(৯) ৪. থেরৰগ্গো

১. ৰাহনসুত্তং

৮১. একং সমযং ভগৰা চম্পাযং ৰিহরতি গগ্গরায পোক্খরণিযা তীরে. অথ খো আযস্মা ৰাহনো যেন ভগৰা তেনুপসঙ্কমি; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদি. একমন্তং নিসিন্নো খো আযস্মা ৰাহনো ভগৰন্তং এতদৰোচ – ‘‘কতিহি নু খো, ভন্তে, ধম্মেহি তথাগতো নিস্সটো ৰিসংযুত্তো ৰিপ্পমুত্তো ৰিমরিযাদীকতেন চেতসা ৰিহরতী’’তি?

‘‘দসহি খো, ৰাহন, ধম্মেহি তথাগতো নিস্সটো ৰিসংযুত্তো ৰিপ্পমুত্তো ৰিমরিযাদীকতেন চেতসা ৰিহরতি. কতমেহি দসহি? রূপেন খো, ৰাহন, তথাগতো নিস্সটো ৰিসংযুত্তো ৰিপ্পমুত্তো ৰিমরিযাদীকতেন চেতসা ৰিহরতি, ৰেদনায খো, ৰাহন…পে… সঞ্ঞায খো, ৰাহন… সঙ্খারেহি খো, ৰাহন… ৰিঞ্ঞাণেন খো, ৰাহন… জাতিযা খো, ৰাহন… জরায খো, ৰাহন… মরণেন খো, ৰাহন… দুক্খেহি খো, ৰাহন… কিলেসেহি খো, ৰাহন, তথাগতো নিস্সটো ৰিসংযুত্তো ৰিপ্পমুত্তো ৰিমরিযাদীকতেন চেতসা ৰিহরতি. সেয্যথাপি, ৰাহন, উপ্পলং ৰা পদুমং ৰা পুণ্ডরীকং ৰা উদকে জাতং উদকে সংৰড্ঢং উদকা পচ্চুগ্গম্ম ঠিতং অনুপলিত্তং উদকেন; এৰমেৰং খো, ৰাহন, ইমেহি দসহি ধম্মেহি তথাগতো নিস্সটো ৰিসংযুত্তো ৰিপ্পমুত্তো ৰিমরিযাদীকতেন চেতসা ৰিহরতী’’তি. পঠমং.

২. আনন্দসুত্তং

৮২. অথ খো আযস্মা আনন্দো যেন ভগৰা তেনুপসঙ্কমি; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদি. একমন্তং নিসিন্নং খো আযস্মন্তং আনন্দং ভগৰা এতদৰোচ –

‘‘সো ৰতানন্দ, ভিক্খু ‘অস্সদ্ধো সমানো ইমস্মিং ধম্মৰিনযে ৰুদ্ধিং ৰিরূল়্হিং ৰেপুল্লং আপজ্জিস্সতী’তি নেতং ঠানং ৰিজ্জতি.

‘‘সো ৰতানন্দ, ভিক্খু ‘দুস্সীলো সমানো ইমস্মিং ধম্মৰিনযে ৰুদ্ধিং ৰিরূল়্হিং ৰেপুল্লং আপজ্জিস্সতী’তি নেতং ঠানং ৰিজ্জতি.

‘‘সো ৰতানন্দ, ভিক্খু ‘অপ্পস্সুতো সমানো ইমস্মিং ধম্মৰিনযে ৰুদ্ধিং ৰিরূল়্হিং ৰেপুল্লং আপজ্জিস্সতী’তি নেতং ঠানং ৰিজ্জতি.

‘‘সো ৰতানন্দ, ভিক্খু ‘দুব্বচো সমানো ইমস্মিং ধম্মৰিনযে ৰুদ্ধিং ৰিরূল়্হিং ৰেপুল্লং আপজ্জিস্সতী’তি নেতং ঠানং ৰিজ্জতি.

‘‘সো ৰতানন্দ, ভিক্খু ‘পাপমিত্তো সমানো ইমস্মিং ধম্মৰিনযে ৰুদ্ধিং ৰিরূল়্হিং ৰেপুল্লং আপজ্জিস্সতী’তি নেতং ঠানং ৰিজ্জতি.

‘‘সো ৰতানন্দ, ভিক্খু ‘কুসীতো সমানো ইমস্মিং ধম্মৰিনযে ৰুদ্ধিং ৰিরূল়্হিং ৰেপুল্লং আপজ্জিস্সতী’তি নেতং ঠানং ৰিজ্জতি.

‘‘সো ৰতানন্দ, ভিক্খু ‘মুট্ঠস্সতি সমানো ইমস্মিং ধম্মৰিনযে ৰুদ্ধিং ৰিরূল়্হিং ৰেপুল্লং আপজ্জিস্সতী’তি নেতং ঠানং ৰিজ্জতি.

‘‘সো ৰতানন্দ, ভিক্খু ‘অসন্তুট্ঠো সমানো ইমস্মিং ধম্মৰিনযে ৰুদ্ধিং ৰিরূল়্হিং ৰেপুল্লং আপজ্জিস্সতী’তি নেতং ঠানং ৰিজ্জতি.

‘‘সো ৰতানন্দ, ভিক্খু ‘পাপিচ্ছো সমানো ইমস্মিং ধম্মৰিনযে ৰুদ্ধিং ৰিরূল়্হিং ৰেপুল্লং আপজ্জিস্সতী’তি নেতং ঠানং ৰিজ্জতি.

‘‘সো ৰতানন্দ, ভিক্খু ‘মিচ্ছাদিট্ঠিকো সমানো ইমস্মিং ধম্মৰিনযে ৰুদ্ধিং ৰিরূল়্হিং ৰেপুল্লং আপজ্জিস্সতী’তি নেতং ঠানং ৰিজ্জতি.

‘‘সো ৰতানন্দ, ভিক্খু ‘ইমেহি দসহি ধম্মেহি সমন্নাগতো ইমস্মিং ধম্মৰিনযে ৰুদ্ধিং ৰিরূল়্হিং ৰেপুল্লং আপজ্জিস্সতী’তি নেতং ঠানং ৰিজ্জতি.

‘‘সো ৰতানন্দ, ভিক্খু ‘সদ্ধো সমানো ইমস্মিং ধম্মৰিনযে ৰুদ্ধিং ৰিরূল়্হিং ৰেপুল্লং আপজ্জিস্সতী’তি ঠানমেতং ৰিজ্জতি.

‘‘সো ৰতানন্দ, ভিক্খু ‘সীলৰা সমানো ইমস্মিং ধম্মৰিনযে ৰুদ্ধিং ৰিরূল়্হিং ৰেপুল্লং আপজ্জিস্সতী’তি ঠানমেতং ৰিজ্জতি.

‘‘সো ৰতানন্দ, ভিক্খু ‘বহুস্সুতো সুতধরো সমানো ইমস্মিং ধম্মৰিনযে ৰুদ্ধিং ৰিরূল়্হিং ৰেপুল্লং আপজ্জিস্সতী’তি ঠানমেতং ৰিজ্জতি.

‘‘সো ৰতানন্দ, ভিক্খু ‘সুৰচো সমানো ইমস্মিং ধম্মৰিনযে ৰুদ্ধিং ৰিরূল়্হিং ৰেপুল্লং আপজ্জিস্সতী’তি ঠানমেতং ৰিজ্জতি.

‘‘সো ৰতানন্দ, ভিক্খু ‘কল্যাণমিত্তো সমানো ইমস্মিং ধম্মৰিনযে ৰুদ্ধিং ৰিরূল়্হিং ৰেপুল্লং আপজ্জিস্সতী’তি ঠানমেতং ৰিজ্জতি.

