নমো তস্স ভগৱতো অৰহতো সম্মাসম্বুদ্ধস্স

ৱিনযপিটকে

পাচিত্তিযপাড়ি

৫. পাচিত্তিযকণ্ডং

১. মুসাৱাদৱগ্গো

১. মুসাৱাদসিক্খাপদং

ইমে খো পনাযস্মন্তো দ্ৱেনৱুতি পাচিত্তিযা

ধম্মা উদ্দেসং আগচ্ছন্তি.

১. তেন সমযেন বুদ্ধো ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তেন খো পন সমযেন হত্থকো সক্যপুত্তো ৱাদক্খিত্তো হোতি. সো তিত্থিযেহি সদ্ধিং সল্লপন্তো অৱজানিত্ৱা পটিজানাতি, পটিজানিত্ৱা অৱজানাতি, অঞ্ঞেনঞ্ঞং পটিচৰতি, সম্পজানমুসা ভাসতি, সঙ্কেতং কত্ৱা ৱিসংৱাদেতি. তিত্থিযা উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম হত্থকো সক্যপুত্তো অম্হেহি সদ্ধিং সল্লপন্তো অৱজানিত্ৱা পটিজানিস্সতি, পটিজানিত্ৱা অৱজানিস্সতি, অঞ্ঞেনঞ্ঞং পটিচৰিস্সতি, সম্পজানমুসা ভাসিস্সতি, সঙ্কেতং কত্ৱা ৱিসংৱাদেস্সতী’’তি!

অস্সোসুং খো ভিক্খূ তেসং তিত্থিযানং উজ্ঝাযন্তানং খিয্যন্তানং ৱিপাচেন্তানং. অথ খো তে ভিক্খূ যেন হত্থকো সক্যপুত্তো তেনুপসঙ্কমিংসু; উপসঙ্কমিত্ৱা হত্থকং সক্যপুত্তং এতদৱোচুং – ‘‘সচ্চং কিৰ ত্ৱং, আৱুসো হত্থক, তিত্থিযেহি সদ্ধিং সল্লপন্তো অৱজানিত্ৱা পটিজানাসি, পটিজানিত্ৱা অৱজানাসি, অঞ্ঞেনঞ্ঞং পটিচৰসি, সম্পজানমুসা ভাসসি, সঙ্কেতং কত্ৱা ৱিসংৱাদেসী’’তি? ‘‘এতে খো, আৱুসো, তিত্থিযা নাম যেন কেনচি জেতব্বা; নেৱ তেসং জযো দাতব্বো’’তি. যে তে ভিক্খূ অপ্পিচ্ছা…পে… তে উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম হত্থকো সক্যপুত্তো তিত্থিযেহি সদ্ধিং সল্লপন্তো অৱজানিত্ৱা পটিজানিস্সতি, পটিজানিত্ৱা অৱজানিস্সতি, অঞ্ঞেনঞ্ঞং পটিচৰিস্সতি, সম্পজানমুসা ভাসিস্সতি, সঙ্কেতং কত্ৱা ৱিসংৱাদেস্সতী’’তি!

অথ খো তে ভিক্খূ হত্থকং সক্যপুত্তং অনেকপৰিযাযেন ৱিগৰহিত্ৱা ভগৱতো এতমত্থং আৰোচেসুং. অথ খো ভগৱা এতস্মিং নিদানে এতস্মিং পকৰণে ভিক্খুসঙ্ঘং সন্নিপাতাপেত্ৱা হত্থকং সক্যপুত্তং পটিপুচ্ছি – ‘‘সচ্চং কিৰ ত্ৱং, হত্থক, তিত্থিযেহি সদ্ধিং সল্লপন্তো অৱজানিত্ৱা পটিজানাসি, পটিজানিত্ৱা অৱজানাসি, অঞ্ঞেনঞ্ঞং পটিচৰসি, সম্পজানমুসা ভাসসি, সঙ্কেতং কত্ৱা ৱিসংৱাদেসী’’তি? ‘‘সচ্চং, ভগৱা’’তি. ৱিগৰহি বুদ্ধো ভগৱা…পে… কথঞ্হি নাম ত্ৱং, মোঘপুৰিস, তিত্থিযেহি সদ্ধিং সল্লপন্তো অৱজানিত্ৱা পটিজানিস্সসি, পটিজানিত্ৱা অৱজানিস্সসি, অঞ্ঞেনঞ্ঞং পটিচৰিস্সসি, সম্পজানমুসা ভাসিস্সসি, সঙ্কেতং কত্ৱা ৱিসংৱাদেস্সসি! নেতং, মোঘপুৰিস, অপ্পসন্নানং ৱা পসাদায…পে… এৱঞ্চ পন, ভিক্খৱে, ইমং সিক্খাপদং উদ্দিসেয্যাথ –

২. ‘‘সম্পজানমুসাৱাদে পাচিত্তিয’’ন্তি.

৩. সম্পজানমুসাৱাদো নাম ৱিসংৱাদনপুৰেক্খাৰস্স ৱাচা, গিৰা, ব্যপ্পথো, ৱচীভেদো, ৱাচসিকা ৱিঞ্ঞত্তি, অট্ঠ অনৰিযৱোহাৰা – অদিট্ঠং দিট্ঠং মেতি, অস্সুতং সুতং মেতি, অমুতং মুতং মেতি, অৱিঞ্ঞাতং ৱিঞ্ঞাতং মেতি, দিট্ঠং অদিট্ঠং মেতি, সুতং অস্সুতং মেতি, মুতং অমুতং মেতি, ৱিঞ্ঞাতং অৱিঞ্ঞাতং মেতি.

অদিট্ঠং নাম ন চক্খুনা দিট্ঠং. অস্সুতং নাম ন সোতেন সুতং. অমুতং নাম ন ঘানেন ঘাযিতং, ন জিৱ্হায সাযিতং, ন কাযেন ফুট্ঠং. অৱিঞ্ঞাতং নাম ন মনসা ৱিঞ্ঞাতং. দিট্ঠং নাম চক্খুনা দিট্ঠং. সুতং নাম সোতেন সুতং. মুতং নাম ঘানেন ঘাযিতং, জিৱ্হায সাযিতং, কাযেন ফুট্ঠং. ৱিঞ্ঞাতং নাম মনসা ৱিঞ্ঞাতং.

৪. তীহাকাৰেহি ‘‘অদিট্ঠং দিট্ঠং মে’’তি সম্পজানমুসা ভণন্তস্স আপত্তি পাচিত্তিযস্স – পুব্বেৱস্স হোতি ‘‘মুসা ভণিস্স’’ন্তি, ভণন্তস্স হোতি ‘‘মুসা ভণামী’’তি, ভণিতস্স হোতি ‘‘মুসা মযা ভণিত’’ন্তি.

চতূহাকাৰেহি ‘‘অদিট্ঠং দিট্ঠং মে’’তি সম্পজানমুসা ভণন্তস্স আপত্তি পাচিত্তিযস্স – পুব্বেৱস্স হোতি ‘‘মুসা ভণিস্স’’ন্তি, ভণন্তস্স হোতি ‘‘মুসা ভণামী’’তি, ভণিতস্স হোতি ‘‘মুসা মযা ভণিত’’ন্তি, ৱিনিধায দিট্ঠিং.

পঞ্চহাকাৰেহি ‘‘অদিট্ঠং দিট্ঠং মে’’তি সম্পজানমুসা ভণন্তস্স আপত্তি পাচিত্তিযস্স – পুব্বেৱস্স হোতি ‘‘মুসা ভণিস্স’’ন্তি, ভণন্তস্স হোতি ‘‘মুসা ভণামী’’তি, ভণিতস্স হোতি ‘‘মুসা মযা ভণিত’’ন্তি, ৱিনিধায দিট্ঠিং, ৱিনিধায খন্তিং.

ছহাকাৰেহি ‘‘অদিট্ঠং দিট্ঠং মে’’তি সম্পজানমুসা ভণন্তস্স আপত্তি পাচিত্তিযস্স – পুব্বেৱস্স হোতি ‘‘মুসা ভণিস্স’’ন্তি, ভণন্তস্স হোতি ‘‘মুসা ভণামী’’তি, ভণিতস্স হোতি ‘‘মুসা মযা ভণিত’’ন্তি, ৱিনিধায দিট্ঠিং, ৱিনিধায খন্তিং, ৱিনিধায ৰুচিং.

সত্তহাকাৰেহি ‘‘অদিট্ঠং দিট্ঠং মে’’তি সম্পজানমুসা ভণন্তস্স আপত্তি পাচিত্তিযস্স’’ – পুব্বেৱস্স হোতি ‘‘মুসা ভণিস্স’’ন্তি, ভণন্তস্স হোতি ‘‘মুসা ভণামী’’তি, ভণিতস্স হোতি ‘‘মুসা মযা ভণিত’’ন্তি, ৱিনিধায দিট্ঠিং, ৱিনিধায খন্তিং, ৱিনিধায ৰুচিং, ৱিনিধায ভাৱং.

৫. তীহাকাৰেহি ‘‘অস্সুতং সুতং মে’’তি…পে… অমুতং মুতং মেতি…পে… অৱিঞ্ঞাতং ৱিঞ্ঞাতং মেতি সম্পজানমুসা ভণন্তস্স আপত্তি পাচিত্তিযস্স – পুব্বেৱস্স হোতি ‘‘মুসা ভণিস্স’’ন্তি, ভণন্তস্স হোতি ‘‘মুসা ভণামী’’তি, ভণিতস্স হোতি ‘‘মুসা মযা ভণিত’’ন্তি.

চতূহাকাৰেহি…পে… পঞ্চহাকাৰেহি…পে… ছহাকাৰেহি…পে… সত্তহাকাৰেহি ‘‘অৱিঞ্ঞাতং ৱিঞ্ঞাতং মে’’তি সম্পজানমুসা ভণন্তস্স আপত্তি পাচিত্তিযস্স – পুব্বেৱস্স হোতি ‘‘মুসা ভণিস্স’’ন্তি, ভণন্তস্স হোতি ‘‘মুসা ভণামী’’তি, ভণিতস্স হোতি ‘‘মুসা মযা ভণিতন্তি, ৱিনিধায দিট্ঠিং, ৱিনিধায খন্তিং, ৱিনিধায ৰুচিং, ৱিনিধায ভাৱং.

৬. তীহাকাৰেহি ‘‘অদিট্ঠং দিট্ঠঞ্চ মে সুতঞ্চা’’তি সম্পজানমুসা ভণন্তস্স আপত্তি পাচিত্তিযস্স…পে… তীহাকাৰেহি ‘‘অদিট্ঠং দিট্ঠঞ্চ মে মুতঞ্চা’’তি সম্পজানমুসা ভণন্তস্স আপত্তি পাচিত্তিযস্স…পে… তীহাকাৰেহি ‘‘অদিট্ঠং দিট্ঠঞ্চ মে ৱিঞ্ঞাতঞ্চা’’তি সম্পজানমুসা ভণন্তস্স আপত্তি পাচিত্তিযস্স …পে… তীহাকাৰেহি অদিট্ঠং ‘‘দিট্ঠঞ্চ মে সুতঞ্চ মুতঞ্চা’’তি…পে… তীহাকাৰেহি অদিট্ঠং ‘‘দিট্ঠঞ্চ মে সুতঞ্চ ৱিঞ্ঞাতঞ্চা’’তি…পে… তীহাকাৰেহি অদিট্ঠং ‘‘দিট্ঠঞ্চ মে সুতঞ্চ মুতঞ্চ ৱিঞ্ঞাতঞ্চা’’তি সম্পজানমুসা ভণন্তস্স আপত্তি পাচিত্তিযস্স…পে….

