৪. পাচিত্তিযকণ্ডং (ভিক্খুনীৱিভঙ্গো)

১. লসুণৱগ্গো

১. পঠমসিক্খাপদং

ইমে খো পনায্যাযো ছসট্ঠিসতা পাচিত্তিযা

ধম্মা উদ্দেসং আগচ্ছন্তি.

৭৯৩. তেন সমযেন বুদ্ধো ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তেন খো পন সমযেন অঞ্ঞতৰেন উপাসকেন ভিক্খুনিসঙ্ঘো লসুণেন পৱাৰিতো হোতি – ‘‘যাসং অয্যানং লসুণেন অত্থো, অহং লসুণেনা’’তি. খেত্তপালো চ আণত্তো হোতি – ‘‘সচে ভিক্খুনিযো আগচ্ছন্তি, একমেকায ভিক্খুনিযা দ্ৱেতযো ভণ্ডিকে দেহী’’তি. তেন খো পন সমযেন সাৱত্থিযং উস্সৱো হোতি. যথাভতং লসুণং পৰিক্খযং অগমাসি. ভিক্খুনিযো তং উপাসকং উপসঙ্কমিত্ৱা এতদৱোচুং – ‘‘লসুণেন, আৱুসো, অত্থো’’তি. ‘‘নত্থায্যে. যথাভতং লসুণং পৰিক্খীণং. খেত্তং গচ্ছথা’’তি. থুল্লনন্দা ভিক্খুনী খেত্তং গন্ত্ৱা ন মত্তং জানিত্ৱা বহুং লসুণং হৰাপেসি. খেত্তপালো উজ্ঝাযতি খিয্যতি ৱিপাচেতি – ‘‘কথঞ্হি নাম ভিক্খুনিযো ন মত্তং জানিত্ৱা বহুং লসুণং হৰাপেস্সন্তী’’তি! অস্সোসুং খো ভিক্খুনিযো তস্স খেত্তপালস্স উজ্ঝাযন্তস্স খিয্যন্তস্স ৱিপাচেন্তস্স. যা তা ভিক্খুনিযো অপ্পিচ্ছা…পে… তা উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম অয্যা থুল্লনন্দা ন মত্তং জানিত্ৱা বহুং লসুণং হৰাপেস্সতী’’তি…পে… সচ্চং কিৰ, ভিক্খৱে, থুল্লনন্দা ভিক্খুনী ন মত্তং জানিত্ৱা বহুং লসুণং হৰাপেতীতি [হৰাপেসীতি (ক.)]? ‘‘সচ্চং, ভগৱা’’তি. ৱিগৰহি বুদ্ধো ভগৱা…পে… কথঞ্হি নাম, ভিক্খৱে, থুল্লনন্দা ভিক্খুনী ন মত্তং জানিত্ৱা বহুং লসুণং হৰাপেস্সতি! নেতং, ভিক্খৱে, অপ্পসন্নানং ৱা পসাদায…পে… ধম্মিং কথং কত্ৱা ভিক্খূ আমন্তেসি –

‘‘ভূতপুব্বং, ভিক্খৱে, থুল্লনন্দা ভিক্খুনী অঞ্ঞতৰস্স ব্ৰাহ্মণস্স পজাপতি অহোসি. তিস্সো চ ধীতৰো – নন্দা, নন্দৱতী, সুন্দৰীনন্দা. অথ খো, ভিক্খৱে, সো ব্ৰাহ্মণো কালঙ্কত্ৱা অঞ্ঞতৰং হংসযোনিং উপপজ্জি. তস্স সব্বসোৱণ্ণমযা পত্তা অহেসুং. সো তাসং একেকং পত্তং দেতি. অথ খো, ভিক্খৱে, থুল্লনন্দা ভিক্খুনী ‘‘অযং হংসো অম্হাকং একেকং পত্তং দেতী’’তি তং হংসৰাজং গহেত্ৱা নিপ্পত্তং অকাসি. তস্স পুন জাযমানা পত্তা সেতা সম্পজ্জিংসু. তদাপি, ভিক্খৱে, থুল্লনন্দা ভিক্খুনী অতিলোভেন সুৱণ্ণা পৰিহীনা. ইদানি লসুণা পৰিহাযিস্সতী’’তি.

[জা. ১.১.১৩৬ সুৱণ্ণহংসজাতকেপি] ‘‘যং লদ্ধং তেন তুট্ঠব্বং, অতিলোভো হি পাপকো;

হংসৰাজং গহেত্ৱান, সুৱণ্ণা পৰিহাযথা’’তি.

অথ খো ভগৱা থুল্লনন্দং ভিক্খুনিং অনেকপৰিযাযেন ৱিগৰহিত্ৱা দুব্ভৰতায…পে… এৱঞ্চ পন, ভিক্খৱে, ভিক্খুনিযো ইমং সিক্খাপদং উদ্দিসন্তু –

৭৯৪. ‘‘যা পন ভিক্খুনী লসুণং খাদেয্য পাচিত্তিয’’ন্তি.

৭৯৫. যা পনাতি যা যাদিসা…পে… ভিক্খুনীতি…পে… অযং ইমস্মিং অত্থে অধিপ্পেতা ভিক্খুনীতি.

লসুণং নাম মাগধকং ৱুচ্চতি.

‘‘খাদিস্সামীতি পটিগ্গণ্হা’’তি, আপত্তি দুক্কটস্স. অজ্ঝোহাৰে অজ্ঝোহাৰে আপত্তি পাচিত্তিযস্স.

৭৯৬. লসুণে লসুণসঞ্ঞা খাদতি, আপত্তি পাচিত্তিযস্স. লসুণে ৱেমতিকা খাদতি, আপত্তি পাচিত্তিযস্স. লসুণে অলসুণসঞ্ঞা খাদতি, আপত্তি পাচিত্তিযস্স.

অলসুণে লসুণসঞ্ঞা খাদতি, আপত্তি দুক্কটস্স. অলসুণে ৱেমতিকা খাদতি, আপত্তি দুক্কটস্স. অলসুণে অলসুণসঞ্ঞা খাদতি, অনাপত্তি.

৭৯৭. অনাপত্তি পলণ্ডুকে, ভঞ্জনকে, হৰীতকে, চাপলসুণে, সূপসম্পাকে, মংসসম্পাকে, তেলসম্পাকে, সাড়ৱে, উত্তৰিভঙ্গে, উম্মত্তিকায, আদিকম্মিকাযাতি.

পঠমসিক্খাপদং নিট্ঠিতং.

