৭. সত্তমসিক্খাপদং

১১০১. তেন সমযেন বুদ্ধো ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তেন খো পন সমযেন ভিক্খুনিযো পৰিপুণ্ণদ্ৱাদসৱস্সং গিহিগতং দ্ৱে ৱস্সানি ছসু ধম্মেসু সিক্খিতসিক্খং সঙ্ঘেন অসম্মতং ৱুট্ঠাপেন্তি. ভিক্খুনিযো এৱমাহংসু – ‘‘এথ সিক্খমানা, ইমং জানাথ, ইমং দেথ, ইমং আহৰথ, ইমিনা অত্থো, ইমং কপ্পিযং কৰোথা’’তি. তা এৱমাহংসু – ‘‘ন মযং, অয্যে, সিক্খমানা, ভিক্খুনিযো ময’’ন্তি. যা তা ভিক্খুনিযো অপ্পিচ্ছা…পে… তা উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম ভিক্খুনিযো পৰিপুণ্ণদ্ৱাদসৱস্সং গিহিগতং দ্ৱে ৱস্সানি ছসু ধম্মেসু সিক্খিতসিক্খং সঙ্ঘেন অসম্মতং ৱুট্ঠাপেস্সন্তী’’তি…পে… সচ্চং কিৰ, ভিক্খৱে, ভিক্খুনিযো পৰিপুণ্ণদ্ৱাদসৱস্সং গিহিগতং দ্ৱে ৱস্সানি ছসু ধম্মেসু সিক্খিতসিক্খং সঙ্ঘেন অসম্মত্তং ৱুট্ঠাপেন্তীতি? ‘‘সচ্চং, ভগৱা’’তি. ৱিগৰহি বুদ্ধো ভগৱা…পে… কথঞ্হি নাম ভিক্খৱে ভিক্খুনিযো পৰিপুণ্ণদ্ৱাদসৱস্সং গিহিগতং দ্ৱে ৱস্সানি ছসু ধম্মেসু সিক্খিতসিক্খং সঙ্ঘেন অসম্মতং ৱুট্ঠাপেস্সন্তি! নেতং, ভিক্খৱে, অপ্পসন্নানং ৱা পসাদায…পে… ৱিগৰহিত্ৱা…পে… ধম্মিং কথং কত্ৱা ভিক্খূ আমন্তেসি – ‘‘অনুজানামি, ভিক্খৱে, পৰিপুণ্ণদ্ৱাদসৱস্সায গিহিগতায দ্ৱে ৱস্সানি ছসু ধম্মেসু সিক্খিতসিক্খায ৱুট্ঠানসম্মুতিং দাতুং. এৱঞ্চ পন, ভিক্খৱে, দাতব্বা. তায পৰিপুণ্ণদ্ৱাদসৱস্সায গিহিগতায দ্ৱে ৱস্সানি ছসু ধম্মেসু সিক্খিতসিক্খায সঙ্ঘং উপসঙ্কমিত্ৱা একংসং উত্তৰাসঙ্গং কৰিত্ৱা ভিক্খুনীনং পাদে ৱন্দিত্ৱা উক্কুটিকং নিসীদিত্ৱা অঞ্জলিং পগ্গহেত্ৱা এৱমস্স ৱচনীযো – অহং, অয্যে, ইত্থন্নামা ইত্থন্নামায অয্যায পৰিপুণ্ণদ্ৱাদসৱস্সা গিহিগতা দ্ৱে ৱস্সানি ছসু ধম্মেসু সিক্খিতসিক্খা, সঙ্ঘং ৱুট্ঠানসম্মুতিং যাচামী’’তি. দুতিযম্পি যাচিতব্বা. ততিযম্পি যাচিতব্বা. ব্যত্তায ভিক্খুনিযা পটিবলায সঙ্ঘো ঞাপেতব্বো.

১১০২. ‘‘সুণাতু মে, অয্যে, সঙ্ঘো. অযং ইত্থন্নামা ইত্থন্নামায অয্যায পৰিপুণ্ণদ্ৱাদসৱস্সা গিহিগতা দ্ৱে ৱস্সানি ছসু ধম্মেসু সিক্খিতসিক্খা সঙ্ঘং ৱুট্ঠানসম্মুতিং যাচতি. যদি সঙ্ঘস্স পত্তকল্লং, সঙ্ঘো ইত্থন্নামায পৰিপুণ্ণদ্ৱাদসৱস্সায গিহিগতায দ্ৱে ৱস্সানি ছসু ধম্মেসু সিক্খিতসিক্খায ৱুট্ঠানসম্মুতিং দদেয্য. এসা ঞত্তি.

