৮. কুমাৰীভূতৱগ্গো

১. পঠমসিক্খাপদং

১১১৯. তেন সমযেন বুদ্ধো ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তেন খো পন সমযেন ভিক্খুনিযো ঊনৱীসতিৱস্সং কুমাৰিভূতং ৱুট্ঠাপেন্তি. তা অক্খমা হোন্তি সীতস্স উণ্হস্স জিঘচ্ছায পিপাসায ডংসমকসৱাতাতপসৰীসপসম্ফস্সানং দুৰুত্তানং দুৰাগতানং ৱচনপথানং. উপ্পন্নানং সাৰীৰিকানং ৱেদনানং দুক্খানং তিব্বানং খৰানং কটুকানং অসাতানং অমনাপানং পাণহৰানং অনধিৱাসকজাতিকা হোন্তি. যা তা ভিক্খুনিযো অপ্পিচ্ছা…পে… তা উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম ভিক্খুনিযো ঊনৱীসতিৱস্সং কুমাৰিভূতং ৱুট্ঠাপেস্সন্তী’’তি…পে… সচ্চং কিৰ, ভিক্খৱে, ভিক্খুনিযো ঊনৱীসতিৱস্সং কুমাৰিভূতং ৱুট্ঠাপেন্তীতি? ‘‘সচ্চং, ভগৱা’’তি. ৱিগৰহি বুদ্ধো ভগৱা…পে… কথঞ্হি নাম, ভিক্খৱে, ভিক্খুনিযো ঊনৱীসতিৱস্সং কুমাৰিভূতং ৱুট্ঠাপেস্সন্তি! ঊনৱীসতিৱস্সা, ভিক্খৱে, কুমাৰিভূতা অক্খমা হোতি সীতস্স উণ্হস্স…পে… পাণহৰানং অনধিৱাসকজাতিকা হোতি. ৱীসতিৱস্সাৱ খো, ভিক্খৱে, কুমাৰিভূতা খমা হোতি সীতস্স উণ্হস্স…পে… পাণহৰানং অধিৱাসকজাতিকা হোতি. নেতং, ভিক্খৱে, অপ্পসন্নানং ৱা পসাদায…পে… এৱঞ্চ পন, ভিক্খৱে, ভিক্খুনিযো ইমং সিক্খাপদং উদ্দিসন্তু –

১১২০. ‘‘যা পন ভিক্খুনী ঊনৱীসতিৱস্সং কুমাৰিভূতং ৱুট্ঠাপেয্য, পাচিত্তিয’’ন্তি.

১১২১. যা পনাতি যা যাদিসা…পে… ভিক্খুনীতি…পে… অযং ইমস্মিং অত্থে অধিপ্পেতা ভিক্খুনীতি.

ঊনৱীসতিৱস্সা নাম অপ্পত্তৱীসতিৱস্সা. কুমাৰিভূতা নাম সামণেৰী ৱুচ্চতি. ৱুট্ঠাপেয্যাতি উপসম্পাদেয্য.

‘‘ৱুট্ঠাপেস্সামী’’তি গণং ৱা আচৰিনিং ৱা পত্তং ৱা চীৱৰং ৱা পৰিযেসতি, সীমং ৱা সম্মন্নতি, আপত্তি দুক্কটস্স. ঞত্তিযা দুক্কটং. দ্ৱীহি কম্মৱাচাহি দুক্কটা. কম্মৱাচাপৰিযোসানে উপজ্ঝাযায আপত্তি পাচিত্তিযস্স. গণস্স চ আচৰিনিযা চ আপত্তি দুক্কটস্স.

১১২২. ঊনৱীসতিৱস্সায ঊনৱীসতিৱস্সসঞ্ঞা ৱুট্ঠাপেতি, আপত্তি পাচিত্তিযস্স. ঊনৱীসতিৱস্সায ৱেমতিকা ৱুট্ঠাপেতি, আপত্তি দুক্কটস্স. ঊনৱীসতিৱস্সায পৰিপুণ্ণসঞ্ঞা ৱুট্ঠাপেতি, অনাপত্তি. পৰিপুণ্ণৱীসতিৱস্সায ঊনৱীসতিৱস্সসঞ্ঞা, আপত্তি দুক্কটস্স. পৰিপুণ্ণৱীসতিৱস্সায ৱেমতিকা, আপত্তি দুক্কটস্স. পৰিপুণ্ণৱীসতিৱস্সায পৰিপুণ্ণসঞ্ঞা, অনাপত্তি.

১১২৩. অনাপত্তি ঊনৱীসতিৱস্সং পৰিপুণ্ণসঞ্ঞা ৱুট্ঠাপেতি, পৰিপুণ্ণৱীসতিৱস্সং পৰিপুণ্ণসঞ্ঞা ৱুট্ঠাপেতি, উম্মত্তিকায, আদিকম্মিকাযাতি.

পঠমসিক্খাপদং নিট্ঠিতং.