২. দুতিযসিক্খাপদং

৭৯৮. তেন সমযেন বুদ্ধো ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তেন খো পন সমযেন ছব্বগ্গিযা ভিক্খুনিযো সম্বাধে লোমং সংহৰাপেত্ৱা অচিৰৱতিযা নদিযা ৱেসিযাহি সদ্ধিং নগ্গা একতিত্থে নহাযন্তি. ৱেসিযা উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম ভিক্খুনিযো সম্বাধে লোমং সংহৰাপেস্সন্তি, সেয্যথাপি গিহিনিযো কামভোগিনিযো’’তি! অস্সোসুং খো ভিক্খুনিযো তাসং ৱেসিযানং উজ্ঝাযন্তীনং খিয্যন্তীনং ৱিপাচেন্তীনং. যা তা ভিক্খুনিযো অপ্পিচ্ছা…পে… তা উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম ছব্বগ্গিযা ভিক্খুনিযো সম্বাধে লোমং সংহৰাপেস্সন্তী’’তি…পে… সচ্চং কিৰ, ভিক্খৱে, ছব্বগ্গিযা ভিক্খুনিযো সম্বাধে লোমং সংহৰাপেন্তীতি? ‘‘সচ্চং, ভগৱা’’তি. ৱিগৰহি বুদ্ধো ভগৱা…পে… কথঞ্হি নাম, ভিক্খৱে, ছব্বগ্গিযা ভিক্খুনিযো সম্বাধে লোমং সংহৰাপেস্সন্তি! নেতং, ভিক্খৱে, অপ্পসন্নানং ৱা পসাদায…পে… এৱঞ্চ পন, ভিক্খৱে, ভিক্খুনিযো ইমং সিক্খাপদং উদ্দিসন্তু –

৭৯৯. ‘‘যা পন ভিক্খুনী সম্বাধে লোমং সংহৰাপেয্য, পাচিত্তিয’’ন্তি.

৮০০. যা পনাতি যা যাদিসা…পে… ভিক্খুনীতি…পে… অযং ইমস্মিং অত্থে অধিপ্পেতা ভিক্খুনীতি.

সম্বাধো নাম উভো উপকচ্ছকা, মুত্তকৰণং.

সংহৰাপেয্যাতি একম্পি লোমং সংহৰাপেতি, আপত্তি পাচিত্তিযস্স. বহুকেপি লোমে সংহৰাপেতি, আপত্তি পাচিত্তিযস্স.

৮০১. অনাপত্তি আবাধপচ্চযা, উম্মত্তিকায, আদিকম্মিকাযাতি.

দুতিযসিক্খাপদং নিট্ঠিতং.

৩. ততিযসিক্খাপদং

৮০২. তেন সমযেন বুদ্ধো ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তেন খো পন সমযেন দ্ৱে ভিক্খুনিযো অনভিৰতিযা পীড়িতা ওৱৰকং পৱিসিত্ৱা তলঘাতকং কৰোন্তি. ভিক্খুনিযো তেন সদ্দেন উপধাৱিত্ৱা তা ভিক্খুনিযো এতদৱোচুং – ‘‘কিস্স তুম্হে, অয্যে, পুৰিসেন সদ্ধিং সম্পদুস্সথা’’তি? ‘‘ন মযং, অয্যে, পুৰিসেন সদ্ধিং সম্পদুস্সামা’’তি. ভিক্খুনীনং এতমত্থং আৰোচেসুং. যা তা ভিক্খুনিযো অপ্পিচ্ছা…পে… তা উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম ভিক্খুনিযো তলঘাতকং কৰিস্সন্তী’’তি…পে… সচ্চং কিৰ, ভিক্খৱে, ভিক্খুনিযো তলঘাতকং কৰোন্তীতি? ‘‘সচ্চং, ভগৱা’’তি. ৱিগৰহি বুদ্ধো ভগৱা…পে… কথঞ্হি নাম, ভিক্খৱে, ভিক্খুনিযো তলঘাতকং কৰিস্সন্তি! নেতং, ভিক্খৱে, অপ্পসন্নানং ৱা পসাদায…পে… এৱঞ্চ পন, ভিক্খৱে, ভিক্খুনিযো ইমং সিক্খাপদং উদ্দিসন্তু –

৮০৩. ‘‘তলঘাতকে পাচিত্তিয’’ন্তি.

৮০৪. তলঘাতকং নাম সম্ফস্সং সাদিযন্তী অন্তমসো উপ্পলপত্তেনপি মুত্তকৰণে পহাৰং দেতি, আপত্তি পাচিত্তিযস্স.

৮০৫. অনাপত্তি আবাধপচ্চযা, উম্মত্তিকায, আদিকম্মিকাযাতি.

ততিযসিক্খাপদং নিট্ঠিতং.

৪. চতুত্থসিক্খাপদং

৮০৬. তেন সমযেন বুদ্ধো ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তেন খো পন সমযেন অঞ্ঞতৰা পুৰাণৰাজোৰোধা ভিক্খুনীসু পব্বজিতা [অঞ্ঞতৰো পুৰাণৰাজোৰোধো ভিক্খুনীসু পব্বজিতো (স্যা.)] হোতি. অঞ্ঞতৰা ভিক্খুনী অনভিৰতিযা পীড়িতা যেন সা ভিক্খুনী তেনুপসঙ্কমি; উপসঙ্কমিত্ৱা তং ভিক্খুনিং এতদৱোচ – ‘‘ৰাজা খো, অয্যে, তুম্হে চিৰাচিৰং গচ্ছতি. কথং তুম্হে ধাৰেথা’’তি? ‘‘জতুমট্ঠকেন, অয্যে’’তি. ‘‘কিং এতং, অয্যে, জতুমট্ঠক’’ন্তি? অথ খো সা ভিক্খুনী তস্সা ভিক্খুনিযা জতুমট্ঠকং আচিক্খি. অথ খো সা ভিক্খুনী জতুমট্ঠকং আদিযিত্ৱা ধোৱিতুং ৱিস্সৰিত্ৱা একমন্তং ছড্ডেসি. ভিক্খুনিযো মক্খিকাহি সম্পৰিকিণ্ণং পস্সিত্ৱা এৱমাহংসু – ‘‘কস্সিদং কম্ম’’ন্তি? সা এৱমাহ – ‘‘ময্হিদং কম্ম’’ন্তি. যা তা ভিক্খুনিযো অপ্পিচ্ছা…পে… তা উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম ভিক্খুনী জতুমট্ঠকং আদিযিস্সতী’’তি…পে… সচ্চং কিৰ, ভিক্খৱে, ভিক্খুনী জতুমট্ঠকং আদিযতীতি [আদিযীতি (ক.)]? ‘‘সচ্চং, ভগৱা’’তি. ৱিগৰহি বুদ্ধো ভগৱা…পে… কথঞ্হি নাম, ভিক্খৱে, ভিক্খুনী জতুমট্ঠকং আদিযিস্সতি! নেতং, ভিক্খৱে, অপ্পসন্নানং ৱা পসাদায…পে… এৱঞ্চ পন, ভিক্খৱে, ভিক্খুনিযো ইমং সিক্খাপদং উদ্দিসন্তু –

৮০৭. ‘‘জতুমট্ঠকে [জতুমট্টকে (সী.)] পাচিত্তিয’’ন্তি.

