৭. নপ্পিযসুত্তং

৮৭. তত্র খো ভগৰা কালঙ্কতং ভিক্খুং [কলন্দকং ভিক্খুং (সী.), কাল়কভিক্খুং (স্যা.)] আরব্ভ ভিক্খূ আমন্তেসি – ‘‘ভিক্খৰো’’তি. ‘‘ভদন্তে’’তি তে ভিক্খূ ভগৰতো পচ্চস্সোসুং. ভগৰা এতদৰোচ –

‘‘ইধ, ভিক্খৰে, ভিক্খু অধিকরণিকো হোতি, অধিকরণসমথস্স ন ৰণ্ণৰাদী. যম্পি, ভিক্খৰে, ভিক্খু অধিকরণিকো হোতি অধিকরণসমথস্স ন ৰণ্ণৰাদী, অযম্পি ধম্মো ন পিযতায ন গরুতায ন ভাৰনায ন সামঞ্ঞায ন একীভাৰায সংৰত্ততি.

‘‘পুন চপরং, ভিক্খৰে, ভিক্খু ন সিক্খাকামো হোতি, সিক্খাসমাদানস্স [সিক্খাকামস্স (ক.)] ন ৰণ্ণৰাদী. যম্পি, ভিক্খৰে, ভিক্খু ন সিক্খাকামো হোতি সিক্খাসমাদানস্স ন ৰণ্ণৰাদী, অযম্পি ধম্মো ন পিযতায ন গরুতায ন ভাৰনায ন সামঞ্ঞায ন একীভাৰায সংৰত্ততি.

‘‘পুন চপরং, ভিক্খৰে, ভিক্খু পাপিচ্ছো হোতি, ইচ্ছাৰিনযস্স ন ৰণ্ণৰাদী. যম্পি, ভিক্খৰে, ভিক্খু পাপিচ্ছো হোতি ইচ্ছাৰিনযস্স ন ৰণ্ণৰাদী, অযম্পি ধম্মো ন পিযতায ন গরুতায ন ভাৰনায ন সামঞ্ঞায ন একীভাৰায সংৰত্ততি.

‘‘পুন চপরং, ভিক্খৰে, ভিক্খু কোধনো হোতি, কোধৰিনযস্স ন ৰণ্ণৰাদী. যম্পি, ভিক্খৰে, ভিক্খু কোধনো হোতি কোধৰিনযস্স ন ৰণ্ণৰাদী, অযম্পি ধম্মো ন পিযতায ন গরুতায ন ভাৰনায ন সামঞ্ঞায ন একীভাৰায সংৰত্ততি.

‘‘পুন চপরং, ভিক্খৰে, ভিক্খু মক্খী হোতি, মক্খৰিনযস্স ন ৰণ্ণৰাদী. যম্পি, ভিক্খৰে, ভিক্খু মক্খী হোতি মক্খৰিনযস্স ন ৰণ্ণৰাদী, অযম্পি ধম্মো ন পিযতায ন গরুতায ন ভাৰনায ন সামঞ্ঞায ন একীভাৰায সংৰত্ততি.

‘‘পুন চপরং, ভিক্খৰে, ভিক্খু সঠো হোতি, সাঠেয্যৰিনযস্স ন ৰণ্ণৰাদী. যম্পি, ভিক্খৰে, ভিক্খু সঠো হোতি সাঠেয্যৰিনযস্স ন ৰণ্ণৰাদী, অযম্পি ধম্মো ন পিযতায ন গরুতায ন ভাৰনায ন সামঞ্ঞায ন একীভাৰায সংৰত্ততি.

‘‘পুন চপরং, ভিক্খৰে, ভিক্খু মাযাৰী হোতি, মাযাৰিনযস্স ন ৰণ্ণৰাদী. যম্পি, ভিক্খৰে, ভিক্খু মাযাৰী হোতি মাযাৰিনযস্স ন ৰণ্ণৰাদী, অযম্পি ধম্মো ন পিযতায ন গরুতায ন ভাৰনায ন সামঞ্ঞায ন একীভাৰায সংৰত্ততি.

‘‘পুন চপরং, ভিক্খৰে, ভিক্খু ধম্মানং ন নিসামকজাতিকো হোতি, ধম্মনিসন্তিযা ন ৰণ্ণৰাদী. যম্পি, ভিক্খৰে, ভিক্খু ধম্মানং ন নিসামকজাতিকো হোতি ধম্মনিসন্তিযা ন ৰণ্ণৰাদী, অযম্পি ধম্মো ন পিযতায ন গরুতায ন ভাৰনায ন সামঞ্ঞায ন একীভাৰায সংৰত্ততি.

‘‘পুন চপরং, ভিক্খৰে, ভিক্খু ন পটিসল্লীনো হোতি, পটিসল্লানস্স ন ৰণ্ণৰাদী. যম্পি, ভিক্খৰে, ভিক্খু ন পটিসল্লীনো হোতি পটিসল্লানস্স ন ৰণ্ণৰাদী, অযম্পি ধম্মো ন পিযতায ন গরুতায ন ভাৰনায ন সামঞ্ঞায ন একীভাৰায সংৰত্ততি.

