাকতহেতূ. ইমে ৰুচ্চন্তি রূপধাতুযা অট্ঠ হেতূ.

তত্থ কতমে রূপধাতুযা তযো আহারা? ফস্সাহারো, মনোসঞ্চেতনাহারো, ৰিঞ্ঞাণাহারো – ইমে ৰুচ্চন্তি ‘‘রূপধাতুযা তযো আহারা’’.

তত্থ কতমে রূপধাতুযা চত্তারো ফস্সা? চক্খুসম্ফস্সো, সোতসম্ফস্সো, মনোধাতুসম্ফস্সো, মনোৰিঞ্ঞাণধাতুসম্ফস্সো – ইমে ৰুচ্চন্তি ‘‘রূপধাতুযা চত্তারো ফস্সা’’.

তত্থ কতমা রূপধাতুযা চতস্সো ৰেদনা…পে… চতস্সো সঞ্ঞা…পে… চতস্সো চেতনা…পে… চত্তারি চিত্তানি? চক্খুৰিঞ্ঞাণং, সোতৰিঞ্ঞাণং, মনোধাতু, মনোৰিঞ্ঞাণধাতু – ইমানি ৰুচ্চন্তি ‘‘রূপধাতুযা চত্তারি চিত্তানি’’.

৩. অরূপধাতু

৯৯৫. অরূপধাতুযা কতি খন্ধা…পে… কতি চিত্তানি?

অরূপধাতুযা চত্তারো খন্ধা, দ্ৰে আযতনানি, দ্ৰে ধাতুযো, তীণি সচ্চানি, একাদসিন্দ্রিযানি, অট্ঠ হেতূ, তযো আহারা, একো ফস্সো, একা ৰেদনা, একা সঞ্ঞা, একা চেতনা, একং চিত্তং.

৯৯৬. তত্থ কতমে অরূপধাতুযা চত্তারো খন্ধা? ৰেদনাক্খন্ধো, সঞ্ঞাক্খন্ধো, সঙ্খারক্খন্ধো, ৰিঞ্ঞাণক্খন্ধো – ইমে ৰুচ্চন্তি ‘‘অরূপধাতুযা চত্তারো খন্ধা’’.

তত্থ কতমানি অরূপধাতুযা দ্ৰে আযতনানি? মনাযতনং, ধম্মাযতনং – ইমানি ৰুচ্চন্তি ‘‘অরূপধাতুযা দ্ৰে আযতনানি’’.

তত্থ কতমা অরূপধাতুযা দ্ৰে ধাতুযো? মনোৰিঞ্ঞাণধাতু, ধম্মধাতু – ইমা ৰুচ্চন্তি ‘‘অরূপধাতুযা দ্ৰে ধাতুযো’’.

তত্থ কতমানি অরূপধাতুযা তীণি সচ্চানি? দুক্খসচ্চং, সমুদযসচ্চং, মগ্গসচ্চং – ইমানি ৰুচ্চন্তি ‘‘অরূপধাতুযা তীণি সচ্চানি’’.

তত্থ কতমানি অরূপধাতুযা একাদসিন্দ্রিযানি? মনিন্দ্রিযং, জীৰিতিন্দ্রিযং, সোমনস্সিন্দ্রিযং, উপেক্খিন্দ্রিযং, সদ্ধিন্দ্রিযং, ৰীরিযিন্দ্রিযং, সতিন্দ্রিযং, সমাধিন্দ্রিযং, পঞ্ঞিন্দ্রিযং, অঞ্ঞিন্দ্রিযং, অঞ্ঞাতাৰিন্দ্রিযং – ইমানি ৰুচ্চন্তি ‘‘অরূপধাতুযা একাদসিন্দ্রিযানি’’.

তত্থ কতমে অরূপধাতুযা অট্ঠ হেতূ? তযো কুসলহেতূ, দ্ৰে অকুসলহেতূ, তযো অব্যাকতহেতূ…পে… ইমে ৰুচ্চন্তি ‘‘অরূপধাতুযা অট্ঠ হেতূ’’.

তত্থ কতমে অরূপধাতুযা তযো আহারা? ফস্সাহারো, মনোসঞ্চেতনাহারো, ৰিঞ্ঞাণাহারো – ইমে ৰুচ্চন্তি ‘‘অরূপধাতুযা তযো আহারা’’.

তত্থ কতমো অরূপধাতুযা একো ফস্সো? মনোৰিঞ্ঞাণধাতুসম্ফস্সো – অযং ৰুচ্চতি ‘‘অরূপধাতুযা একো ফস্সো’’.

তত্থ কতমা অরূপধাতুযা একা ৰেদনা…পে… একা সঞ্ঞা…পে… একা চেতনা…পে… একং চিত্তং? মনোৰিঞ্ঞাণধাতু – ইদং ৰুচ্চতি ‘‘অরূপধাতুযা একং চিত্তং’’.

৪. অপরিযাপন্নং

৯৯৭. অপরিযাপন্নে কতি খন্ধা…পে… কতি চিত্তানি?