তীহাকাৰেহি অস্সুতং ‘‘সুতঞ্চ মে মুতঞ্চা’’তি…পে… তীহাকাৰেহি অস্সুতং ‘‘সুতঞ্চ মে ৱিঞ্ঞাতঞ্চা’’তি…পে… তীহাকাৰেহি অস্সুতং ‘‘সুতঞ্চ মে দিট্ঠঞ্চা’’তি সম্পজানমুসা ভণন্তস্স আপত্তি পাচিত্তিযস্স…পে… তীহাকাৰেহি অস্সুতং ‘‘সুতঞ্চ মে মুতঞ্চ ৱিঞ্ঞাতঞ্চা’’তি…পে… তীহাকাৰেহি অস্সুতং ‘‘সুতঞ্চ মে মুতঞ্চ দিট্ঠঞ্চা’’তি…পে… তীহাকাৰেহি অস্সুতং ‘‘সুতঞ্চ মে মুতঞ্চ ৱিঞ্ঞাতঞ্চ দিট্ঠঞ্চা’’তি সম্পজানমুসা ভণন্তস্স আপত্তি পাচিত্তিযস্স…পে….

তীহাকাৰেহি অমুতং ‘‘মুতঞ্চ মে ৱিঞ্ঞাতঞ্চা’’তি…পে… তীহাকাৰেহি অমুতং ‘‘মুতঞ্চ মে দিট্ঠঞ্চা’’তি…পে… তীহাকাৰেহি অমুতং ‘‘মুতঞ্চ মে সুতঞ্চা’’তি সম্পজানমুসা ভণন্তস্স আপত্তি পাচিত্তিযস্স…পে… তীহাকাৰেহি অমুতং ‘‘মুতঞ্চ মে ৱিঞ্ঞাতঞ্চ দিট্ঠঞ্চা’’তি…পে… তীহাকাৰেহি অমুতং ‘‘মুতঞ্চ মে ৱিঞ্ঞাতঞ্চ সুতঞ্চা’’তি…পে… তীহাকাৰেহি অমুতং ‘‘মুতঞ্চ মে ৱিঞ্ঞাতঞ্চ দিট্ঠঞ্চ সুতঞ্চা’’তি সম্পজানমুসা ভণন্তস্স আপত্তি পাচিত্তিযস্স…পে….

তীহাকাৰেহি অৱিঞ্ঞাতং ‘‘ৱিঞ্ঞাতঞ্চ মে দিট্ঠঞ্চা’’তি…পে… তীহাকাৰেহি অৱিঞ্ঞাতং ‘‘ৱিঞ্ঞাতঞ্চ মে সুতঞ্চা’’তি…পে… তীহাকাৰেহি অৱিঞ্ঞাতং ‘‘ৱিঞ্ঞাতঞ্চ মে মুতঞ্চা’’তি সম্পজানমুসা ভণন্তস্স আপত্তি পাচিত্তিযস্স…পে… তীহাকাৰেহি অৱিঞ্ঞাতং ‘‘ৱিঞ্ঞাতঞ্চ মে দিট্ঠঞ্চ সুতঞ্চা’’তি…পে… তীহাকাৰেহি অৱিঞ্ঞাতং ‘‘ৱিঞ্ঞাতঞ্চ মে দিট্ঠঞ্চ মুতঞ্চা’’তি…পে… তীহাকাৰেহি অৱিঞ্ঞাতং ‘‘ৱিঞ্ঞাতঞ্চ মে দিট্ঠঞ্চ সুতঞ্চ মুতঞ্চা’’তি সম্পজানমুসা ভণন্তস্স আপত্তি পাচিত্তিযস্স…পে….

৭. তীহাকাৰেহি দিট্ঠং ‘‘অদিট্ঠং মে’’তি…পে… সুতং ‘‘অস্সুতং মে’’তি…পে… মুতং ‘‘অমুতং মে’’তি…পে… ৱিঞ্ঞাতং ‘‘অৱিঞ্ঞাতং মে’’তি সম্পজানমুসা ভণন্তস্স আপত্তি পাচিত্তিযস্স…পে….

৮. তীহাকাৰেহি দিট্ঠং ‘‘সুতং মে’’তি…পে… তীহাকাৰেহি দিট্ঠং ‘‘মুতং মে’’তি…পে… তীহাকাৰেহি দিট্ঠং ‘‘ৱিঞ্ঞাতং মে’’তি সম্পজানমুসা ভণন্তস্স আপত্তি পাচিত্তিযস্স…পে… তীহাকাৰেহি দিট্ঠং ‘‘সুতঞ্চ মে মুতঞ্চা’’তি…পে… তীহাকাৰেহি দিট্ঠং ‘‘সুতঞ্চ মে ৱিঞ্ঞাতঞ্চা’’তি…পে… তীহাকাৰেহি দিট্ঠং ‘‘সুতঞ্চ মে মুতঞ্চ ৱিঞ্ঞাতঞ্চা’’তি সম্পজানমুসা ভণন্তস্স আপত্তি পাচিত্তিযস্স…পে….

তীহাকাৰেহি সুতং ‘‘মুতং মে’’তি…পে… তীহাকাৰেহি সুতং ‘‘ৱিঞ্ঞাতং মে’’তি…পে… তীহাকাৰেহি সুতং ‘‘দিট্ঠং মে’’তি সম্পজানমুসা ভণন্তস্স আপত্তি পাচিত্তিযস্স…পে… তীহাকাৰেহি সুতং ‘‘মুতঞ্চ মে ৱিঞ্ঞাতঞ্চা’’তি…পে… তীহাকাৰেহি সুতং ‘‘মুতঞ্চ মে দিট্ঠঞ্চা’’তি…পে… তীহাকাৰেহি সুতং ‘‘মুতঞ্চ মে ৱিঞ্ঞাতঞ্চ দিট্ঠঞ্চা’’তি সম্পজানমুসা ভণন্তস্স আপত্তি পাচিত্তিযস্স…পে….

তীহাকাৰেহি মুতং ‘‘ৱিঞ্ঞাতং মে’’তি…পে… তীহাকাৰেহি মুতং ‘‘দিট্ঠং মে’’তি…পে… তীহাকাৰেহি মুতং ‘‘সুতং মে’’তি সম্পজানমুসা ভণন্তস্স আপত্তি পাচিত্তিযস্স…পে… তীহাকাৰেহি মুতং ‘‘ৱিঞ্ঞাতঞ্চ মে দিট্ঠঞ্চা’’তি…পে… তীহাকাৰেহি মুতং ‘‘ৱিঞ্ঞাতঞ্চ মে সুতঞ্চা’’তি…পে… তীহাকাৰেহি মুতং ‘‘ৱিঞ্ঞাতঞ্চ মে দিট্ঠঞ্চ সুতঞ্চা’’তি সম্পজানমুসা ভণন্তস্স আপত্তি পাচিত্তিযস্স…পে….

তীহাকাৰেহি ৱিঞ্ঞাতং ‘‘দিট্ঠং মে’’তি…পে… তীহাকাৰেহি ৱিঞ্ঞাতং ‘‘সুতং মে’’তি …পে… তীহাকাৰেহি ৱিঞ্ঞাতং ‘‘মুতং মে’’তি সম্পজানমুসা ভণন্তস্স আপত্তি পাচিত্তিযস্স…পে… তীহাকাৰেহি ৱিঞ্ঞাতং ‘‘দিট্ঠঞ্চ মে সুতঞ্চা’’তি…পে… তীহাকাৰেহি ৱিঞ্ঞাতং ‘‘দিট্ঠঞ্চ মে মুতঞ্চা’’তি…পে… তীহাকাৰেহি ৱিঞ্ঞাতং ‘‘দিট্ঠঞ্চ মে সুতঞ্চ মুতঞ্চা’’তি সম্পজানমুসা ভণন্তস্স আপত্তি পাচিত্তিযস্স…পে….

৯. তীহাকাৰেহি দিট্ঠে ৱেমতিকো দিট্ঠং নোকপ্পেতি, দিট্ঠং নস্সৰতি, দিট্ঠং পমুট্ঠো হোতি…পে… সুতে ৱেমতিকো সুতং নোকপ্পেতি, সুতং নস্সৰতি, সুতং পমুট্ঠো হোতি…পে… মুতে ৱেমতিকো মুতং নোকপ্পেতি, মুতং নস্সৰতি, মুতং পমুট্ঠো হোতি…পে… ৱিঞ্ঞাতে ৱেমতিকো ৱিঞ্ঞাতং নোকপ্পেতি, ৱিঞ্ঞাতং নস্সৰতি, ৱিঞ্ঞাতং পমুট্ঠো হোতি… ৱিঞ্ঞাতঞ্চ মে দিট্ঠঞ্চাতি…পে… ৱিঞ্ঞাতং পমুট্ঠো হোতি ৱিঞ্ঞাতঞ্চ মে সুতঞ্চাতি…পে… ৱিঞ্ঞাতং পমুট্ঠো হোতি; ৱিঞ্ঞাতঞ্চ মে মুতঞ্চাতি…পে… ৱিঞ্ঞাতং পমুট্ঠো হোতি; ৱিঞ্ঞাতঞ্চ মে দিট্ঠঞ্চ সুতঞ্চাতি…পে… ৱিঞ্ঞাতং পমুট্ঠো হোতি; ৱিঞ্ঞাতঞ্চ মে দিট্ঠঞ্চ মুতঞ্চাতি…পে… ৱিঞ্ঞাতং পমুট্ঠো হোতি; ৱিঞ্ঞাতঞ্চ মে দিট্ঠঞ্চ সুতঞ্চ মুতঞ্চাতি সম্পজানমুসা ভণন্তস্স আপত্তি পাচিত্তিযস্স.

১০. চতূহাকাৰেহি…পে… পঞ্চহাকাৰেহি…পে… ছহাকাৰেহি…পে… সত্তহাকাৰেহি…পে… ৱিঞ্ঞাতং পমুট্ঠো হোতি, ৱিঞ্ঞাতঞ্চ মে দিট্ঠঞ্চ সুতঞ্চ মুতঞ্চাতি সম্পজানমুসা ভণন্তস্স আপত্তি পাচিত্তিযস্স – পুব্বেৱস্স হোতি ‘‘মুসা ভণিস্স’’ন্তি, ভণন্তস্স হোতি ‘‘মুসা ভণামী’’তি, ভণিতস্স হোতি ‘‘মুসা মযা ভণিত’’ন্তি, ৱিনিধায দিট্ঠিং, ৱিনিধায খন্তিং, ৱিনিধায ৰুচিং, ৱিনিধায ভাৱং.

১১. অনাপত্তি দৱা ভণতি, ৰৱা ভণতি [দৱায ভণতি, ৰৱায ভণতি (স্যা.)]. ‘‘দৱা ভণতি নাম সহসা ভণতি. ৰৱা ভণতি নাম ‘অঞ্ঞং ভণিস্সামী’তি অঞ্ঞং ভণতি’’. উম্মত্তকস্স, আদিকম্মিকস্সাতি.

মুসাৱাদসিক্খাপদং নিট্ঠিতং পঠমং.