‘‘সুণাতু মে, অয্যে, সঙ্ঘো. অযং ইত্থন্নামা ইত্থন্নামায অয্যায পৰিপুণ্ণদ্ৱাদসৱস্সা গিহিগতা দ্ৱে ৱস্সানি ছসু ধম্মেসু সিক্খিতসিক্খা সঙ্ঘং ৱুট্ঠানসম্মুতিং যাচতি. সঙ্ঘো ইত্থন্নামায পৰিপুণ্ণদ্ৱাদসৱস্সায গিহিগতায দ্ৱে ৱস্সানি ছসু ধম্মেসু সিক্খিতসিক্খায ৱুট্ঠানসম্মুতিং দেতি. যস্সা অয্যায খমতি ইত্থন্নামায পৰিপুণ্ণদ্ৱাদসৱস্সায গিহিগতায দ্ৱে ৱস্সানি ছসু ধম্মেসু সিক্খিতসিক্খায ৱুট্ঠানসম্মুতিযা দানং, সা তুণ্হস্স; যস্সা নক্খমতি, সা ভাসেয্য.

‘‘দিন্না সঙ্ঘেন ইত্থন্নামায পৰিপুণ্ণদ্ৱাদসৱস্সায গিহিগতায দ্ৱে ৱস্সানি ছসু ধম্মেসু সিক্খিতসিক্খায ৱুট্ঠানসম্মুতি. খমতি সঙ্ঘস্স, তস্মা তুণ্হী, এৱমেতং ধাৰযামী’’তি.

অথ খো ভগৱা তা ভিক্খুনিযো অনেকপৰিযাযেন ৱিগৰহিত্ৱা দুব্ভৰতায…পে… এৱঞ্চ পন, ভিক্খৱে, ভিক্খুনিযো ইমং সিক্খাপদং উদ্দিসন্তু –

১১০৩. ‘‘যা পন ভিক্খুনী পৰিপুণ্ণদ্ৱাদসৱস্সং গিহিগতং দ্ৱে ৱস্সানি ছসু ধম্মেসু সিক্খিতসিক্খং সঙ্ঘেন অসম্মতং ৱুট্ঠাপেয্য, পাচিত্তিয’’ন্তি.

১১০৪. যা পনাতি যা যাদিসা…পে… ভিক্খুনীতি…পে… অযং ইমস্মিং অত্থে অধিপ্পেতা ভিক্খুনীতি.

পৰিপুণ্ণদ্ৱাদসৱস্সা নাম পত্তদ্ৱাদসৱস্সা. গিহিগতা নাম পুৰিসন্তৰগতা ৱুচ্চতি. দ্ৱে ৱস্সানীতি দ্ৱে সংৱচ্ছৰানি. সিক্খিতসিক্খা নাম ছসু ধম্মেসু সিক্খিতসিক্খা. অসম্মতা নাম ঞত্তিদুতিযেন কম্মেন ৱুট্ঠানসম্মুতি ন দিন্না হোতি. ৱুট্ঠাপেয্যাতি উপসম্পাদেয্য.

‘‘ৱুট্ঠাপেস্সামী’’তি গণং ৱা আচৰিনিং ৱা পত্তং ৱা চীৱৰং ৱা পৰিযেসতি, সীমং ৱা সম্মন্নতি, আপত্তি দুক্কটস্স. ঞত্তিযা দুক্কটং. দ্ৱীহি কম্মৱাচাহি দুক্কটা. কম্মৱাচাপৰিযোসানে উপজ্ঝাযায আপত্তি পাচিত্তিযস্স. গণস্স চ আচৰিনিযা চ আপত্তি দুক্কটস্স.

১১০৫. ধম্মকম্মে ধম্মকম্মসঞ্ঞা ৱুট্ঠাপেতি, আপত্তি পাচিত্তিযস্স. ধম্মকম্মে ৱেমতিকা ৱুট্ঠাপেতি, আপত্তি পাচিত্তিযস্স. ধম্মকম্মে অধম্মকম্মসঞ্ঞা ৱুট্ঠাপেতি, আপত্তি পাচিত্তিযস্স.

অধম্মকম্মে ধম্মকম্মসঞ্ঞা, আপত্তি দুক্কটস্স. অধম্মকম্মে ৱেমতিকা, আপত্তি দুক্কটস্স. অধম্মকম্মে অধম্মকম্মসঞ্ঞা, আপত্তি দুক্কটস্স.

১১০৬. অনাপত্তি পৰিপুণ্ণদ্ৱাদসৱস্সং গিহিগতং দ্ৱে ৱস্সানি ছসু ধম্মেসু সিক্খিতসিক্খং সঙ্ঘেন সম্মতং ৱুট্ঠাপেতি, উম্মত্তিকায, আদিকম্মিকাযাতি.

সত্তমসিক্খাপদং নিট্ঠিতং.