অপরিযাপন্নে চত্তারো খন্ধা, দ্ৰে আযতনানি, দ্ৰে ধাতুযো, দ্ৰে সচ্চানি, দ্ৰাদসিন্দ্রিযানি, ছ হেতূ, তযো আহারা, একো ফস্সো, একা ৰেদনা, একা সঞ্ঞা, একা চেতনা, একং চিত্তং.

৯৯৮. তত্থ কতমে অপরিযাপন্নে চত্তারো খন্ধা? ৰেদনাক্খন্ধো, সঞ্ঞাক্খন্ধো, সঙ্খারক্খন্ধো, ৰিঞ্ঞাণক্খন্ধো – ইমে ৰুচ্চন্তি ‘‘অপরিযাপন্নে চত্তারো খন্ধা’’.

তত্থ কতমানি অপরিযাপন্নে দ্ৰে আযতনানি? মনাযতনং, ধম্মাযতনং – ইমানি ৰুচ্চন্তি ‘‘অপরিযাপন্নে দ্ৰে আযতনানি’’.

তত্থ কতমা অপরিযাপন্নে দ্ৰে ধাতুযো? মনোৰিঞ্ঞাণধাতু, ধম্মধাতু – ইমা ৰুচ্চন্তি ‘‘অপরিযাপন্নে দ্ৰে ধাতুযো’’.

তত্থ কতমানি অপরিযাপন্নে দ্ৰে সচ্চানি? মগ্গসচ্চং, নিরোধসচ্চং – ইমানি ৰুচ্চন্তি ‘‘অপরিযাপন্নে দ্ৰে সচ্চানি’’.

তত্থ কতমানি অপরিযাপন্নে দ্ৰাদসিন্দ্রিযানি? মনিন্দ্রিযং, জীৰিতিন্দ্রিযং, সোমনস্সিন্দ্রিযং, উপেক্খিন্দ্রিযং, সদ্ধিন্দ্রিযং, ৰীরিযিন্দ্রিযং, সতিন্দ্রিযং, সমাধিন্দ্রিযং, পঞ্ঞিন্দ্রিযং, অনঞ্ঞাতঞ্ঞস্সামীতিন্দ্রিযং, অঞ্ঞিন্দ্রিযং, অঞ্ঞাতাৰিন্দ্রিযং – ইমানি ৰুচ্চন্তি ‘‘অপরিযাপন্নে দ্ৰাদসিন্দ্রিযানি’’.

তত্থ কতমে অপরিযাপন্নে ছ হেতূ? তযো কুসলহেতূ, তযো অব্যাকতহেতূ.

তত্থ কতমে তযো অব্যাকতহেতূ? কুসলানং ধম্মানং ৰিপাকতো অলোভো, অদোসো, অমোহো – ইমে তযো অব্যাকতহেতূ. ইমে ৰুচ্চন্তি ‘‘অপরিযাপন্নে ছ হেতূ’’.

তত্থ কতমে অপরিযাপন্নে তযো আহারা? ফস্সাহারো, মনোসঞ্চেতনাহারো, ৰিঞ্ঞাণাহারো – ইমে ৰুচ্চন্তি ‘‘অপরিযাপন্নে তযো আহারা’’.

তত্থ কতমো অপরিযাপন্নে একো ফস্সো? মনোৰিঞ্ঞাণধাতুসম্ফস্সো – অযং ৰুচ্চতি ‘‘অপরিযাপন্নে একো ফস্সো’’.

তত্থ কতমা অপরিযাপন্নে একা ৰেদনা…পে… একা সঞ্ঞা…পে… একা চেতনা…পে… একং চিত্তং? মনোৰিঞ্ঞাণধাতু – ইদং ৰুচ্চতি ‘‘অপরিযাপন্নে একং চিত্তং’’.

৩. পরিযাপন্নাপরিযাপন্নৰারো

১. কামধাতু

৯৯৯. পঞ্চন্নং খন্ধানং কতি কামধাতুপরিযাপন্না, কতি ন কামধাতুপরিযাপন্না…পে… সত্তন্নং চিত্তানং কতি কামধাতুপরিযাপন্না, কতি ন কামধাতুপরিযাপন্না?

১০০০. রূপক্খন্ধো কামধাতুপরিযাপন্নো; চত্তারো খন্ধা সিযা কামধাতুপরিযাপন্না, সিযা ন কামধাতুপরিযাপন্না.

দসাযতনা কামধাতুপরিযাপন্না; দ্ৰে আযতনা সিযা কামধাতুপরিযাপন্না, সিযা ন কামধাতুপরিযাপন্না.

সোল়স ধাতুযো কামধাতুপরিযাপন্না; দ্ৰে ধাতুযো সিযা কামধাতুপরিযাপন্না, সিযা ন কামধাতুপরিযাপন্না.

সমুদযসচ্চং কামধাতুপরিযাপন্নং; দ্ৰে সচ্চা ন কামধাতুপরিযাপন্না; দুক্খসচ্চং সিযা কামধাতুপরিযাপন্নং, সিযা ন কামধাতুপরিযাপন্নং.