‘‘পুন চপরং, ভিক্খৰে, ভিক্খু সব্রহ্মচারীনং ন পটিসন্থারকো [পটিসন্ধারকো (ক.)] হোতি, পটিসন্থারকস্স ন ৰণ্ণৰাদী. যম্পি, ভিক্খৰে, ভিক্খু সব্রহ্মচারীনং ন পটিসন্থারকো হোতি পটিসন্থারকস্স ন ৰণ্ণৰাদী, অযম্পি ধম্মো ন পিযতায ন গরুতায ন ভাৰনায ন সামঞ্ঞায ন একীভাৰায সংৰত্ততি.

‘‘এৰরূপস্স, ভিক্খৰে, ভিক্খুনো কিঞ্চাপি এৰং ইচ্ছা উপ্পজ্জেয্য – ‘অহো ৰত মং সব্রহ্মচারী সক্করেয্যুং গরুং করেয্যুং [গরুকরেয্যুং (সী. স্যা.)] মানেয্যুং পূজেয্যু’ন্তি, অথ খো নং সব্রহ্মচারী ন চেৰ সক্করোন্তি ন গরুং করোন্তি [গরুকরোন্তি (সী. স্যা.)] ন মানেন্তি ন পূজেন্তি. তং কিস্স হেতু? তথাহিস্স, ভিক্খৰে, ৰিঞ্ঞূ সব্রহ্মচারী তে পাপকে অকুসলে ধম্মে অপ্পহীনে সমনুপস্সন্তি.

‘‘সেয্যথাপি, ভিক্খৰে, অস্সখল়ুঙ্কস্স কিঞ্চাপি এৰং ইচ্ছা উপ্পজ্জেয্য – ‘অহো ৰত মং মনুস্সা আজানীযট্ঠানে ঠপেয্যুং, আজানীযভোজনঞ্চ ভোজেয্যুং, আজানীযপরিমজ্জনঞ্চ পরিমজ্জেয্যু’ন্তি, অথ খো নং মনুস্সা ন চেৰ আজানীযট্ঠানে ঠপেন্তি ন চ আজানীযভোজনং ভোজেন্তি ন চ আজানীযপরিমজ্জনং পরিমজ্জন্তি. তং কিস্স হেতু? তথাহিস্স, ভিক্খৰে, ৰিঞ্ঞূ মনুস্সা তানি সাঠেয্যানি কূটেয্যানি জিম্হেয্যানি ৰঙ্কেয্যানি অপ্পহীনানি সমনুপস্সন্তি. এৰমেৰং খো, ভিক্খৰে, এৰরূপস্স ভিক্খুনো কিঞ্চাপি এৰং ইচ্ছা উপ্পজ্জেয্য – ‘অহো ৰত মং সব্রহ্মচারী সক্করেয্যুং গরুং করেয্যুং মানেয্যুং পূজেয্যু’ন্তি, অথ খো নং সব্রহ্মচারী ন চেৰ সক্করোন্তি ন গরুং করোন্তি ন মানেন্তি ন পূজেন্তি. তং কিস্স হেতু? তথাহিস্স, ভিক্খৰে, ৰিঞ্ঞূ সব্রহ্মচারী তে পাপকে অকুসলে ধম্মে অপ্পহীনে সমনুপস্সন্তি.

‘‘ইধ পন, ভিক্খৰে, ভিক্খু ন অধিকরণিকো হোতি, অধিকরণসমথস্স ৰণ্ণৰাদী. যম্পি, ভিক্খৰে, ভিক্খু ন অধিকরণিকো হোতি অধিকরণসমথস্স ৰণ্ণৰাদী, অযম্পি ধম্মো পিযতায গরুতায ভাৰনায সামঞ্ঞায একীভাৰায সংৰত্ততি.

‘‘পুন চপরং, ভিক্খৰে, ভিক্খু সিক্খাকামো হোতি, সিক্খাসমাদানস্স ৰণ্ণৰাদী. যম্পি, ভিক্খৰে, ভিক্খু সিক্খাকামো হোতি সিক্খাসমাদানস্স ৰণ্ণৰাদী, অযম্পি ধম্মো পিযতায গরুতায ভাৰনায সামঞ্ঞায একীভাৰায সংৰত্ততি.

‘‘পুন চপরং, ভিক্খৰে, ভিক্খু অপ্পিচ্ছো হোতি, ইচ্ছাৰিনযস্স ৰণ্ণৰাদী. যম্পি, ভিক্খৰে, ভিক্খু অপ্পিচ্ছো হোতি ইচ্ছাৰিনযস্স ৰণ্ণৰাদী, অযম্পি ধম্মো…পে… একীভাৰায সংৰত্ততি.

‘‘পুন চপরং, ভিক্খৰে, ভিক্খু অক্কোধনো হোতি, কোধৰিনযস্স ৰণ্ণৰাদী. যম্পি, ভিক্খৰে, ভিক্খু অক্কোধনো হোতি কোধৰিনযস্স ৰণ্ণৰাদী, অযম্পি ধম্মো…পে… একীভাৰায সংৰত্ততি.

