৭. গব্ভিনীৱগ্গো

১. পঠমসিক্খাপদং

১০৬৭. তেন সমযেন বুদ্ধো ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তেন খো পন সমযেন ভিক্খুনিযো গব্ভিনিং ৱুট্ঠাপেন্তি. সা পিণ্ডায চৰতি. মনুস্সা এৱমাহংসু – ‘‘দেথায্যায ভিক্খং, গৰুভাৰা [গৰুগব্ভা (স্যা.)] অয্যা’’তি. মনুস্সা উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম ভিক্খুনিযো গব্ভিনিং ৱুট্ঠাপেস্সন্তী’’তি! অস্সোসুং খো ভিক্খুনিযো তেসং মনুস্সানং উজ্ঝাযন্তানং খিয্যন্তানং ৱিপাচেন্তানং. যা তা ভিক্খুনিযো অপ্পিচ্ছা…পে… তা উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম ভিক্খুনিযো গব্ভিনিং ৱুট্ঠাপেস্সন্তী’’তি…পে… সচ্চং কিৰ, ভিক্খৱে, ভিক্খুনিযো গব্ভিনিং ৱুট্ঠাপেন্তীতি? ‘‘সচ্চং, ভগৱা’’তি. ৱিগৰহি বুদ্ধো ভগৱা…পে… কথঞ্হি নাম, ভিক্খৱে, ভিক্খুনিযো গব্ভিনিং ৱুট্ঠাপেস্সন্তি! নেতং, ভিক্খৱে, অপ্পসন্নানং ৱা পসাদায…পে… এৱঞ্চ পন, ভিক্খৱে, ভিক্খুনিযো ইমং সিক্খাপদং উদ্দিসন্তু –

১০৬৮. ‘‘যা পন ভিক্খুনী গব্ভিনিং ৱুট্ঠাপেয্য, পাচিত্তিয’’ন্তি.

১০৬৯. যা পনাতি যা যাদিসা…পে… ভিক্খুনীতি…পে… অযং ইমস্মিং অত্থে অধিপ্পেতা ভিক্খুনীতি.

গব্ভিনী নাম আপন্নসত্তা ৱুচ্চতি. ৱুট্ঠাপেয্যাতি উপসম্পাদেয্য.

‘‘ৱুট্ঠাপেস্সামী’’তি গণং ৱা আচৰিনিং ৱা পত্তং ৱা চীৱৰং ৱা পৰিযেসতি, সীমং ৱা সম্মন্নতি, আপত্তি দুক্কটস্স. ঞত্তিযা দুক্কটং. দ্ৱীহি কম্মৱাচাহি দুক্কটা. কম্মৱাচাপৰিযোসানে উপজ্ঝাযায আপত্তি পাচিত্তিযস্স. গণস্স চ আচৰিনিযা চ আপত্তি দুক্কটস্স.

১০৭০. গব্ভিনিযা গব্ভিনিসঞ্ঞা ৱুট্ঠাপেতি, আপত্তি পাচিত্তিযস্স. গব্ভিনিযা ৱেমতিকা ৱুট্ঠাপেতি, আপত্তি দুক্কটস্স. গব্ভিনিযা অগব্ভিনিসঞ্ঞা ৱুট্ঠাপেতি, অনাপত্তি. অগব্ভিনিযা গব্ভিনিসঞ্ঞা, আপত্তি দুক্কটস্স. অগব্ভিনিযা ৱেমতিকা, আপত্তি দুক্কটস্স. অগব্ভিনিযা অগব্ভিনিসঞ্ঞা, অনাপত্তি.

১০৭১. অনাপত্তি গব্ভিনিং অগব্ভিনিসঞ্ঞা ৱুট্ঠাপেতি, অগব্ভিনিং অগব্ভিনিসঞ্ঞা ৱুট্ঠাপেতি, উম্মত্তিকায, আদিকম্মিকাযাতি.

পঠমসিক্খাপদং নিট্ঠিতং.

২. দুতিযসিক্খাপদং

১০৭২. তেন সমযেন বুদ্ধো ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তেন খো পন সমযেন ভিক্খুনিযো পাযন্তিং ৱুট্ঠাপেন্তি. সা পিণ্ডায চৰতি. মনুস্সা এৱমাহংসু – ‘‘দেথায্যায ভিক্খং, সদুতিযিকা অয্যা’’তি. মনুস্সা উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম ভিক্খুনিযো পাযন্তিং ৱুট্ঠাপেস্সন্তী’’তি! অস্সোসুং খো ভিক্খুনিযো তেসং মনুস্সানং উজ্ঝাযন্তানং খিয্যন্তানং ৱিপাচেন্তানং. যা তা ভিক্খুনিযো অপ্পিচ্ছা…পে… তা উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম ভিক্খুনিযো পাযন্তিং ৱুট্ঠাপেস্সন্তী’’তি…পে… সচ্চং কিৰ, ভিক্খৱে, ভিক্খুনিযো পাযন্তিং ৱুট্ঠাপেন্তীতি? ‘‘সচ্চং, ভগৱা’’তি. ৱিগৰহি বুদ্ধো ভগৱা…পে… কথঞ্হি নাম, ভিক্খৱে, ভিক্খুনিযো পাযন্তিং ৱুট্ঠাপেস্সন্তি! নেতং, ভিক্খৱে, অপ্পসন্নানং ৱা পসাদায…পে… এৱঞ্চ পন, ভিক্খৱে, ভিক্খুনিযো ইমং সিক্খাপদং উদ্দিসন্তু –

১০৭৩. ‘‘যা পন ভিক্খুনী পাযন্তিং ৱুট্ঠাপেয্য, পাচিত্তিয’’ন্তি.

১০৭৪. যা পনাতি যা যাদিসা…পে… ভিক্খুনীতি…পে… অযং ইমস্মিং অত্থে অধিপ্পেতা ভিক্খুনীতি.

পাযন্তী নাম মাতা ৱা হোতি [হোতু (ক.)] ধাতি [ধাতী (সী. স্যা.)] ৱা.

ৱুট্ঠাপেয্যাতি উপসম্পাদেয্য.

‘‘ৱুট্ঠাপেস্সামী’’তি গণং ৱা আচৰিনিং ৱা পত্তং ৱা চীৱৰং ৱা পৰিযেসতি, সীমং ৱা সম্মন্নতি, আপত্তি দুক্কটস্স. ঞত্তিযা দুক্কটং. দ্ৱীহি কম্মৱাচাহি দুক্কটা. কম্মৱাচাপৰিযোসানে উপজ্ঝাযায আপত্তি পাচিত্তিযস্স. গণস্স চ আচৰিনিযা চ আপত্তি দুক্কটস্স.

১০৭৫. পাযন্তিযা পাযন্তিসঞ্ঞা ৱুট্ঠাপেতি, আপত্তি পাচিত্তিযস্স. পাযন্তিযা ৱেমতিকা ৱুট্ঠাপেতি, আপত্তি দুক্কটস্স. পাযন্তিযা অপাযন্তিসঞ্ঞা ৱুট্ঠাপেতি, অনাপত্তি. অপাযন্তিযা পাযন্তিসঞ্ঞা, আপত্তি দুক্কটস্স. অপাযন্তিযা ৱেমতিকা, আপত্তি দুক্কটস্স. অপাযন্তিযা অপাযন্তিসঞ্ঞা, অনাপত্তি.