‘‘সো ৰতানন্দ, ভিক্খু ‘আরদ্ধৰীরিযো সমানো ইমস্মিং ধম্মৰিনযে ৰুদ্ধিং ৰিরূল়্হিং ৰেপুল্লং আপজ্জিস্সতী’তি ঠানমেতং ৰিজ্জতি.

‘‘সো ৰতানন্দ, ভিক্খু ‘উপট্ঠিতস্সতি সমানো ইমস্মিং ধম্মৰিনযে ৰুদ্ধিং ৰিরূল়্হিং ৰেপুল্লং আপজ্জিস্সতী’তি ঠানমেতং ৰিজ্জতি.

‘‘সো ৰতানন্দ, ভিক্খু ‘সন্তুট্ঠো সমানো ইমস্মিং ধম্মৰিনযে ৰুদ্ধিং ৰিরূল়্হিং ৰেপুল্লং আপজ্জিস্সতী’তি ঠানমেতং ৰিজ্জতি.

‘‘সো ৰতানন্দ, ভিক্খু ‘অপ্পিচ্ছো সমানো ইমস্মিং ধম্মৰিনযে ৰুদ্ধিং ৰিরূল়্হিং ৰেপুল্লং আপজ্জিস্সতী’তি ঠানমেতং ৰিজ্জতি.

‘‘সো ৰতানন্দ, ভিক্খু ‘সম্মাদিট্ঠিকো সমানো ইমস্মিং ধম্মৰিনযে ৰুদ্ধিং ৰিরূল়্হিং ৰেপুল্লং আপজ্জিস্সতী’তি ঠানমেতং ৰিজ্জতি.

‘‘সো ৰতানন্দ, ভিক্খু ‘ইমেহি দসহি ধম্মেহি সমন্নাগতো ইমস্মিং ধম্মৰিনযে ৰুদ্ধিং ৰিরূল়্হিং ৰেপুল্লং আপজ্জিস্সতী’তি ঠানমেতং ৰিজ্জতী’’তি. দুতিযং.

৩. পুণ্ণিযসুত্তং

৮৩. অথ খো আযস্মা পুণ্ণিযো যেন ভগৰা তেনুপসঙ্কমি; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদি. একমন্তং নিসিন্নো খো আযস্মা পুণ্ণিযো ভগৰন্তং এতদৰোচ – ‘‘কো নু খো, ভন্তে, হেতু কো পচ্চযো যেন অপ্পেকদা তথাগতং ধম্মদেসনা পটিভাতি অপ্পেকদা নপ্পটিভাতী’’তি?

‘‘সদ্ধো চ, পুণ্ণিয, ভিক্খু হোতি, নো চ উপসঙ্কমিতা; নেৰ তাৰ তথাগতং ধম্মদেসনা পটিভাতি. যতো চ খো, পুণ্ণিয, ভিক্খু সদ্ধো চ হোতি উপসঙ্কমিতা চ, এৰং তথাগতং ধম্মদেসনা পটিভাতি.

‘‘সদ্ধো চ, পুণ্ণিয, ভিক্খু হোতি উপসঙ্কমিতা চ, নো চ পযিরুপাসিতা…পে… পযিরুপাসিতা চ, নো চ পরিপুচ্ছিতা… পরিপুচ্ছিতা চ, নো চ ওহিতসোতো ধম্মং সুণাতি… ওহিতসোতো চ ধম্মং সুণাতি, নো চ সুত্ৰা ধম্মং ধারেতি… সুত্ৰা চ ধম্মং ধারেতি, নো চ ধাতানং ধম্মানং অত্থং উপপরিক্খতি… ধাতানঞ্চ ধম্মানং অত্থং উপপরিক্খতি নো চ অত্থমঞ্ঞায ধম্মমঞ্ঞায ধম্মানুধম্মপ্পটিপন্নো হোতি… অত্থমঞ্ঞায ধম্মমঞ্ঞায ধম্মানুধম্মপ্পটিপন্নো চ হোতি, নো চ কল্যাণৰাচো হোতি কল্যাণৰাক্করণো পোরিযা ৰাচায সমন্নাগতো ৰিস্সট্ঠায অনেলগল়ায অত্থস্স ৰিঞ্ঞাপনিযা… কল্যাণৰাচো চ হোতি কল্যাণৰাক্করণো পোরিযা ৰাচায সমন্নাগতো ৰিস্সট্ঠায অনেলগল়ায অত্থস্স ৰিঞ্ঞাপনিযা, নো চ সন্দস্সকো হোতি সমাদপকো সমুত্তেজকো সম্পহংসকো সব্রহ্মচারীনং, নেৰ তাৰ তথাগতং ধম্মদেসনা পটিভাতি.

‘‘যতো চ খো, পুণ্ণিয, ভিক্খু সদ্ধো চ হোতি, উপসঙ্কমিতা চ, পযিরুপাসিতা চ, পরিপুচ্ছিতা চ, ওহিতসোতো চ ধম্মং সুণাতি, সুত্ৰা চ ধম্মং ধারেতি, ধাতানঞ্চ ধম্মানং অত্থং উপপরিক্খতি, অত্থমঞ্ঞায ধম্মমঞ্ঞায ধম্মানুধম্মপ্পটিপন্নো চ হোতি, কল্যাণৰাচো চ হোতি কল্যাণৰাক্করণো পোরিযা ৰাচায সমন্নাগতো ৰিস্সট্ঠায অনেলগল়ায অত্থস্স ৰিঞ্ঞাপনিযা, সন্দস্সকো চ হোতি সমাদপকো সমুত্তেজকো সম্পহংসকো সব্রহ্মচারীনং – এৰং তথাগতং ধম্মদেসনা পটিভাতি. ইমেহি খো, পুণ্ণিয, দসহি ধম্মেহি সমন্নাগতা [সমন্নাগতো (ক.)] [একন্তং তথাগতং ধম্মদেসনা পটিভাতীতি (স্যা.)] একন্তপটিভানা [একন্তপটিভানং (সী.)] তথাগতং ধম্মদেসনা হোতী’’তি [একন্তং তথাগতং ধম্মদেসনা পটিভাতীতি (স্যা.)]. ততিযং.

৪. ব্যাকরণসুত্তং

৮৪. তত্র খো আযস্মা মহামোগ্গল্লানো ভিক্খূ আমন্তেসি – ‘‘আৰুসো ভিক্খৰে’’তি. ‘‘আৰুসো’’তি খো তে ভিক্খূ আযস্মতো মহামোগ্গল্লানস্স পচ্চস্সোসুং. আযস্মা মহামোগ্গল্লানো এতদৰোচ –

‘‘ইধাৰুসো, ভিক্খু অঞ্ঞং ব্যাকরোতি – ‘খীণা জাতি, ৰুসিতং ব্রহ্মচরিযং, কতং করণীযং, নাপরং ইত্থত্তাযাতি পজানামী’তি. তমেনং তথাগতো ৰা তথাগতসাৰকো ৰা ঝাযী সমাপত্তিকুসলো পরচিত্তকুসলো পরচিত্তপরিযাযকুসলো সমনুযুঞ্জতি সমনুগ্গাহতি সমনুভাসতি. সো তথাগতেন ৰা তথাগতসাৰকেন ৰা ঝাযিনা সমাপত্তিকুসলেন পরচিত্তকুসলেন পরচিত্তপরিযাযকুসলেন সমনুযুঞ্জিযমানো সমনুগ্গাহিযমানো সমনুভাসিযমানো ইরীণং আপজ্জতি ৰিচিনং [ৰিসিনং (সী. অট্ঠ.)] আপজ্জতি অনযং আপজ্জতি ব্যসনং আপজ্জতি অনযব্যসনং আপজ্জতি.