দসিন্দ্রিযা কামধাতুপরিযাপন্না; তীণিন্দ্রিযা ন কামধাতুপরিযাপন্না; নৰিন্দ্রিযা সিযা কামধাতুপরিযাপন্না, সিযা ন কামধাতুপরিযাপন্না.

তযো অকুসলহেতূ কামধাতুপরিযাপন্না; ছ হেতূ সিযা কামধাতুপরিযাপন্না, সিযা ন কামধাতুপরিযাপন্না.

কবল়ীকারো আহারো কামধাতুপরিযাপন্নো; তযো আহারা সিযা কামধাতুপরিযাপন্না, সিযা ন কামধাতুপরিযাপন্না.

ছ ফস্সা কামধাতুপরিযাপন্না; মনোৰিঞ্ঞাণধাতুসম্ফস্সো সিযা কামধাতু পরিযাপন্নো, সিযা ন কামধাতুপরিযাপন্নো.

ছ ৰেদনা…পে… ছ সঞ্ঞা… ছ চেতনা… ছ চিত্তা কামধাতুপরিযাপন্না; মনোৰিঞ্ঞাণধাতু সিযা কামধাতুপরিযাপন্না, সিযা ন কামধাতুপরিযাপন্না.

২. রূপধাতু

১০০১. পঞ্চন্নং খন্ধানং কতি রূপধাতুপরিযাপন্না, কতি ন রূপধাতুপরিযাপন্না …পে… সত্তন্নং চিত্তানং কতি রূপধাতুপরিযাপন্না, কতি ন রূপধাতুপরিযাপন্না?

১০০২. রূপক্খন্ধো ন রূপধাতুপরিযাপন্নো; চত্তারো খন্ধা সিযা রূপধাতুপরিযাপন্না, সিযা ন রূপধাতুপরিযাপন্না.

দসাযতনা ন রূপধাতুপরিযাপন্না; দ্ৰে আযতনা সিযা রূপধাতুপরিযাপন্না, সিযা ন রূপধাতুপরিযাপন্না.

সোল়স ধাতুযো ন রূপধাতুপরিযাপন্না; দ্ৰে ধাতুযো সিযা রূপধাতুপরিযাপন্না, সিযা ন রূপধাতুপরিযাপন্না.

তীণি সচ্চানি ন রূপধাতুপরিযাপন্না; দুক্খসচ্চং সিযা রূপধাতুপরিযাপন্নং, সিযা ন রূপধাতুপরিযাপন্নং.

তেরসিন্দ্রিযা ন রূপধাতুপরিযাপন্না; নৰিন্দ্রিযা সিযা রূপধাতুপরিযাপন্না, সিযা ন রূপধাতুপরিযাপন্না.

তযো অকুসলহেতূ ন রূপধাতুপরিযাপন্না; ছ হেতূ সিযা রূপধাতুপরিযাপন্না, সিযা ন রূপধাতুপরিযাপন্না.

কবল়ীকারো আহারো ন রূপধাতুপরিযাপন্নো; তযো আহারা সিযা রূপধাতুপরিযাপন্না, সিযা ন রূপধাতুপরিযাপন্না.

ছ ফস্সা ন রূপধাতুপরিযাপন্না; মনোৰিঞ্ঞাণধাতুসম্ফস্সো সিযা রূপধাতুপরিযাপন্নো, সিযা ন রূপধাতুপরিযাপন্নো.

ছ ৰেদনা…পে… ছ সঞ্ঞা… ছ চেতনা… ছ চিত্তা ন রূপধাতুপরিযাপন্না; মনোৰিঞ্ঞাণধাতু সিযা রূপধাতুপরিযাপন্না, সিযা ন রূপধাতুপরিযাপন্না.

৩. অরূপধাতু

১০০৩. পঞ্চন্নং খন্ধানং কতি অরূপধাতুপরিযাপন্না, কতি ন অরূপধাতুপরিযাপন্না…পে… সত্তন্নং চিত্তানং কতি অরূপধাতুপরিযাপন্না, কতি ন অরূপধাতুপরিযাপন্না?

১০০৪. রূপক্খন্ধো ন অরূপধাতুপরিযাপন্নো; চত্তারো খন্ধা সিযা অরূপধাতুপরিযাপন্না, সিযা ন অরূপধাতুপরিযাপন্না.

দসাযতনা ন অরূপধাতুপরিযাপন্না; দ্ৰে আযতনা সিযা অরূপধাতুপরিযাপন্না, সিযা ন অরূপধাতুপরিযাপন্না.

সোল়স ধাতুযো ন অরূপধাতুপরিযাপন্না; দ্ৰে ধাতুযো সিযা অরূপধাতুপরিযাপন্না, সিযা ন অরূপধাতুপরিযাপন্না.

তীণি সচ্চানি ন অরূপধাতুপরিযাপন্নানি.

দুক্খসচ্চং সিযা অরূপধাতুপরিযাপন্নং, সিযা ন অরূপধাতুপরিযাপন্নং.

চুদ্দসিন্দ্রিযা ন অরূপধাতুপরিযাপন্না; অট্ঠিন্দ্রিযা সিযা অরূপধাতুপরিযাপন্না, সিযা ন অরূপধাতুপরিযাপন্না.