১০৭৬. অনাপত্তি পাযন্তিং অপাযন্তিসঞ্ঞা ৱুট্ঠাপেতি, অপাযন্তিং অপাযন্তিসঞ্ঞা ৱুট্ঠাপেতি, উম্মত্তিকায, আদিকম্মিকাযাতি.

দুতিযসিক্খাপদং নিট্ঠিতং.

৩. ততিযসিক্খাপদং

১০৭৭. তেন সমযেন বুদ্ধো ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তেন খো পন সমযেন ভিক্খুনিযো দ্ৱে ৱস্সানি ছসু ধম্মেসু অসিক্খিতসিক্খং সিক্খমানং ৱুট্ঠাপেন্তি. তা বালা হোন্তি অব্যত্তা ন জানন্তি কপ্পিযং ৱা অকপ্পিযং ৱা. যা তা ভিক্খুনিযো অপ্পিচ্ছা…পে… তা উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম ভিক্খুনিযো দ্ৱে ৱস্সানি ছসু ধম্মেসু অসিক্খিতসিক্খং সিক্খমানং ৱুট্ঠাপেস্সন্তী’’তি…পে… সচ্চং কিৰ, ভিক্খৱে, ভিক্খুনিযো দ্ৱে ৱস্সানি ছসু ধম্মেসু অসিক্খিতসিক্খং সিক্খমানং ৱুট্ঠাপেন্তী’’তি? ‘‘সচ্চং, ভগৱা’’তি. ৱিগৰহি বুদ্ধো ভগৱা…পে… কথঞ্হি নাম, ভিক্খৱে, ভিক্খুনিযো দ্ৱে ৱস্সানি ছসু ধম্মেসু অসিক্খিতসিক্খং সিক্খমানং ৱুট্ঠাপেস্সন্তি! নেতং, ভিক্খৱে, অপ্পসন্নানং ৱা পসাদায…পে… ৱিগৰহিত্ৱা…পে… ধম্মিং কথং কত্ৱা ভিক্খূ আমন্তেসি – ‘‘অনুজানামি, ভিক্খৱে, সিক্খমানায দ্ৱে ৱস্সানি ছসু ধম্মেসু সিক্খাসম্মুতিং দাতুং. এৱঞ্চ পন, ভিক্খৱে, দাতব্বা. তায সিক্খমানায সঙ্ঘং উপসঙ্কমিত্ৱা একংসং উত্তৰাসঙ্গং কৰিত্ৱা ভিক্খুনীনং পাদে ৱন্দিত্ৱা উক্কুটিকং নিসীদিত্ৱা অঞ্জলিং পগ্গহেত্ৱা এৱমস্স ৱচনীযো – অহং, অয্যে, ইত্থন্নামা ইত্থন্নামায অয্যায সিক্খমানা. সঙ্ঘং দ্ৱে ৱস্সানি ছসু ধম্মেসু সিক্খাসম্মুতিং যাচামী’’তি. দুতিযম্পি যাচিতব্বা. ততিযম্পি যাচিতব্বা. ব্যত্তায ভিক্খুনিযা পটিবলায সঙ্ঘো ঞাপেতব্বো –

১০৭৮. ‘‘সুণাতু মে, অয্যে, সঙ্ঘো. অযং ইত্থন্নামা ইত্থন্নামায অয্যায সিক্খমানা সঙ্ঘং দ্ৱে ৱস্সানি ছসু ধম্মেসু সিক্খাসম্মুতিং যাচতি. যদি সঙ্ঘস্স পত্তকল্লং সঙ্ঘো ইত্থন্নামায সিক্খমানায দ্ৱে ৱস্সানি ছসু ধম্মেসু সিক্খাসম্মুতিং দদেয্য. এসা ঞত্তি.

‘‘সুণাতু মে, অয্যে, সঙ্ঘো. অযং ইত্থন্নামা ইত্থন্নামায অয্যায সিক্খমানা সঙ্ঘং দ্ৱে ৱস্সানি ছসু ধম্মেসু সিক্খাসম্মুতিং যাচতি. সঙ্ঘো ইত্থন্নামায সিক্খমানায দ্ৱে ৱস্সানি ছসু ধম্মেসু সিক্খাসম্মুতিং দেতি. যস্সা অয্যায খমতি ইত্থন্নামায সিক্খমানায দ্ৱে ৱস্সানি ছসু ধম্মেসু সিক্খাসম্মুতিযা দানং, সা তুণ্হস্স; যস্সা নক্খমতি, সা ভাসেয্য.

‘‘দিন্না সঙ্ঘেন ইত্থন্নামায সিক্খমানায দ্ৱে ৱস্সানি ছসু ধম্মেসু সিক্খাসম্মুতি. খমতি সঙ্ঘস্স, তস্মা তুণ্হী, এৱমেতং ধাৰযামী’’তি.

১০৭৯. সা সিক্খমানা ‘‘এৱং ৱদেহী’’তি ৱত্তব্বা – ‘‘পাণাতিপাতা ৱেৰমণিং দ্ৱে ৱস্সানি অৱীতিক্কম্ম সমাদানং সমাদিযামি. অদিন্নাদানা ৱেৰমণিং দ্ৱে ৱস্সানি অৱীতিক্কম্ম সমাদানং সমাদিযামি. অব্ৰহ্মচৰিযা ৱেৰমণিং দ্ৱে ৱস্সানি অৱীতিক্কম্ম সমাদানং সমাদিযামি. মুসাৱাদা ৱেৰমণিং দ্ৱে ৱস্সানি অৱীতিক্কম্ম সমাদানং সমাদিযামি. সুৰামেৰযমজ্জপ্পমাদট্ঠানা ৱেৰমণিং দ্ৱে ৱস্সানি অৱীতিক্কম্ম সমাদানং সমাদিযামি. ৱিকালভোজনা ৱেৰমণিং দ্ৱে ৱস্সানি অৱীতিক্কম্ম সমাদানং সমাদিযামী’’তি.

অথ খো ভগৱা তা ভিক্খুনিযো অনেকপৰিযাযেন ৱিগৰহিত্ৱা দুব্ভৰতায…পে… এৱঞ্চ পন, ভিক্খৱে, ভিক্খুনিযো ইমং সিক্খাপদং উদ্দিসন্তু –

১০৮০. ‘‘যা পন ভিক্খুনী দ্ৱে ৱস্সানি ছসু ধম্মেসু অসিক্খিতসিক্খং সিক্খমানং ৱুট্ঠাপেয্য, পাচিত্তিয’’ন্তি.

১০৮১. যা পনাতি যা যাদিসা…পে… ভিক্খুনীতি…পে… অযং ইমস্মিং অত্থে অধিপ্পেতা ভিক্খুনীতি.

দ্ৱে ৱস্সানীতি দ্ৱে সংৱচ্ছৰানি. অসিক্খিতসিক্খা নাম সিক্খা ৱা ন দিন্না হোতি, দিন্না ৱা সিক্খা কুপিতা. ৱুট্ঠাপেয্যাতি উপসম্পাদেয্য.