‘‘তমেনং তথাগতো ৰা তথাগতসাৰকো ৰা ঝাযী সমাপত্তিকুসলো পরচিত্তকুসলো পরচিত্তপরিযাযকুসলো এৰং চেতসা চেতো পরিচ্চ মনসি করোতি – ‘কিং নু খো অযমাযস্মা অঞ্ঞং ব্যাকরোতি – খীণা জাতি, ৰুসিতং ব্রহ্মচরিযং, কতং করণীযং, নাপরং ইত্থত্তাযাতি পজানামী’তি?

‘‘তমেনং তথাগতো ৰা তথাগতসাৰকো ৰা ঝাযী সমাপত্তিকুসলো পরচিত্তকুসলো পরচিত্তপরিযাযকুসলো এৰং চেতসা চেতো পরিচ্চ পজানাতি –

‘কোধনো খো অযমাযস্মা; কোধপরিযুট্ঠিতেন চেতসা বহুলং ৰিহরতি. কোধপরিযুট্ঠানং খো পন তথাগতপ্পৰেদিতে ধম্মৰিনযে পরিহানমেতং.

‘উপনাহী খো পন অযমাযস্মা; উপনাহপরিযুট্ঠিতেন চেতসা বহুলং ৰিহরতি. উপনাহপরিযুট্ঠানং খো পন তথাগতপ্পৰেদিতে ধম্মৰিনযে পরিহানমেতং.

‘মক্খী খো পন অযমাযস্মা; মক্খপরিযুট্ঠিতেন চেতসা বহুলং ৰিহরতি. মক্খপরিযুট্ঠানং খো পন তথাগতপ্পৰেদিতে ধম্মৰিনযে পরিহানমেতং.

‘পল়াসী খো পন অযমাযস্মা; পল়াসপরিযুট্ঠিতেন চেতসা বহুলং ৰিহরতি. পল়াসপরিযুট্ঠানং খো পন তথাগতপ্পৰেদিতে ধম্মৰিনযে পরিহানমেতং.

‘ইস্সুকী খো পন অযমাযস্মা; ইস্সাপরিযুট্ঠিতেন চেতসা বহুলং ৰিহরতি. ইস্সাপরিযুট্ঠানং খো পন তথাগতপ্পৰেদিতে ধম্মৰিনযে পরিহানমেতং.

‘মচ্ছরী খো পন অযমাযস্মা; মচ্ছেরপরিযুট্ঠিতেন চেতসা বহুলং ৰিহরতি. মচ্ছেরপরিযুট্ঠানং খো পন তথাগতপ্পৰেদিতে ধম্মৰিনযে পরিহানমেতং.

‘সঠো খো পন অযমাযস্মা; সাঠেয্যপরিযুট্ঠিতেন চেতসা বহুলং ৰিহরতি. সাঠেয্যপরিযুট্ঠানং খো পন তথাগতপ্পৰেদিতে ধম্মৰিনযে পরিহানমেতং.

‘মাযাৰী খো পন অযমাযস্মা; মাযাপরিযুট্ঠিতেন চেতসা বহুলং ৰিহরতি. মাযাপরিযুট্ঠানং খো পন তথাগতপ্পৰেদিতে ধম্মৰিনযে পরিহানমেতং.

‘পাপিচ্ছো খো পন অযমাযস্মা; ইচ্ছাপরিযুট্ঠিতেন চেতসা বহুলং ৰিহরতি. ইচ্ছাপরিযুট্ঠানং খো পন তথাগতপ্পৰেদিতে ধম্মৰিনযে পরিহানমেতং.

‘সতি [মুট্ঠস্সতি (সী. স্যা.)] খো পন অযমাযস্মা উত্তরি করণীযে ওরমত্তকেন ৰিসেসাধিগমেন অন্তরা ৰোসানং আপন্নো. অন্তরা ৰোসানগমনং খো পন তথাগতপ্পৰেদিতে ধম্মৰিনযে পরিহানমেতং’.

‘‘সো ৰতাৰুসো, ভিক্খু ‘ইমে দস ধম্মে অপ্পহায ইমস্মিং ধম্মৰিনযে ৰুদ্ধিং ৰিরূল়্হিং ৰেপুল্লং আপজ্জিস্সতী’তি নেতং ঠানং ৰিজ্জতি. সো ৰতাৰুসো, ভিক্খু ‘ইমে দস ধম্মে পহায ইমস্মিং ধম্মৰিনযে ৰুদ্ধিং ৰিরূল়্হিং ৰেপুল্লং আপজ্জিস্সতী’তি ঠানমেতং ৰিজ্জতী’’তি. চতুত্থং.

৫. কত্থীসুত্তং

৮৫. একং সমযং আযস্মা মহাচুন্দো চেতীসু ৰিহরতি সহজাতিযং. তত্র খো আযস্মা মহাচুন্দো ভিক্খূ আমন্তেসি – ‘‘আৰুসো ভিক্খৰে’’তি. ‘‘আৰুসো’’তি খো তে ভিক্খূ আযস্মতো মহাচুন্দস্স পচ্চস্সোসুং. আযস্মা মহাচুন্দো এতদৰোচ –

‘‘ইধাৰুসো, ভিক্খু কত্থী হোতি ৰিকত্থী অধিগমেসু – ‘অহং পঠমং ঝানং সমাপজ্জামিপি ৰুট্ঠহামিপি, অহং দুতিযং ঝানং সমাপজ্জামিপি ৰুট্ঠহামিপি, অহং ততিযং ঝানং সমাপজ্জামিপি ৰুট্ঠহামিপি, অহং চতুত্থং ঝানং সমাপজ্জামিপি ৰুট্ঠহামিপি, অহং আকাসানঞ্চাযতনং সমাপজ্জামিপি ৰুট্ঠহামিপি, অহং ৰিঞ্ঞাণঞ্চাযতনং সমাপজ্জামিপি ৰুট্ঠহামিপি, অহং আকিঞ্চঞ্ঞাযতনং সমাপজ্জামিপি ৰুট্ঠহামিপি, অহং নেৰসঞ্ঞানাসঞ্ঞাযতনং সমাপজ্জামিপি ৰুট্ঠহামিপি, অহং সঞ্ঞাৰেদযিতনিরোধং সমাপজ্জামিপি ৰুট্ঠহামিপী’তি.

‘‘তমেনং তথাগতো ৰা তথাগতসাৰকো ৰা ঝাযী সমাপত্তিকুসলো পরচিত্তকুসলো পরচিত্তপরিযাযকুসলো সমনুযুঞ্জতি সমনুগ্গাহতি সমনুভাসতি. সো তথাগতেন ৰা তথাগতসাৰকেন ৰা ঝাযিনা সমাপত্তিকুসলেন পরচিত্তকুসলেন পরচিত্তপরিযাযকুসলেন সমনুযুঞ্জিযমানো সমনুগ্গাহিযমানো সমনুভাসিযমানো ইরীণং আপজ্জতি ৰিচিনং আপজ্জতি অনযং আপজ্জতি ব্যসনং আপজ্জতি অনযব্যসনং আপজ্জতি.

‘‘তমেনং তথাগতো ৰা তথাগতসাৰকো ৰা ঝাযী সমাপত্তিকুসলো পরচিত্তকুসলো পরচিত্তপরিযাযকুসলো এৰং চেতসা চেতো পরিচ্চ মনসি করোতি – ‘কিং নু খো অযমাযস্মা কত্থী হোতি ৰিকত্থী অধিগমেসু – অহং পঠমং ঝানং সমাপজ্জামিপি ৰুট্ঠহামিপি…পে… অহং সঞ্ঞাৰেদযিতনিরোধং সমাপজ্জামিপি ৰুট্ঠহামিপী’তি.

‘দীঘরত্তং খো অযমাযস্মা খণ্ডকারী ছিদ্দকারী সবলকারী কম্মাসকারী ন সন্ততকারী ন সন্ততৰুত্তি সীলেসু. দুস্সীলো খো অযমাযস্মা. দুস্সিল্যং খো পন তথাগতপ্পৰেদিতে ধম্মৰিনযে পরিহানমেতং.