৮০৮. জতুমট্ঠকং নাম জতুমযং কট্ঠমযং পিট্ঠমযং মত্তিকামযং.

আদিযেয্যাতি সম্ফস্সং সাদিযন্তী অন্তমসো উপ্পলপত্তম্পি মুত্তকৰণং পৱেসেতি, আপত্তি পাচিত্তিযস্স.

৮০৯. অনাপত্তি আবাধপচ্চযা, উম্মত্তিকায, আদিকম্মিকাযাতি.

চতুত্থসিক্খাপদং নিট্ঠিতং.

৫. পঞ্চমসিক্খাপদং

৮১০. তেন সমযেন বুদ্ধো ভগৱা সক্কেসু ৱিহৰতি কপিলৱত্থুস্মিং নিগ্ৰোধাৰামে. অথ খো মহাপজাপতি গোতমী যেন ভগৱা তেনুপসঙ্কমি; উপসঙ্কমিত্ৱা ভগৱন্তং অভিৱাদেত্ৱা অধোৱাতে অট্ঠাসি – ‘‘দুগ্গন্ধো, ভগৱা, মাতুগামো’’তি. অথ খো ভগৱা – ‘‘আদিযন্তু খো ভিক্খুনিযো উদকসুদ্ধিক’’ন্তি, মহাপজাপতিং গোতমিং ধম্মিযা কথায সন্দস্সেসি সমাদপেসি সমুত্তেজেসি সম্পহংসেসি. অথ খো মহাপজাপতি গোতমী ভগৱতা ধম্মিযা কথায সন্দস্সিতা সমাদপিতা সমুত্তেজিতা সম্পহংসিতা ভগৱন্তং অভিৱাদেত্ৱা পদক্খিণং কত্ৱা পক্কামি. অথ খো ভগৱা এতস্মিং নিদানে এতস্মিং পকৰণে ধম্মিং কথং কত্ৱা ভিক্খূ আমন্তেসি – ‘‘অনুজানামি, ভিক্খৱে, ভিক্খুনীনং উদকসুদ্ধিক’’ন্তি. তেন খো পন সমযেন অঞ্ঞতৰা ভিক্খুনী – ‘‘ভগৱতা উদকসুদ্ধিকা অনুঞ্ঞাতা’’তি অতিগম্ভীৰং উদকসুদ্ধিকং আদিযন্তী মুত্তকৰণে ৱণং অকাসি. অথ খো সা ভিক্খুনী ভিক্খুনীনং এতমত্থং আৰোচেতি. যা তা ভিক্খুনিযো অপ্পিচ্ছা…পে… তা উজ্ঝাযন্তি খিয্যন্তি ৱিপাচেন্তি – কথঞ্হি নাম ভিক্খুনী অতিগম্ভীৰং উদকসুদ্ধিকং আদিযিস্সতীতি…পে… সচ্চং কিৰ, ভিক্খৱে, ভিক্খুনী অতিগম্ভীৰং উদকসুদ্ধিকং আদিযতী’’তি [আদিযীতি (ক.)]? ‘‘সচ্চং, ভগৱা’’তি. ৱিগৰহি বুদ্ধো ভগৱা…পে… কথঞ্হি নাম, ভিক্খৱে, ভিক্খুনী অতিগম্ভীৰং উদকসুদ্ধিকং আদিযিস্সতি! নেতং, ভিক্খৱে, অপ্পসন্নানং ৱা পসাদায…পে… এৱঞ্চ পন, ভিক্খৱে, ভিক্খুনিযো ইমং সিক্খাপদং উদ্দিসন্তু –

৮১১. ‘‘উদকসুদ্ধিকং পন ভিক্খুনিযা আদিযমানায দ্ৱঙ্গুলপব্বপৰমং আদাতব্বং. তং অতিক্কামেন্তিযা পাচিত্তিয’’ন্তি.

৮১২. উদকসুদ্ধিকং নাম মুত্তকৰণস্স ধোৱনা ৱুচ্চতি.

আদিযমানাযাতি ধোৱন্তিযা.

দ্ৱঙ্গুলপব্বপৰমং আদাতব্বন্তি দ্ৱীসু অঙ্গুলেসু দ্ৱে পব্বপৰমা আদাতব্বা.

তং অতিক্কামেন্তিযাতি সম্ফস্সং সাদিযন্তী অন্তমসো কেসগ্গমত্তম্পি অতিক্কামেতি, আপত্তি পাচিত্তিযস্স.

৮১৩. অতিৰেকদ্ৱঙ্গুলপব্বে অতিৰেকসঞ্ঞা আদিযতি, আপত্তি পাচিত্তিযস্স. অতিৰেকদ্ৱঙ্গুলপব্বে ৱেমতিকা আদিযতি, আপত্তি পাচিত্তিযস্স. অতিৰেকদ্ৱঙ্গুলপব্বে ঊনকসঞ্ঞা আদিযতি, আপত্তি পাচিত্তিযস্স.

ঊনকদ্ৱঙ্গুলপব্বে অতিৰেকসঞ্ঞা, আপত্তি দুক্কটস্স. ঊনকদ্ৱঙ্গুলপব্বে ৱেমতিকা, আপত্তি দুক্কটস্স. ঊনকদ্ৱঙ্গুলপব্বে ঊনকসঞ্ঞা, অনাপত্তি.

৮১৪. অনাপত্তি দ্ৱঙ্গুলপব্বপৰমং আদিযতি, ঊনকদ্ৱঙ্গুলপব্বপৰমং আদিযতি, আবাধপচ্চযা, উম্মত্তিকায, আদিকম্মিকাযাতি.

পঞ্চমসিক্খাপদং নিট্ঠিতং.