‘‘ৱুট্ঠাপেস্সামী’’তি গণং ৱা আচৰিনিং ৱা পত্তং ৱা চীৱৰং ৱা পৰিযেসতি, সীমং ৱা সম্মন্নতি, আপত্তি দুক্কটস্স. ঞত্তিযা দুক্কটং. দ্ৱীহি কম্মৱাচাহি দুক্কটা. কম্মৱাচাপৰিযোসানে উপজ্ঝাযায আপত্তি পাচিত্তিযস্স. গণস্স চ আচৰিনিযা চ আপত্তি দুক্কটস্স.

১০৮২. ধম্মকম্মে ধম্মকম্মসঞ্ঞা ৱুট্ঠাপেতি, আপত্তি পাচিত্তিযস্স. ধম্মকম্মে ৱেমতিকা ৱুট্ঠাপেতি, আপত্তি পাচিত্তিযস্স. ধম্মকম্মে অধম্মকম্মসঞ্ঞা ৱুট্ঠাপেতি, আপত্তি পাচিত্তিযস্স.

অধম্মকম্মে ধম্মকম্মসঞ্ঞা, আপত্তি দুক্কটস্স. অধম্মকম্মে ৱেমতিকা, আপত্তি দুক্কটস্স. অধম্মকম্মে অধম্মকম্মসঞ্ঞা, আপত্তি দুক্কটস্স.

১০৮৩. অনাপত্তি দ্ৱে ৱস্সানি ছসু ধম্মেসু সিক্খিতসিক্খং সিক্খমানং ৱুট্ঠাপেতি, উম্মত্তিকায, আদিকম্মিকাযাতি.

ততিযসিক্খাপদং নিট্ঠিতং.

৪. চতুত্থসিক্খাপদং

১০৮৪. তেন সমযেন বুদ্ধো ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তেন খো পন সমযেন ভিক্খুনিযো দ্ৱে ৱস্সানি ছসু ধম্মেসু সিক্খিতসিক্খং সিক্খমানং সঙ্ঘেন অসম্মতং ৱুট্ঠাপেন্তি. ভিক্খুনিযো এৱমাহংসু – ‘‘এথ, সিক্খমানা, ইমং জানাথ, ইমং দেথ, ইমং আহৰথ, ইমিনা অত্থো, ইমং কপ্পিযং কৰোথা’’তি. তা এৱমাহংসু – ‘‘ন মযং, অয্যে, সিক্খমানা. ভিক্খুনিযো ময’’ন্তি. যা তা ভিক্খুনিযো অপ্পিচ্ছা…পে… তা উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম ভিক্খুনিযো দ্ৱে ৱস্সানি ছসু ধম্মেসু সিক্খিতসিক্খং সিক্খমানং সঙ্ঘেন অসম্মতং ৱুট্ঠাপেস্সন্তী’’তি…পে… সচ্চং কিৰ, ভিক্খৱে, ভিক্খুনিযো দ্ৱে ৱস্সানি ছসু ধম্মেসু সিক্খিতসিক্খং সিক্খমানং সঙ্ঘেন অসম্মতং ৱুট্ঠাপেন্তীতি? ‘‘সচ্চং, ভগৱা’’তি. ৱিগৰহি বুদ্ধো ভগৱা…পে… কথঞ্হি নাম, ভিক্খৱে, ভিক্খুনিযো দ্ৱে ৱস্সানি ছসু ধম্মেসু সিক্খিতসিক্খং সিক্খমানং সঙ্ঘেন অসম্মতং ৱুট্ঠাপেস্সন্তি! নেতং, ভিক্খৱে, অপ্পসন্নানং ৱা পসাদায…পে… ৱিগৰহিত্ৱা…পে… ধম্মিং কথং কত্ৱা ভিক্খূ আমন্তেসি – ‘‘অনুজানামি, ভিক্খৱে, দ্ৱে ৱস্সানি ছসু ধম্মেসু সিক্খিতসিক্খায সিক্খমানায ৱুট্ঠানসম্মুতিং দাতুং. এৱঞ্চ পন, ভিক্খৱে, দাতব্বা. তায দ্ৱে ৱস্সানি ছসু ধম্মেসু সিক্খিতসিক্খায সিক্খমানায সঙ্ঘং উপসঙ্কমিত্ৱা একংসং উত্তৰাসঙ্গং কৰিত্ৱা ভিক্খুনীনং পাদে ৱন্দিত্ৱা উক্কুটিকং নিসীদিত্ৱা অঞ্জলিং পগ্গহেত্ৱা এৱমস্স ৱচনীযো – ‘‘অহং, অয্যে, ইত্থন্নামা ইত্থন্নামায অয্যায দ্ৱে ৱস্সানি ছসু ধম্মেসু সিক্খিতসিক্খা সিক্খমানা সঙ্ঘং ৱুট্ঠানসম্মুতিং যাচামী’’তি. দুতিযম্পি যাচিতব্বা. ততিযম্পি যাচিতব্বা. ব্যত্তায ভিক্খুনিযা পটিবলায সঙ্ঘো ঞাপেতব্বো –

১০৮৫. ‘‘সুণাতু মে, অয্যে, সঙ্ঘো. অযং ইত্থন্নামা ইত্থন্নামায অয্যায দ্ৱে ৱস্সানি ছসু ধম্মেসু সিক্খিতসিক্খা সিক্খমানা সঙ্ঘং ৱুট্ঠানসম্মুতিং যাচতি. যদি সঙ্ঘস্স পত্তকল্লং, সঙ্ঘো ইত্থন্নামায দ্ৱে ৱস্সানি ছসু ধম্মেসু সিক্খিতসিক্খায সিক্খমানায ৱুট্ঠানসম্মুতিং দদেয্য. এসা ঞত্তি.

‘‘সুণাতু মে, অয্যে, সঙ্ঘো. অযং ইত্থন্নামা ইত্থন্নামায অয্যায দ্ৱে ৱস্সানি ছসু ধম্মেসু সিক্খিতসিক্খা সিক্খমানা সঙ্ঘং ৱুট্ঠানসম্মুতিং যাচতি. সঙ্ঘো ইত্থন্নামায দ্ৱে ৱস্সানি ছসু ধম্মেসু সিক্খিতসিক্খায সিক্খমানায ৱুট্ঠানসম্মুতিং দেতি. যস্সা অয্যায খমতি ইত্থন্নামায দ্ৱে ৱস্সানি ছসু ধম্মেসু সিক্খিতসিক্খায সিক্খমানায ৱুট্ঠানসম্মুতিযা দানং, সা তুণ্হস্স; যস্সা নক্খমতি, সা ভাসেয্য.

‘‘দিন্না সঙ্ঘেন ইত্থন্নামায দ্ৱে ৱস্সানি ছসু ধম্মেসু সিক্খিতসিক্খায সিক্খমানায ৱুট্ঠানসম্মুতি; খমতি সঙ্ঘস্স, তস্মা তুণ্হী, এৱমেতং ধাৰযামী’’তি.

অথ খো ভগৱা তা ভিক্খুনিযো অনেকপৰিযাযেন ৱিগৰহিত্ৱা দুব্ভৰতায…পে… এৱঞ্চ পন, ভিক্খৱে, ভিক্খুনিযো ইমং সিক্খাপদং উদ্দিসন্তু –

১০৮৬. ‘‘যা পন ভিক্খুনী দ্ৱে ৱস্সানি ছসু ধম্মেসু সিক্খিতসিক্খং সিক্খমানং সঙ্ঘেন অসম্মতং ৱুট্ঠাপেয্য, পাচিত্তিয’’ন্তি.