‘অস্সদ্ধো খো পন অযমাযস্মা; অস্সদ্ধিযং খো পন তথাগতপ্পৰেদিতে ধম্মৰিনযে পরিহানমেতং.

‘অপ্পস্সুতো খো পন অযমাযস্মা অনাচারো; অপ্পসচ্চং খো পন তথাগতপ্পৰেদিতে ধম্মৰিনযে পরিহানমেতং.

‘দুব্বচো খো পন অযমাযস্মা; দোৰচস্সতা খো পন তথাগতপ্পৰেদিতে ধম্মৰিনযে পরিহানমেতং.

‘পাপমিত্তো খো পন অযমাযস্মা; পাপমিত্ততা খো পন তথাগতপ্পৰেদিতে ধম্মৰিনযে পরিহানমেতং.

‘কুসীতো খো পন অযমাযস্মা; কোসজ্জং খো পন তথাগতপ্পৰেদিতে ধম্মৰিনযে পরিহানমেতং.

‘মুট্ঠস্সতি খো পন অযমাযস্মা; মুট্ঠস্সচ্চং খো পন তথাগতপ্পৰেদিতে ধম্মৰিনযে পরিহানমেতং.

‘কুহকো খো পন অযমাযস্মা; কোহঞ্ঞং খো পন তথাগতপ্পৰেদিতে ধম্মৰিনযে পরিহানমেতং.

‘দুব্ভরো খো পন অযমাযস্মা; দুব্ভরতা খো পন তথাগতপ্পৰেদিতে ধম্মৰিনযে পরিহানমেতং.

‘দুপ্পঞ্ঞো খো পন অযমাযস্মা; দুপ্পঞ্ঞতা খো পন তথাগতপ্পৰেদিতে ধম্মৰিনযে পরিহানমেতং’.

‘‘সেয্যথাপি, আৰুসো, সহাযকো সহাযকং এৰং ৰদেয্য – ‘যদা তে, সম্ম, ধনেন [বন্ধো (ক.)] ধনকরণীযং অস্স, যাচেয্যাসি মং [যাচিস্সসি মং (সী.), পৰেদেয্যাসি মং (স্যা.), পরাজেয্যাপি মং (ক.)] ধনং. দস্সামি তে ধন’ন্তি. সো কিঞ্চিদেৰ ধনকরণীযে সমুপ্পন্নে সহাযকো সহাযকং এৰং ৰদেয্য – ‘অত্থো মে, সম্ম, ধনেন. দেহি মে ধন’ন্তি. সো এৰং ৰদেয্য – ‘তেন হি, সম্ম, ইধ খনাহী’তি. সো তত্র খনন্তো নাধিগচ্ছেয্য. সো এৰং ৰদেয্য – ‘অলিকং মং, সম্ম, অৰচ; তুচ্ছকং মং, সম্ম, অৰচ – ইধ খনাহী’তি. সো এৰং ৰদেয্য – ‘নাহং তং, সম্ম, অলিকং অৰচং, তুচ্ছকং অৰচং. তেন হি, সম্ম, ইধ খনাহী’তি. সো তত্রপি খনন্তো নাধিগচ্ছেয্য. সো এৰং ৰদেয্য – ‘অলিকং মং, সম্ম, অৰচ, তুচ্ছকং মং, সম্ম, অৰচ – ইধ খনাহী’তি. সো এৰং ৰদেয্য – ‘নাহং তং, সম্ম, অলিকং অৰচং, তুচ্ছকং অৰচং. তেন হি, সম্ম, ইধ খনাহী’তি. সো তত্রপি খনন্তো নাধিগচ্ছেয্য. সো এৰং ৰদেয্য – ‘অলিকং মং, সম্ম, অৰচ, তুচ্ছকং মং, সম্ম, অৰচ – ইধ খনাহী’তি. সো এৰং ৰদেয্য – ‘নাহং তং, সম্ম, অলিকং অৰচং, তুচ্ছকং অৰচং. অপি চ অহমেৰ উম্মাদং পাপুণিং চেতসো ৰিপরিযায’ন্তি.

‘‘এৰমেৰং খো, আৰুসো, ভিক্খু কত্থী হোতি ৰিকত্থী অধিগমেসু – ‘অহং পঠমং ঝানং সমাপজ্জামিপি ৰুট্ঠহামিপি, অহং দুতিযং ঝানং সমাপজ্জামিপি ৰুট্ঠহামিপি, অহং ততিযং ঝানং সমাপজ্জামিপি ৰুট্ঠহামিপি, অহং চতুত্থং ঝানং সমাপজ্জামিপি ৰুট্ঠহামিপি, অহং আকাসানঞ্চাযতনং সমাপজ্জামিপি ৰুট্ঠহামিপি, অহং ৰিঞ্ঞাণঞ্চাযতনং সমাপজ্জামিপি ৰুট্ঠহামিপি, অহং আকিঞ্চঞ্ঞাযতনং সমাপজ্জামিপি ৰুট্ঠহামিপি, অহং নেৰসঞ্ঞানাসঞ্ঞাযতনং সমাপজ্জামিপি ৰুট্ঠহামিপি, অহং সঞ্ঞাৰেদযিতনিরোধং সমাপজ্জামিপি ৰুট্ঠহামিপী’তি.

‘‘তমেনং তথাগতো ৰা তথাগতসাৰকো ৰা ঝাযী সমাপত্তিকুসলো পরচিত্তকুসলো পরচিত্তপরিযাযকুসলো এৰং চেতসা চেতো পরিচ্চ মনসি করোতি – ‘কিং নু খো অযমাযস্মা কত্থী হোতি ৰিকত্থী অধিগমেসু – অহং পঠমং ঝানং সমাপজ্জামিপি…পে… অহং সঞ্ঞাৰেদযিতনিরোধং সমাপজ্জামিপি ৰুট্ঠহামিপী’তি.

‘‘তমেনং তথাগতো ৰা তথাগতসাৰকো ৰা ঝাযী সমাপত্তিকুসলো পরচিত্তপরিযাযকুসলো চেতসা চেতো পরিচ্চ পজানাতি –

‘দীঘরত্তং খো অযমাযস্মা খণ্ডকারী ছিদ্দকারী সবলকারী কম্মাসকারী, ন সন্ততকারী ন সন্ততৰুত্তি সীলেসু. দুস্সীলো খো অযমাযস্মা; দুস্সিল্যং খো পন তথাগতপ্পৰেদিতে ধম্মৰিনযে পরিহানমেতং.

৬. অধিমানসুত্তং

৮৬. একং সমযং আযস্মা মহাকস্সপো রাজগহে ৰিহরতি ৰেল়ুৰনে কলন্দকনিৰাপে. তত্র খো আযস্মা মহাকস্সপো ভিক্খূ আমন্তেসি – ‘‘আৰুসো ভিক্খৰে’’তি. ‘‘আৰুসো’’তি খো তে ভিক্খূ আযস্মতো মহাকস্সপস্স পচ্চস্সোসুং. আযস্মা মহাকস্সপো এতদৰোচ –

‘‘ইধাৰুসো, ভিক্খু অঞ্ঞং ব্যাকরোতি – ‘খীণা জাতি, ৰুসিতং ব্রহ্মচরিযং, কতং করণীযং, নাপরং ইত্থত্তাযাতি পজানামী’তি. তমেনং তথাগতো ৰা তথাগতসাৰকো ৰা ঝাযী সমাপত্তিকুসলো পরচিত্তকুসলো পরচিত্তপরিযাযকুসলো সমনুযুঞ্জতি সমনুগ্গাহতি সমনুভাসতি. সো তথাগতেন ৰা তথাগতসাৰকেন ৰা ঝাযিনা সমাপত্তিকুসলেন পরচিত্তকুসলেন পরচিত্তপরিযাযকুসলেন সমনুযুঞ্জিযমানো সমনুগ্গাহিযমানো সমনুভাসিযমানো ইরীণং আপজ্জতি ৰিচিনং আপজ্জতি অনযং আপজ্জতি ব্যসনং আপজ্জতি অনযব্যসনং আপজ্জতি.