তযো অকুসলহেতূ ন অরূপধাতুপরিযাপন্না; ছ হেতূ সিযা অরূপধাতুপরিযাপন্না, সিযা ন অরূপধাতুপরিযাপন্না.

কবল়ীকারো আহারো ন অরূপধাতুপরিযাপন্নো; তযো আহারা সিযা অরূপধাতুপরিযাপন্না, সিযা ন অরূপধাতুপরিযাপন্না.

ছ ফস্সা ন অরূপধাতুপরিযাপন্না; মনোৰিঞ্ঞাণধাতুসম্ফস্সো সিযা অরূপধাতুপরিযাপন্নো, সিযা ন অরূপধাতুপরিযাপন্নো.

ছ ৰেদনা…পে… ছ সঞ্ঞা … ছ চেতনা… ছ চিত্তা ন অরূপধাতুপরিযাপন্না; মনোৰিঞ্ঞাণধাতু সিযা অরূপধাতুপরিযাপন্না, সিযা ন অরূপধাতুপরিযাপন্না.

৪. পরিযাপন্নাপরিযাপন্নং

১০০৫. পঞ্চন্নং খন্ধানং কতি পরিযাপন্না, কতি অপরিযাপন্না…পে… সত্তন্নং চিত্তানং কতি পরিযাপন্না, কতি অপরিযাপন্না?

১০০৬. রূপক্খন্ধো পরিযাপন্নো; চত্তারো খন্ধা সিযা পরিযাপন্না, সিযা অপরিযাপন্না.

দসাযতনা পরিযাপন্না; দ্ৰে আযতনা সিযা পরিযাপন্না, সিযা অপরিযাপন্না.

সোল়স ধাতুযো পরিযাপন্না; দ্ৰে ধাতুযো সিযা পরিযাপন্না, সিযা অপরিযাপন্না.

দ্ৰে সচ্চা পরিযাপন্না; দ্ৰে সচ্চা অপরিযাপন্না.

দসিন্দ্রিযা পরিযাপন্না, তীণিন্দ্রিযা অপরিযাপন্না; নৰিন্দ্রিযা সিযা পরিযাপন্না, সিযা অপরিযাপন্না.

তযো অকুসলহেতূ পরিযাপন্না; ছ হেতূ সিযা পরিযাপন্না, সিযা অপরিযাপন্না.

কবল়ীকারো আহারো পরিযাপন্নো; তযো আহারা সিযা পরিযাপন্না, সিযা অপরিযাপন্না.

ছ ফস্সা পরিযাপন্না; মনোৰিঞ্ঞাণধাতুসম্ফস্সো সিযা পরিযাপন্নো, সিযা অপরিযাপন্নো.

ছ ৰেদনা…পে… ছ সঞ্ঞা… ছ চেতনা… ছ চিত্তা পরিযাপন্না; মনোৰিঞ্ঞাণধাতু সিযা পরিযাপন্না, সিযা অপরিযাপন্না.

৪. ধম্মদস্সনৰারো

১. কামধাতু

১০০৭. কামধাতুযা উপপত্তিক্খণে কতি খন্ধা পাতুভৰন্তি…পে… কতি চিত্তানি পাতুভৰন্তি?

কামধাতুযা উপপত্তিক্খণে সব্বেসং পঞ্চক্খন্ধা পাতুভৰন্তি; কস্সচি একাদসাযতনানি পাতুভৰন্তি; কস্সচি দসাযতনানি পাতুভৰন্তি; কস্সচি অপরানি দসাযতনানি পাতুভৰন্তি; কস্সচি নৰাযতনানি পাতুভৰন্তি; কস্সচি সত্তাযতনানি পাতুভৰন্তি; কস্সচি একাদস ধাতুযো পাতুভৰন্তি; কস্সচি দস ধাতুযো পাতুভৰন্তি; কস্সচি অপরা দস ধাতুযো পাতুভৰন্তি; কস্সচি নৰ ধাতুযো পাতুভৰন্তি; কস্সচি সত্ত ধাতুযো পাতুভৰন্তি; সব্বেসং একং সচ্চং পাতুভৰতি; কস্সচি চুদ্দসিন্দ্রিযানি পাতুভৰন্তি; কস্সচি তেরসিন্দ্রিযানি পাতুভৰন্তি; কস্সচি অপরানি তেরসিন্দ্রিযানি পাতুভৰন্তি; কস্সচি দ্ৰাদসিন্দ্রিযানি পাতুভৰন্তি; কস্সচি দসিন্দ্রিযানি পাতুভৰন্তি; কস্সচি নৰিন্দ্রিযানি পাতুভৰন্তি; কস্সচি অপরানি নৰিন্দ্রিযানি পাতুভৰন্তি; কস্সচি অট্ঠিন্দ্রিযানি পাতুভৰন্তি; কস্সচি অপরানি অট্ঠিন্দ্রিযানি পাতুভৰন্তি; কস্সচি সত্তিন্দ্রিযানি পাতুভৰন্তি; কস্সচি পঞ্চিন্দ্রিযানি পাতুভৰন্তি; কস্সচি চত্তারিন্দ্রিযানি পাতুভৰন্তি; কস্সচি তযো হেতূ পাতুভৰন্তি; কস্সচি দ্ৰে হেতূ পাতুভৰন্তি; কস্সচি [কেচি (স্যা.)] অহেতুকা পাতুভৰন্তি; সব্বেসং চত্তারো আহারা পাতুভৰন্তি; সব্বেসং একো ফস্সো পাতুভৰতি; সব্বেসং একা ৰেদনা… একা সঞ্ঞা… একা চেতনা… একং চিত্তং পাতুভৰতি.