২. ওমসৱাদসিক্খাপদং

১২. তেন সমযেন বুদ্ধো ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তেন খো পন সমযেন ছব্বগ্গিযা ভিক্খূ পেসলেহি ভিক্খূহি সদ্ধিং ভণ্ডন্তা [ভণ্ডেন্তা (ইতিপি)] পেসলে ভিক্খূ ওমসন্তি – জাতিযাপি, নামেনপি, গোত্তেনপি, কম্মেনপি, সিপ্পেনপি, আবাধেনপি, লিঙ্গেনপি, কিলেসেনপি, আপত্তিযাপি; হীনেনপি অক্কোসেন খুংসেন্তি ৱম্ভেন্তি. যে তে ভিক্খূ অপ্পিচ্ছা…পে… তে উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম ছব্বগ্গিযা ভিক্খূ পেসলেহি ভিক্খূহি সদ্ধিং ভণ্ডন্তা পেসলে ভিক্খূ ওমসিস্সন্তি – জাতিযাপি, নামেনপি, গোত্তেনপি, কম্মেনপি, সিপ্পেনপি, আবাধেনপি, লিঙ্গেনপি, কিলেসেনপি, আপত্তিযাপি; হীনেনপি অক্কোসেন খুংসেস্সন্তি ৱম্ভেস্সন্তী’’তি!

অথ খো তে ভিক্খূ ছব্বগ্গিযে ভিক্খূ অনেকপৰিযাযেন ৱিগৰহিত্ৱা ভগৱতো এতমত্থং আৰোচেসুং…পে… সচ্চং কিৰ তুম্হে, ভিক্খৱে, পেসলেহি ভিক্খূহি সদ্ধিং ভণ্ডন্তা পেসলে ভিক্খূ ওমসথ – জাতিযাপি…পে… হীনেনপি অক্কোসেন খুংসেথ ৱম্ভেথাতি? ‘‘সচ্চং, ভগৱা’’তি. ৱিগৰহি বুদ্ধো ভগৱা…পে… কথঞ্হি নাম তুম্হে, মোঘপুৰিসা, পেসলেহি ভিক্খূহি সদ্ধিং ভণ্ডন্তা পেসলে ভিক্খূ ওমসিস্সথ – জাতিযাপি…পে… হীনেনপি অক্কোসেন খুংসেস্সথ ৱম্ভেস্সথ! নেতং, মোঘপুৰিসা, অপ্পসন্নানং ৱা পসাদায…পে… ৱিগৰহিত্ৱা…পে… ধম্মিং কথং কত্ৱা ভিক্খূ আমন্তেসি –

১৩. ‘‘ভূতপুব্বং, ভিক্খৱে, তক্কসিলাযং [তক্কসীলাযং (ক.)] অঞ্ঞতৰস্স ব্ৰাহ্মণস্স নন্দিৱিসালো নাম বলীবদ্দো [বলিৱদ্দো (সী.), বলিবদ্দো (স্যা.)] অহোসি. অথ খো, ভিক্খৱে, নন্দিৱিসালো বলীবদ্দো তং ব্ৰাহ্মণং এতদৱোচ – ‘‘গচ্ছ ত্ৱং, ব্ৰাহ্মণ, সেট্ঠিনা সদ্ধিং সহস্সেন অব্ভুতং কৰোহি – ময্হং বলীবদ্দো সকটসতং অতিবদ্ধং পৱট্টেস্সতী’’তি. অথ খো, ভিক্খৱে, সো ব্ৰাহ্মণো সেট্ঠিনা সদ্ধিং সহস্সেন অব্ভুতং অকাসি – ময্হং বলীবদ্দো সকটসতং অতিবদ্ধং পৱট্টেস্সতীতি. অথ খো, ভিক্খৱে, সো ব্ৰাহ্মণো সকটসতং অতিবন্ধিত্ৱা নন্দিৱিসালং বলীবদ্দং যুঞ্জিত্ৱা এতদৱোচ – ‘‘গচ্ছ, কূট [অঞ্ছ কূট (সী. স্যা.)], ৱহস্সু, কূটা’তি. অথ খো, ভিক্খৱে, নন্দিৱিসালো বলীবদ্দো তত্থেৱ অট্ঠাসি. অথ খো, ভিক্খৱে, সো ব্ৰাহ্মণো সহস্সেন পৰাজিতো পজ্ঝাযি. অথ খো, ভিক্খৱে, নন্দিৱিসালো বলীবদ্দো তং ব্ৰাহ্মণং এতদৱোচ – ‘‘কিস্স ত্ৱং, ব্ৰাহ্মণ, পজ্ঝাযসী’’তি? ‘তথা হি পনাহং, ভো, তযা সহস্সেন পৰাজিতো’’তি. ‘কিস্স পন মং ত্ৱং, ব্ৰাহ্মণ, অকূটং কূটৱাদেন পাপেসি? গচ্ছ ত্ৱং, ব্ৰাহ্মণ, সেট্ঠিনা সদ্ধিং দ্ৱীহি সহস্সেহি অব্ভুতং কৰোহি – ‘‘ময্হং বলীবদ্দো সকটসতং অতিবদ্ধং পৱট্টেস্সতী’’তি. ‘‘মা চ মং অকূটং কূটৱাদেন পাপেসী’’তি. অথ খো, ভিক্খৱে, সো ব্ৰাহ্মণো সেট্ঠিনা সদ্ধিং দ্ৱীহি সহস্সেহি অব্ভুতং অকাসি – ‘‘ময্হং বলীবদ্দো সকটসতং অতিবদ্ধং পৱট্টেস্সতী’’তি. অথ খো, ভিক্খৱে, সো ব্ৰাহ্মণো সকটসতং অতিবন্ধিত্ৱা নন্দিৱিসালং বলীবদ্দং যুঞ্জিত্ৱা এতদৱোচ – ‘‘অচ্ছ, ভদ্ৰ, ৱহস্সু, ভদ্ৰা’’তি. অথ খো, ভিক্খৱে, নন্দিৱিসালো বলীবদ্দো সকটসতং অতিবদ্ধং পৱট্টেসি.

[জা. ১.১.২৮ নন্দিৱিসালজাতকেপি, তত্থ পন মনুঞ্ঞসদ্দো দিস্সতি] ‘‘মনাপমেৱ ভাসেয্য, না, মনাপং কুদাচনং;

মনাপং ভাসমানস্স, গৰুং ভাৰং উদব্বহি;

ধনঞ্চ নং অলাভেসি, তেন চ, ত্তমনো অহূতি.

‘‘তদাপি মে, ভিক্খৱে, অমনাপা খুংসনা ৱম্ভনা. কিমঙ্গং পন এতৰহি মনাপা ভৱিস্সতি খুংসনা ৱম্ভনা? নেতং, ভিক্খৱে, অপ্পসন্নানং ৱা পসাদায…পে…. ‘‘এৱঞ্চ পন, ভিক্খৱে, ইমং সিক্খাপদং উদ্দিসেয্যাথ –

১৪. ‘‘ওমসৱাদে পাচিত্তিয’’ন্তি.

১৫. ওমসৱাদো নাম দসহি আকাৰেহি ওমসতি – জাতিযাপি, নামেনপি, গোত্তেনপি, কম্মেনপি, সিপ্পেনপি, আবাধেনপি, লিঙ্গেনপি, কিলেসেনপি, আপত্তিযাপি, অক্কোসেনপি.

জাতি নাম দ্ৱে জাতিযো – হীনা চ জাতি উক্কট্ঠা চ জাতি. হীনা নাম জাতি – চণ্ডালজাতি, ৱেনজাতি, নেসাদজাতি, ৰথকাৰজাতি, পুক্কুসজাতি. এসা হীনা নাম জাতি. উক্কট্ঠা নাম জাতি – খত্তিযজাতি, ব্ৰাহ্মণজাতি. এসা উক্কট্ঠা নাম জাতি.

নামং নাম দ্ৱে নামানি – হীনঞ্চ নামং উক্কট্ঠঞ্চ নামং. হীনং নাম নামং – অৱকণ্ণকং, জৱকণ্ণকং, ধনিট্ঠকং, সৱিট্ঠকং, কুলৱড্ঢকং, তেসু তেসু ৱা পন জনপদেসু ওঞ্ঞাতং অৱঞ্ঞাতং হীড়িতং পৰিভূতং অচিত্তীকতং, এতং হীনং নাম নামং. উক্কট্ঠং নাম নামং – বুদ্ধপ্পটিসংযুত্তং, ধম্মপ্পটিসংযুত্তং, সঙ্ঘপ্পটিসংযুত্তং, তেসু তেসু ৱা পন জনপদেসু অনোঞ্ঞাতং অনৱঞ্ঞাতং অহীড়িতং অপৰিভূতং চিত্তীকতং, এতং উক্কট্ঠং নাম নামং.

গোত্তং নাম দ্ৱে গোত্তানি – হীনঞ্চ গোত্তং উক্কট্ঠঞ্চ গোত্তং. হীনং নাম গোত্তং – কোসিযগোত্তং, ভাৰদ্ৱাজগোত্তং, তেসু তেসু ৱা পন জনপদেসু ওঞ্ঞাতং অৱঞ্ঞাতং হীড়িতং পৰিভূতং অচিত্তীকতং, এতং হীনং নাম গোত্তং. উক্কট্ঠং নাম গোত্তং – গোতমগোত্তং, মোগ্গল্লানগোত্তং, কচ্চানগোত্তং, ৱাসিট্ঠগোত্তং, তেসু তেসু ৱা পন জনপদেসু অনোঞ্ঞাতং অনৱঞ্ঞাতং অহীড়িতং অপৰিভূতং চিত্তীকতং, এতং উক্কট্ঠং নাম গোত্তং.

কম্মং নাম দ্ৱে কম্মানি – হীনঞ্চ কম্মং উক্কট্ঠঞ্চ কম্মং. হীনং নাম কম্মং – কোট্ঠককম্মং, পুপ্ফছড্ডককম্মং, তেসু তেসু ৱা পন জনপদেসু ওঞ্ঞাতং অৱঞ্ঞাতং হীড়িতং পৰিভূতং অচিত্তীকতং, এতং হীনং নাম কম্মং. উক্কট্ঠং নাম কম্মং – কসি, ৱণিজ্জা, গোৰক্খা, তেসু তেসু ৱা পন জনপদেসু অনোঞ্ঞাতং অনৱঞ্ঞাতং অহীড়িতং অপৰিভূতং চিত্তীকতং. এতং উক্কট্ঠং নাম কম্মং.

সিপ্পং নাম দ্ৱে সিপ্পানি – হীনঞ্চ সিপ্পং উক্কট্ঠঞ্চ সিপ্পং. হীনং নাম সিপ্পং – নড়কাৰসিপ্পং, কুম্ভকাৰসিপ্পং, পেসকাৰসিপ্পং, চম্মকাৰসিপ্পং, নহাপিতসিপ্পং, তেসু তেসু ৱা পন জনপদেসু ওঞ্ঞাতং অৱঞ্ঞাতং হীড়িতং পৰিভূতং অচিত্তীকতং. এতং হীনং নাম সিপ্পং. উক্কট্ঠং নাম সিপ্পং – মুদ্দা, গণনা, লেখা, তেসু তেসু ৱা পন জনপদেসু অনোঞ্ঞাতং অনৱঞ্ঞাতং অহীড়িতং অপৰিভূতং চিত্তীকতং, এতং উক্কট্ঠং নাম সিপ্পং.

সব্বেপি আবাধা হীনা, অপিচ মধুমেহো আবাধো উক্কট্ঠো.