‘অধিমানিকো খো অযমাযস্মা অধিমানসচ্চো, অপ্পত্তে পত্তসঞ্ঞী, অকতে কতসঞ্ঞী, অনধিগতে অধিগতসঞ্ঞী. অধিমানেন অঞ্ঞং ব্যাকরোতি – খীণা জাতি, ৰুসিতং ব্রহ্মচরিযং, কতং করণীযং, নাপরং ইত্থত্তাযাতি পজানামী’তি.

‘‘তমেনং তথাগতো ৰা তথাগতসাৰকো ৰা ঝাযী সমাপত্তিকুসলো পরচিত্তকুসলো পরচিত্তপরিযাযকুসলো এৰং চেতসা চেতো পরিচ্চ মনসি করোতি – ‘কিং নু খো অযমাযস্মা নিস্সায অধিমানিকো অধিমানসচ্চো, অপ্পত্তে পত্তসঞ্ঞী, অকতে কতসঞ্ঞী, অনধিগতে অধিগতসঞ্ঞী. অধিমানেন অঞ্ঞং ব্যাকরোতি – খীণা জাতি, ৰুসিতং ব্রহ্মচরিযং, কতং করণীযং, নাপরং ইত্থত্তাযাতি পজানামী’তি.

‘বহুস্সুতো খো পন অযমাযস্মা সুতধরো সুতসন্নিচযো, যে তে ধম্মা আদিকল্যাণা মজ্ঝেকল্যাণা পরিযোসানকল্যাণা সাত্থং সব্যঞ্জনং কেৰলপরিপুণ্ণং পরিসুদ্ধং ব্রহ্মচরিযং অভিৰদন্তি, তথারূপাস্স ধম্মা বহুস্সুতা হোন্তি ধাতা ৰচসা পরিচিতা মনসানুপেক্খিতা দিট্ঠিযা সুপ্পটিৰিদ্ধা. তস্মা অযমাযস্মা অধিমানিকো অধিমানসচ্চো, অপ্পত্তে পত্তসঞ্ঞী, অকতে কতসঞ্ঞী, অনধিগতে অধিগতসঞ্ঞী. অধিমানেন অঞ্ঞং ব্যাকরোতি – খীণা জাতি, ৰুসিতং ব্রহ্মচরিযং, কতং করণীযং, নাপরং ইত্থত্তাযাতি পজানামী’তি.

‘অভিজ্ঝালু খো পন অযমাযস্মা; অভিজ্ঝাপরিযুট্ঠিতেন চেতসা বহুলং ৰিহরতি. অভিজ্ঝাপরিযুট্ঠানং খো পন তথাগতপ্পৰেদিতে ধম্মৰিনযে পরিহানমেতং.

‘ব্যাপন্নো খো পন অযমাযস্মা; ব্যাপাদপরিযুট্ঠিতেন চেতসা বহুলং ৰিহরতি. ব্যাপাদপরিযুট্ঠানং খো পন তথাগতপ্পৰেদিতে ধম্মৰিনযে পরিহানমেতং.

‘থিনমিদ্ধো খো পন অযমাযস্মা; থিনমিদ্ধপরিযুট্ঠিতেন চেতসা বহুলং ৰিহরতি. থিনমিদ্ধপরিযুট্ঠানং খো পন তথাগতপ্পৰেদিতে ধম্মৰিনযে পরিহানমেতং.

‘উদ্ধতো খো পন অযমাযস্মা; উদ্ধচ্চপরিযুট্ঠিতেন চেতসা বহুলং ৰিহরতি. উদ্ধচ্চপরিযুট্ঠানং খো পন তথাগতপ্পৰেদিতে ধম্মৰিনযে পরিহানমেতং.

‘ৰিচিকিচ্ছো খো পন অযমাযস্মা; ৰিচিকিচ্ছাপরিযুট্ঠিতেন চেতসা বহুলং ৰিহরতি. ৰিচিকিচ্ছাপরিযুট্ঠানং খো পন তথাগতপ্পৰেদিতে ধম্মৰিনযে পরিহানমেতং.

‘কম্মারামো খো পন অযমাযস্মা কম্মরতো কম্মারামতং অনুযুত্তো. কম্মারামতা খো পন তথাগতপ্পৰেদিতে ধম্মৰিনযে পরিহানমেতং.

‘ভস্সারামো খো পন অযমাযস্মা ভস্সরতো ভস্সারামতং অনুযুত্তো. ভস্সারামতা খো পন তথাগতপ্পৰেদিতে ধম্মৰিনযে পরিহানমেতং.

‘নিদ্দারামো খো পন অযমাযস্মা নিদ্দারতো নিদ্দারামতং অনুযুত্তো. নিদ্দারামতা খো পন তথাগতপ্পৰেদিতে ধম্মৰিনযে পরিহানমেতং.

‘সঙ্গণিকারামো খো পন অযমাযস্মা সঙ্গণিকরতো সঙ্গণিকারামতং অনুযুত্তো. সঙ্গণিকারামতা খো পন তথাগতপ্পৰেদিতে ধম্মৰিনযে পরিহানমেতং.

‘সতি খো পন অযমাযস্মা উত্তরি করণীযে ওরমত্তকেন ৰিসেসাধিগমেন অন্তরা ৰোসানং আপন্নো. অন্তরা ৰোসানগমনং খো পন তথাগতপ্পৰেদিতে ধম্মৰিনযে পরিহানমেতং’.

৭. নপ্পিযসুত্তং

৮৭. তত্র খো ভগৰা কালঙ্কতং ভিক্খুং [কলন্দকং ভিক্খুং (সী.), কাল়কভিক্খুং (স্যা.)] আরব্ভ ভিক্খূ আমন্তেসি – ‘‘ভিক্খৰো’’তি. ‘‘ভদন্তে’’তি তে ভিক্খূ ভগৰতো পচ্চস্সোসুং. ভগৰা এতদৰোচ –

‘‘ইধ, ভিক্খৰে, ভিক্খু অধিকরণিকো হোতি, অধিকরণসমথস্স ন ৰণ্ণৰাদী. যম্পি, ভিক্খৰে, ভিক্খু অধিকরণিকো হোতি অধিকরণসমথস্স ন ৰণ্ণৰাদী, অযম্পি ধম্মো ন পিযতায ন গরুতায ন ভাৰনায ন সামঞ্ঞায ন একীভাৰায সংৰত্ততি.

‘‘পুন চপরং, ভিক্খৰে, ভিক্খু ন সিক্খাকামো হোতি, সিক্খাসমাদানস্স [সিক্খাকামস্স (ক.)] ন ৰণ্ণৰাদী. যম্পি, ভিক্খৰে, ভিক্খু ন সিক্খাকামো হোতি সিক্খাসমাদানস্স ন ৰণ্ণৰাদী, অযম্পি ধম্মো ন পিযতায ন গরুতায ন ভাৰনায ন সামঞ্ঞায ন একীভাৰায সংৰত্ততি.

‘‘পুন চপরং, ভিক্খৰে, ভিক্খু পাপিচ্ছো হোতি, ইচ্ছাৰিনযস্স ন ৰণ্ণৰাদী. যম্পি, ভিক্খৰে, ভিক্খু পাপিচ্ছো হোতি ইচ্ছাৰিনযস্স ন ৰণ্ণৰাদী, অযম্পি ধম্মো ন পিযতায ন গরুতায ন ভাৰনায ন সামঞ্ঞায ন একীভাৰায সংৰত্ততি.