১০৮৭. যা পনাতি যা যাদিসা…পে… ভিক্খুনীতি…পে… অযং ইমস্মিং অত্থে অধিপ্পেতা ভিক্খুনীতি.

দ্ৱে ৱস্সানীতি দ্ৱে সংৱচ্ছৰানি. সিক্খিতসিক্খা নাম ছসু ধম্মেসু সিক্খিতসিক্খা. অসম্মতা নাম ঞত্তিদুতিযেন কম্মেন ৱুট্ঠানসম্মুতি ন দিন্নাহোতি. ৱুট্ঠাপেয্যাতি উপসম্পাদেয্য.

‘‘ৱুট্ঠাপেস্সামী’’তি গণং ৱা আচৰিনিং ৱা পত্তং ৱা চীৱৰং ৱা পৰিযেসতি, সীমং ৱা সম্মন্নতি, আপত্তি দুক্কটস্স. ঞত্তিযা দুক্কটং. দ্ৱীহি কম্মৱাচাহি দুক্কটা. কম্মৱাচাপৰিযোসানে উপজ্ঝাযায আপত্তি পাচিত্তিযস্স. গণস্স চ আচৰিনিযা চ আপত্তি দুক্কটস্স.

১০৮৮. ধম্মকম্মে ধম্মকম্মসঞ্ঞা ৱুট্ঠাপেতি, আপত্তি পাচিত্তিযস্স. ধম্মকম্মে ৱেমতিকা ৱুট্ঠাপেতি, আপত্তি পাচিত্তিযস্স. ধম্মকম্মে অধম্মকম্মসঞ্ঞা ৱুট্ঠাপেতি, আপত্তি পাচিত্তিযস্স.

অধম্মকম্মে ধম্মকম্মসঞ্ঞা, আপত্তি দুক্কটস্স. অধম্মকম্মে ৱেমতিকা, আপত্তি দুক্কটস্স. অধম্মকম্মে অধম্মকম্মসঞ্ঞা, আপত্তি দুক্কটস্স.

১০৮৯. অনাপত্তি দ্ৱে ৱস্সানি ছসু ধম্মেসু সিক্খিতসিক্খং সিক্খমানং সঙ্ঘেন সম্মতং ৱুট্ঠাপেতি, উম্মত্তিকায, আদিকম্মিকাযাতি.

চতুত্থসিক্খাপদং নিট্ঠিতং.

৫. পঞ্চমসিক্খাপদং

১০৯০. তেন সমযেন বুদ্ধো ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তেন খো পন সমযেন ভিক্খুনিযো ঊনদ্ৱাদসৱস্সং গিহিগতং ৱুট্ঠাপেন্তি. তা অক্খমা হোন্তি সীতস্স উণ্হস্স জিঘচ্ছায পিপাসায ডংসমকসৱাতাতপসৰীসপসম্ফস্সানং দুৰুত্তানং দুৰাগতানং ৱচনপথানং. উপ্পন্নানং সাৰীৰিকানং ৱেদনানং দুক্খানং তিব্বানং খৰানং কটুকানং অসাতানং অমনাপানং পাণহৰানং অনধিৱাসকজাতিকা হোন্তি. যা তা ভিক্খুনিযো অপ্পিচ্ছা…পে… তা উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম ভিক্খুনিযো ঊনদ্ৱাদসৱস্সং গিহিগতং ৱুট্ঠাপেস্সন্তী’’তি…পে… সচ্চং কিৰ, ভিক্খৱে, ভিক্খুনিযো ঊনদ্ৱাদসৱস্সং গিহিগতং ৱুট্ঠাপেন্তীতি? ‘‘সচ্চং, ভগৱা’’তি. ৱিগৰহি বুদ্ধো ভগৱা…পে… কথঞ্হি নাম, ভিক্খৱে, ভিক্খুনিযো ঊনদ্ৱাদসৱস্সং গিহিগতং ৱুট্ঠাপেস্সন্তি! ঊনদ্ৱাদসৱস্সা [ঊনদ্ৱাদসৱস্সাহি (ক.)], ভিক্খৱে, গিহিগতা অক্খমা হোতি সীতস্স উণ্হস্স জিঘচ্ছায পিপাসায ডংসমকসৱাতাতপসৰীসপসম্ফস্সানং দুৰুত্তানং দুৰাগতানং ৱচনপথানং. উপ্পন্নানং সাৰীৰিকানং ৱেদনানং দুক্খানং তিব্বানং খৰানং কটুকানং অসাতানং অমনাপানং পাণহৰানং অনধিৱাসকজাতিকা হোতি. দ্ৱাদসৱস্সাৱ [দ্ৱাদসৱস্সা চ (স্যা. ক.)] খো, ভিক্খৱে, গিহিগতা খমা হোতি সীতস্স উণ্হস্স জিঘচ্ছায পিপাসায ডংসমকসৱাতাতপসৰীসপসম্ফস্সানং দুৰুত্তানং দুৰাগতানং ৱচনপথানং. উপ্পন্নানং সাৰীৰিকানং ৱেদনানং দুক্খানং তিব্বানং খৰানং কটুকানং অসাতানং অমনাপানং পাণহৰানং অধিৱাসকজাতিকা হোতি. নেতং, ভিক্খৱে, অপ্পসন্নানং ৱা পসাদায…পে… এৱঞ্চ পন, ভিক্খৱে, ভিক্খুনিযো ইমং সিক্খাপদং উদ্দিসন্তু –

১০৯১. ‘‘যা পন ভিক্খুনী ঊনদ্ৱাদসৱস্সং গিহিগতং ৱুট্ঠাপেয্য, পাচিত্তিয’’ন্তি.

১০৯২. যা পনাতি যা যাদিসা…পে… ভিক্খুনীতি…পে… অযং ইমস্মিং অত্থে অধিপ্পেতা ভিক্খুনীতি.

ঊনদ্ৱাদসৱস্সা নাম অপ্পত্তদ্ৱাদসৱস্সা. গিহিগতা নাম পুৰিসন্তৰগতা ৱুচ্চতি. ৱুট্ঠাপেয্যাতি উপসম্পাদেয্য.

‘‘ৱুট্ঠাপেস্সামী’’তি গণং ৱা আচৰিনিং ৱা পত্তং ৱা চীৱৰং ৱা পৰিযেসতি, সীমং ৱা সম্মন্নতি, আপত্তি দুক্কটস্স. ঞত্তিযা দুক্কটং. দ্ৱীহি কম্মৱাচাহি দুক্কটা. কম্মৱাচাপৰিযোসানে উপজ্ঝাযায আপত্তি পাচিত্তিযস্স. গণস্স চ আচৰিনিযা চ আপত্তি দুক্কটস্স.

১০৯৩. ঊনদ্ৱাদসৱস্সায ঊনদ্ৱাদসৱস্সসঞ্ঞা ৱুট্ঠাপেতি, আপত্তি পাচিত্তিযস্স. ঊনদ্ৱাদসৱস্সায ৱেমতিকা ৱুট্ঠাপেতি, আপত্তি দুক্কটস্স. ঊনদ্ৱাদসৱস্সায পৰিপুণ্ণসঞ্ঞা ৱুট্ঠাপেতি, অনাপত্তি.