১০০৮. কামধাতুযা উপপত্তিক্খণে সব্বেসং কতমে পঞ্চক্খন্ধা পাতুভৰন্তি? রূপক্খন্ধো…পে… ৰিঞ্ঞাণক্খন্ধো – কামধাতুযা উপপত্তিক্খণে সব্বেসং ইমে পঞ্চক্খন্ধা পাতুভৰন্তি.

১০০৯. কামধাতুযা উপপত্তিক্খণে কস্স একাদসাযতনানি পাতুভৰন্তি? কামাৰচরানং দেৰানং, পঠমকপ্পিকানং মনুস্সানং, ওপপাতিকানং পেতানং, ওপপাতিকানং অসুরানং, ওপপাতিকানং তিরচ্ছানগতানং, নেরযিকানং পরিপুণ্ণাযতনানং উপপত্তিক্খণে একাদসাযতনানি পাতুভৰন্তি – চক্খাযতনং, রূপাযতনং, সোতাযতনং, ঘানাযতনং, গন্ধাযতনং, জিৰ্হাযতনং, রসাযতনং, কাযাযতনং, ফোট্ঠব্বাযতনং, মনাযতনং, ধম্মাযতনং. কামধাতুযা উপপত্তিক্খণে এতেসং ইমানি একাদসাযতনানি পাতুভৰন্তি.

কামধাতুযা উপপত্তিক্খণে কস্স দসাযতনানি পাতুভৰন্তি? ওপপাতিকানং পেতানং, ওপপাতিকানং অসুরানং, ওপপাতিকানং তিরচ্ছানগতানং নেরযিকানং, জচ্চন্ধানং উপপত্তিক্খণে দসাযতনানি পাতুভৰন্তি – রূপাযতনং, সোতাযতনং, ঘানাযতনং, গন্ধাযতনং, জিৰ্হাযতনং, রসাযতনং, কাযাযতনং, ফোট্ঠব্বাযতনং, মনাযতনং, ধম্মাযতনং. কামধাতুযা উপপত্তিক্খণে এতেসং ইমানি দসাযতনানি পাতুভৰন্তি.

কামধাতুযা উপপত্তিক্খণে কস্স অপরানি দসাযতনানি পাতুভৰন্তি? ওপপাতিকানং পেতানং, ওপপাতিকানং অসুরানং, ওপপাতিকানং তিরচ্ছানগতানং নেরযিকানং, জচ্চবধিরানং উপপত্তিক্খণে দসাযতনানি পাতুভৰন্তি – চক্খাযতনং, রূপাযতনং, ঘানাযতনং, গন্ধাযতনং, জিৰ্হাযতনং, রসাযতনং, কাযাযতনং, ফোট্ঠব্বাযতনং, মনাযতনং, ধম্মাযতনং. কামধাতুযা উপপত্তিক্খণে এতেসং ইমানি দসাযতনানি পাতুভৰন্তি.

কামধাতুযা উপপত্তিক্খণে কস্স নৰাযতনানি পাতুভৰন্তি? ওপপাতিকানং পেতানং, ওপপাতিকানং অসুরানং, ওপপাতিকানং তিরচ্ছানগতানং নেরযিকানং, জচ্চন্ধবধিরানং উপপত্তিক্খণে নৰাযতনানি পাতুভৰন্তি – রূপাযতনং, ঘানাযতনং, গন্ধাযতনং, জিৰ্হাযতনং, রসাযতনং, কাযাযতনং, ফোট্ঠব্বাযতনং, মনাযতনং, ধম্মাযতনং. কামধাতুযা উপপত্তিক্খণে এতেসং ইমানি নৰাযতনানি পাতুভৰন্তি.

কামধাতুযা উপপত্তিক্খণে কস্স সত্তাযতনানি পাতুভৰন্তি? গব্ভসেয্যকানং সত্তানং উপপত্তিক্খণে সত্তাযতনানি পাতুভৰন্তি – রূপাযতনং, গন্ধাযতনং, রসাযতনং, কাযাযতনং, ফোট্ঠব্বাযতনং, মনাযতনং, ধম্মাযতনং. কামধাতুযা উপপত্তিক্খণে এতেসং ইমানি সত্তাযতনানি পাতুভৰন্তি.