৬. ছট্ঠসিক্খাপদং

৮১৫. তেন সমযেন বুদ্ধো ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তেন খো পন সমযেন আৰোহন্তো নাম মহামত্তো ভিক্খূসু পব্বজিতো হোতি. তস্স পুৰাণদুতিযিকা ভিক্খুনীসু পব্বজিতা হোতি. তেন খো পন সমযেন সো ভিক্খু তস্সা ভিক্খুনিযা সন্তিকে ভত্তৱিস্সগ্গং কৰোতি. অথ খো সা ভিক্খুনী তস্স ভিক্খুনো ভুঞ্জন্তস্স পানীযেন চ ৱিধূপনেন চ উপতিট্ঠিত্ৱা অচ্চাৱদতি. অথ খো সো ভিক্খু তং ভিক্খুনিং অপসাদেতি – ‘‘মা, ভগিনি, এৱৰূপং অকাসি. নেতং কপ্পতী’’তি. ‘‘পুব্বে মং ত্ৱং এৱঞ্চ এৱঞ্চ কৰোসি, ইদানি এত্তকং ন সহসী’’তি – পানীযথালকং মত্থকে আসুম্ভিত্ৱা ৱিধূপনেন পহাৰং অদাসি. যা তা ভিক্খুনিযো অপ্পিচ্ছা…পে… তা উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম ভিক্খুনী ভিক্খুস্স পহাৰং দস্সতী’’তি…পে… সচ্চং কিৰ, ভিক্খৱে, ভিক্খুনী ভিক্খুস্স পহাৰং অদাসীতি? ‘‘সচ্চং, ভগৱা’’তি. ৱিগৰহি বুদ্ধো ভগৱা…পে… কথঞ্হি নাম, ভিক্খৱে, ভিক্খুনী ভিক্খুস্স পহাৰং দস্সতি! নেতং, ভিক্খৱে, অপ্পসন্নানং ৱা পসাদায…পে… এৱঞ্চ পন, ভিক্খৱে, ভিক্খুনিযো ইমং সিক্খাপদং উদ্দিসন্তু –

৮১৬. ‘‘যা পন ভিক্খুনী ভিক্খুস্স ভুঞ্জন্তস্স পানীযেন ৱা ৱিধূপনেন ৱা উপতিট্ঠেয্য, পাচিত্তিয’’ন্তি.

৮১৭. যা পনাতি যা যাদিসা…পে… ভিক্খুনীতি…পে… অযং ইমস্মিং অত্থে অধিপ্পেতা ভিক্খুনীতি.

ভিক্খুস্সাতি উপসম্পন্নস্স.

ভুঞ্জন্তস্সাতি পঞ্চন্নং ভোজনানং অঞ্ঞতৰং ভোজনং ভুঞ্জন্তস্স.

পানীযং নাম যং কিঞ্চি পানীযং.

ৱিধূপনং নাম যা কাচি বীজনী.

উপতিট্ঠেয্যাতি হত্থপাসে তিট্ঠতি, আপত্তি পাচিত্তিযস্স.

৮১৮. উপসম্পন্নে উপসম্পন্নসঞ্ঞা পানীযেন ৱা ৱিধূপনেন ৱা উপতিট্ঠতি, আপত্তি পাচিত্তিযস্স. উপসম্পন্নে ৱেমতিকা পানীযেন ৱা ৱিধূপনেন ৱা উপতিট্ঠতি, আপত্তি পাচিত্তিযস্স. উপসম্পন্নে অনুপসম্পন্নসঞ্ঞা পানীযেন ৱা ৱিধূপনেন ৱা উপতিট্ঠতি, আপত্তি পাচিত্তিযস্স.

হত্থপাসং ৱিজহিত্ৱা উপতিট্ঠতি, আপত্তি দুক্কটস্স. খাদনীযং খাদন্তস্স উপতিট্ঠতি, আপত্তি দুক্কটস্স. অনুপসম্পন্নস্স উপতিট্ঠতি, আপত্তি দুক্কটস্স. অনুপসম্পন্নে উপসম্পন্নসঞ্ঞা, আপত্তি দুক্কটস্স. অনুপসম্পন্নে ৱেমতিকা, আপত্তি দুক্কটস্স. অনুপসম্পন্নে অনুপসম্পন্নসঞ্ঞা, আপত্তি দুক্কটস্স.

৮১৯. অনাপত্তি দেতি, দাপেতি, অনুপসম্পন্নং আণাপেতি, উম্মত্তিকায, আদিকম্মিকাযাতি.

ছট্ঠসিক্খাপদং নিট্ঠিতং.

৭. সত্তমসিক্খাপদং

৮২০. তেন সমযেন বুদ্ধো ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তেন খো পন সমযেন ভিক্খুনিযো সস্সকালে আমকধঞ্ঞং ৱিঞ্ঞাপেত্ৱা নগৰং অতিহৰন্তি দ্ৱাৰট্ঠানে – ‘‘দেথায্যে, ভাগ’’ন্তি. পলিবুন্ধেত্ৱা মুঞ্চিংসু. অথ খো তা ভিক্খুনিযো উপস্সযং গন্ত্ৱা ভিক্খুনীনং এতমত্থং আৰোচেসুং. যা তা ভিক্খুনিযো অপ্পিচ্ছা…পে… তা উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম ভিক্খুনিযো আমকধঞ্ঞং ৱিঞ্ঞাপেস্সন্তী’’তি…পে… সচ্চং কিৰ, ভিক্খৱে, ভিক্খুনিযো আমকধঞ্ঞং ৱিঞ্ঞাপেন্তীতি? ‘‘সচ্চং, ভগৱা’’তি. ৱিগৰহি বুদ্ধো ভগৱা…পে… কথঞ্হি নাম, ভিক্খৱে, ভিক্খুনিযো আমকধঞ্ঞং ৱিঞ্ঞাপেস্সন্তি! নেতং, ভিক্খৱে, অপ্পসন্নানং ৱা পসাদায…পে… এৱঞ্চ পন, ভিক্খৱে, ভিক্খুনিযো ইমং সিক্খাপদং উদ্দিসন্তু –

৮২১. ‘‘যা পন ভিক্খুনী আমকধঞ্ঞং ৱিঞ্ঞত্ৱা ৱা ৱিঞ্ঞাপেত্ৱা ৱা ভজ্জিত্ৱা ৱা ভজ্জাপেত্ৱা ৱা কোট্টেত্ৱা ৱা কোট্টাপেত্ৱা ৱা পচিত্ৱা ৱা পচাপেত্ৱা ৱা ভুঞ্জেয্য, পাচিত্তিয’’ন্তি.

৮২২. যা পনাতি যা যাদিসা…পে… ভিক্খুনীতি…পে… অযং ইমস্মিং অত্থে অধিপ্পেতা ভিক্খুনীতি.

আমকধঞ্ঞং নাম সালি ৱীহি যৱো গোধুমো কঙ্গু ৱৰকো কুদ্ৰুসকো.

ৱিঞ্ঞত্ৱাতি সযং ৱিঞ্ঞত্ৱা. ৱিঞ্ঞাপেত্ৱাতি অঞ্ঞং ৱিঞ্ঞাপেত্ৱা.

ভজ্জিত্ৱাতি সযং ভজ্জিত্ৱা. ভজ্জাপেত্ৱাতি অঞ্ঞং ভজ্জাপেত্ৱা.