পৰিপুণ্ণদ্ৱাদসৱস্সায ঊনদ্ৱাদসৱস্সসঞ্ঞা, আপত্তি দুক্কটস্স. পৰিপুণ্ণদ্ৱাদসৱস্সায ৱেমতিকা, আপত্তি দুক্কটস্স. পৰিপুণ্ণদ্ৱাদসৱস্সায পৰিপুণ্ণসঞ্ঞা, অনাপত্তি.

১০৯৪. অনাপত্তি ঊনদ্ৱাদসৱস্সং পৰিপুণ্ণসঞ্ঞা ৱুট্ঠাপেতি, পৰিপুণ্ণদ্ৱাদসৱস্সং পৰিপুণ্ণসঞ্ঞা ৱুট্ঠাপেতি, উম্মত্তিকায, আদিকম্মিকাযাতি.

পঞ্চমসিক্খাপদং নিট্ঠিতং.

৬. ছট্ঠসিক্খাপদং

১০৯৫. তেন সমযেন বুদ্ধো ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তেন খো পন সমযেন ভিক্খুনিযো পৰিপুণ্ণদ্ৱাদসৱস্সং গিহিগতং দ্ৱে ৱস্সানি ছসু ধম্মেসু অসিক্খিতসিক্খং ৱুট্ঠাপেন্তি. তা বালা হোন্তি অব্যত্তা ন জানন্তি কপ্পিযং ৱা অকপ্পিযং ৱা. যা তা ভিক্খুনিযো অপ্পিচ্ছা…পে… তা উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম ভিক্খুনিযো পৰিপুণ্ণদ্ৱাদসৱস্সং গিহিগতং দ্ৱে ৱস্সানি ছসু ধম্মেসু অসিক্খিতসিক্খং ৱুট্ঠাপেস্সন্তী’’তি…পে… সচ্চং কিৰ, ভিক্খৱে, ভিক্খুনিযো পৰিপুণ্ণদ্ৱাদসৱস্সং গিহিগতং দ্ৱে ৱস্সানি ছসু ধম্মেসু অসিক্খিতসিক্খং ৱুট্ঠাপেন্তীতি? ‘‘সচ্চং, ভগৱা’’তি. ৱিগৰহি বুদ্ধো ভগৱা…পে… কথঞ্হি নাম, ভিক্খৱে, ভিক্খুনিযো পৰিপুণ্ণদ্ৱাদসৱস্সং গিহিগতং দ্ৱে ৱস্সানি ছসু ধম্মেসু অসিক্খিতসিক্খং ৱুট্ঠাপেস্সন্তি! নেতং, ভিক্খৱে, অপ্পসন্নানং ৱা পসাদায…পে… ৱিগৰহিত্ৱা ধম্মিং কথং কত্ৱা ভিক্খূ আমন্তেসি – ‘‘অনুজানামি, ভিক্খৱে, পৰিপুণ্ণদ্ৱাদসৱস্সায গিহিগতায দ্ৱে ৱস্সানি ছসু ধম্মেসু সিক্খাসম্মুতিং দাতুং. এৱঞ্চ পন, ভিক্খৱে, দাতব্বা. তায পৰিপুণ্ণদ্ৱাদসৱস্সায গিহিগতায সঙ্ঘং উপসঙ্কমিত্ৱা একংসং উত্তৰাসঙ্গং কৰিত্ৱা ভিক্খুনীনং পাদে ৱন্দিত্ৱা উক্কুটিকং নিসীদিত্ৱা অঞ্জলিং পগ্গহেত্ৱা এৱমস্স ৱচনীযো – অহং, অয্যে, ইত্থন্নামা ইত্থন্নামায অয্যায পৰিপুণ্ণদ্ৱাদসৱস্সা গিহিগতা সঙ্ঘং দ্ৱে ৱস্সানি ছসু ধম্মেসু সিক্খাসম্মুতিং যাচামী’’তি. দুতিযম্পি যাচিতব্বা. ততিযম্পি যাচিতব্বা. ব্যত্তায ভিক্খুনিযা পটিবলায সঙ্ঘো ঞাপেতব্বো –

১০৯৬. ‘‘সুণাতু মে, অয্যে, সঙ্ঘো. অযং ইত্থন্নামা ইত্থন্নামায অয্যায পৰিপুণ্ণদ্ৱাদসৱস্সা গিহিগতা সঙ্ঘং দ্ৱে ৱস্সানি ছসু ধম্মেসু সিক্খাসম্মুতিং যাচতি. যদি সঙ্ঘস্স পত্তকল্লং সঙ্ঘো ইত্থন্নামায পৰিপুণ্ণদ্ৱাদসৱস্সায গিহিগতায দ্ৱে ৱস্সানি ছসু ধম্মেসু সিক্খাসম্মুতিং দদেয্য. এসা ঞত্তি.

‘‘সুণাতু মে, অয্যে, সঙ্ঘো. অযং ইত্থন্নামা ইত্থন্নামায অয্যায পৰিপুণ্ণদ্ৱাদসৱস্সা গিহিগতা সঙ্ঘং দ্ৱে ৱস্সানি ছসু ধম্মেসু সিক্খাসম্মুতিং যাচতি. সঙ্ঘো ইত্থন্নামায পৰিপুণ্ণদ্ৱাদসৱস্সায গিহিগতায দ্ৱে ৱস্সানি ছসু ধম্মেসু সিক্খাসম্মুতিং দেতি. যস্সা অয্যায খমতি ইত্থন্নামায পৰিপুণ্ণদ্ৱাদসৱস্সায গিহিগতায দ্ৱে ৱস্সানি ছসু ধম্মেসু সিক্খাসম্মুতিযা দানং, সা তুণ্হস্স; যস্সা নক্খমতি, সা ভাসেয্য.

‘‘দিন্না সঙ্ঘেন ইত্থন্নামায পৰিপুণ্ণদ্ৱাদসৱস্সায গিহিগতায দ্ৱে ৱস্সানি ছসু ধম্মেসু সিক্খাসম্মুতি. খমতি সঙ্ঘস্স, তস্মা তুণ্হী, এৱমেতং ধাৰযামী’’তি.

সা পৰিপুণ্ণদ্ৱাদসৱস্সা গিহিগতা এৱং ৱদেহীতি ৱত্তব্বা – ‘‘পাণাতিপাতা ৱেৰমণিং দ্ৱে ৱস্সানি অৱীতিক্কম্ম সমাদানং সমাদিযামি…পে… ৱিকালভোজনা ৱেৰমণিং দ্ৱে ৱস্সানি অৱীতিক্কম্ম সমাদানং সমাদিযামী’’তি.

অথ খো ভগৱা তা ভিক্খুনিযো অনেকপৰিযাযেন ৱিগৰহিত্ৱা দুব্ভৰতায…পে… এৱঞ্চ পন, ভিক্খৱে, ভিক্খুনিযো ইমং সিক্খাপদং উদ্দিসন্তু –

১০৯৭. ‘‘যা পন ভিক্খুনী পৰিপুণ্ণদ্ৱাদসৱস্সং গিহিগতং দ্ৱে ৱস্সানি ছসু ধম্মেসু অসিক্খিতসিক্খং ৱুট্ঠাপেয্য, পাচিত্তিয’’ন্তি.