লিঙ্গং নাম দ্ৱে লিঙ্গানি – হীনঞ্চ লিঙ্গং উক্কট্ঠঞ্চ লিঙ্গং. হীনং নাম লিঙ্গং – অতিদীঘং, অতিৰস্সং, অতিকণ্হং, অচ্চোদাতং, এতং হীনং নাম লিঙ্গং. উক্কট্ঠং নাম লিঙ্গং – নাতিদীঘং, নাতিৰস্সং, নাতিকণ্হং, নাচ্চোদাতং. এতং উক্কট্ঠং নাম লিঙ্গং.

সব্বেপি কিলেসা হীনা.

সব্বাপি আপত্তিযো হীনা. অপিচ, সোতাপত্তিসমাপত্তি উক্কট্ঠা.

অক্কোসো নাম দ্ৱে অক্কোসা – হীনো চ অক্কোসো উক্কট্ঠো চ অক্কোসো. হীনো নাম অক্কোসো – ওট্ঠোসি, মেণ্ডোসি, গোণোসি, গদ্ৰভোসি, তিৰচ্ছানগতোসি, নেৰযিকোসি; নত্থি তুয্হং সুগতি, দুগ্গতি যেৱ তুয্হং পাটিকঙ্খাতি, যকাৰেন ৱা ভকাৰেন ৱা, কাটকোটচিকায ৱা, এসো হীনো নাম অক্কোসো. উক্কট্ঠো নাম অক্কোসো – পণ্ডিতোসি, ব্যত্তোসি, মেধাৱীসি, বহুস্সুতোসি, ধম্মকথিকোসি, নত্থি তুয্হং দুগ্গতি, সুগতিযেৱ তুয্হং পাটিকঙ্খাতি, এসো উক্কট্ঠো নাম অক্কোসো.

১৬. উপসম্পন্নো উপসম্পন্নং খুংসেতুকামো ৱম্ভেতুকামো মঙ্কুকত্তুকামো হীনেন হীনং ৱদেতি, চণ্ডালং ৱেনং নেসাদং ৰথকাৰং পুক্কুসং – ‘‘চণ্ডালোসি, ৱেনোসি, নেসাদোসি, ৰথকাৰোসি, পুক্কুসোসী’’তি ভণতি [ৱদেতীতি উদ্দেসো. ভণতীতি ৱিত্থাৰো (ৱজিৰবুদ্ধি)], আপত্তি ৱাচায, ৱাচায পাচিত্তিযস্স.

উপসম্পন্নো উপসম্পন্নং খুংসেতুকামো ৱম্ভেতুকামো মঙ্কুকত্তুকামো হীনেন উক্কট্ঠং ৱদেতি, খত্তিযং ব্ৰাহ্মণং – ‘‘চণ্ডালোসি, ৱেনোসি, নেসাদোসি, ৰথকাৰোসি, পুক্কুসোসী’’তি ভণতি, আপত্তি ৱাচায, ৱাচায পাচিত্তিযস্স.

উপসম্পন্নো উপসম্পন্নং খুংসেতুকামো ৱম্ভেতুকামো মঙ্কুকত্তুকামো উক্কট্ঠেন হীনং ৱদেতি, চণ্ডালং ৱেনং নেসাদং ৰথকাৰং পুক্কুসং – ‘‘খত্তিযোসি, ব্ৰাহ্মণোসী’’তি ভণতি, আপত্তি ৱাচায, ৱাচায পাচিত্তিযস্স.

উপসম্পন্নো উপসম্পন্নং খুংসেতুকামো ৱম্ভেতুকামো মঙ্কুকত্তুকামো উক্কট্ঠেন উক্কট্ঠং ৱদেতি, খত্তিযং ব্ৰাহ্মণং – ‘‘খত্তিযোসি, ব্ৰাহ্মণোসী’’তি ভণতি, আপত্তি ৱাচায, ৱাচায পাচিত্তিযস্স.

১৭. উপসম্পন্নো উপসম্পন্নং খুংসেতুকামো ৱম্ভেতুকামো মঙ্কুকত্তুকামো হীনেন হীনং ৱদেতি, অৱকণ্ণকং জৱকণ্ণকং ধনিট্ঠকং সৱিট্ঠকং কুলৱড্ঢকং – ‘‘অৱকণ্ণকোসি, জৱকণ্ণকোসি, ধনিট্ঠকোসি, সৱিট্ঠকোসি, কুলৱড্ঢকোসী’’তি ভণতি, আপত্তি ৱাচায, ৱাচায পাচিত্তিযস্স.

উপসম্পন্নো উপসম্পন্নং খুংসেতুকামো ৱম্ভেতুকামো মঙ্কুকত্তুকামো হীনেন উক্কট্ঠং ৱদেতি, বুদ্ধৰক্খিতং ধম্মৰক্খিতং সঙ্ঘৰক্খিতং – ‘‘অৱকণ্ণকোসি, জৱকণ্ণকোসি, ধনিট্ঠকোসি, সৱিট্ঠকোসি, কুলৱড্ঢকোসী’’তি ভণতি, আপত্তি ৱাচায, ৱাচায পাচিত্তিযস্স.

উপসম্পন্নো উপসম্পন্নং খুংসেতুকামো ৱম্ভেতুকামো মঙ্কুকত্তুকামো উক্কট্ঠেন হীনং ৱদেতি, অৱকণ্ণকং জৱকণ্ণকং ধনিট্ঠকং সৱিট্ঠকং কুলৱড্ঢকং – ‘‘বুদ্ধৰক্খিতোসি, ধম্মৰক্খিতোসি, সঙ্ঘৰক্খিতোসী’’তি ভণতি, আপত্তি ৱাচায, ৱাচায পাচিত্তিযস্স.

উপসম্পন্নো উপসম্পন্নং খুংসেতুকামো ৱম্ভেতুকামো মঙ্কুকত্তুকামো উক্কট্ঠেন উকট্ঠং ৱদেতি, বুদ্ধৰক্খিতং ধম্মৰক্খিতং সঙ্ঘৰক্খিতং – ‘‘বুদ্ধৰক্খিতোসি, ধম্মৰক্খিতোসি, সঙ্ঘৰক্খিতোসী’’তি ভণতি, আপত্তি ৱাচায, ৱাচায পাচিত্তিযস্স.

১৮. উপসম্পন্নো উপসম্পন্নং খুংসেতুকামো ৱম্ভেতুকামো মঙ্কুকত্তুকামো হীনেন হীনং ৱদেতি, কোসিযং ভাৰদ্ৱাজং – ‘‘কোসিযোসি, ভাৰদ্ৱাজোসী’’তি ভণতি, আপত্তি ৱাচায, ৱাচায পাচিত্তিযস্স.

উপসম্পন্নো উপসম্পন্নং খুংসেতুকামো ৱম্ভেতুকামো মঙ্কুকত্তুকামো হীনেন উক্কট্ঠং ৱদেতি, গোতমং মোগ্গল্লানং কচ্চানং ৱাসিট্ঠং – ‘‘কোসিযোসি, ভাৰদ্ৱাজোসী’’তি ভণতি, আপত্তি ৱাচায, ৱাচায পাচিত্তিযস্স.

উপসম্পন্নো উপসম্পন্নং খুংসেতুকামো ৱম্ভেতুকামো মঙ্কুকত্তুকামো উক্কট্ঠেন হীনং ৱদেতি, কোসিযং ভাৰদ্ৱাজং – ‘‘গোতমোসি, মোগ্গল্লানোসি, কচ্চানোসি, ৱাসিট্ঠোসী’’তি ভণতি, আপত্তি ৱাচায, ৱাচায পাচিত্তিযস্স.

উপসম্পন্নো উপসম্পন্নং খুংসেতুকামো ৱম্ভেতুকামো মঙ্কুকত্তুকামো উক্কট্ঠেন উক্কট্ঠং ৱদেতি, গোতমং মোগ্গল্লানং কচ্চানং ৱাসিট্ঠং – ‘‘গোতমোসি, মোগ্গল্লানোসি, কচ্চানোসি, ৱাসিট্ঠোসী’’তি ভণতি, আপত্তি ৱাচায, ৱাচায পাচিত্তিযস্স.

১৯. উপসম্পন্নো উপসম্পন্নং খুংসেতুকামো ৱম্ভেতুকামো মঙ্কুকত্তুকামো হীনেন হীনং ৱদেতি, কোট্ঠকং পুপ্ফছড্ডকং – ‘‘কোট্ঠকোসি, পুপ্ফছড্ডকোসী’’তি ভণতি, আপত্তি ৱাচায, ৱাচায পাচিত্তিযস্স.

উপসম্পন্নো উপসম্পন্নং খুংসেতুকামো ৱম্ভেতুকামো মঙ্কুকত্তুকামো হীনেন উক্কট্ঠং ৱদেতি, কস্সকং ৱাণিজং গোৰক্খং – ‘‘কোট্ঠকোসি, পুপ্ফছড্ডকোসী’’তি ভণতি, আপত্তি ৱাচায, ৱাচায পাচিত্তিযস্স.

উপসম্পন্নো উপসম্পন্নং খুংসেতুকামো ৱম্ভেতুকামো মঙ্কুকত্তুকামো উক্কট্ঠেন হীনং ৱদেতি, কোট্ঠকং পুপ্ফছড্ডকং – ‘‘কস্সকোসি, ৱাণিজোসি, গোৰক্খোসী’’তি ভণতি, আপত্তি ৱাচায, ৱাচায পাচিত্তিযস্স.

উপসম্পন্নো উপসম্পন্নং খুংসেতুকামো ৱম্ভেতুকামো মঙ্কুকত্তুকামো উক্কট্ঠেন উক্কট্ঠং ৱদেতি, কস্সকং ৱাণিজং গোৰক্খং – ‘‘কস্সকোসি, ৱাণিজোসি, গোৰক্খোসী’’তি ভণতি, আপত্তি ৱাচায, ৱাচায পাচিত্তিযস্স.

২০. উপসম্পন্নো উপসম্পন্নং খুংসেতুকামো ৱম্ভেতুকামো মঙ্কুকত্তুকামো হীনেন হীনং ৱদেতি, নড়কাৰং কুম্ভকাৰং পেসকাৰং চম্মকাৰং নহাপিতং – ‘‘নড়কাৰোসি, কুম্ভকাৰোসি, পেসকাৰোসি, চম্মকাৰোসি, নহাপিতোসী’’তি ভণতি, আপত্তি ৱাচায, ৱাচায পাচিত্তিযস্স.

উপসম্পন্নো উপসম্পন্নং খুংসেতুকামো ৱম্ভেতুকামো মঙ্কুকত্তুকামো হীনেন উক্কট্ঠং ৱদেতি, মুদ্দিকং গণকং লেখকং – ‘‘নড়কাৰোসি, কুম্ভকাৰোসি, পেসকাৰোসি, চম্মকাৰোসি, নহাপিতোসী’’তি ভণতি, আপত্তি ৱাচায, ৱাচায পাচিত্তিযস্স.

উপসম্পন্নো উপসম্পন্নং খুংসেতুকামো ৱম্ভেতুকামো মঙ্কুকত্তুকামো উক্কট্ঠেন হীনং ৱদেতি, নড়কাৰং কুম্ভকাৰং পেসকাৰং চম্মকাৰং নহাপিতং – ‘‘মুদ্দিকোসি, গণকোসি, লেখকোসী’’তি ভণতি, আপত্তি ৱাচায, ৱাচায পাচিত্তিযস্স.

উপসম্পন্নো উপসম্পন্নং খুংসেতুকামো ৱম্ভেতুকামো মঙ্কুকত্তুকামো উক্কট্ঠেন উক্কট্ঠং ৱদেতি, মুদ্দিকং গণকং লেখকং – ‘‘মুদ্দিকোসি, গণকোসি, লেখকোসী’’তি ভণতি, আপত্তি ৱাচায, ৱাচায পাচিত্তিযস্স.