কোট্টেত্ৱাতি সযং কোট্টেত্ৱা. কোট্টাপেত্ৱাতি অঞ্ঞং কোট্টাপেত্ৱা.

পচিত্ৱাতি সযং পচিত্ৱা. পচাপেত্ৱাতি অঞ্ঞং পচাপেত্ৱা.

‘‘ভুঞ্জিস্সামী’’তি পটিগ্গণ্হাতি, আপত্তি দুক্কটস্স. অজ্ঝোহাৰে অজ্ঝোহাৰে আপত্তি পাচিত্তিযস্স.

৮২৩. অনাপত্তি আবাধপচ্চযা, অপৰণ্ণং ৱিঞ্ঞাপেতি, উম্মত্তিকায, আদিকম্মিকাযাতি.

সত্তমসিক্খাপদং নিট্ঠিতং.

৮. অট্ঠমসিক্খাপদং

৮২৪. তেন সমযেন বুদ্ধো ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তেন খো পন সমযেন অঞ্ঞতৰো ব্ৰাহ্মণো নিব্বিট্ঠৰাজভটো ‘‘তঞ্ঞেৱ ভটপথং যাচিস্সামী’’তি সীসং নহাযিত্ৱা ভিক্খুনুপস্সযং নিস্সায ৰাজকুলং গচ্ছতি. অঞ্ঞতৰা ভিক্খুনী কটাহে ৱচ্চং কত্ৱা তিৰোকুট্টে ছড্ডেন্তী তস্স ব্ৰাহ্মণস্স মত্থকে আসুম্ভি. অথ খো সো ব্ৰাহ্মণো উজ্ঝাযতি খিয্যতি ৱিপাচেতি – ‘‘অস্সমণিযো ইমা মুণ্ডা বন্ধকিনিযো. কথঞ্হি নাম গূথকটাহং মত্থকে আসুম্ভিস্সন্তি! ইমাসং উপস্সযং ঝাপেস্সামী’’তি! উম্মুকং গহেত্ৱা উপস্সযং পৱিসতি. অঞ্ঞতৰো উপাসকো উপস্সযা নিক্খমন্তো অদ্দস তং ব্ৰাহ্মণং উম্মুকং গহেত্ৱা উপস্সযং পৱিসন্তং. দিস্ৱান তং ব্ৰাহ্মণং এতদৱোচ – ‘‘কিস্স ত্ৱং, ভো, উম্মুকং গহেত্ৱা উপস্সযং পৱিসসী’’তি? ‘‘ইমা মং, ভো, মুণ্ডা বন্ধকিনিযো গূথকটাহং মত্থকে আসুম্ভিংসু. ইমাসং উপস্সযং ঝাপেস্সামী’’তি. ‘‘গচ্ছ, ভো ব্ৰাহ্মণ, মঙ্গলং এতং. সহস্সং লচ্ছসি তঞ্চ ভটপথ’’ন্তি. অথ খো সো ব্ৰাহ্মণো সীসং নহাযিত্ৱা ৰাজকুলং গন্ত্ৱা সহস্সং অলত্থ তঞ্চ ভটপথং. অথ খো সো উপাসকো উপস্সযং পৱিসিত্ৱা ভিক্খুনীনং এতমত্থং আৰোচেত্ৱা পৰিভাসি. যা তা ভিক্খুনিযো অপ্পিচ্ছা…পে… তা উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম ভিক্খুনিযো উচ্চাৰং তিৰোকুট্টে ছড্ডেস্সন্তী’’তি…পে… সচ্চং কিৰ, ভিক্খৱে, ভিক্খুনিযো উচ্চাৰং তিৰোকুট্টে ছড্ডেন্তীতি? ‘‘সচ্চং, ভগৱা’’তি. ৱিগৰহি বুদ্ধো ভগৱা…পে… কথঞ্হি নাম, ভিক্খৱে, ভিক্খুনিযো উচ্চাৰং তিৰোকুট্টে ছড্ডেস্সন্তি! নেতং, ভিক্খৱে, অপ্পসন্নানং ৱা পসাদায…পে… এৱঞ্চ পন, ভিক্খৱে, ভিক্খুনিযো ইমং সিক্খাপদং উদ্দিসন্তু –

৮২৫. ‘‘যা পন ভিক্খুনী উচ্চাৰং ৱা পস্সাৱং ৱা সঙ্কাৰং ৱা ৱিঘাসং ৱা তিৰোকুট্টে ৱা তিৰোপাকাৰে ৱা ছড্ডেয্য ৱা ছড্ডাপেয্য ৱা, পাচিত্তিয’’ন্তি.

৮২৬. যা পনাতি যা যাদিসা…পে… ভিক্খুনীতি…পে… অযং ইমস্মিং অত্থে অধিপ্পেতা ভিক্খুনীতি.

উচ্চাৰো নাম গূথো ৱুচ্চতি. পস্সাৱো নাম মুত্তং ৱুচ্চতি.

সঙ্কাৰং নাম কচৱৰং ৱুচ্চতি.

ৱিঘাসং নাম চলকানি ৱা অট্ঠিকানি ৱা উচ্ছিট্ঠোদকং ৱা.

কুট্টো নাম তযো কুট্টা – ইট্ঠকাকুট্টো, সিলাকুট্টো, দাৰুকুট্টো.

পাকাৰো নাম তযো পাকাৰা – ইট্ঠকাপাকাৰো, সিলাপাকাৰো, দাৰুপাকাৰো.

তিৰোকুট্টেতি কুট্টস্স পৰতো. তিৰোপাকাৰেতি পাকাৰস্স পৰতো.

ছড্ডেয্যাতি সযং ছড্ডেতি, আপত্তি পাচিত্তিযস্স.

ছড্ডাপেয্যাতি অঞ্ঞং আণাপেতি, আপত্তি দুক্কটস্স. সকিং আণত্তা বহুকম্পি ছড্ডেতি, আপত্তি পাচিত্তিযস্স.

৮২৭. অনাপত্তি ওলোকেত্ৱা ছড্ডেতি, অৱড়ঞ্জে ছড্ডেতি, উম্মত্তিকায, আদিকম্মিকাযাতি.

অট্ঠমসিক্খাপদং নিট্ঠিতং.