১০৯৮. যা পনাতি যা যাদিসা…পে… ভিক্খুনীতি…পে… অযং ইমস্মিং অত্থে অধিপ্পেতা ভিক্খুনীতি.

পৰিপুণ্ণদ্ৱাদসৱস্সা নাম পত্তদ্ৱাদসৱস্সা. গিহিগতা নাম পুৰিসন্তৰগতা ৱুচ্চতি. দ্ৱে ৱস্সানীতি দ্ৱে সংৱচ্ছৰানি. অসিক্খিতসিক্খা নাম সিক্খা ৱা ন দিন্না হোতি, দিন্না ৱা সিক্খা কুপিতা. ৱুট্ঠাপেয্যাতি উপসম্পাদেয্য.

‘‘ৱুট্ঠাপেস্সামী’’তি গণং ৱা আচৰিনিং ৱা পত্তং ৱা চীৱৰং ৱা পৰিযেসতি, সীমং ৱা সম্মন্নতি, আপত্তি দুক্কটস্স. ঞত্তিযা দুক্কটং. দ্ৱীহি কম্মৱাচাহি দুক্কটা. কম্মৱাচাপৰিযোসানে উপজ্ঝাযায আপত্তি পাচিত্তিযস্স. গণস্স চ আচৰিনিযা চ আপত্তি দুক্কটস্স.

১০৯৯. ধম্মকম্মে ধম্মকম্মসঞ্ঞা ৱুট্ঠাপেতি, আপত্তি পাচিত্তিযস্স. ধম্মকম্মে ৱেমতিকা ৱুট্ঠাপেতি, আপত্তি পাচিত্তিযস্স. ধম্মকম্মে অধম্মকম্মসঞ্ঞা ৱুট্ঠাপেতি, আপত্তি পাচিত্তিযস্স.

অধম্মকম্মে ধম্মকম্মসঞ্ঞা ৱুট্ঠাপেতি, আপত্তি দুক্কটস্স. অধম্মকম্মে ৱেমতিকা ৱুট্ঠাপেতি, আপত্তি দুক্কটস্স. অধম্মকম্মে অধম্মকম্মসঞ্ঞা ৱুট্ঠাপেতি, আপত্তি দুক্কটস্স.

১১০০. অনাপত্তি পৰিপুণ্ণদ্ৱাদসৱস্সং গিহিগতং দ্ৱে ৱস্সানি ছসু ধম্মেসু সিক্খিতসিক্খং ৱুট্ঠাপেতি, উম্মত্তিকায, আদিকম্মিকাযাতি.

ছট্ঠসিক্খাপদং নিট্ঠিতং.

৭. সত্তমসিক্খাপদং

১১০১. তেন সমযেন বুদ্ধো ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তেন খো পন সমযেন ভিক্খুনিযো পৰিপুণ্ণদ্ৱাদসৱস্সং গিহিগতং দ্ৱে ৱস্সানি ছসু ধম্মেসু সিক্খিতসিক্খং সঙ্ঘেন অসম্মতং ৱুট্ঠাপেন্তি. ভিক্খুনিযো এৱমাহংসু – ‘‘এথ সিক্খমানা, ইমং জানাথ, ইমং দেথ, ইমং আহৰথ, ইমিনা অত্থো, ইমং কপ্পিযং কৰোথা’’তি. তা এৱমাহংসু – ‘‘ন মযং, অয্যে, সিক্খমানা, ভিক্খুনিযো ময’’ন্তি. যা তা ভিক্খুনিযো অপ্পিচ্ছা…পে… তা উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম ভিক্খুনিযো পৰিপুণ্ণদ্ৱাদসৱস্সং গিহিগতং দ্ৱে ৱস্সানি ছসু ধম্মেসু সিক্খিতসিক্খং সঙ্ঘেন অসম্মতং ৱুট্ঠাপেস্সন্তী’’তি…পে… সচ্চং কিৰ, ভিক্খৱে, ভিক্খুনিযো পৰিপুণ্ণদ্ৱাদসৱস্সং গিহিগতং দ্ৱে ৱস্সানি ছসু ধম্মেসু সিক্খিতসিক্খং সঙ্ঘেন অসম্মত্তং ৱুট্ঠাপেন্তীতি? ‘‘সচ্চং, ভগৱা’’তি. ৱিগৰহি বুদ্ধো ভগৱা…পে… কথঞ্হি নাম ভিক্খৱে ভিক্খুনিযো পৰিপুণ্ণদ্ৱাদসৱস্সং গিহিগতং দ্ৱে ৱস্সানি ছসু ধম্মেসু সিক্খিতসিক্খং সঙ্ঘেন অসম্মতং ৱুট্ঠাপেস্সন্তি! নেতং, ভিক্খৱে, অপ্পসন্নানং ৱা পসাদায…পে… ৱিগৰহিত্ৱা…পে… ধম্মিং কথং কত্ৱা ভিক্খূ আমন্তেসি – ‘‘অনুজানামি, ভিক্খৱে, পৰিপুণ্ণদ্ৱাদসৱস্সায গিহিগতায দ্ৱে ৱস্সানি ছসু ধম্মেসু সিক্খিতসিক্খায ৱুট্ঠানসম্মুতিং দাতুং. এৱঞ্চ পন, ভিক্খৱে, দাতব্বা. তায পৰিপুণ্ণদ্ৱাদসৱস্সায গিহিগতায দ্ৱে ৱস্সানি ছসু ধম্মেসু সিক্খিতসিক্খায সঙ্ঘং উপসঙ্কমিত্ৱা একংসং উত্তৰাসঙ্গং কৰিত্ৱা ভিক্খুনীনং পাদে ৱন্দিত্ৱা উক্কুটিকং নিসীদিত্ৱা অঞ্জলিং পগ্গহেত্ৱা এৱমস্স ৱচনীযো – অহং, অয্যে, ইত্থন্নামা ইত্থন্নামায অয্যায পৰিপুণ্ণদ্ৱাদসৱস্সা গিহিগতা দ্ৱে ৱস্সানি ছসু ধম্মেসু সিক্খিতসিক্খা, সঙ্ঘং ৱুট্ঠানসম্মুতিং যাচামী’’তি. দুতিযম্পি যাচিতব্বা. ততিযম্পি যাচিতব্বা. ব্যত্তায ভিক্খুনিযা পটিবলায সঙ্ঘো ঞাপেতব্বো.

১১০২. ‘‘সুণাতু মে, অয্যে, সঙ্ঘো. অযং ইত্থন্নামা ইত্থন্নামায অয্যায পৰিপুণ্ণদ্ৱাদসৱস্সা গিহিগতা দ্ৱে ৱস্সানি ছসু ধম্মেসু সিক্খিতসিক্খা সঙ্ঘং ৱুট্ঠানসম্মুতিং যাচতি. যদি সঙ্ঘস্স পত্তকল্লং, সঙ্ঘো ইত্থন্নামায পৰিপুণ্ণদ্ৱাদসৱস্সায গিহিগতায দ্ৱে ৱস্সানি ছসু ধম্মেসু সিক্খিতসিক্খায ৱুট্ঠানসম্মুতিং দদেয্য. এসা ঞত্তি.