‘‘পুন চপরং, ভিক্খৰে, ভিক্খু কোধনো হোতি, কোধৰিনযস্স ন ৰণ্ণৰাদী. যম্পি, ভিক্খৰে, ভিক্খু কোধনো হোতি কোধৰিনযস্স ন ৰণ্ণৰাদী, অযম্পি ধম্মো ন পিযতায ন গরুতায ন ভাৰনায ন সামঞ্ঞায ন একীভাৰায সংৰত্ততি.

‘‘পুন চপরং, ভিক্খৰে, ভিক্খু মক্খী হোতি, মক্খৰিনযস্স ন ৰণ্ণৰাদী. যম্পি, ভিক্খৰে, ভিক্খু মক্খী হোতি মক্খৰিনযস্স ন ৰণ্ণৰাদী, অযম্পি ধম্মো ন পিযতায ন গরুতায ন ভাৰনায ন সামঞ্ঞায ন একীভাৰায সংৰত্ততি.

‘‘পুন চপরং, ভিক্খৰে, ভিক্খু সঠো হোতি, সাঠেয্যৰিনযস্স ন ৰণ্ণৰাদী. যম্পি, ভিক্খৰে, ভিক্খু সঠো হোতি সাঠেয্যৰিনযস্স ন ৰণ্ণৰাদী, অযম্পি ধম্মো ন পিযতায ন গরুতায ন ভাৰনায ন সামঞ্ঞায ন একীভাৰায সংৰত্ততি.

‘‘পুন চপরং, ভিক্খৰে, ভিক্খু মাযাৰী হোতি, মাযাৰিনযস্স ন ৰণ্ণৰাদী. যম্পি, ভিক্খৰে, ভিক্খু মাযাৰী হোতি মাযাৰিনযস্স ন ৰণ্ণৰাদী, অযম্পি ধম্মো ন পিযতায ন গরুতায ন ভাৰনায ন সামঞ্ঞায ন একীভাৰায সংৰত্ততি.

‘‘পুন চপরং, ভিক্খৰে, ভিক্খু ধম্মানং ন নিসামকজাতিকো হোতি, ধম্মনিসন্তিযা ন ৰণ্ণৰাদী. যম্পি, ভিক্খৰে, ভিক্খু ধম্মানং ন নিসামকজাতিকো হোতি ধম্মনিসন্তিযা ন ৰণ্ণৰাদী, অযম্পি ধম্মো ন পিযতায ন গরুতায ন ভাৰনায ন সামঞ্ঞায ন একীভাৰায সংৰত্ততি.

‘‘পুন চপরং, ভিক্খৰে, ভিক্খু ন পটিসল্লীনো হোতি, পটিসল্লানস্স ন ৰণ্ণৰাদী. যম্পি, ভিক্খৰে, ভিক্খু ন পটিসল্লীনো হোতি পটিসল্লানস্স ন ৰণ্ণৰাদী, অযম্পি ধম্মো ন পিযতায ন গরুতায ন ভাৰনায ন সামঞ্ঞায ন একীভাৰায সংৰত্ততি.

‘‘পুন চপরং, ভিক্খৰে, ভিক্খু সব্রহ্মচারীনং ন পটিসন্থারকো [পটিসন্ধারকো (ক.)] হোতি, পটিসন্থারকস্স ন ৰণ্ণৰাদী. যম্পি, ভিক্খৰে, ভিক্খু সব্রহ্মচারীনং ন পটিসন্থারকো হোতি পটিসন্থারকস্স ন ৰণ্ণৰাদী, অযম্পি ধম্মো ন পিযতায ন গরুতায ন ভাৰনায ন সামঞ্ঞায ন একীভাৰায সংৰত্ততি.

‘‘এৰরূপস্স, ভিক্খৰে, ভিক্খুনো কিঞ্চাপি এৰং ইচ্ছা উপ্পজ্জেয্য – ‘অহো ৰত মং সব্রহ্মচারী সক্করেয্যুং গরুং করেয্যুং [গরুকরেয্যুং (সী. স্যা.)] মানেয্যুং পূজেয্যু’ন্তি, অথ খো নং সব্রহ্মচারী ন চেৰ সক্করোন্তি ন গরুং করোন্তি [গরুকরোন্তি (সী. স্যা.)] ন মানেন্তি ন পূজেন্তি. তং কিস্স হেতু? তথাহিস্স, ভিক্খৰে, ৰিঞ্ঞূ সব্রহ্মচারী তে পাপকে অকুসলে ধম্মে অপ্পহীনে সমনুপস্সন্তি.

‘‘সেয্যথাপি, ভিক্খৰে, অস্সখল়ুঙ্কস্স কিঞ্চাপি এৰং ইচ্ছা উপ্পজ্জেয্য – ‘অহো ৰত মং মনুস্সা আজানীযট্ঠানে ঠপেয্যুং, আজানীযভোজনঞ্চ ভোজেয্যুং, আজানীযপরিমজ্জনঞ্চ পরিমজ্জেয্যু’ন্তি, অথ খো নং মনুস্সা ন চেৰ আজানীযট্ঠানে ঠপেন্তি ন চ আজানীযভোজনং ভোজেন্তি ন চ আজানীযপরিমজ্জনং পরিমজ্জন্তি. তং কিস্স হেতু? তথাহিস্স, ভিক্খৰে, ৰিঞ্ঞূ মনুস্সা তানি সাঠেয্যানি কূটেয্যানি জিম্হেয্যানি ৰঙ্কেয্যানি অপ্পহীনানি সমনুপস্সন্তি. এৰমেৰং খো, ভিক্খৰে, এৰরূপস্স ভিক্খুনো কিঞ্চাপি এৰং ইচ্ছা উপ্পজ্জেয্য – ‘অহো ৰত মং সব্রহ্মচারী সক্করেয্যুং গরুং করেয্যুং মানেয্যুং পূজেয্যু’ন্তি, অথ খো নং সব্রহ্মচারী ন চেৰ সক্করোন্তি ন গরুং করোন্তি ন মানেন্তি ন পূজেন্তি. তং কিস্স হেতু? তথাহিস্স, ভিক্খৰে, ৰিঞ্ঞূ সব্রহ্মচারী তে পাপকে অকুসলে ধম্মে অপ্পহীনে সমনুপস্সন্তি.

‘‘ইধ পন, ভিক্খৰে, ভিক্খু ন অধিকরণিকো হোতি, অধিকরণসমথস্স ৰণ্ণৰাদী. যম্পি, ভিক্খৰে, ভিক্খু ন অধিকরণিকো হোতি অধিকরণসমথস্স ৰণ্ণৰাদী, অযম্পি ধম্মো পিযতায গরুতায ভাৰনায সামঞ্ঞায একীভাৰায সংৰত্ততি.

‘‘পুন চপরং, ভিক্খৰে, ভিক্খু সিক্খাকামো হোতি, সিক্খাসমাদানস্স ৰণ্ণৰাদী. যম্পি, ভিক্খৰে, ভিক্খু সিক্খাকামো হোতি সিক্খাসমাদানস্স ৰণ্ণৰাদী, অযম্পি ধম্মো পিযতায গরুতায ভাৰনায সামঞ্ঞায একীভাৰায সংৰত্ততি.

‘‘পুন চপরং, ভিক্খৰে, ভিক্খু অপ্পিচ্ছো হোতি, ইচ্ছাৰিনযস্স ৰণ্ণৰাদী. যম্পি, ভিক্খৰে, ভিক্খু অপ্পিচ্ছো হোতি ইচ্ছাৰিনযস্স ৰণ্ণৰাদী, অযম্পি ধম্মো…পে… একীভাৰায সংৰত্ততি.