৯. নৱমসিক্খাপদং

৮২৮. তেন সমযেন বুদ্ধো ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তেন খো পন সমযেন অঞ্ঞতৰস্স ব্ৰাহ্মণস্স ভিক্খুনূপস্সযং নিস্সায যৱখেত্তং হোতি. ভিক্খুনিযো উচ্চাৰম্পি পস্সাৱম্পি সঙ্কাৰম্পি ৱিঘাসম্পি খেত্তে ছড্ডেন্তি. অথ খো সো ব্ৰাহ্মণো উজ্ঝাযতি খিয্যতি ৱিপাচেতি – ‘‘কথঞ্হি নাম ভিক্খুনিযো অম্হাকং যৱখেত্তং দূসেস্সন্তী’’তি! অস্সোসুং খো ভিক্খুনিযো তস্স ব্ৰাহ্মণস্স উজ্ঝাযন্তস্স খিয্যন্তস্স ৱিপাচেন্তস্স. যা তা ভিক্খুনিযো অপ্পিচ্ছা…পে… তা উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম ভিক্খুনিযো উচ্চাৰম্পি পস্সাৱম্পি সঙ্কাৰম্পি ৱিঘাসম্পি হৰিতে ছড্ডেস্সন্তী’’তি…পে… সচ্চং কিৰ, ভিক্খৱে, ভিক্খুনিযো উচ্চাৰম্পি পস্সাৱম্পি সঙ্কাৰম্পি ৱিঘাসম্পি হৰিতে ছড্ডেন্তীতি? ‘‘সচ্চং, ভগৱা’’তি. ৱিগৰহি বুদ্ধো ভগৱা…পে… কথঞ্হি নাম, ভিক্খৱে, ভিক্খুনিযো উচ্চাৰম্পি পস্সাৱম্পি সঙ্কাৰম্পি ৱিঘাসম্পি হৰিতে ছড্ডেস্সন্তি! নেতং, ভিক্খৱে, অপ্পসন্নানং ৱা পসাদায…পে… এৱঞ্চ পন, ভিক্খৱে, ভিক্খুনিযো ইমং সিক্খাপদং উদ্দিসন্তু –

৮২৯. ‘‘যা পন ভিক্খুনী উচ্চাৰং ৱা পস্সাৱং ৱা সঙ্কাৰং ৱা ৱিঘাসং ৱা হৰিতে ছড্ডেয্য ৱা ছড্ডাপেয্য ৱা, পাচিত্তিয’’ন্তি.

৮৩০. যা পনাতি যা যাদিসা…পে… ভিক্খুনীতি…পে… অযং ইমস্মিং অত্থে অধিপ্পেতা ভিক্খুনীতি.

উচ্চাৰো নাম গূথো ৱুচ্চতি. পস্সাৱো নাম মুত্তং ৱুচ্চতি.

সঙ্কাৰং নাম কচৱৰং ৱুচ্চতি.

ৱিঘাসং নাম চলকানি ৱা অট্ঠিকানি ৱা উচ্ছিট্ঠোদকং ৱা.

হৰিতং নাম পুব্বণ্ণং অপৰণ্ণং যং মনুস্সানং উপভোগপৰিভোগং ৰোপিমং.

ছড্ডেয্যাতি সযং ছড্ডেতি, আপত্তি পাচিত্তিযস্স.

৮৩১. হৰিতে হৰিতসঞ্ঞা ছড্ডেতি ৱা ছড্ডাপেতি ৱা, আপত্তি পাচিত্তিযস্স. হৰিতে ৱেমতিকা ছড্ডেতি ৱা ছড্ডাপেতি ৱা, আপত্তি পাচিত্তিযস্স. হৰিতে অহৰিতসঞ্ঞা ছড্ডেতি ৱা ছড্ডাপেতি ৱা, আপত্তি পাচিত্তিযস্স.

অহৰিতে হৰিতসঞ্ঞা, আপত্তি দুক্কটস্স. অহৰিতে ৱেমতিকা, আপত্তি দুক্কটস্স. অহৰিতে অহৰিতসঞ্ঞা, অনাপত্তি.

৮৩২. অনাপত্তি ওলোকেত্ৱা ছড্ডেতি, খেত্তমৰিযাদে [ছড্ডিতখেত্তে (?) অট্ঠকথা ওলোকেতব্বা] ছড্ডেতি সামিকে আপুচ্ছিত্ৱা অপলোকেত্ৱা ছড্ডেতি, উম্মত্তিকায, আদিকম্মিকাযাতি.

নৱমসিক্খাপদং নিট্ঠিতং.

১০. দসমসিক্খাপদং

৮৩৩. তেন সমযেন বুদ্ধো ভগৱা ৰাজগহে ৱিহৰতি ৱেড়ুৱনে কলন্দকনিৱাপে. তেন খো পন সমযেন ৰাজগহে গিৰগ্গসমজ্জো হোতি. ছব্বগ্গিযা ভিক্খুনিযো গিৰগ্গসমজ্জং দস্সনায অগমংসু. মনুস্সা উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম ভিক্খুনিযো নচ্চম্পি গীতম্পি ৱাদিতম্পি দস্সনায গচ্ছিস্সন্তি, সেয্যথাপি গিহিনিযো কামভোগিনিযো’’তি! অস্সোসুং খো ভিক্খুনিযো তেসং মনুস্সানং উজ্ঝাযন্তানং খিয্যন্তানং ৱিপাচেন্তানং. যা তা ভিক্খুনিযো অপ্পিচ্ছা…পে… তা উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম ছব্বগ্গিযা ভিক্খুনিযো নচ্চম্পি গীতম্পি ৱাদিতম্পি দস্সনায গচ্ছিস্সন্তী’’তি…পে… সচ্চং কিৰ, ভিক্খৱে, ছব্বগ্গিযা ভিক্খুনিযো নচ্চম্পি গীতম্পি ৱাদিতম্পি দস্সনায গচ্ছন্তীতি? ‘‘সচ্চং, ভগৱা’’তি. ৱিগৰহি বুদ্ধো ভগৱা…পে… কথঞ্হি নাম, ভিক্খৱে, ছব্বগ্গিযা ভিক্খুনিযো নচ্চম্পি গীতম্পি ৱাদিতম্পি দস্সনায গচ্ছিস্সন্তি! নেতং, ভিক্খৱে, অপ্পসন্নানং ৱা পসাদায…পে… এৱঞ্চ পন, ভিক্খৱে, ভিক্খুনিযো ইমং সিক্খাপদং উদ্দিসন্তু –

৮৩৪. ‘‘যা পন ভিক্খুনী নচ্চং ৱা গীতং ৱা ৱাদিতং ৱা দস্সনায গচ্ছেয্য, পাচিত্তিয’’ন্তি.

৮৩৫. যা পনাতি যা যাদিসা…পে… ভিক্খুনীতি…পে… অযং ইমস্মিং অত্থে অধিপ্পেতা ভিক্খুনীতি.

নচ্চং নাম যং কিঞ্চি নচ্চং. গীতং নাম যং কিঞ্চি গীতং. ৱাদিতং নাম যং কিঞ্চি ৱাদিতং.

