৬. অধিমানসুত্তং

৮৬. একং সমযং আযস্মা মহাকস্সপো রাজগহে ৰিহরতি ৰেল়ুৰনে কলন্দকনিৰাপে. তত্র খো আযস্মা মহাকস্সপো ভিক্খূ আমন্তেসি – ‘‘আৰুসো ভিক্খৰে’’তি. ‘‘আৰুসো’’তি খো তে ভিক্খূ আযস্মতো মহাকস্সপস্স পচ্চস্সোসুং. আযস্মা মহাকস্সপো এতদৰোচ –

‘‘ইধাৰুসো, ভিক্খু অঞ্ঞং ব্যাকরোতি – ‘খীণা জাতি, ৰুসিতং ব্রহ্মচরিযং, কতং করণীযং, নাপরং ইত্থত্তাযাতি পজানামী’তি. তমেনং তথাগতো ৰা তথাগতসাৰকো ৰা ঝাযী সমাপত্তিকুসলো পরচিত্তকুসলো পরচিত্তপরিযাযকুসলো সমনুযুঞ্জতি সমনুগ্গাহতি সমনুভাসতি. সো তথাগতেন ৰা তথাগতসাৰকেন ৰা ঝাযিনা সমাপত্তিকুসলেন পরচিত্তকুসলেন পরচিত্তপরিযাযকুসলেন সমনুযুঞ্জিযমানো সমনুগ্গাহিযমানো সমনুভাসিযমানো ইরীণং আপজ্জতি ৰিচিনং আপজ্জতি অনযং আপজ্জতি ব্যসনং আপজ্জতি অনযব্যসনং আপজ্জতি.

‘‘তমেনং তথাগতো ৰা তথাগতসাৰকো ৰা ঝাযী সমাপত্তিকুসলো পরচিত্তকুসলো পরচিত্তপরিযাযকুসলো এৰং চেতসা চেতো পরিচ্চ মনসি করোতি – ‘কিং নু খো অযমাযস্মা অঞ্ঞং ব্যাকরোতি – খীণা জাতি, ৰুসিতং ব্রহ্মচরিযং, কতং করণীযং, নাপরং ইত্থত্তাযাতি পজানামী’তি.

‘‘তমেনং তথাগতো ৰা তথাগতসাৰকো ৰা ঝাযী সমাপত্তিকুসলো পরচিত্তকুসলো পরচিত্তপরিযাযকুসলো এৰং চেতসা চেতো পরিচ্চ পজানাতি –

‘অধিমানিকো খো অযমাযস্মা অধিমানসচ্চো, অপ্পত্তে পত্তসঞ্ঞী, অকতে কতসঞ্ঞী, অনধিগতে অধিগতসঞ্ঞী. অধিমানেন অঞ্ঞং ব্যাকরোতি – খীণা জাতি, ৰুসিতং ব্রহ্মচরিযং, কতং করণীযং, নাপরং ইত্থত্তাযাতি পজানামী’তি.

‘‘তমেনং তথাগতো ৰা তথাগতসাৰকো ৰা ঝাযী সমাপত্তিকুসলো পরচিত্তকুসলো পরচিত্তপরিযাযকুসলো এৰং চেতসা চেতো পরিচ্চ মনসি করোতি – ‘কিং নু খো অযমাযস্মা নিস্সায অধিমানিকো অধিমানসচ্চো, অপ্পত্তে পত্তসঞ্ঞী, অকতে কতসঞ্ঞী, অনধিগতে অধিগতসঞ্ঞী. অধিমানেন অঞ্ঞং ব্যাকরোতি – খীণা জাতি, ৰুসিতং ব্রহ্মচরিযং, কতং করণীযং, নাপরং ইত্থত্তাযাতি পজানামী’তি.

‘‘তমেনং তথাগতো ৰা তথাগতসাৰকো ৰা ঝাযী সমাপত্তিকুসলো পরচিত্তকুসলো পরচিত্তপরিযাযকুসলো এৰং চেতসা চেতো পরিচ্চ পজানাতি –

‘বহুস্সুতো খো পন অযমাযস্মা সুতধরো সুতসন্নিচযো, যে তে ধম্মা আদিকল্যাণা মজ্ঝেকল্যাণা পরিযোসানকল্যাণা সাত্থং সব্যঞ্জনং কেৰলপরিপুণ্ণং পরিসুদ্ধং ব্রহ্মচরিযং অভিৰদন্তি, তথারূপাস্স ধম্মা বহুস্সুতা হোন্তি ধাতা ৰচসা পরিচিতা মনসানুপেক্খিতা দিট্ঠিযা সুপ্পটিৰিদ্ধা. তস্মা অযমাযস্মা অধিমানিকো অধিমানসচ্চো, অপ্পত্তে পত্তসঞ্ঞী, অকতে কতসঞ্ঞী, অনধিগতে অধিগতসঞ্ঞী. অধিমানেন অঞ্ঞং ব্যাকরোতি – খীণা জাতি, ৰুসিতং ব্রহ্মচরিযং, কতং করণীযং, নাপরং ইত্থত্তাযাতি পজানামী’তি.