২১. উপসম্পন্নো উপসম্পন্নং খুংসেতুকামো ৱম্ভেতুকামো মঙ্কুকত্তুকামো হীনেন হীনং ৱদেতি, কুট্ঠিকং গণ্ডিকং কিলাসিকং সোসিকং অপমাৰিকং – ‘‘কুট্ঠিকোসি, গণ্ডিকোসি, কিলাসিকোসি, সোসিকোসি, অপমাৰিকোসী’’তি ভণতি, আপত্তি ৱাচায, ৱাচায পাচিত্তিযস্স.

উপসম্পন্নো উপসম্পন্নং খুংসেতুকামো ৱম্ভেতুকামো মঙ্কুকত্তুকামো হীনেন উক্কট্ঠং ৱদেতি, মধুমেহিকং – ‘‘কুট্ঠিকোসি, গণ্ডিকোসি, কিলাসিকোসি, সোসিকোসি, অপমাৰিকোসী’’তি ভণতি, আপত্তি ৱাচায, ৱাচায পাচিত্তিযস্স.

উপসম্পন্নো উপসম্পন্নং খুংসেতুকামো ৱম্ভেতুকামো মঙ্কুকত্তুকামো উক্কট্ঠেন হীনং ৱদেতি, কুট্ঠিকং গণ্ডিকং কিলাসিকং সোসিকং অপমাৰিকং – ‘‘মধুমেহিকোসী’’তি ভণতি, আপত্তি ৱাচায, ৱাচায পাচিত্তিযস্স.

উপসম্পন্নো উপসম্পন্নং খুংসেতুকামো ৱম্ভেতুকামো মঙ্কুকত্তুকামো উক্কট্ঠেন উক্কট্ঠং ৱদেতি, মধুমেহিকং – ‘‘মধুমেহিকোসী’’তি ভণতি, আপত্তি ৱাচায, ৱাচায পাচিত্তিযস্স.

২২. উপসম্পন্নো উপসম্পন্নং খুংসেতুকামো ৱম্ভেতুকামো মঙ্কুকত্তুকামো হীনেন হীনং ৱদেতি, অতিদীঘং অতিৰস্সং অতিকণ্হং অচ্চোদাতং – ‘‘অতিদীঘোসি, অতিৰস্সোসি, অতিকণ্হোসি, অচ্চোদাতোসী’’তি ভণতি, আপত্তি ৱাচায, ৱাচায পাচিত্তিযস্স.

উপসম্পন্নো উপসম্পন্নং খুংসেতুকামো ৱম্ভেতুকামো মঙ্কুকত্তুকামো হীনেন উক্কট্ঠং ৱদেতি, নাতিদীঘং নাতিৰস্সং নাতিকণ্হং নাচ্চোদাতং – ‘‘অতিদীঘোসি, অতিৰস্সোসি, অতিকণ্হোসি, অচ্চোদাতোসী’’তি ভণতি, আপত্তি ৱাচায, ৱাচায পাচিত্তিযস্স.

উপসম্পন্নো উপসম্পন্নং খুংসেতুকামো ৱম্ভেতুকামো মঙ্কুকত্তুকামো উক্কট্ঠেন হীনং ৱদেতি, অতিদীঘং অতিৰস্সং অতিকণ্হং অচ্চোদাতং – ‘‘নাতিদীঘোসি, নাতিৰস্সোসি, নাতিকণ্হোসি, নাচ্চোদাতোসী’’তি ভণতি, আপত্তি ৱাচায, ৱাচায পাচিত্তিযস্স.

উপসম্পন্নো উপসম্পন্নং খুংসেতুকামো ৱম্ভেতুকামো মঙ্কুকত্তুকামো উক্কট্ঠেন উক্কট্ঠং ৱদেতি, নাতিদীঘং নাতিৰস্সং নাতিকণ্হং নাচ্চোদাতং – ‘‘নাতিদীঘোসি, নাতিৰস্সোসি, নাতিকণ্হোসি, নাচ্চোদাতোসী’’তি ভণতি, আপত্তি ৱাচায, ৱাচায পাচিত্তিযস্স.

২৩. উপসম্পন্নো উপসম্পন্নং খুংসেতুকামো ৱম্ভেতুকামো মঙ্কুকত্তুকামো হীনেন হীনং ৱদেতি, ৰাগপৰিযুট্ঠিতং দোসপৰিযুট্ঠিতং মোহপৰিযুট্ঠিতং – ‘‘ৰাগপৰিযুট্ঠিতোসি, দোসপৰিযুট্ঠিতোসি, মোহপৰিযুট্ঠিতোসী’’তি ভণতি, আপত্তি ৱাচায, ৱাচায পাচিত্তিযস্স.

উপসম্পন্নো উপসম্পন্নং খুংসেতুকামো ৱম্ভেতুকামো মঙ্কুকত্তুকামো হীনেন উক্কট্ঠং ৱদেতি, ৱীতৰাগং ৱীতদোসং ৱীতমোহং – ‘‘ৰাগপৰিযুট্ঠিতোসি, দোসপৰিযুট্ঠিতোসি, মোহপৰিযুট্ঠিতোসী’’তি ভণতি, আপত্তি ৱাচায, ৱাচায পাচিত্তিযস্স.

উপসম্পন্নো উপসম্পন্নং খুংসেতুকামো ৱম্ভেতুকামো মঙ্কুকত্তুকামো উক্কট্ঠেন হীনং ৱদেতি, ৰাগপৰিযুট্ঠিতং দোসপৰিযুট্ঠিতং মোহপৰিযুট্ঠিতং – ‘‘ৱীতৰাগোসি, ৱীতদোসোসি, ৱীতমোহোসী’’তি ভণতি, আপত্তি ৱাচায, ৱাচায পাচিত্তিযস্স.

উপসম্পন্নো উপসম্পন্নং খুংসেতুকামো ৱম্ভেতুকামো মঙ্কুকত্তুকামো উক্কট্ঠেন উক্কট্ঠং ৱদেতি, ৱীতৰাগং ৱীতদোসং ৱীতমোহং – ‘‘ৱীতৰাগোসি, ৱীতদোসোসি, ৱীতমোহোসী’’তি ভণতি, আপত্তি ৱাচায, ৱাচায পাচিত্তিযস্স.

২৪. উপসম্পন্নো উপসম্পন্নং খুংসেতুকামো ৱম্ভেতুকামো মঙ্কুকত্তুকামো হীনেন হীনং ৱদেতি, পাৰাজিকং অজ্ঝাপন্নং সঙ্ঘাদিসেসং অজ্ঝাপন্নং থুল্লচ্চযং অজ্ঝাপন্নং পাচিত্তিযং অজ্ঝাপন্নং পাটিদেসনীযং অজ্ঝাপন্নং দুক্কটং অজ্ঝাপন্নং দুব্ভাসিতং অজ্ঝাপন্নং – ‘‘পাৰাজিকং অজ্ঝাপন্নোসি, সঙ্ঘাদিসেসং অজ্ঝাপন্নোসি, থুল্লচ্চযং অজ্ঝাপন্নোসি, পাচিত্তিযং অজ্ঝাপন্নোসি, পাটিদেসনীযং অজ্ঝাপন্নোসি, দুক্কটং অজ্ঝাপন্নোসি, দুব্ভাসিতং অজ্ঝাপন্নোসী’’তি ভণতি, আপত্তি ৱাচায, ৱাচায পাচিত্তিযস্স.

উপসম্পন্নো উপসম্পন্নং খুংসেতুকামো ৱম্ভেতুকামো মঙ্কুকত্তুকামো হীনেন উক্কট্ঠং ৱদেতি, সোতাপন্নং – ‘‘পাৰাজিকং অজ্ঝাপন্নোসি…পে… দুব্ভাসিতং অজ্ঝাপন্নোসী’’তি ভণতি, আপত্তি ৱাচায, ৱাচায পাচিত্তিযস্স.

উপসম্পন্নো উপসম্পন্নং খুংসেতুকামো ৱম্ভেতুকামো মঙ্কুকত্তুকামো উক্কট্ঠেন হীনং ৱদেতি, পাৰাজিকং অজ্ঝাপন্নং…পে… দুব্ভাসিতং অজ্ঝাপন্নং – ‘‘সোতাপন্নোসী’’তি ভণতি, আপত্তি ৱাচায, ৱাচায পাচিত্তিযস্স.

উপসম্পন্নো উপসম্পন্নং খুংসেতুকামো ৱম্ভেতুকামো মঙ্কুকত্তুকামো উক্কট্ঠেন উক্কট্ঠং ৱদেতি, সোতাপন্নং – ‘‘সোতাপন্নোসী’’তি ভণতি, আপত্তি ৱাচায, ৱাচায পাচিত্তিযস্স.

২৫. উপসম্পন্নো উপসম্পন্নং খুংসেতুকামো ৱম্ভেতুকামো মঙ্কুকত্তুকামো হীনেন হীনং ৱদেতি, ওট্ঠং মেণ্ডং গোণং গদ্ৰভং তিৰচ্ছানগতং নেৰযিকং – ‘‘ওট্ঠোসি, মেণ্ডোসি, গোণোসি, গদ্ৰভোসি, তিৰচ্ছানগতোসি, নেৰযিকোসি, নত্থি তুয্হং সুগতি, দুগ্গতি যেৱ তুয্হং পাটিকঙ্খা’’তি ভণতি, আপত্তি ৱাচায, ৱাচায পাচিত্তিযস্স.

উপসম্পন্নো উপসম্পন্নং খুংসেতুকামো ৱম্ভেতুকামো মঙ্কুকত্তুকামো হীনেন উক্কট্ঠং ৱদেতি, পণ্ডিতং ব্যত্তং মেধাৱি বহুস্সুতং ধম্মকথিকং – ‘‘ওট্ঠোসি, মেণ্ডোসি, গোণোসি, গদ্ৰভোসি, তিৰচ্ছানগতোসি, নেৰযিকোসি; নত্থি তুয্হং সুগতি, দুগ্গতি যেৱ তুয্হং পাটিকঙ্খা’’তি ভণতি, আপত্তি ৱাচায, ৱাচায পাচিত্তিযস্স.

উপসম্পন্নো উপসম্পন্নং খুংসেতুকামো ৱম্ভেতুকামো মঙ্কুকত্তুকামো উক্কট্ঠেন হীনং ৱদেতি, ওট্ঠং মেণ্ডং গোণং গদ্ৰভং তিৰচ্ছানগতং নেৰযিকং – ‘‘পণ্ডিতোসি, ব্যত্তোসি, মেধাৱীসি, বহুস্সুতোসি, ধম্মকথিকোসি, নত্থি তুয্হং দুগ্গতি, সুগতি যেৱ তুয্হং পাটিকঙ্খা’’তি ভণতি, আপত্তি ৱাচায, ৱাচায পাচিত্তিযস্স.

উপসম্পন্নো উপসম্পন্নং খুংসেতুকামো ৱম্ভেতুকামো মঙ্কুকত্তুকামো উক্কট্ঠেন উক্কট্ঠং ৱদেতি, পণ্ডিতং ব্যত্তং মেধাৱিং বহুস্সুতং ধম্মকথিকং – ‘‘পণ্ডিতোসি, ব্যত্তোসি, মেধাৱীসি, বহুস্সুতোসি, ধম্মকথিকোসি, নত্থি তুয্হং দুগ্গতি, সুগতি যেৱ তুয্হং পাটিকঙ্খা’’তি ভণতি, আপত্তি ৱাচায, ৱাচায পাচিত্তিযস্স.