১০১০. কামধাতুযা উপপত্তিক্খণে কস্স একাদস ধাতুযো পাতুভৰন্তি? কামাৰচরানং দেৰানং, পঠমকপ্পিকানং মনুস্সানং, ওপপাতিকানং পেতানং, ওপপাতিকানং অসুরানং, ওপপাতিকানং তিরচ্ছানগতানং নেরযিকানং পরিপুণ্ণাযতনানং উপপত্তিক্খণে একাদস ধাতুযো পাতুভৰন্তি – চক্খুধাতু, রূপধাতু, সোতধাতু, ঘানধাতু, গন্ধধাতু, জিৰ্হাধাতু, রসধাতু, কাযধাতু, ফোট্ঠব্বধাতু, মনোৰিঞ্ঞাণধাতু, ধম্মধাতু. কামধাতুযা উপপত্তিক্খণে এতেসং ইমা একাদস ধাতুযো পাতুভৰন্তি.

কামধাতুযা উপপত্তিক্খণে কস্স দস ধাতুযো পাতুভৰন্তি? ওপপাতিকানং পেতানং, ওপপাতিকানং অসুরানং, ওপপাতিকানং তিরচ্ছানগতানং নেরযিকানং, জচ্চন্ধানং উপপত্তিক্খণে দস ধাতুযো পাতুভৰন্তি – রূপধাতু, সোতধাতু, ঘানধাতু, গন্ধধাতু, জিৰ্হাধাতু, রসধাতু, কাযধাতু, ফোট্ঠব্বধাতু, মনোৰিঞ্ঞাণধাতু, ধম্মধাতু. কামধাতুযা উপপত্তিক্খণে এতেসং ইমা দস ধাতুযো পাতুভৰন্তি.

কামধাতুযা উপপত্তিক্খণে কস্স অপরা দস ধাতুযো পাতুভৰন্তি? ওপপাতিকানং পেতানং, ওপপাতিকানং অসুরানং, ওপপাতিকানং তিরচ্ছানগতানং নেরযিকানং, জচ্চবধিরানং উপপত্তিক্খণে দস ধাতুযো পাতুভৰন্তি – চক্খুধাতু, রূপধাতু, ঘানধাতু, গন্ধধাতু, জিৰ্হাধাতু, রসধাতু, কাযধাতু, ফোট্ঠব্বধাতু, মনোৰিঞ্ঞাণধাতু, ধম্মধাতু. কামধাতুযা উপপত্তিক্খণে এতেসং ইমা দস ধাতুযো পাতুভৰন্তি.

কামধাতুযা উপপত্তিক্খণে কস্স নৰ ধাতুযো পাতুভৰন্তি? ওপপাতিকানং পেতানং, ওপপাতিকানং অসুরানং, ওপপাতিকানং তিরচ্ছানগতানং নেরযিকানং, জচ্চন্ধবধিরানং উপপত্তিক্খণে নৰ ধাতুযো পাতুভৰন্তি – রূপধাতু, ঘানধাতু, গন্ধধাতু, জিৰ্হাধাতু, রসধাতু, কাযধাতু, ফোট্ঠব্বধাতু, মনোৰিঞ্ঞাণধাতু, ধম্মধাতু. কামধাতুযা উপপত্তিক্খণে এতেসং ইমা নৰ ধাতুযো পাতুভৰন্তি.

কামধাতুযা উপপত্তিক্খণে কস্স সত্ত ধাতুযো পাতুভৰন্তি? গব্ভসেয্যকানং সত্তানং উপপত্তিক্খণে সত্ত ধাতুযো পাতুভৰন্তি – রূপধাতু, গন্ধধাতু, রসধাতু, কাযধাতু, ফোট্ঠব্বধাতু, মনোৰিঞ্ঞাণধাতু, ধম্মধাতু. কামধাতুযা উপপত্তিক্খণে এতেসং ইমা সত্ত ধাতুযো পাতুভৰন্তি.

১০১১. কামধাতুযা উপপত্তিক্খণে সব্বেসং কতমং একং সচ্চং পাতুভৰতি? দুক্খসচ্চং – কামধাতুযা উপপত্তিক্খণে সব্বেসং ইদং একং সচ্চং পাতুভৰতি.

১০১২. কামধাতুযা উপপত্তিক্খণে কস্স চুদ্দসিন্দ্রিযানি পাতুভৰন্তি? কামাৰচরানং দেৰানং, সহেতুকানং ঞাণসম্পযুত্তানং উপপত্তিক্খণে চুদ্দসিন্দ্রিযানি পাতুভৰন্তি – চক্খুন্দ্রিযং, সোতিন্দ্রিযং, ঘানিন্দ্রিযং, জিৰ্হিন্দ্রিযং, কাযিন্দ্রিযং, মনিন্দ্রিযং, ইত্থিন্দ্রিযং ৰা পুরিসিন্দ্রিযং ৰা, জীৰিতিন্দ্রিযং, সোমনস্সিন্দ্রিযং ৰা উপেক্খিন্দ্রিযং ৰা, সদ্ধিন্দ্রিযং, ৰীরিযিন্দ্রিযং, সতিন্দ্রিযং, সমাধিন্দ্রিযং, পঞ্ঞিন্দ্রিযং. কামধাতুযা উপপত্তিক্খণে এতেসং ইমানি চুদ্দসিন্দ্রিযানি পাতুভৰন্তি.