‘‘পুন চপরং, ভিক্খৰে, ভিক্খু অমক্খী হোতি, মক্খৰিনযস্স ৰণ্ণৰাদী. যম্পি, ভিক্খৰে, ভিক্খু অমক্খী হোতি মক্খৰিনযস্স ৰণ্ণৰাদী, অযম্পি ধম্মো…পে… একীভাৰায সংৰত্ততি.

‘‘পুন চপরং, ভিক্খৰে, ভিক্খু অসঠো হোতি, সাঠেয্যৰিনযস্স ৰণ্ণৰাদী. যম্পি, ভিক্খৰে, ভিক্খু অসঠো হোতি সাঠেয্যৰিনযস্স ৰণ্ণৰাদী, অযম্পি ধম্মো…পে… একীভাৰায সংৰত্ততি.

‘‘পুন চপরং, ভিক্খৰে, ভিক্খু অমাযাৰী হোতি, মাযাৰিনযস্স ৰণ্ণৰাদী. যম্পি, ভিক্খৰে, ভিক্খু অমাযাৰী হোতি মাযাৰিনযস্স ৰণ্ণৰাদী, অযম্পি ধম্মো…পে… একীভাৰায সংৰত্ততি.

‘‘পুন চপরং, ভিক্খৰে, ভিক্খু ধম্মানং নিসামকজাতিকো হোতি, ধম্মনিসন্তিযা ৰণ্ণৰাদী. যম্পি, ভিক্খৰে, ভিক্খু ধম্মানং নিসামকজাতিকো হোতি ধম্মনিসন্তিযা ৰণ্ণৰাদী, অযম্পি ধম্মো…পে… একীভাৰায সংৰত্ততি.

‘‘পুন চপরং, ভিক্খৰে, ভিক্খু পটিসল্লীনো হোতি, পটিসল্লানস্স ৰণ্ণৰাদী. যম্পি, ভিক্খৰে, ভিক্খু পটিসল্লীনো হোতি পটিসল্লানস্স ৰণ্ণৰাদী, অযম্পি ধম্মো…পে… একীভাৰায সংৰত্ততি.

‘‘পুন চপরং, ভিক্খৰে, ভিক্খু সব্রহ্মচারীনং পটিসন্থারকো হোতি, পটিসন্থারকস্স ৰণ্ণৰাদী. যম্পি, ভিক্খৰে, ভিক্খু সব্রহ্মচারীনং পটিসন্থারকো হোতি পটিসন্থারকস্স ৰণ্ণৰাদী, অযম্পি ধম্মো পিযতায গরুতায ভাৰনায সামঞ্ঞায একীভাৰায সংৰত্ততি.

‘‘এৰরূপস্স, ভিক্খৰে, ভিক্খুনো কিঞ্চাপি ন এৰং ইচ্ছা উপ্পজ্জেয্য – ‘অহো ৰত মং সব্রহ্মচারী সক্করেয্যুং গরুং করেয্যুং মানেয্যুং পূজেয্যু’ন্তি, অথ খো নং সব্রহ্মচারী সক্করোন্তি গরুং করোন্তি মানেন্তি পূজেন্তি. তং কিস্স হেতু? তথাহিস্স, ভিক্খৰে, ৰিঞ্ঞূ সব্রহ্মচারী তে পাপকে অকুসলে ধম্মে পহীনে সমনুপস্সন্তি.

‘‘সেয্যথাপি, ভিক্খৰে, ভদ্দস্স অস্সাজানীযস্স কিঞ্চাপি ন এৰং ইচ্ছা উপ্পজ্জেয্য – ‘অহো ৰত মং মনুস্সা আজানীযট্ঠানে ঠপেয্যুং, আজানীযভোজনঞ্চ ভোজেয্যুং, আজানীযপরিমজ্জনঞ্চ পরিমজ্জেয্যু’ন্তি, অথ খো নং মনুস্সা আজানীযট্ঠানে চ ঠপেন্তি আজানীযভোজনঞ্চ ভোজেন্তি আজানীযপরিমজ্জনঞ্চ পরিমজ্জন্তি. তং কিস্স হেতু? তথাহিস্স, ভিক্খৰে, ৰিঞ্ঞূ মনুস্সা তানি সাঠেয্যানি কূটেয্যানি জিম্হেয্যানি ৰঙ্কেয্যানি পহীনানি সমনুপস্সন্তি.

‘‘এৰমেৰং খো, ভিক্খৰে, এৰরূপস্স ভিক্খুনো কিঞ্চাপি ন এৰং ইচ্ছা উপ্পজ্জেয্য – ‘অহো ৰত মং সব্রহ্মচারী সক্করেয্যুং গরুং করেয্যুং মানেয্যুং পূজেয্যু’ন্তি, অথ খো নং সব্রহ্মচারী সক্করোন্তি গরুং করোন্তি মানেন্তি পূজেন্তি. তং কিস্স হেতু? তথাহিস্স, ভিক্খৰে, ৰিঞ্ঞূ সব্রহ্মচারী তে পাপকে অকুসলে ধম্মে পহীনে সমনুপস্সন্তী’’তি. সত্তমং.