২৬. উপসম্পন্নো উপসম্পন্নং খুংসেতুকামো ৱম্ভেতুকামো মঙ্কুকত্তুকামো এৱং ৱদেতি, ‘‘সন্তি ইধেকচ্চে চণ্ডালা ৱেনা নেসাদা ৰথকাৰা পুক্কুসা’’তি ভণতি, আপত্তি ৱাচায, ৱাচায দুক্কটস্স.

উপসম্পন্নো উপসম্পন্নং খুংসেতুকামো ৱম্ভেতুকামো মঙ্কুকত্তুকামো এৱং ৱদেতি, ‘‘সন্তি ইধেকচ্চে খত্তিযা, ব্ৰাহ্মণা’’তি ভণতি, আপত্তি ৱাচায, ৱাচায দুক্কটস্স.

২৭. উপসম্পন্নো উপসম্পন্নং খুংসেতুকামো ৱম্ভেতুকামো মঙ্কুকত্তুকামো এৱং ৱদেতি, ‘‘সন্তি ইধেকচ্চে অৱকণ্ণকা জৱকণ্ণকা ধনিট্ঠকা সৱিট্ঠকা কুলৱড্ঢকা’’তি ভণতি…পে…. ‘‘সন্তি ইধেকচ্চে বুদ্ধৰক্খিতা ধম্মৰক্খিতা সঙ্ঘৰক্খিতা’’তি ভণতি …পে…. ‘‘সন্তি ইধেকচ্চে কোসিযা ভাৰদ্ৱাজা’’তি ভণতি…পে…. ‘‘সন্তি ইধেকচ্চে গোতমা মোগ্গল্লানা কচ্চানা ৱাসিট্ঠা’’তি ভণতি…পে…. ‘‘সন্তি ইধেকচ্চে কোট্ঠকা পুপ্ফছড্ডকা’’তি ভণতি…পে…. ‘‘সন্তি ইধেকচ্চে কস্সকা ৱাণিজা গোৰক্খা’’তি ভণতি…পে…. ‘‘সন্তি ইধেকচ্চে নড়কাৰা কুম্ভকাৰা পেসকাৰা চম্মকাৰা নহাপিতা’’তি ভণতি…পে…. ‘‘সন্তি ইধেকচ্চে মুদ্দিকা গণকা লেখকা’’তি ভণতি…পে…. ‘‘সন্তি ইধেকচ্চে কুট্ঠিকা গণ্ডিকা কিলাসিকা সোসিকা অপমাৰিকা’’তি ভণতি…পে…. ‘‘সন্তি ইধেকচ্চে মধুমেহিকা’’তি ভণতি…পে…. ‘‘সন্তি ইধেকচ্চে অতিদীঘা অতিৰস্সা অতিকণ্হা অচ্চোদাতা’’তি ভণতি…পে…. ‘‘সন্তি ইধেকচ্চে নাতিদীঘা নাতিৰস্সা নাতিকণ্হা নাচ্চোদাতা’’তি ভণতি…পে…. ‘‘সন্তি ইধেকচ্চে ৰাগপৰিযুট্ঠিতা দোসপৰিযুট্ঠিতা মোহপৰিযুট্ঠিতা’’তি ভণতি…পে…. ‘‘সন্তি ইধেকচ্চে ৱীতৰাগা ৱীতদোসা ৱীতমোহা’’তি ভণতি…পে…. ‘‘সন্তি ইধেকচ্চে পাৰাজিকং অজ্ঝাপন্না…পে… দুব্ভাসিতং অজ্ঝাপন্না’’তি ভণতি…পে…. ‘‘সন্তি ইধেকচ্চে সোতাপন্না’’তি ভণতি…পে…. ‘‘সন্তি ইধেকচ্চে ওট্ঠা মেণ্ডা গোণা গদ্ৰভা তিৰচ্ছানগতা নেৰযিকা, নত্থি তেসং সুগতি, দুগ্গতিযেৱ তেসং পাটিকঙ্খা’’তি ভণতি, আপত্তি ৱাচায, ৱাচায দুক্কটস্স.

২৮. উপসম্পন্নো উপসম্পন্নং খুংসেতুকামো ৱম্ভেতুকামো মঙ্কুকত্তুকামো এৱং ৱদেতি, ‘‘সন্তি ইধেকচ্চে পণ্ডিতা ব্যত্তা, মেধাৱী বহুস্সুতা ধম্মকথিকা, নত্থি তেসং দুগ্গতি, সুগতিযেৱ তেসং পাটিকঙ্খা’’তি ভণতি, আপত্তি ৱাচায, ৱাচায দুক্কটস্স.

২৯. উপসম্পন্নো উপসম্পন্নং খুংসেতুকামো ৱম্ভেতুকামো মঙ্কুকত্তুকামো এৱং ৱদেতি, ‘‘যে নূন চণ্ডালা ৱেনা নেসাদা ৰথকাৰা পুক্কুসা’’তি ভণতি, আপত্তি ৱাচায, ৱাচায দুক্কটস্স…পে….

উপসম্পন্নো উপসম্পন্নং খুংসেতুকামো ৱম্ভেতুকামো মঙ্কুকত্তুকামো এৱং ৱদেতি, ‘‘যে নূন পণ্ডিতা ব্যত্তা মেধাৱী বহুস্সুতা ধম্মকথিকা’’তি ভণতি, আপত্তি ৱাচায, ৱাচায দুক্কটস্স.

৩০. উপসম্পন্নো উপসম্পন্নং খুংসেতুকামো ৱম্ভেতুকামো মঙ্কুকত্তুকামো এৱং ৱদেতি, ‘‘ন মযং চণ্ডালা ৱেনা নেসাদা ৰথকাৰা পুক্কুসা’’তি ভণতি…পে…. ‘‘ন মযং পণ্ডিতা ব্যত্তা মেধাৱী বহুস্সুতা ধম্মকথিকা, নত্থম্হাকং দুগ্গতি, সুগতিযেৱ অম্হাকং পাটিকঙ্খা’’তি ভণতি. আপত্তি ৱাচায, ৱাচায দুক্কটস্স.

৩১. উপসম্পন্নো অনুপসম্পন্নং খুংসেতুকামো ৱম্ভেতুকামো মঙ্কুকত্তুকামো হীনেন হীনং ৱদেতি,…পে… হীনেন উক্কট্ঠং ৱদেতি…পে… উক্কট্ঠেন হীনং ৱদেতি…পে… উক্কট্ঠেন উক্কট্ঠং ৱদেতি, পণ্ডিতং ব্যত্তং মেধাৱিং বহুস্সুতং ধম্মকথিকং – ‘‘পণ্ডিতোসি, ব্যত্তোসি, মেধাৱীসি, বহুস্সুতোসি, ধম্মকথিকোসি, নত্থি তুয্হং দুগ্গতি, সুগতিযেৱ তুয্হং পাটিকঙ্খা’’তি ভণতি, আপত্তি ৱাচায, ৱাচায দুক্কটস্স.

উপসম্পন্নো অনুপসম্পন্নং খুংসেতুকামো ৱম্ভেতুকামো মঙ্কুকত্তুকামো এৱং ৱদেতি, ‘‘সন্তি ইধেকচ্চে চণ্ডালা ৱেনা নেসাদা ৰথকাৰা পুক্কুসা’’তি ভণতি…পে…. ‘‘সন্তি ইধেকচ্চে পণ্ডিতা ব্যত্তা মেধাৱী বহুস্সুতা ধম্মকথিকা, নত্থি তেসং দুগ্গতি, সুগতিযেৱ তেসং পাটিকঙ্খা’’তি ভণতি, আপত্তি ৱাচায, ৱাচায দুক্কটস্স.

উপসম্পন্নো অনুপসম্পন্নং খুংসেতুকামো ৱম্ভেতুকামো মঙ্কুকত্তুকামো এৱং ৱদেতি, ‘‘যে নূন চণ্ডালা ৱেনা নেসাদা ৰথকাৰা পুক্কুসা’’তি ভণতি…পে…. ‘‘যে নূন পণ্ডিতা ব্যত্তা মেধাৱী বহুস্সুতা ধম্মকথিকা’’তি ভণতি, আপত্তি ৱাচায, ৱাচায দুক্কটস্স.

উপসম্পন্নো অনুপসম্পন্নং খুংসেতুকামো ৱম্ভেতুকামো মঙ্কুকত্তুকামো এৱং ৱদেতি, ‘‘ন মযং চণ্ডালা ৱেনা নেসাদা ৰথকাৰা পুক্কুসা’’তি ভণতি…পে…. ‘‘ন মযং পণ্ডিতা ব্যত্তা মেধাৱী বহুস্সুতা ধম্মকথিকা, নত্থম্হাকং দুগ্গতি, সুগতিযেৱ অম্হাকং পাটিকঙ্খা’’তি ভণতি. আপত্তি ৱাচায, ৱাচায দুক্কটস্স.

৩২. উপসম্পন্নো উপসম্পন্নং ন খুংসেতুকামো ন ৱম্ভেতুকামো ন মঙ্কুকত্তুকামো, দৱকম্যতা হীনেন হীনং ৱদেতি, চণ্ডালং ৱেনং নেসাদং ৰথকাৰং পুক্কুসং – ‘‘চণ্ডালোসি, ৱেনোসি, নেসাদোসি, ৰথকাৰোসি, পুক্কুসোসী’’তি ভণতি, আপত্তি ৱাচায, ৱাচায দুব্ভাসিতস্স.

উপসম্পন্নো উপসম্পন্নং ন খুংসেতুকামো ন ৱম্ভেতুকামো ন মঙ্কুকত্তুকামো, দৱকম্যতা হীনেন উক্কট্ঠং ৱদেতি, খত্তিযং ব্ৰাহ্মণং – ‘‘চণ্ডালোসি, ৱেনোসি, নেসাদোসি, ৰথকাৰোসি, পুক্কুসোসী’’তি ভণতি, আপত্তি ৱাচায, ৱাচায দুব্ভাসিতস্স.

উপসম্পন্নো উপসম্পন্নং ন খুংসেতুকামো ন ৱম্ভেতুকামো ন মঙ্কুকত্তুকামো, দৱকম্যতা উক্কট্ঠেন হীনং ৱদেতি, চণ্ডালং ৱেনং নেসাদং ৰথকাৰং পুক্কুসং – ‘‘খত্তিযোসি, ব্ৰাহ্মণোসী’’তি ভণতি, আপত্তি ৱাচায, ৱাচায দুব্ভাসিতস্স.

উপসম্পন্নো উপসম্পন্নং ন খুংসেতুকামো ন ৱম্ভেতুকামো ন মঙ্কুকত্তুকামো, দৱকম্যতা উক্কট্ঠেন উক্কট্ঠং ৱদেতি, খত্তিযং ব্ৰাহ্মণং – ‘‘খত্তিযোসি, ব্ৰাহ্মণোসী’’তি ভণতি, আপত্তি ৱাচায, ৱাচায দুব্ভাসিতস্স.

উপসম্পন্নো উপসম্পন্নং ন খুংসেতুকামো ন ৱম্ভেতুকামো ন মঙ্কুকত্তুকামো, দৱকম্যতা হীনেন হীনং ৱদেতি…পে… হীনেন উক্কট্ঠং ৱদেতি…পে… উক্কট্ঠেন হীনং ৱদেতি…পে… উক্কট্ঠেন উক্কট্ঠং ৱদেতি, পণ্ডিতং ব্যত্তং মেধাৱিং বহুস্সুতং ধম্মকথিকং – ‘‘পণ্ডিতোসি, ব্যত্তোসি, মেধাৱীসি, বহুস্সুতোসি, ধম্মকথিকোসি, নত্থি তুয্হং দুগ্গতি, সুগতি যেৱ তুয্হং পাটিকঙ্খা’’তি ভণতি, আপত্তি ৱাচায, ৱাচায দুব্ভাসিতস্স.

