৬. ছট্ঠসিক্খাপদং

১০৯৫. তেন সমযেন বুদ্ধো ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তেন খো পন সমযেন ভিক্খুনিযো পৰিপুণ্ণদ্ৱাদসৱস্সং গিহিগতং দ্ৱে ৱস্সানি ছসু ধম্মেসু অসিক্খিতসিক্খং ৱুট্ঠাপেন্তি. তা বালা হোন্তি অব্যত্তা ন জানন্তি কপ্পিযং ৱা অকপ্পিযং ৱা. যা তা ভিক্খুনিযো অপ্পিচ্ছা…পে… তা উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম ভিক্খুনিযো পৰিপুণ্ণদ্ৱাদসৱস্সং গিহিগতং দ্ৱে ৱস্সানি ছসু ধম্মেসু অসিক্খিতসিক্খং ৱুট্ঠাপেস্সন্তী’’তি…পে… সচ্চং কিৰ, ভিক্খৱে, ভিক্খুনিযো পৰিপুণ্ণদ্ৱাদসৱস্সং গিহিগতং দ্ৱে ৱস্সানি ছসু ধম্মেসু অসিক্খিতসিক্খং ৱুট্ঠাপেন্তীতি? ‘‘সচ্চং, ভগৱা’’তি. ৱিগৰহি বুদ্ধো ভগৱা…পে… কথঞ্হি নাম, ভিক্খৱে, ভিক্খুনিযো পৰিপুণ্ণদ্ৱাদসৱস্সং গিহিগতং দ্ৱে ৱস্সানি ছসু ধম্মেসু অসিক্খিতসিক্খং ৱুট্ঠাপেস্সন্তি! নেতং, ভিক্খৱে, অপ্পসন্নানং ৱা পসাদায…পে… ৱিগৰহিত্ৱা ধম্মিং কথং কত্ৱা ভিক্খূ আমন্তেসি – ‘‘অনুজানামি, ভিক্খৱে, পৰিপুণ্ণদ্ৱাদসৱস্সায গিহিগতায দ্ৱে ৱস্সানি ছসু ধম্মেসু সিক্খাসম্মুতিং দাতুং. এৱঞ্চ পন, ভিক্খৱে, দাতব্বা. তায পৰিপুণ্ণদ্ৱাদসৱস্সায গিহিগতায সঙ্ঘং উপসঙ্কমিত্ৱা একংসং উত্তৰাসঙ্গং কৰিত্ৱা ভিক্খুনীনং পাদে ৱন্দিত্ৱা উক্কুটিকং নিসীদিত্ৱা অঞ্জলিং পগ্গহেত্ৱা এৱমস্স ৱচনীযো – অহং, অয্যে, ইত্থন্নামা ইত্থন্নামায অয্যায পৰিপুণ্ণদ্ৱাদসৱস্সা গিহিগতা সঙ্ঘং দ্ৱে ৱস্সানি ছসু ধম্মেসু সিক্খাসম্মুতিং যাচামী’’তি. দুতিযম্পি যাচিতব্বা. ততিযম্পি যাচিতব্বা. ব্যত্তায ভিক্খুনিযা পটিবলায সঙ্ঘো ঞাপেতব্বো –

১০৯৬. ‘‘সুণাতু মে, অয্যে, সঙ্ঘো. অযং ইত্থন্নামা ইত্থন্নামায অয্যায পৰিপুণ্ণদ্ৱাদসৱস্সা গিহিগতা সঙ্ঘং দ্ৱে ৱস্সানি ছসু ধম্মেসু সিক্খাসম্মুতিং যাচতি. যদি সঙ্ঘস্স পত্তকল্লং সঙ্ঘো ইত্থন্নামায পৰিপুণ্ণদ্ৱাদসৱস্সায গিহিগতায দ্ৱে ৱস্সানি ছসু ধম্মেসু সিক্খাসম্মুতিং দদেয্য. এসা ঞত্তি.

‘‘সুণাতু মে, অয্যে, সঙ্ঘো. অযং ইত্থন্নামা ইত্থন্নামায অয্যায পৰিপুণ্ণদ্ৱাদসৱস্সা গিহিগতা সঙ্ঘং দ্ৱে ৱস্সানি ছসু ধম্মেসু সিক্খাসম্মুতিং যাচতি. সঙ্ঘো ইত্থন্নামায পৰিপুণ্ণদ্ৱাদসৱস্সায গিহিগতায দ্ৱে ৱস্সানি ছসু ধম্মেসু সিক্খাসম্মুতিং দেতি. যস্সা অয্যায খমতি ইত্থন্নামায পৰিপুণ্ণদ্ৱাদসৱস্সায গিহিগতায দ্ৱে ৱস্সানি ছসু ধম্মেসু সিক্খাসম্মুতিযা দানং, সা তুণ্হস্স; যস্সা নক্খমতি, সা ভাসেয্য.