‘‘পুন চপরং, ভিক্খৰে, ভিক্খু অক্কোধনো হোতি, কোধৰিনযস্স ৰণ্ণৰাদী. যম্পি, ভিক্খৰে, ভিক্খু অক্কোধনো হোতি কোধৰিনযস্স ৰণ্ণৰাদী, অযম্পি ধম্মো…পে… একীভাৰায সংৰত্ততি.

‘‘পুন চপরং, ভিক্খৰে, ভিক্খু অমক্খী হোতি, মক্খৰিনযস্স ৰণ্ণৰাদী. যম্পি, ভিক্খৰে, ভিক্খু অমক্খী হোতি মক্খৰিনযস্স ৰণ্ণৰাদী, অযম্পি ধম্মো…পে… একীভাৰায সংৰত্ততি.

‘‘পুন চপরং, ভিক্খৰে, ভিক্খু অসঠো হোতি, সাঠেয্যৰিনযস্স ৰণ্ণৰাদী. যম্পি, ভিক্খৰে, ভিক্খু অসঠো হোতি সাঠেয্যৰিনযস্স ৰণ্ণৰাদী, অযম্পি ধম্মো…পে… একীভাৰায সংৰত্ততি.

‘‘পুন চপরং, ভিক্খৰে, ভিক্খু অমাযাৰী হোতি, মাযাৰিনযস্স ৰণ্ণৰাদী. যম্পি, ভিক্খৰে, ভিক্খু অমাযাৰী হোতি মাযাৰিনযস্স ৰণ্ণৰাদী, অযম্পি ধম্মো…পে… একীভাৰায সংৰত্ততি.

‘‘পুন চপরং, ভিক্খৰে, ভিক্খু ধম্মানং নিসামকজাতিকো হোতি, ধম্মনিসন্তিযা ৰণ্ণৰাদী. যম্পি, ভিক্খৰে, ভিক্খু ধম্মানং নিসামকজাতিকো হোতি ধম্মনিসন্তিযা ৰণ্ণৰাদী, অযম্পি ধম্মো…পে… একীভাৰায সংৰত্ততি.

‘‘পুন চপরং, ভিক্খৰে, ভিক্খু পটিসল্লীনো হোতি, পটিসল্লানস্স ৰণ্ণৰাদী. যম্পি, ভিক্খৰে, ভিক্খু পটিসল্লীনো হোতি পটিসল্লানস্স ৰণ্ণৰাদী, অযম্পি ধম্মো…পে… একীভাৰায সংৰত্ততি.

‘‘পুন চপরং, ভিক্খৰে, ভিক্খু সব্রহ্মচারীনং পটিসন্থারকো হোতি, পটিসন্থারকস্স ৰণ্ণৰাদী. যম্পি, ভিক্খৰে, ভিক্খু সব্রহ্মচারীনং পটিসন্থারকো হোতি পটিসন্থারকস্স ৰণ্ণৰাদী, অযম্পি ধম্মো পিযতায গরুতায ভাৰনায সামঞ্ঞায একীভাৰায সংৰত্ততি.

‘‘এৰরূপস্স, ভিক্খৰে, ভিক্খুনো কিঞ্চাপি ন এৰং ইচ্ছা উপ্পজ্জেয্য – ‘অহো ৰত মং সব্রহ্মচারী সক্করেয্যুং গরুং করেয্যুং মানেয্যুং পূজেয্যু’ন্তি, অথ খো নং সব্রহ্মচারী সক্করোন্তি গরুং করোন্তি মানেন্তি পূজেন্তি. তং কিস্স হেতু? তথাহিস্স, ভিক্খৰে, ৰিঞ্ঞূ সব্রহ্মচারী তে পাপকে অকুসলে ধম্মে পহীনে সমনুপস্সন্তি.

‘‘সেয্যথাপি, ভিক্খৰে, ভদ্দস্স অস্সাজানীযস্স কিঞ্চাপি ন এৰং ইচ্ছা উপ্পজ্জেয্য – ‘অহো ৰত মং মনুস্সা আজানীযট্ঠানে ঠপেয্যুং, আজানীযভোজনঞ্চ ভোজেয্যুং, আজানীযপরিমজ্জনঞ্চ পরিমজ্জেয্যু’ন্তি, অথ খো নং মনুস্সা আজানীযট্ঠানে চ ঠপেন্তি আজানীযভোজনঞ্চ ভোজেন্তি আজানীযপরিমজ্জনঞ্চ পরিমজ্জন্তি. তং কিস্স হেতু? তথাহিস্স, ভিক্খৰে, ৰিঞ্ঞূ মনুস্সা তানি সাঠেয্যানি কূটেয্যানি জিম্হেয্যানি ৰঙ্কেয্যানি পহীনানি সমনুপস্সন্তি.

‘‘এৰমেৰং খো, ভিক্খৰে, এৰরূপস্স ভিক্খুনো কিঞ্চাপি ন এৰং ইচ্ছা উপ্পজ্জেয্য – ‘অহো ৰত মং সব্রহ্মচারী সক্করেয্যুং গরুং করেয্যুং মানেয্যুং পূজেয্যু’ন্তি, অথ খো নং সব্রহ্মচারী সক্করোন্তি গরুং করোন্তি মানেন্তি পূজেন্তি. তং কিস্স হেতু? তথাহিস্স, ভিক্খৰে, ৰিঞ্ঞূ সব্রহ্মচারী তে পাপকে অকুসলে ধম্মে পহীনে সমনুপস্সন্তী’’তি. সত্তমং.

৮. অক্কোসকসুত্তং

৮৮. ‘‘যো সো, ভিক্খৰে, ভিক্খু অক্কোসকপরিভাসকো অরিযূপৰাদী সব্রহ্মচারীনং ঠানমেতং অৰকাসো [অট্ঠানমেতং অনৰকাসো (সী. স্যা. পী.)] যং সো দসন্নং ব্যসনানং অঞ্ঞতরং ব্যসনং নিগচ্ছেয্য [ন নিগচ্ছেয্য (সী. স্যা. পী.)]. কতমেসং দসন্নং? অনধিগতং নাধিগচ্ছতি, অধিগতা পরিহাযতি, সদ্ধম্মস্স ন ৰোদাযন্তি, সদ্ধম্মেসু ৰা অধিমানিকো হোতি অনভিরতো ৰা ব্রহ্মচরিযং চরতি, অঞ্ঞতরং ৰা সংকিলিট্ঠং আপত্তিং আপজ্জতি, গাল়্হং ৰা রোগাতঙ্কং ফুসতি, উম্মাদং ৰা পাপুণাতি চিত্তক্খেপং, সম্মূল়্হো কালং করোতি, কাযস্স ভেদা পরং মরণা অপাযং দুগ্গতিং ৰিনিপাতং নিরযং উপপজ্জতি. যো সো, ভিক্খৰে, ভিক্খু অক্কোসকপরিভাসকো অরিযূপৰাদী সব্রহ্মচারীনং, ঠানমেতং অৰকাসো যং সো ইমেসং দসন্নং ব্যসনানং অঞ্ঞতরং ব্যসনং নিগচ্ছেয্যা’’তি. অট্ঠমং.

৯. কোকালিকসুত্তং

৮৯. [সং. নি. ১.১৮১; সু. নি. কোকালিকসুত্ত] অথ খো কোকালিকো ভিক্খু যেন ভগৰা তেনুপসঙ্কমি; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদি. একমন্তং নিসিন্নো খো কোকালিকো ভিক্খু ভগৰন্তং এতদৰোচ – ‘‘পাপিচ্ছা, ভন্তে, সারিপুত্তমোগ্গল্লানা, পাপিকানং ইচ্ছানং ৰসং গতা’’তি. ‘‘মা হেৰং, কোকালিক, মা হেৰং, কোকালিক! পসাদেহি, কোকালিক, সারিপুত্তমোগ্গল্লানেসু চিত্তং. পেসলা সারিপুত্তমোগ্গল্লানা’’তি.