কামধাতুযা উপপত্তিক্খণে কস্স তেরসিন্দ্রিযানি পাতুভৰন্তি? কামাৰচরানং দেৰানং সহেতুকানং ঞাণৰিপ্পযুত্তানং উপপত্তিক্খণে তেরসিন্দ্রিযানি পাতুভৰন্তি – চক্খুন্দ্রিযং, সোতিন্দ্রিযং, ঘানিন্দ্রিযং, জিৰ্হিন্দ্রিযং, কাযিন্দ্রিযং, মনিন্দ্রিযং, ইত্থিন্দ্রিযং ৰা পুরিসিন্দ্রিযং ৰা, জীৰিতিন্দ্রিযং, সোমনস্সিন্দ্রিযং ৰা উপেক্খিন্দ্রিযং ৰা, সদ্ধিন্দ্রিযং, ৰীরিযিন্দ্রিযং, সতিন্দ্রিযং, সমাধিন্দ্রিযং. কামধাতুযা উপপত্তিক্খণে এতেসং ইমানি তেরসিন্দ্রিযানি পাতুভৰন্তি.

কামধাতুযা উপপত্তিক্খণে কস্স অপরানি তেরসিন্দ্রিযানি পাতুভৰন্তি? পঠমকপ্পিকানং মনুস্সানং সহেতুকানং ঞাণসম্পযুত্তানং উপপত্তিক্খণে তেরসিন্দ্রিযানি পাতুভৰন্তি – চক্খুন্দ্রিযং, সোতিন্দ্রিযং, ঘানিন্দ্রিযং, জিৰ্হিন্দ্রিযং, কাযিন্দ্রিযং, মনিন্দ্রিযং, জীৰিতিন্দ্রিযং, সোমনস্সিন্দ্রিযং ৰা উপেক্খিন্দ্রিযং ৰা, সদ্ধিন্দ্রিযং, ৰীরিযিন্দ্রিযং, সতিন্দ্রিযং, সমাধিন্দ্রিযং, পঞ্ঞিন্দ্রিযং. কামধাতুযা উপপত্তিক্খণে এতেসং ইমানি তেরসিন্দ্রিযানি পাতুভৰন্তি.

কামধাতুযা উপপত্তিক্খণে কস্স দ্ৰাদসিন্দ্রিযানি পাতুভৰন্তি? পঠমকপ্পিকানং মনুস্সানং সহেতুকানং ঞাণৰিপ্পযুত্তানং উপপত্তিক্খণে দ্ৰাদসিন্দ্রিযানি পাতুভৰন্তি – চক্খুন্দ্রিযং, সোতিন্দ্রিযং, ঘানিন্দ্রিযং, জিৰ্হিন্দ্রিযং, কাযিন্দ্রিযং, মনিন্দ্রিযং, জীৰিতিন্দ্রিযং, সোমনস্সিন্দ্রিযং ৰা উপেক্খিন্দ্রিযং ৰা, সদ্ধিন্দ্রিযং, ৰীরিযিন্দ্রিযং, সতিন্দ্রিযং, সমাধিন্দ্রিযং. কামধাতুযা উপপত্তিক্খণে এতেসং ইমানি দ্ৰাদসিন্দ্রিযানি পাতুভৰন্তি.

কামধাতুযা উপপত্তিক্খণে কস্স দসিন্দ্রিযানি পাতুভৰন্তি? গব্ভসেয্যকানং সত্তানং সহেতুকানং ঞাণসম্পযুত্তানং উপপত্তিক্খণে দসিন্দ্রিযানি পাতুভৰন্তি – কাযিন্দ্রিযং, মনিন্দ্রিযং, ইত্থিন্দ্রিযং ৰা পুরিসিন্দ্রিযং ৰা, জীৰিতিন্দ্রিযং, সোমনস্সিন্দ্রিযং ৰা উপেক্খিন্দ্রিযং ৰা, সদ্ধিন্দ্রিযং, ৰীরিযিন্দ্রিযং, সতিন্দ্রিযং, সমাধিন্দ্রিযং, পঞ্ঞিন্দ্রিযং. কামধাতুযা উপপত্তিক্খণে এতেসং ইমানি দসিন্দ্রিযানি পাতুভৰন্তি.

কামধাতুযা উপপত্তিক্খণে কস্স নৰিন্দ্রিযানি পাতুভৰন্তি? গব্ভসেয্যকানং সত্তানং সহেতুকানং ঞাণৰিপ্পযুত্তানং উপপত্তিক্খণে নৰিন্দ্রিযানি পাতুভৰন্তি – কাযিন্দ্রিযং, মনিন্দ্রিযং, ইত্থিন্দ্রিযং ৰা পুরিসিন্দ্রিযং ৰা, জীৰিতিন্দ্রিযং, সোমনস্সিন্দ্রিযং ৰা উপেক্খিন্দ্রিযং ৰা, সদ্ধিন্দ্রিযং, ৰীরিযিন্দ্রিযং, সতিন্দ্রিযং, সমাধিন্দ্রিযং. কামধাতুযা উপপত্তিক্খণে এতেসং ইমানি নৰিন্দ্রিযানি পাতুভৰন্তি.