‘‘দিন্না সঙ্ঘেন ইত্থন্নামায পৰিপুণ্ণদ্ৱাদসৱস্সায গিহিগতায দ্ৱে ৱস্সানি ছসু ধম্মেসু সিক্খাসম্মুতি. খমতি সঙ্ঘস্স, তস্মা তুণ্হী, এৱমেতং ধাৰযামী’’তি.

সা পৰিপুণ্ণদ্ৱাদসৱস্সা গিহিগতা এৱং ৱদেহীতি ৱত্তব্বা – ‘‘পাণাতিপাতা ৱেৰমণিং দ্ৱে ৱস্সানি অৱীতিক্কম্ম সমাদানং সমাদিযামি…পে… ৱিকালভোজনা ৱেৰমণিং দ্ৱে ৱস্সানি অৱীতিক্কম্ম সমাদানং সমাদিযামী’’তি.

অথ খো ভগৱা তা ভিক্খুনিযো অনেকপৰিযাযেন ৱিগৰহিত্ৱা দুব্ভৰতায…পে… এৱঞ্চ পন, ভিক্খৱে, ভিক্খুনিযো ইমং সিক্খাপদং উদ্দিসন্তু –

১০৯৭. ‘‘যা পন ভিক্খুনী পৰিপুণ্ণদ্ৱাদসৱস্সং গিহিগতং দ্ৱে ৱস্সানি ছসু ধম্মেসু অসিক্খিতসিক্খং ৱুট্ঠাপেয্য, পাচিত্তিয’’ন্তি.

১০৯৮. যা পনাতি যা যাদিসা…পে… ভিক্খুনীতি…পে… অযং ইমস্মিং অত্থে অধিপ্পেতা ভিক্খুনীতি.

পৰিপুণ্ণদ্ৱাদসৱস্সা নাম পত্তদ্ৱাদসৱস্সা. গিহিগতা নাম পুৰিসন্তৰগতা ৱুচ্চতি. দ্ৱে ৱস্সানীতি দ্ৱে সংৱচ্ছৰানি. অসিক্খিতসিক্খা নাম সিক্খা ৱা ন দিন্না হোতি, দিন্না ৱা সিক্খা কুপিতা. ৱুট্ঠাপেয্যাতি উপসম্পাদেয্য.

‘‘ৱুট্ঠাপেস্সামী’’তি গণং ৱা আচৰিনিং ৱা পত্তং ৱা চীৱৰং ৱা পৰিযেসতি, সীমং ৱা সম্মন্নতি, আপত্তি দুক্কটস্স. ঞত্তিযা দুক্কটং. দ্ৱীহি কম্মৱাচাহি দুক্কটা. কম্মৱাচাপৰিযোসানে উপজ্ঝাযায আপত্তি পাচিত্তিযস্স. গণস্স চ আচৰিনিযা চ আপত্তি দুক্কটস্স.

১০৯৯. ধম্মকম্মে ধম্মকম্মসঞ্ঞা ৱুট্ঠাপেতি, আপত্তি পাচিত্তিযস্স. ধম্মকম্মে ৱেমতিকা ৱুট্ঠাপেতি, আপত্তি পাচিত্তিযস্স. ধম্মকম্মে অধম্মকম্মসঞ্ঞা ৱুট্ঠাপেতি, আপত্তি পাচিত্তিযস্স.

অধম্মকম্মে ধম্মকম্মসঞ্ঞা ৱুট্ঠাপেতি, আপত্তি দুক্কটস্স. অধম্মকম্মে ৱেমতিকা ৱুট্ঠাপেতি, আপত্তি দুক্কটস্স. অধম্মকম্মে অধম্মকম্মসঞ্ঞা ৱুট্ঠাপেতি, আপত্তি দুক্কটস্স.

১১০০. অনাপত্তি পৰিপুণ্ণদ্ৱাদসৱস্সং গিহিগতং দ্ৱে ৱস্সানি ছসু ধম্মেসু সিক্খিতসিক্খং ৱুট্ঠাপেতি, উম্মত্তিকায, আদিকম্মিকাযাতি.

ছট্ঠসিক্খাপদং নিট্ঠিতং.