৮৩৬. দস্সনায গচ্ছতি, আপত্তি দুক্কটস্স. যত্থ ঠিতা পস্সতি ৱা সুণাতি ৱা, আপত্তি পাচিত্তিযস্স. দস্সনূপচাৰং ৱিজহিত্ৱা পুনপ্পুনং পস্সতি ৱা সুণাতি ৱা, আপত্তি পাচিত্তিযস্স. একমেকং দস্সনায গচ্ছতি, আপত্তি দুক্কটস্স. যত্থ ঠিতা পস্সতি ৱা সুণাতি ৱা, আপত্তি পাচিত্তিযস্স. দস্সনূপচাৰং ৱিজহিত্ৱা পুনপ্পুনং পস্সতি ৱা সুণাতি ৱা, আপত্তি পাচিত্তিযস্স.

৮৩৭. অনাপত্তি আৰামে ঠিতা পস্সতি ৱা সুণাতি ৱা, ভিক্খুনিযা ঠিতোকাসং ৱা নিসিন্নোকাসং ৱা নিপন্নোকাসং ৱা আগন্ত্ৱা নচ্চন্তি ৱা গাযন্তি ৱা ৱাদেন্তি ৱা, পটিপথং গচ্ছন্তী পস্সতি ৱা সুণাতি ৱা, সতি কৰণীযে গন্ত্ৱা পস্সতি ৱা সুণাতি ৱা, আপদাসু, উম্মত্তিকায, আদিকম্মিকাযাতি.

দসমসিক্খাপদং নিট্ঠিতং.

লসুণৱগ্গো পঠমো.

২. অন্ধকাৰৱগ্গো

১. পঠমসিক্খাপদং

৮৩৮. তেন সমযেন বুদ্ধো ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তেন খো পন সমযেন ভদ্দায কাপিলানিযা অন্তেৱাসিনিযা ভিক্খুনিযা ঞাতকো পুৰিসো গামকা সাৱত্থিং অগমাসি কেনচিদেৱ কৰণীযেন. অথ খো সা ভিক্খুনী তেন পুৰিসেন সদ্ধিং ৰত্তন্ধকাৰে অপ্পদীপে একেনেকা সন্তিট্ঠতিপি সল্লপতিপি. যা তা ভিক্খুনিযো অপ্পিচ্ছা…পে… তা উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম ভিক্খুনী ৰত্তন্ধকাৰে অপ্পদীপে পুৰিসেন সদ্ধিং একেনেকা সন্তিট্ঠিস্সতিপি সল্লপিস্সতিপী’’তি…পে… সচ্চং কিৰ, ভিক্খৱে, ভিক্খুনী ৰত্তন্ধকাৰে অপ্পদীপে পুৰিসেন সদ্ধিং একেনেকা সন্তিট্ঠতিপি সল্লপতিপীতি? ‘‘সচ্চং, ভগৱা’’তি. ৱিগৰহি বুদ্ধো ভগৱা…পে… কথঞ্হি নাম, ভিক্খৱে, ভিক্খুনী ৰত্তন্ধকাৰে অপ্পদীপে পুৰিসেন সদ্ধিং একেনেকা সন্তিট্ঠিস্সতিপি সল্লপিস্সতিপি! নেতং, ভিক্খৱে, অপ্পসন্নানং ৱা পসাদায…পে… এৱঞ্চ পন, ভিক্খৱে, ভিক্খুনিযো ইমং সিক্খাপদং উদ্দিসন্তু –

৮৩৯. ‘‘যা পন ভিক্খুনী ৰত্তন্ধকাৰে অপ্পদীপে পুৰিসেন সদ্ধিং একেনেকা সন্তিট্ঠেয্য ৱা সল্লপেয্য ৱা, পাচিত্তিয’’ন্তি.

৮৪০. যা পনাতি যা যাদিসা…পে… ভিক্খুনীতি…পে… অযং ইমস্মিং অত্থে অধিপ্পেতা ভিক্খুনীতি.

ৰত্তন্ধকাৰেতি ওগ্গতে সূৰিযে. অপ্পদীপেতি অনালোকে.

পুৰিসো নাম মনুস্সপুৰিসো ন যক্খো ন পেতো ন তিৰচ্ছানগতো ৱিঞ্ঞূ পটিবলো সন্তিট্ঠিতুং সল্লপিতুং.

সদ্ধিন্তি একতো. একেনেকাতি পুৰিসো চেৱ হোতি ভিক্খুনী চ.

সন্তিট্ঠেয্য ৱাতি পুৰিসস্স হত্থপাসে তিট্ঠতি, আপত্তি পাচিত্তিযস্স.

সল্লপেয্য ৱাতি পুৰিসস্স হত্থপাসে ঠিতা সল্লপতি, আপত্তি পাচিত্তিযস্স.

হত্থপাসং ৱিজহিত্ৱা সন্তিট্ঠতি ৱা সল্লপতি ৱা, আপত্তি দুক্কটস্স. যক্খেন ৱা পেতেন ৱা পণ্ডকেন ৱা তিৰচ্ছানগতমনুস্সৱিগ্গহেন ৱা সদ্ধিং সন্তিট্ঠতি ৱা সল্লপতি ৱা, আপত্তি দুক্কটস্স.

৮৪১. অনাপত্তি যো কোচি ৱিঞ্ঞূ দুতিযো [যা কাচি ৱিঞ্ঞূ দুতিযা (স্যা.)] হোতি, অৰহোপেক্খা, অঞ্ঞৱিহিতা সন্তিট্ঠতি ৱা সল্লপতি ৱা, উম্মত্তিকায, আদিকম্মিকাযাতি.

পঠমসিক্খাপদং নিট্ঠিতং.

২. দুতিযসিক্খাপদং

৮৪২. তেন সমযেন বুদ্ধো ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তেন খো পন সমযেন ভদ্দায কাপিলানিযা অন্তেৱাসিনিযা ভিক্খুনিযা ঞাতকো পুৰিসো গামকা সাৱত্থিং অগমাসি কেনচিদেৱ কৰণীযেন. অথ খো সা ভিক্খুনী – ‘‘ভগৱতা পটিক্খিত্তং ৰত্তন্ধকাৰে অপ্পদীপে পুৰিসেন সদ্ধিং একেনেকা সন্তিট্ঠিতুং সল্লপিতু’’ন্তি তেনেৱ পুৰিসেন সদ্ধিং পটিচ্ছন্নে ওকাসে একেনেকা সন্তিট্ঠতিপি সল্লপতিপি. যা তা ভিক্খুনিযো অপ্পিচ্ছা…পে… তা উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম ভিক্খুনী পটিচ্ছন্নে ওকাসে পুৰিসেন সদ্ধিং একেনেকা সন্তিট্ঠিস্সতিপি সল্লপিস্সতিপী’’তি…পে… সচ্চং কিৰ, ভিক্খৱে, ভিক্খুনী পটিচ্ছন্নে ওকাসে পুৰিসেন সদ্ধিং একেনেকা সন্তিট্ঠতিপি সল্লপতিপীতি? ‘‘সচ্চং, ভগৱা’’তি. ৱিগৰহি বুদ্ধো ভগৱা…পে… কথঞ্হি নাম, ভিক্খৱে, ভিক্খুনী পটিচ্ছন্নে ওকাসে পুৰিসেন সদ্ধিং একেনেকা সন্তিট্ঠিস্সতিপি সল্লপিস্সতিপি! নেতং, ভিক্খৱে, অপ্পসন্নানং ৱা পসাদায…পে… এৱঞ্চ পন, ভিক্খৱে, ভিক্খুনিযো ইমং সিক্খাপদং উদ্দিসন্তু –