দুতিযম্পি খো কোকালিকো ভিক্খু ভগৰন্তং এতদৰোচ – ‘‘কিঞ্চাপি মে, ভন্তে, ভগৰা সদ্ধাযিকো পচ্চযিকো, অথ খো পাপিচ্ছাৰ সারিপুত্তমোগ্গল্লানা, পাপিকানং ইচ্ছানং ৰসং গতা’’তি. ‘‘মা হেৰং, কোকালিক, মা হেৰং, কোকালিক! পসাদেহি, কোকালিক, সারিপুত্তমোগ্গল্লানেসু চিত্তং. পেসলা সারিপুত্তমোগ্গল্লানা’’তি.

ততিযম্পি খো কোকালিকো ভিক্খু ভগৰন্তং এতদৰোচ – ‘‘কিঞ্চাপি মে, ভন্তে, ভগৰা সদ্ধাযিকো পচ্চযিকো, অথ খো পাপিচ্ছাৰ সারিপুত্তমোগ্গল্লানা, পাপিকানং ইচ্ছানং ৰসং গতা’’তি. ‘‘মা হেৰং, কোকালিক, মা হেৰং, কোকালিক! পসাদেহি, কোকালিক, সারিপুত্তমোগ্গল্লানেসু চিত্তং. পেসলা সারিপুত্তমোগ্গল্লানা’’তি.

অথ খো কোকালিকো ভিক্খু উট্ঠাযাসনা ভগৰন্তং অভিৰাদেত্ৰা পদক্খিণং কত্ৰা পক্কামি. অচিরপক্কন্তস্স চ কোকালিকস্স ভিক্খুনো সাসপমত্তীহি পীল়কাহি সব্বো কাযো ফুটো অহোসি. সাসপমত্তিযো হুত্ৰা মুগ্গমত্তিযো অহেসুং, মুগ্গমত্তিযো হুত্ৰা কলাযমত্তিযো অহেসুং, কলাযমত্তিযো হুত্ৰা কোলট্ঠিমত্তিযো অহেসুং, কোলট্ঠিমত্তিযো হুত্ৰা কোলমত্তিযো অহেসুং, কোলমত্তিযো হুত্ৰা আমলকমত্তিযো অহেসুং, আমলকমত্তিযো হুত্ৰা (তিণ্ডুকমত্তিযো অহেসুং, তিণ্ডুকমত্তিযো হুত্ৰা,) [সং. নি. ১.১৮১; সু. নি. কোকালিকসুত্ত নত্থি] বেল়ুৰসলাটুকমত্তিযো অহেসুং, বেল়ুৰসলাটুকমত্তিযো হুত্ৰা বিল্লমত্তিযো অহেসুং, বিল্লমত্তিযো হুত্ৰা পভিজ্জিংসু, পুব্বঞ্চ লোহিতঞ্চ পগ্ঘরিংসু. সো সুদং কদলিপত্তেসু সেতি মচ্ছোৰ ৰিসগিলিতো.

অথ খো তুরূ পচ্চেকব্রহ্মা [তুদুপ্পচ্চেকব্রহ্মা (সী. পী.), তুদি পচ্চেকব্রহ্মা (স্যা.), তুরি পচ্চেকব্রহ্মা (ক.) সং. নি. ১.১৮০] যেন কোকালিকো ভিক্খু তেনুপসঙ্কমি; উপসঙ্কমিত্ৰা ৰেহাসে ঠত্ৰা কোকালিকং ভিক্খুং এতদৰোচ – ‘‘পসাদেহি, কোকালিক, সারিপুত্তমোগ্গল্লানেসু চিত্তং. পেসলা সারিপুত্তমোগ্গল্লানা’’তি. ‘‘কোসি ত্ৰং, আৰুসো’’তি? ‘‘অহং তুরূ পচ্চেকব্রহ্মা’’তি. ‘‘ননু ত্ৰং, আৰুসো, ভগৰতা অনাগামী ব্যাকতো, অথ কিঞ্চরহি ইধাগতো? পস্স যাৰঞ্চ তে ইদং অপরদ্ধ’’ন্তি.

অথ খো তুরূ পচ্চেকব্রহ্মা কোকালিকং ভিক্খুং গাথাহি অজ্ঝভাসি –

‘‘পুরিসস্স হি জাতস্স, কুঠারী জাযতে মুখে;

যায ছিন্দতি অত্তানং, বালো দুব্ভাসিতং ভণং.

‘‘যো নিন্দিযং পসংসতি, তং ৰা নিন্দতি যো পসংসিযো;

ৰিচিনাতি মুখেন সো কলিং, কলিনা তেন সুখং ন ৰিন্দতি.

‘‘অপ্পমত্তকো অযং কলি, যো অক্খেসু ধনপরাজযো;

সব্বস্সাপি সহাপি অত্তনা, অযমেৰ মহত্তরো কলি;

যো সুগতেসু মনং পদূসযে.

‘‘সতং সহস্সানং নিরব্বুদানং, ছত্তিংসতি পঞ্চ চ অব্বুদানি;

যমরিযগরহী নিরযং উপেতি, ৰাচং মনঞ্চ পণিধায পাপক’’ন্তি.

অথ খো কোকালিকো ভিক্খু তেনেৰ আবাধেন কালমকাসি. কালঙ্কতো চ কোকালিকো ভিক্খু পদুমং নিরযং উপপজ্জতি সারিপুত্তমোগ্গল্লানেসু চিত্তং আঘাতেত্ৰা.

অথ খো ব্রহ্মা সহম্পতি অভিক্কন্তায রত্তিযা অভিক্কন্তৰণ্ণো কেৰলকপ্পং জেতৰনং ওভাসেত্ৰা যেন ভগৰা তেনুপসঙ্কমি; উপসঙ্কমিত্ৰা ভগৰন্তং অভিৰাদেত্ৰা একমন্তং অট্ঠাসি. একমন্তং ঠিতো খো ব্রহ্মা সহম্পতি ভগৰন্তং এতদৰোচ – ‘‘কোকালিকো, ভন্তে, ভিক্খু কালঙ্কতো. কালঙ্কতো চ, ভন্তে, কোকালিকো ভিক্খু পদুমং নিরযং উপপন্নো সারিপুত্তমোগ্গল্লানেসু চিত্তং আঘাতেত্ৰা’’তি. ইদমৰোচ ব্রহ্মা সহম্পতি. ইদং ৰত্ৰা ভগৰন্তং অভিৰাদেত্ৰা পদক্খিণং কত্ৰা তত্থেৰন্তরধাযি.

অথ খো ভগৰা তস্সা রত্তিযা অচ্চযেন ভিক্খূ আমন্তেসি – ‘‘ইমং, ভিক্খৰে, রত্তিং ব্রহ্মা সহম্পতি অভিক্কন্তায রত্তিযা অভিক্কন্তৰণ্ণো কেৰলকপ্পং জেতৰনং ওভাসেত্ৰা যেনাহং তেনুপসঙ্কমি; উপসঙ্কমিত্ৰা মং অভিৰাদেত্ৰা একমন্তং অট্ঠাসি. একমন্তং ঠিতো খো, ভিক্খৰে, ব্রহ্মা সহম্পতি মং এতদৰোচ – ‘কোকালিকো, ভন্তে, ভিক্খু কালঙ্কতো; কালঙ্কতো চ, ভন্তে, কোকালিকো ভিক্খু পদুমং নিরযং উপপন্নো সারিপুত্তমোগ্গল্লানেসু চিত্তং আঘাতেত্ৰা’তি. ইদমৰোচ, ভিক্খৰে, ব্রহ্মা সহম্পতি. ইদং ৰত্ৰা মং অভিৰাদেত্ৰা পদক্খিণং কত্ৰা তত্থেৰন্তরধাযী’’তি.