৩৩. উপসম্পন্নো উপসম্পন্নং ন খুংসেতুকামো ন ৱম্ভেতুকামো ন মঙ্কুকত্তুকামো, দৱকম্যতা এৱং ৱদেতি, ‘‘সন্তি ইধেকচ্চে চণ্ডালা ৱেনা নেসাদা ৰথকাৰা পুক্কুসা’’তি ভণতি…পে…. ‘‘সন্তি ইধেকচ্চে পণ্ডিতা ব্যত্তা মেধাৱী বহুস্সুতা ধম্মকথিকা, নত্থি তেসং দুগ্গতি, সুগতি যেৱ তেসং পাটিকঙ্খা’’তি ভণতি, আপত্তি ৱাচায, ৱাচায দুব্ভাসিতস্স.

উপসম্পন্নো উপসম্পন্নং ন খুংসেতুকামো ন ৱম্ভেতুকামো ন মঙ্কুকত্তুকামো, দৱকম্যতা এৱং ৱদেতি, ‘‘যে নূন চণ্ডালা ৱেনা নেসাদা ৰথকাৰা পুক্কুসা’’তি ভণতি…পে…. ‘‘যে নূন পণ্ডিতা ব্যত্তা মেধাৱী বহুস্সুতা ধম্মকথিকা’’তি ভণতি, আপত্তি ৱাচায, ৱাচায দুব্ভাসিতস্স.

উপসম্পন্নো উপসম্পন্নং ন খুংসেতুকামো ন ৱম্ভেতুকামো ন মঙ্কুকত্তুকামো, দৱকম্যতা এৱং ৱদেতি, ‘‘ন মযং চণ্ডালা ৱেনা নেসাদা ৰথকাৰা পুক্কুসা’’তি ভণতি…পে…. ‘‘ন মযং পণ্ডিতা ব্যত্তা মেধাৱী বহুস্সুতা ধম্মকথিকা, নত্থম্হাকং দুগ্গতি, সুগতিযেৱ অম্হাকং পাটিকঙ্খা’’তি ভণতি. আপত্তি ৱাচায, ৱাচায দুব্ভাসিতস্স.

৩৪. উপসম্পন্নো অনুপসম্পন্নং ন খুংসেতুকামো ন ৱম্ভেতুকামো ন মঙ্কুকত্তুকামো, দৱকম্যতা হীনেন হীনং ৱদেতি…পে… হীনেন উক্কট্ঠং ৱদেতি…পে… উক্কট্ঠেন হীনং ৱদেতি…পে… উক্কট্ঠেন উক্কট্ঠং ৱদেতি, পণ্ডিতং ব্যত্তং মেধাৱিং বহুস্সুতং ধম্মকথিকং – ‘‘পণ্ডিতোসি, ব্যত্তোসি, মেধাৱীসি, বহুস্সুতোসি ধম্মকথিকোসি, নত্থি তুয্হং দুগ্গতি; সুগতি যেৱ তুয্হং পাটিকঙ্খা’’তি ভণতি, আপত্তি ৱাচায, ৱাচায দুব্ভাসিতস্স.

উপসম্পন্নো অনুপসম্পন্নং ন খুংসেতুকামো ন ৱম্ভেতুকামো ন মঙ্কুকত্তুকামো, দৱকম্যতা এৱং ৱদেতি, ‘‘সন্তি ইধেকচ্চে চণ্ডালা ৱেনা নেসাদা ৰথকাৰা পুক্কুসা’’তি ভণতি…পে…. ‘‘সন্তি ইধেকচ্চে পণ্ডিতা ব্যত্তা মেধাৱী বহুস্সুতা ধম্মকথিকা, নত্থি তেসং দুগ্গতি, সুগতি যেৱ তেসং পাটিকঙ্খা’’তি ভণতি, আপত্তি ৱাচায, ৱাচায দুব্ভাসিতস্স.

উপসম্পন্নো অনুপসম্পন্নং ন খুংসেতুকামো ন ৱম্ভেতুকামো ন মঙ্কুকত্তুকামো, দৱকম্যতা এৱং ৱদেতি, ‘‘যে নূন চণ্ডালা ৱেনা নেসাদা ৰথকাৰা পুক্কুসা’’তি ভণতি…পে…. ‘‘যে নূন পণ্ডিতা ব্যত্তা মেধাৱী বহুস্সুতা ধম্মকথিকা’’তি ভণতি, আপত্তি ৱাচায, ৱাচায দুব্ভাসিতস্স.

উপসম্পন্নো অনুপসম্পন্নং ন খুংসেতুকামো ন ৱম্ভেতুকামো ন মঙ্কুকত্তুকামো, দৱকম্যতা এৱং ৱদেতি, ‘‘ন মযং চণ্ডালা ৱেনা নেসাদা ৰথকাৰা পুক্কুসা’’তি ভণতি…পে…. ‘‘ন মযং পণ্ডিতা ব্যত্তা মেধাৱী বহুস্সুতা ধম্মকথিকা, নত্থম্হাকং দুগ্গতি, সুগতি যেৱ অম্হাকং পাটিকঙ্খা’’তি ভণতি, আপত্তি ৱাচায, ৱাচায দুব্ভাসিতস্স.

৩৫. অনাপত্তি অত্থপুৰেক্খাৰস্স, ধম্মপুৰেক্খাৰস্স, অনুসাসনিপুৰেক্খাৰস্স, উম্মত্তকস্স, খিত্তচিত্তস্স, ৱেদনাট্টস্স, আদিকম্মিকস্সাতি.

ওমসৱাদসিক্খাপদং নিট্ঠিতং দুতিযং.

৩. পেসুঞ্ঞসিক্খাপদং

৩৬. তেন সমযেন বুদ্ধো ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তেন খো পন সমযেন ছব্বগ্গিযা ভিক্খূ ভিক্খূনং ভণ্ডনজাতানং কলহজাতানং ৱিৱাদাপন্নানং পেসুঞ্ঞং উপসংহৰন্তি; ইমস্স সুত্ৱা অমুস্স অক্খাযন্তি, ইমস্স ভেদায; অমুস্স সুত্ৱা ইমস্স অক্খাযন্তি, অমুস্স ভেদায. তেন অনুপ্পন্নানি চেৱ ভণ্ডনানি উপ্পজ্জন্তি, উপ্পন্নানি চ ভণ্ডনানি ভিয্যোভাৱায ৱেপুল্লায সংৱত্তন্তি. যে তে ভিক্খূ অপ্পিচ্ছা…পে… তে উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম ছব্বগ্গিযা ভিক্খূ ভিক্খূনং ভণ্ডনজাতানং কলহজাতানং ৱিৱাদাপন্নানং পেসুঞ্ঞং উপসংহৰিস্সন্তি, ইমস্স সুত্ৱা অমুস্স অক্খাযিস্সন্তি, ইমস্স ভেদায; অমুস্স সুত্ৱা ইমস্স অক্খাযিস্সন্তি, অমুস্স ভেদায! তেন অনুপ্পন্নানি চেৱ ভণ্ডনানি উপ্পজ্জন্তি, উপ্পন্নানি চ ভণ্ডনানি ভিয্যোভাৱায ৱেপুল্লায সংৱত্তন্তী’’তি. অথ খো তে ভিক্খূ ছব্বগ্গিযে ভিক্খূ অনেকপৰিযাযেন ৱিগৰহিত্ৱা ভগৱতো এতমত্থং আৰোচেসুং…পে… ‘‘সচ্চং কিৰ তুম্হে, ভিক্খৱে, ভিক্খূনং ভণ্ডনজাতানং কলহজাতানং ৱিৱাদাপন্নানং পেসুঞ্ঞং উপসংহৰথ, ইমস্স সুত্ৱা অমুস্স অক্খাযথ, ইমস্স ভেদায, অমুস্স সুত্ৱা ইমস্স অক্খাযথ, অমুস্স ভেদায? তেন অনুপ্পন্নানি চেৱ ভণ্ডনানি উপ্পজ্জন্তি, উপ্পন্নানি চ ভণ্ডনানি ভিয্যোভাৱায ৱেপুল্লায সংৱত্তন্তী’’তি? ‘‘সচ্চং, ভগৱা’’তি. ৱিগৰহি বুদ্ধো ভগৱা…পে… কথঞ্হি নাম তুম্হে, মোঘপুৰিসা, ভিক্খূনং ভণ্ডনজাতানং কলহজাতানং ৱিৱাদাপন্নানং পেসুঞ্ঞং উপসংহৰিস্সথ! ইমস্স সুত্ৱা অমুস্স অক্খাযিস্সথ, ইমস্স ভেদায! অমুস্স সুত্ৱা ইমস্স অক্খাযিস্সথ, অমুস্স ভেদায! তেন অনুপ্পন্নানি চেৱ ভণ্ডনানি উপ্পজ্জন্তি, উপ্পন্নানি চ ভণ্ডনানি ভিয্যোভাৱায ৱেপুল্লায সংৱত্তন্তি. নেতং, মোঘপুৰিসা, অপ্পসন্নানং ৱা পসাদায. পসন্নানং ৱা ভিয্যোভাৱায…পে… এৱঞ্চ পন, ভিক্খৱে, ইমং সিক্খাপদং উদ্দিসেয্যাথ –

৩৭. ‘‘ভিক্খুপেসুঞ্ঞে পাচিত্তিয’’ন্তি.

৩৮. পেসুঞ্ঞং নাম দ্ৱীহাকাৰেহি পেসুঞ্ঞং হোতি – পিযকম্যস্স ৱা ভেদাধিপ্পাযস্স ৱা. দসহাকাৰেহি পেসুঞ্ঞং উপসংহৰতি – জাতিতোপি, নামতোপি, গোত্ততোপি, কম্মতোপি, সিপ্পতোপি, আবাধতোপি, লিঙ্গতোপি, কিলেসতোপি, আপত্তিতোপি, অক্কোসতোপি.

জাতি নাম দ্ৱে জাতিযো – হীনা চ জাতি উক্কট্ঠা চ জাতি. হীনা নাম জাতি – চণ্ডালজাতি ৱেনজাতি নেসাদজাতি ৰথকাৰজাতি পুক্কুসজাতি. এসা হীনা নাম জাতি. উক্কট্ঠা নাম জাতি – খত্তিযজাতি ব্ৰাহ্মণজাতি. এসা উক্কট্ঠা নাম জাতি…পে….

অক্কোসো নাম দ্ৱে অক্কোসা – হীনো চ অক্কোসো উক্কট্ঠো চ অক্কোসো. হীনো নাম অক্কোসো – ওট্ঠোসি, মেণ্ডোসি, গোণোসি, গদ্ৰভোসি, তিৰচ্ছানগতোসি, নেৰযিকোসি; নত্থি তুয্হং সুগতি; দুগ্গতি যেৱ তুয্হং পাটিকঙ্খাতি, যকাৰেন ৱা ভকাৰেন ৱা কাটকোটচিকায ৱা. এসো হীনো নাম অক্কোসো. উক্কট্ঠো নাম অক্কোসো – পণ্ডিতোসি, ব্যত্তোসি, মেধাৱীসি, বহুস্সুতোসি, ধম্মকথিকোসি; নত্থি তুয্হং দুগ্গতি; সুগতি যেৱ তুয্হং পাটিকঙ্খাতি. এসো উক্কট্ঠো নাম অক্কোসো.