৮৪৩. ‘‘যা পন ভিক্খুনী পটিচ্ছন্নে ওকাসে পুৰিসেন সদ্ধিং একেনেকা সন্তিট্ঠেয্য ৱা সল্লপেয্য ৱা, পাচিত্তিয’’ন্তি.

৮৪৪. যা পনাতি যা যাদিসা…পে… ভিক্খুনীতি…পে… অযং ইমস্মিং অত্থে অধিপ্পেতা ভিক্খুনীতি.

পটিচ্ছন্নো নাম ওকাসো কুট্টেন ৱা কৱাটেন ৱা কিলঞ্জেন ৱা সাণিপাকাৰেন ৱা ৰুক্খেন ৱা থম্ভেন ৱা কোত্থড়িযা ৱা যেন কেনচি পটিচ্ছন্নো হোতি.

সদ্ধিন্তি একতো. একেনেকাতি পুৰিসো চেৱ হোতি ভিক্খুনী চ.

সন্তিট্ঠেয্য ৱাতি পুৰিসস্স হত্থপাসে তিট্ঠতি, আপত্তি পাচিত্তিযস্স.

সল্লপেয্য ৱাতি পুৰিসস্স হত্থপাসে ঠিতা সল্লপতি, আপত্তি পাচিত্তিযস্স.

৮৪৫. অনাপত্তি যো কোচি ৱিঞ্ঞূ দুতিযো হোতি, অৰহোপেক্খা, অঞ্ঞৱিহিতা সন্তিট্ঠতি ৱা সল্লপতি ৱা, উম্মত্তিকায, আদিকম্মিকাযাতি.

দুতিযসিক্খাপদং নিট্ঠিতং.

৩. ততিযসিক্খাপদং

৮৪৬. তেন সমযেন বুদ্ধো ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তেন খো পন সমযেন ভদ্দায কাপিলানিযা অন্তেৱাসিনিযা ভিক্খুনিযা ঞাতকো পুৰিসো গামকা সাৱত্থিং অগমাসি কেনচিদেৱ কৰণীযেন. অথ খো সা ভিক্খুনী – ‘‘ভগৱতা পটিক্খিত্তং পটিচ্ছন্নে ওকাসে পুৰিসেন সদ্ধিং একেনেকা সন্তিট্ঠিতুং সল্লপিতু’’ন্তি তেনেৱ পুৰিসেন সদ্ধিং অজ্ঝোকাসে একেনেকা সন্তিট্ঠতিপি সল্লপতিপি. যা তা ভিক্খুনিযো অপ্পিচ্ছা…পে… তা উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম ভিক্খুনী অজ্ঝোকাসে পুৰিসেন সদ্ধিং একেনেকা সন্তিট্ঠিস্সতিপি সল্লপিস্সতিপী’’তি…পে… সচ্চং কিৰ, ভিক্খৱে, ভিক্খুনী অজ্ঝোকাসে পুৰিসেন সদ্ধিং একেনেকা সন্তিট্ঠতিপি সল্লপতিপীতি? ‘‘সচ্চং, ভগৱা’’তি. ৱিগৰহি বুদ্ধো ভগৱা…পে… কথঞ্হি নাম, ভিক্খৱে, ভিক্খুনী অজ্ঝোকাসে পুৰিসেন সদ্ধিং একেনেকা সন্তিট্ঠিস্সতিপি সল্লপিস্সতিপি! নেতং, ভিক্খৱে, অপ্পসন্নানং ৱা পসাদায…পে… এৱঞ্চ পন, ভিক্খৱে, ভিক্খুনিযো ইমং সিক্খাপদং উদ্দিসন্তু –

৮৪৭. ‘‘যা পন ভিক্খুনী অজ্ঝোকাসে পুৰিসেন সদ্ধিং একেনেকা সন্তিট্ঠেয্য ৱা সল্লপেয্য ৱা, পাচিত্তিয’’ন্তি.

৮৪৮. যা পনাতি যা যাদিসা…পে… ভিক্খুনীতি…পে… অযং ইমস্মিং অত্থে অধিপ্পেতা ভিক্খুনীতি.

অজ্ঝোকাসো নাম অপ্পটিচ্ছন্নো হোতি কুট্টেন ৱা কৱাটেন ৱা কিলঞ্জেন ৱা সাণিপাকাৰেন ৱা ৰুক্খেন ৱা থম্ভেন ৱা কোত্থড়িযা ৱা, যেন কেনচি অপ্পটিচ্ছন্নো হোতি.

পুৰিসো নাম মনুস্সপুৰিসো, ন যক্খো ন পেতো ন তিৰচ্ছানগতো, ৱিঞ্ঞূ পটিবলো সন্তিট্ঠিতুং সল্লপিতুং.

সদ্ধিন্তি একতো. একেনেকাতি পুৰিসো চেৱ হোতি ভিক্খুনী চ.

সন্তিট্ঠেয্য ৱাতি পুৰিসস্স হত্থপাসে তিট্ঠতি, আপত্তি পাচিত্তিযস্স.

সল্লপেয্য ৱাতি পুৰিসস্স হত্থপাসে ঠিতা সল্লপতি, আপত্তি পাচিত্তিযস্স.

হত্থপাসং ৱিজহিত্ৱা সন্তিট্ঠতি ৱা সল্লপতি ৱা, আপত্তি দুক্কটস্স. যক্খেন ৱা পেতেন ৱা পণ্ডকেন ৱা তিৰচ্ছাগতমনুস্সৱিগ্গহেন ৱা সদ্ধিং সন্তিট্ঠতি ৱা সল্লপতি ৱা, আপত্তি দুক্কটস্স.

৮৪৯. অনাপত্তি যো কোচি ৱিঞ্ঞূ দুতিযো হোতি, অৰহোপেক্খা, অঞ্ঞৱিহিতা সন্তিট্ঠতি ৱা সল্লপতি ৱা, উম্মত্তিকায, আদিকম্মিকাযাতি.

ততিযসিক্খাপদং নিট্ঠিতং.