‘‘সুণাতু মে, অয্যে, সঙ্ঘো. অযং ইত্থন্নামা ইত্থন্নামায অয্যায পৰিপুণ্ণদ্ৱাদসৱস্সা গিহিগতা দ্ৱে ৱস্সানি ছসু ধম্মেসু সিক্খিতসিক্খা সঙ্ঘং ৱুট্ঠানসম্মুতিং যাচতি. সঙ্ঘো ইত্থন্নামায পৰিপুণ্ণদ্ৱাদসৱস্সায গিহিগতায দ্ৱে ৱস্সানি ছসু ধম্মেসু সিক্খিতসিক্খায ৱুট্ঠানসম্মুতিং দেতি. যস্সা অয্যায খমতি ইত্থন্নামায পৰিপুণ্ণদ্ৱাদসৱস্সায গিহিগতায দ্ৱে ৱস্সানি ছসু ধম্মেসু সিক্খিতসিক্খায ৱুট্ঠানসম্মুতিযা দানং, সা তুণ্হস্স; যস্সা নক্খমতি, সা ভাসেয্য.

‘‘দিন্না সঙ্ঘেন ইত্থন্নামায পৰিপুণ্ণদ্ৱাদসৱস্সায গিহিগতায দ্ৱে ৱস্সানি ছসু ধম্মেসু সিক্খিতসিক্খায ৱুট্ঠানসম্মুতি. খমতি সঙ্ঘস্স, তস্মা তুণ্হী, এৱমেতং ধাৰযামী’’তি.

অথ খো ভগৱা তা ভিক্খুনিযো অনেকপৰিযাযেন ৱিগৰহিত্ৱা দুব্ভৰতায…পে… এৱঞ্চ পন, ভিক্খৱে, ভিক্খুনিযো ইমং সিক্খাপদং উদ্দিসন্তু –

১১০৩. ‘‘যা পন ভিক্খুনী পৰিপুণ্ণদ্ৱাদসৱস্সং গিহিগতং দ্ৱে ৱস্সানি ছসু ধম্মেসু সিক্খিতসিক্খং সঙ্ঘেন অসম্মতং ৱুট্ঠাপেয্য, পাচিত্তিয’’ন্তি.

১১০৪. যা পনাতি যা যাদিসা…পে… ভিক্খুনীতি…পে… অযং ইমস্মিং অত্থে অধিপ্পেতা ভিক্খুনীতি.

পৰিপুণ্ণদ্ৱাদসৱস্সা নাম পত্তদ্ৱাদসৱস্সা. গিহিগতা নাম পুৰিসন্তৰগতা ৱুচ্চতি. দ্ৱে ৱস্সানীতি দ্ৱে সংৱচ্ছৰানি. সিক্খিতসিক্খা নাম ছসু ধম্মেসু সিক্খিতসিক্খা. অসম্মতা নাম ঞত্তিদুতিযেন কম্মেন ৱুট্ঠানসম্মুতি ন দিন্না হোতি. ৱুট্ঠাপেয্যাতি উপসম্পাদেয্য.

‘‘ৱুট্ঠাপেস্সামী’’তি গণং ৱা আচৰিনিং ৱা পত্তং ৱা চীৱৰং ৱা পৰিযেসতি, সীমং ৱা সম্মন্নতি, আপত্তি দুক্কটস্স. ঞত্তিযা দুক্কটং. দ্ৱীহি কম্মৱাচাহি দুক্কটা. কম্মৱাচাপৰিযোসানে উপজ্ঝাযায আপত্তি পাচিত্তিযস্স. গণস্স চ আচৰিনিযা চ আপত্তি দুক্কটস্স.

১১০৫. ধম্মকম্মে ধম্মকম্মসঞ্ঞা ৱুট্ঠাপেতি, আপত্তি পাচিত্তিযস্স. ধম্মকম্মে ৱেমতিকা ৱুট্ঠাপেতি, আপত্তি পাচিত্তিযস্স. ধম্মকম্মে অধম্মকম্মসঞ্ঞা ৱুট্ঠাপেতি, আপত্তি পাচিত্তিযস্স.

অধম্মকম্মে ধম্মকম্মসঞ্ঞা, আপত্তি দুক্কটস্স. অধম্মকম্মে ৱেমতিকা, আপত্তি দুক্কটস্স. অধম্মকম্মে অধম্মকম্মসঞ্ঞা, আপত্তি দুক্কটস্স.

১১০৬. অনাপত্তি পৰিপুণ্ণদ্ৱাদসৱস্সং গিহিগতং দ্ৱে ৱস্সানি ছসু ধম্মেসু সিক্খিতসিক্খং সঙ্ঘেন সম্মতং ৱুট্ঠাপেতি, উম্মত্তিকায, আদিকম্মিকাযাতি.

সত্তমসিক্খাপদং নিট্ঠিতং.

৮. অট্ঠমসিক্খাপদং

১১০৭. তেন সমযেন বুদ্ধো ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তেন খো পন সমযেন থুল্লনন্দা ভিক্খুনী সহজীৱিনিং ৱুট্ঠাপেত্ৱা দ্ৱে ৱস্সানি নেৱ অনুগ্গণ্হাতি ন অনুগ্গণ্হাপেতি. তা বালা হোন্তি অব্যত্তা; ন জানন্তি কপ্পিযং ৱা অকপ্পিযং ৱা. যা তা ভিক্খুনিযো অপ্পিচ্ছা…পে… তা উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম অয্যা থুল্লনন্দা সহজীৱিনিং ৱুট্ঠাপেত্ৱা দ্ৱে ৱস্সানি নেৱ অনুগ্গণ্হিস্সতি ন অনুগ্গণ্হাপেস্সতী’’তি…পে… সচ্চং কিৰ, ভিক্খৱে, থুল্লনন্দা ভিক্খুনী সহজীৱিনিং ৱুট্ঠাপেত্ৱা দ্ৱে ৱস্সানি নেৱ অনুগ্গণ্হাতি ন অনুগ্গণ্হাপেতীতি? ‘‘সচ্চং, ভগৱা’’তি. ৱিগৰহি বুদ্ধো ভগৱা…পে… কথঞ্হি নাম, ভিক্খৱে, থুল্লনন্দা ভিক্খুনী সহজীৱিনিং ৱুট্ঠাপেত্ৱা দ্ৱে ৱস্সানি নেৱ অনুগ্গণ্হিস্সতি ন অনুগ্গণ্হাপেস্সতি! নেতং, ভিক্খৱে, অপ্পসন্নানং ৱা পসাদায…পে… এৱঞ্চ পন, ভিক্খৱে, ভিক্খুনিযো ইমং সিক্খাপদং উদ্দিসন্তু –

১১০৮. ‘‘যা পন ভিক্খুনী সহজীৱিনিং ৱুট্ঠাপেত্ৱা দ্ৱে ৱস্সানি নেৱ অনুগ্গণ্হেয্য ন অনুগ্গণ্হাপেয্য, পাচিত্তিয’’ন্তি.

১১০৯. যা পনাতি যা যাদিসা…পে… ভিক্খুনীতি…পে… অযং ইমস্মিং অত্থে অধিপ্পেতা ভিক্খুনীতি.