৩৯. উপসম্পন্নো উপসম্পন্নস্স সুত্ৱা উপসম্পন্নস্স পেসুঞ্ঞং উপসংহৰতি – ‘‘ইত্থন্নামো তং ‘চণ্ডালো ৱেনো নেসাদো ৰথকাৰো পুক্কুসো’তি ভণতী’’তি. আপত্তি ৱাচায, ৱাচায পাচিত্তিযস্স.

উপসম্পন্নো উপসম্পন্নস্স সুত্ৱা উপসম্পন্নস্স পেসুঞ্ঞং উপসংহৰতি – ‘‘ইত্থন্নামো তং ‘খত্তিযো ব্ৰাহ্মণো’তি ভণতী’’তি. আপত্তি ৱাচায, ৱাচায পাচিত্তিযস্স.

উপসম্পন্নো উপসম্পন্নস্স সুত্ৱা উপসম্পন্নস্স পেসুঞ্ঞং উপসংহৰতি – ‘‘ইত্থন্নামো তং ‘অৱকণ্ণকো জৱকণ্ণকো ধনিট্ঠকো সৱিট্ঠকো কুলৱড্ঢকো’তি ভণতী’’তি. আপত্তি ৱাচায, ৱাচায পাচিত্তিযস্স.

উপসম্পন্নো উপসম্পন্নস্স সুত্ৱা উপসম্পন্নস্স পেসুঞ্ঞং উপসংহৰতি – ‘‘ইত্থন্নামো তং ‘বুদ্ধৰক্খিতো ধম্মৰক্খিতো সঙ্ঘৰক্খিতো’তি ভণতী’’তি. আপত্তি ৱাচায, ৱাচায পাচিত্তিযস্স.

উপসম্পন্নো উপসম্পন্নস্স সুত্ৱা উপসম্পন্নস্স পেসুঞ্ঞং উপসংহৰতি – ‘‘ইত্থন্নামো তং ‘কোসিযো ভাৰদ্ৱাজো’তি ভণতী’’তি. আপত্তি ৱাচায, ৱাচায পাচিত্তিযস্স.

উপসম্পন্নো উপসম্পন্নস্স সুত্ৱা উপসম্পন্নস্স পেসুঞ্ঞং উপসংহৰতি – ‘‘ইত্থন্নামো তং ‘গোতমো মোগ্গল্লানো কচ্চানো ৱাসিট্ঠো’তি ভণতী’’তি. আপত্তি ৱাচায, ৱাচায পাচিত্তিযস্স.

উপসম্পন্নো উপসম্পন্নস্স সুত্ৱা উপসম্পন্নস্স পেসুঞ্ঞং উপসংহৰতি – ‘‘ইত্থন্নামো তং ‘কোট্ঠকো পুপ্ফছড্ডকো’তি ভণতী’’তি. আপত্তি ৱাচায, ৱাচায পাচিত্তিযস্স.

উপসম্পন্নো উপসম্পন্নস্স সুত্ৱা উপসম্পন্নস্স পেসুঞ্ঞং উপসংহৰতি – ‘‘ইত্থন্নামো তং ‘কস্সকো ৱাণিজো গোৰক্খো’তি ভণতী’’তি. আপত্তি ৱাচায, ৱাচায পাচিত্তিযস্স.

উপসম্পন্নো উপসম্পন্নস্স সুত্ৱা উপসম্পন্নস্স পেসুঞ্ঞং উপসংহৰতি – ‘‘ইত্থন্নামো তং ‘নড়কাৰো কুম্ভকাৰো পেসকাৰো চম্মকাৰো নহাপিতো’তি ভণতী’’তি. আপত্তি ৱাচায, ৱাচায পাচিত্তিযস্স.

উপসম্পন্নো উপসম্পন্নস্স সুত্ৱা উপসম্পন্নস্স পেসুঞ্ঞং উপসংহৰতি – ‘‘ইত্থন্নামো তং ‘মুদ্দিকো গণকো লেখকো’তি ভণতী’’তি. আপত্তি ৱাচায, ৱাচায পাচিত্তিযস্স.

৪০. উপসম্পন্নো উপসম্পন্নস্স সুত্ৱা উপসম্পন্নস্স পেসুঞ্ঞং উপসংহৰতি – ‘‘ইত্থন্নামো তং ‘কুট্ঠিকো গণ্ডিকো কিলাসিকো সোসিকো অপমাৰিকো’তি ভণতী’’তি. আপত্তি ৱাচায, ৱাচায পাচিত্তিযস্স.

উপসম্পন্নো উপসম্পন্নস্স সুত্ৱা উপসম্পন্নস্স পেসুঞ্ঞং উপসংহৰতি – ‘‘ইত্থন্নামো তং ‘মধুমেহিকো’তি ভণতী’’তি. আপত্তি ৱাচায, ৱাচায পাচিত্তিযস্স.

উপসম্পন্নো উপসম্পন্নস্স সুত্ৱা উপসম্পন্নস্স পেসুঞ্ঞং উপসংহৰতি – ‘‘ইত্থন্নামো তং ‘অতিদীঘো অতিৰস্সো অতিকণ্হো অচ্চোদাতো’তি ভণতী’’তি. আপত্তি ৱাচায, ৱাচায পাচিত্তিযস্স.

উপসম্পন্নো উপসম্পন্নস্স সুত্ৱা উপসম্পন্নস্স পেসুঞ্ঞং উপসংহৰতি – ‘‘ইত্থন্নামো তং ‘নাতিদীঘো নাতিৰস্সো নাতিকণ্হো নাচ্চোদাতো’তি ভণতী’’তি. আপত্তি ৱাচায, ৱাচায পাচিত্তিযস্স.

উপসম্পন্নো উপসম্পন্নস্স সুত্ৱা উপসম্পন্নস্স পেসুঞ্ঞং উপসংহৰতি – ‘‘ইত্থন্নামো তং ‘ৰাগপৰিযুট্ঠিতো দোসপৰিযুট্ঠিতো মোহপৰিযুট্ঠিতো’তি ভণতী’’তি. আপত্তি ৱাচায, ৱাচায পাচিত্তিযস্স.

উপসম্পন্নো উপসম্পন্নস্স সুত্ৱা উপসম্পন্নস্স পেসুঞ্ঞং উপসংহৰতি – ‘‘ইত্থন্নামো তং ‘ৱীতৰাগো ৱীতদোসো ৱীতমোহো’তি ভণতী’’তি. আপত্তি ৱাচায, ৱাচায পাচিত্তিযস্স.

উপসম্পন্নো উপসম্পন্নস্স সুত্ৱা উপসম্পন্নস্স পেসুঞ্ঞং উপসংহৰতি – ‘‘ইত্থন্নামো তং ‘পাৰাজিকং অজ্ঝাপন্নো, সঙ্ঘাদিসেসং অজ্ঝাপন্নো, থুল্লচ্চযং অজ্ঝাপন্নো, পাচিত্তিযং অজ্ঝাপন্নো, পাটিদেসনীযং অজ্ঝাপন্নো, দুক্কটং অজ্ঝাপন্নো, দুব্ভাসিতং অজ্ঝাপন্নো’তি ভণতী’’তি. আপত্তি ৱাচায, ৱাচায পাচিত্তিযস্স.

উপসম্পন্নো উপসম্পন্নস্স সুত্ৱা উপসম্পন্নস্স পেসুঞ্ঞং উপসংহৰতি – ‘‘ইত্থন্নামো তং ‘সোতাপন্নো’তি ভণতী’’তি. আপত্তি ৱাচায, ৱাচায পাচিত্তিযস্স.

উপসম্পন্নো উপসম্পন্নস্স সুত্ৱা উপসম্পন্নস্স পেসুঞ্ঞং উপসংহৰতি – ‘‘ইত্থন্নামো তং ‘ওট্ঠো মেণ্ডো গোণো গদ্ৰভো তিৰচ্ছানগতো নেৰযিকো, নত্থি তস্স সুগতি, দুগ্গতিযেৱ তস্স পাটিকঙ্খা’তি ভণতী’’তি. আপত্তি ৱাচায, ৱাচায পাচিত্তিযস্স.

উপসম্পন্নো উপসম্পন্নস্স সুত্ৱা উপসম্পন্নস্স পেসুঞ্ঞং উপসংহৰতি – ‘‘ইত্থন্নামো তং ‘পণ্ডিতো ব্যত্তো মেধাৱী বহুস্সুতো ধম্মকথিকো, নত্থি তস্স দুগ্গতি, সুগতি যেৱ তস্স পাটিকঙ্খা’তি ভণতী’’তি. আপত্তি ৱাচায, ৱাচায পাচিত্তিযস্স.

৪১. উপসম্পন্নো উপসম্পন্নস্স সুত্ৱা উপসম্পন্নস্স পেসুঞ্ঞং উপসংহৰতি – ‘‘ইত্থন্নামো ‘সন্তি ইধেকচ্চে চণ্ডালা ৱেনা নেসাদা ৰথকাৰা, পুক্কুসা’তি ভণতি, ন সো অঞ্ঞং ভণতি, তঞ্ঞেৱ ভণতী’’তি. আপত্তি ৱাচায, ৱাচায দুক্কটস্স.

উপসম্পন্নো উপসম্পন্নস্স সুত্ৱা উপসম্পন্নস্স পেসুঞ্ঞং উপসংহৰতি – ‘‘ইত্থন্নামো ‘সন্তি ইধেকচ্চে খত্তিযা ব্ৰাহ্মণা’তি ভণতি, ন সো অঞ্ঞং ভণতি, তঞ্ঞেৱ ভণতী’তি. আপত্তি ৱাচায, ৱাচায দুক্কটস্স…পে….

উপসম্পন্নো উপসম্পন্নস্স সুত্ৱা উপসম্পন্নস্স পেসুঞ্ঞং উপসংহৰতি – ‘‘ইত্থন্নামো ‘সন্তি ইধেকচ্চে পণ্ডিতা ব্যত্তা মেধাৱী বহুস্সুতা ধম্মকথিকা, নত্থি তেসং দুগ্গতি, সুগতি যেৱ তেসং পাটিকঙ্খা’তি ভণতি, ন সো অঞ্ঞং ভণতি, তঞ্ঞেৱ ভণতী’’তি. আপত্তি ৱাচায, ৱাচায দুক্কটস্স.

উপসম্পন্নো উপসম্পন্নস্স সুত্ৱা উপসম্পন্নস্স পেসুঞ্ঞং উপসংহৰতি – ‘‘ইত্থন্নামো ‘যে নূন চণ্ডালা ৱেনা নেসাদা ৰথকাৰা পুক্কুসা’তি ভণতি, ন সো অঞ্ঞং ভণতি, তঞ্ঞেৱ ভণতী’’তি. আপত্তি ৱাচায, ৱাচায দুক্কটস্স.

উপসম্পন্নো উপসম্পন্নস্স সুত্ৱা উপসম্পন্নস্স পেসুঞ্ঞং উপসংহৰতি – ‘‘ইত্থন্নামো ‘যে নূন পণ্ডিতা ব্যত্তা মেধাৱী বহুস্সুতা ধম্মকথিকা’তি ভণতি, ন সো অঞ্ঞং ভণতি, তঞ্ঞেৱ ভণতী’’তি. আপত্তি ৱাচায, ৱাচায দুক্কটস্স.