‘‘তমেনং তথাগতো ৰা তথাগতসাৰকো ৰা ঝাযী সমাপত্তিকুসলো পরচিত্তকুসলো পরচিত্তপরিযাযকুসলো এৰং চেতসা চেতো পরিচ্চ পজানাতি –

‘অভিজ্ঝালু খো পন অযমাযস্মা; অভিজ্ঝাপরিযুট্ঠিতেন চেতসা বহুলং ৰিহরতি. অভিজ্ঝাপরিযুট্ঠানং খো পন তথাগতপ্পৰেদিতে ধম্মৰিনযে পরিহানমেতং.

‘ব্যাপন্নো খো পন অযমাযস্মা; ব্যাপাদপরিযুট্ঠিতেন চেতসা বহুলং ৰিহরতি. ব্যাপাদপরিযুট্ঠানং খো পন তথাগতপ্পৰেদিতে ধম্মৰিনযে পরিহানমেতং.

‘থিনমিদ্ধো খো পন অযমাযস্মা; থিনমিদ্ধপরিযুট্ঠিতেন চেতসা বহুলং ৰিহরতি. থিনমিদ্ধপরিযুট্ঠানং খো পন তথাগতপ্পৰেদিতে ধম্মৰিনযে পরিহানমেতং.

‘উদ্ধতো খো পন অযমাযস্মা; উদ্ধচ্চপরিযুট্ঠিতেন চেতসা বহুলং ৰিহরতি. উদ্ধচ্চপরিযুট্ঠানং খো পন তথাগতপ্পৰেদিতে ধম্মৰিনযে পরিহানমেতং.

‘ৰিচিকিচ্ছো খো পন অযমাযস্মা; ৰিচিকিচ্ছাপরিযুট্ঠিতেন চেতসা বহুলং ৰিহরতি. ৰিচিকিচ্ছাপরিযুট্ঠানং খো পন তথাগতপ্পৰেদিতে ধম্মৰিনযে পরিহানমেতং.

‘কম্মারামো খো পন অযমাযস্মা কম্মরতো কম্মারামতং অনুযুত্তো. কম্মারামতা খো পন তথাগতপ্পৰেদিতে ধম্মৰিনযে পরিহানমেতং.

‘ভস্সারামো খো পন অযমাযস্মা ভস্সরতো ভস্সারামতং অনুযুত্তো. ভস্সারামতা খো পন তথাগতপ্পৰেদিতে ধম্মৰিনযে পরিহানমেতং.

‘নিদ্দারামো খো পন অযমাযস্মা নিদ্দারতো নিদ্দারামতং অনুযুত্তো. নিদ্দারামতা খো পন তথাগতপ্পৰেদিতে ধম্মৰিনযে পরিহানমেতং.

‘সঙ্গণিকারামো খো পন অযমাযস্মা সঙ্গণিকরতো সঙ্গণিকারামতং অনুযুত্তো. সঙ্গণিকারামতা খো পন তথাগতপ্পৰেদিতে ধম্মৰিনযে পরিহানমেতং.

‘সতি খো পন অযমাযস্মা উত্তরি করণীযে ওরমত্তকেন ৰিসেসাধিগমেন অন্তরা ৰোসানং আপন্নো. অন্তরা ৰোসানগমনং খো পন তথাগতপ্পৰেদিতে ধম্মৰিনযে পরিহানমেতং’.

‘‘সো ৰতাৰুসো, ভিক্খু ‘ইমে দস ধম্মে অপ্পহায ইমস্মিং ধম্মৰিনযে ৰুদ্ধিং ৰিরূল়্হিং ৰেপুল্লং আপজ্জিস্সতী’তি নেতং ঠানং ৰিজ্জতি. সো ৰতাৰুসো, ভিক্খু ‘ইমে দস ধম্মে পহায ইমস্মিং ধম্মৰিনযে ৰুদ্ধিং ৰিরূল়্হিং ৰেপুল্লং আপজ্জিস্সতী’তি ঠানমেতং ৰিজ্জতী’’তি. ছট্ঠং.