কামধাতুযা উপপত্তিক্খণে কস্স অপরানি নৰিন্দ্রিযানি পাতুভৰন্তি? ওপপাতিকানং পেতানং, ওপপাতিকানং অসুরানং, ওপপাতিকানং তিরচ্ছানগতানং নেরযিকানং পরিপুণ্ণাযতনানং উপপত্তিক্খণে নৰিন্দ্রিযানি পাতুভৰন্তি – চক্খুন্দ্রিযং, সোতিন্দ্রিযং, ঘানিন্দ্রিযং, জিৰ্হিন্দ্রিযং, কাযিন্দ্রিযং, মনিন্দ্রিযং, ইত্থিন্দ্রিযং ৰা পুরিসিন্দ্রিযং ৰা, জীৰিতিন্দ্রিযং, উপেক্খিন্দ্রিযং. কামধাতুযা উপপত্তিক্খণে এতেসং ইমানি নৰিন্দ্রিযানি পাতুভৰন্তি.

কামধাতুযা উপপত্তিক্খণে কস্স অট্ঠিন্দ্রিযানি পাতুভৰন্তি? ওপপাতিকানং পেতানং, ওপপাতিকানং অসুরানং, ওপপাতিকানং তিরচ্ছানগতানং নেরযিকানং, জচ্চন্ধানং উপপত্তিক্খণে অট্ঠিন্দ্রিযানি পাতুভৰন্তি – সোতিন্দ্রিযং, ঘানিন্দ্রিযং, জিৰ্হিন্দ্রিযং, কাযিন্দ্রিযং, মনিন্দ্রিযং, ইত্থিন্দ্রিযং ৰা পুরিসিন্দ্রিযং ৰা, জীৰিতিন্দ্রিযং, উপেক্খিন্দ্রিযং. কামধাতুযা উপপত্তিক্খণে এতেসং ইমানি অট্ঠিন্দ্রিযানি পাতুভৰন্তি.

কামধাতুযা উপপত্তিক্খণে কস্স অপরানি অট্ঠিন্দ্রিযানি পাতুভৰন্তি? ওপপাতিকানং পেতানং, ওপপাতিকানং অসুরানং, ওপপাতিকানং তিরচ্ছানগতানং নেরযিকানং, জচ্চবধিরানং উপপত্তিক্খণে অট্ঠিন্দ্রিযানি পাতুভৰন্তি – চক্খুন্দ্রিযং, ঘানিন্দ্রিযং, জিৰ্হিন্দ্রিযং, কাযিন্দ্রিযং মনিন্দ্রিযং, ইত্থিন্দ্রিযং ৰা পুরিসিন্দ্রিযং ৰা, জীৰিতিন্দ্রিযং, উপেক্খিন্দ্রিযং. কামধাতুযা উপপত্তিক্খণে এতেসং ইমানি অট্ঠিন্দ্রিযানি পাতুভৰন্তি.

কামধাতুযা উপপত্তিক্খণে কস্স সত্তিন্দ্রিযানি পাতুভৰন্তি? ওপপাতিকানং পেতানং, ওপপাতিকানং অসুরানং, ওপপাতিকানং তিরচ্ছানগতানং নেরযিকানং, জচ্চন্ধবধিরানং উপপত্তিক্খণে সত্তিন্দ্রিযানি পাতুভৰন্তি – ঘানিন্দ্রিযং, জিৰ্হিন্দ্রিযং, কাযিন্দ্রিযং, মনিন্দ্রিযং, ইত্থিন্দ্রিযং ৰা পুরিসিন্দ্রিযং ৰা, জীৰিতিন্দ্রিযং, উপেক্খিন্দ্রিযং. কামধাতুযা উপপত্তিক্খণে এতেসং ইমানি সত্তিন্দ্রিযানি পাতুভৰন্তি.

কামধাতুযা উপপত্তিক্খণে কস্স পঞ্চিন্দ্রিযানি পাতুভৰন্তি? গব্ভসেয্যকানং সত্তানং অহেতুকানং, ঠপেত্ৰা নপুংসকানং, উপপত্তিক্খণে পঞ্চিন্দ্রিযানি পাতুভৰন্তি – কাযিন্দ্রিযং, মনিন্দ্রিযং, ইত্থিন্দ্রিযং ৰা পুরিসিন্দ্রিযং ৰা, জীৰিতিন্দ্রিযং, উপেক্খিন্দ্রিযং. কামধাতুযা উপপত্তিক্খণে এতেসং ইমানি পঞ্চিন্দ্রিযানি পাতুভৰন্তি.

কামধাতুযা উপপত্তিক্খণে কস্স চত্তারিন্দ্রিযানি পাতুভৰন্তি? গব্ভসেয্যকানং সত্তানং অহেতুকানং, নপুংসকানং উপপত্তিক্খণে চত্তারিন্দ্রিযানি পাতুভৰন্তি – কাযিন্দ্রিযং, মনিন্দ্রিযং, জীৰিতিন্দ্রিযং, উপেক্খিন্দ্রিযং. কামধাতুযা উপপত্তিক্খণে এতেসং ইমানি চত্তারিন্দ্রিযানি পাতুভৰন্তি.