সহজীৱিনী নাম সদ্ধিৱিহাৰিনী ৱুচ্চতি. ৱুট্ঠাপেত্ৱাতি উপসম্পাদেত্ৱা. দ্ৱে ৱস্সানীতি দ্ৱে সংৱচ্ছৰানি.

নেৱ অনুগ্গণ্হেয্যাতি ন সযং অনুগ্গণ্হেয্য উদ্দেসেন পৰিপুচ্ছায ওৱাদেন অনুসাসনিযা.

ন অনুগ্গণ্হাপেয্যাতি ন অঞ্ঞং আণাপেয্য ‘‘দ্ৱে ৱস্সানি নেৱ অনুগ্গণ্হিস্সামি ন অনুগ্গণ্হাপেস্সামী’’তি ধুৰং নিক্খিত্তমত্তে আপত্তি পাচিত্তিযস্স.

১১১০. অনাপত্তি সতি অন্তৰাযে, পৰিযেসিত্ৱা ন লভতি, গিলানায, আপদাসু, উম্মত্তিকায, আদিকম্মিকাযাতি.

অট্ঠমসিক্খাপদং নিট্ঠিতং.

৯. নৱমসিক্খাপদং

১১১১. তেন সমযেন বুদ্ধো ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তেন খো পন সমযেন ভিক্খুনিযো ৱুট্ঠাপিতং পৱত্তিনিং দ্ৱে ৱস্সানি নানুবন্ধন্তি. তা বালা হোন্তি অব্যত্তা; ন জানন্তি কপ্পিযং ৱা অকপ্পিযং ৱা. যা তা ভিক্খুনিযো অপ্পিচ্ছা…পে… তা উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম ভিক্খুনিযো ৱুট্ঠাপিতং পৱত্তিনিং দ্ৱে ৱস্সানি নানুবন্ধিস্সন্তী’’তি…পে… সচ্চং কিৰ, ভিক্খৱে, ভিক্খুনিযো ৱুট্ঠাপিতং পৱত্তিনিং দ্ৱে ৱস্সানি নানুবন্ধন্তীতি? ‘‘সচ্চং, ভগৱা’’তি. ৱিগৰহি বুদ্ধো ভগৱা…পে… কথঞ্হি নাম, ভিক্খৱে, ভিক্খুনিযো ৱুট্ঠাপিতং পৱত্তিনিং দ্ৱে ৱস্সানি নানুবন্ধিস্সন্তি! নেতং, ভিক্খৱে, অপ্পসন্নানং ৱা পসাদায…পে… এৱঞ্চ পন, ভিক্খৱে, ভিক্খুনিযো ইমং সিক্খাপদং উদ্দিসন্তু –

১১১২. ‘‘যা পন ভিক্খুনী ৱুট্ঠাপিতং পৱত্তিনিং দ্ৱে ৱস্সানি নানুবন্ধেয্য, পাচিত্তিয’’ন্তি.

১১১৩. যা পনাতি যা যাদিসা…পে… ভিক্খুনীতি…পে… অযং ইমস্মিং অত্থে অধিপ্পেতা ভিক্খুনীতি.

ৱুট্ঠাপিতন্তি উপসম্পাদিতং. পৱত্তিনী নাম উপজ্ঝাযা ৱুচ্চতি. দ্ৱে ৱস্সানীতি দ্ৱে সংৱচ্ছৰানি. নানুবন্ধেয্যাতি ন সযং উপট্ঠহেয্য. দ্ৱে ৱস্সানি নানুবন্ধিস্সামীতি ধুৰং নিক্খিত্তমত্তে আপত্তি পাচিত্তিযস্স.

১১১৪. অনাপত্তি উপজ্ঝাযা বালা ৱা হোতি অলজ্জিনী ৱা, গিলানায, আপদাসু, উম্মত্তিকায, আদিকম্মিকাযাতি.

নৱমসিক্খাপদং নিট্ঠিতং.

১০. দসমসিক্খাপদং

১১১৫. তেন সমযেন বুদ্ধো ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তেন খো পন সমযেন থুল্লনন্দা ভিক্খুনী সহজীৱিনিং ৱুট্ঠাপেত্ৱা নেৱ ৱূপকাসেতি ন ৱূপকাসাপেতি. সামিকো অগ্গহেসি. যা তা ভিক্খুনিযো অপ্পিচ্ছা…পে… তা উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম অয্যা থুল্লনন্দা সহজীৱিনিং ৱুট্ঠাপেত্ৱা নেৱ ৱূপকাসেস্সতি ন ৱূপকাসাপেস্সতি, সামিকো অগ্গহেসি! সচাযং ভিক্খুনী পক্কন্তা অস্স, ন চ সামিকো গণ্হেয্যা’’তি…পে… সচ্চং কিৰ, ভিক্খৱে, থুল্লনন্দা ভিক্খুনী সহজীৱিনিং ৱুট্ঠাপেত্ৱা নেৱ ৱূপকাসেতি ন ৱূপকাসাপেতি […সি (ক.)], সামিকো অগ্গহেসীতি? ‘‘সচ্চং, ভগৱা’’তি. ৱিগৰহি বুদ্ধো ভগৱা…পে… কথঞ্হি নাম, ভিক্খৱে, থুল্লনন্দা ভিক্খুনী সহজীৱিনিং ৱুট্ঠাপেত্ৱা নেৱ ৱূপকাসেস্সতি ন ৱূপকাসাপেস্সতি, সামিকো অগ্গহেসি! নেতং, ভিক্খৱে, অপ্পসন্নানং ৱা পসাদায…পে… এৱঞ্চ পন, ভিক্খৱে, ভিক্খুনিযো ইমং সিক্খাপদং উদ্দিসন্তু –

১১১৬. ‘‘যা পন ভিক্খুনী সহজীৱিনিং ৱুট্ঠাপেত্ৱা নেৱ ৱূপকাসেয্য ন ৱূপকাসাপেয্য অন্তমসো ছপ্পঞ্চযোজনানিপি, পাচিত্তিয’’ন্তি.

১১১৭. যা পনাতি যা যাদিসা…পে… ভিক্খুনীতি…পে… অযং ইমস্মিং অত্থে অধিপ্পেতা ভিক্খুনীতি.

সহজীৱিনী নাম সদ্ধিৱিহাৰিনী ৱুচ্চতি. ৱুট্ঠাপেত্ৱাতি উপসম্পাদেত্ৱা. নেৱ ৱূপকাসেয্যাতি ন সযং ৱূপকাসেয্য. ন ৱূপকাসাপেয্যাতি ন অঞ্ঞং আণাপেয্য. ‘‘নেৱ ৱূপকাসেস্সামি ন ৱূপকাসাপেস্সামি অন্তমসো ছপ্পঞ্চযোজনানিপী’’তি ধুৰং নিক্খিত্তমত্তে আপত্তি পাচিত্তিযস্স.

১১১৮. অনাপত্তি সতি অন্তৰাযে, পৰিযেসিত্ৱা দুতিযিকং ভিক্খুনিং ন লভতি, গিলানায, আপদাসু, উম্মত্তিকায, আদিকম্মিকাযাতি.

দসমসিক্খাপদং নিট্ঠিতং.

গব্ভিনিৱগ্গো সত্তমো.