২. দুতিযসিক্খাপদং

১১২৪. তেন সমযেন বুদ্ধো ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তেন খো পন সমযেন ভিক্খুনিযো পৰিপুণ্ণৱীসতিৱস্সং কুমাৰিভূতং দ্ৱে ৱস্সানি ছসু ধম্মেসু অসিক্খিতসিক্খং ৱুট্ঠাপেন্তি. তা বালা হোন্তি অব্যত্তা; ন জানন্তি কপ্পিযং ৱা অকপ্পিযং ৱা. যা তা ভিক্খুনিযো অপ্পিচ্ছা…পে… তা উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম ভিক্খুনিযো পৰিপুণ্ণৱীসতিৱস্সং কুমাৰিভূতং দ্ৱে ৱস্সানি ছসু ধম্মেসু অসিক্খিতসিক্খং ৱুট্ঠাপেস্সন্তী’’তি…পে… সচ্চং কিৰ, ভিক্খৱে, ভিক্খুনিযো পৰিপুণ্ণৱীসতিৱস্সং কুমাৰিভূতং দ্ৱে ৱস্সানি ছসু ধম্মেসু অসিক্খিতসিক্খং ৱুট্ঠাপেন্তীতি? ‘‘সচ্চং, ভগৱা’’তি. ৱিগৰহি বুদ্ধো ভগৱা…পে… কথঞ্হি নাম, ভিক্খৱে, ভিক্খুনিযো পৰিপুণ্ণৱীসতিৱস্সং কুমাৰিভূতং দ্ৱে ৱস্সানি ছসু ধম্মেসু অসিক্খিতসিক্খং ৱুট্ঠাপেস্সন্তি! নেতং, ভিক্খৱে, অপ্পসন্নানং ৱা পসাদায…পে… ৱিগৰহিত্ৱা…পে… ধম্মিং কথং কত্ৱা ভিক্খূ আমন্তেসি – ‘‘অনুজানামি, ভিক্খৱে, অট্ঠাৰসৱস্সায কুমাৰিভূতায দ্ৱে ৱস্সানি ছসু ধম্মেসু সিক্খাসম্মুতিং দাতুং. এৱঞ্চ পন ভিক্খৱে দাতব্বা. তায অট্ঠাৰসৱস্সায কুমাৰিভূতায সঙ্ঘং উপসঙ্কমিত্ৱা একংসং উত্তৰাসঙ্গং কৰিত্ৱা ভিক্খুনীনং পাদে ৱন্দিত্ৱা উক্কুটিকং নিসীদিত্ৱা অঞ্জলিং পগ্গহেত্ৱা এৱমস্স ৱচনীযো – অহং, অয্যে, ইত্থন্নামা ইত্থন্নামায অয্যায অট্ঠাৰসৱস্সা কুমাৰিভূতা সঙ্ঘং দ্ৱে ৱস্সানি ছসু ধম্মেসু সিক্খাসম্মুতিং যাচামী’’তি. দুতিযম্পি যাচিতব্বা. ততিযম্পি যাচিতব্বা. ব্যত্তায ভিক্খুনিযা পটিবলায সঙ্ঘো ঞাপেতব্বো –

১১২৫. ‘‘সুণাতু মে, অয্যে, সঙ্ঘো. অযং ইত্থন্নামা ইত্থন্নামায অয্যায অট্ঠাৰসৱস্সা কুমাৰিভূতা সঙ্ঘং দ্ৱে ৱস্সানি ছসু ধম্মেসু সিক্খাসম্মুতিং যাচতি. যদি সঙ্ঘস্স পত্তকল্লং, সঙ্ঘো ইত্থন্নামায অট্ঠাৰসৱস্সায কুমাৰিভূতায দ্ৱে ৱস্সানি ছসু ধম্মেসু সিক্খাসম্মুতিং দদেয্য. এসা ঞত্তি.

‘‘সুণাতু মে, অয্যে, সঙ্ঘো. অযং ইত্থন্নামা ইত্থন্নামায অয্যায অট্ঠাৰসৱস্সা কুমাৰিভূতা সঙ্ঘং দ্ৱে ৱস্সানি ছসু ধম্মেসু সিক্খাসম্মুতিং যাচতি. সঙ্ঘো ইত্থন্নামায অট্ঠাৰসৱস্সায কুমাৰিভূতায দ্ৱে ৱস্সানি ছসু ধম্মেসু সিক্খাসম্মুতিং দেতি. যস্সা অয্যায খমতি ইত্থন্নামায অট্ঠাৰসৱস্সায কুমাৰিভূতায দ্ৱে ৱস্সানি ছসু ধম্মেসু সিক্খাসম্মুতিযা দানং, সা তুণ্হস্স; যস্সা নক্খমতি, সা ভাসেয্য.

‘‘দিন্না সঙ্ঘেন ইত্থন্নামায অট্ঠাৰসৱস্সায কুমাৰিভূতায দ্ৱে ৱস্সানি ছসু ধম্মেসু সিক্খাসম্মুতি. খমতি সঙ্ঘস্স, তস্মা তুণ্হী, এৱমেতং ধাৰযামী’’তি.

সা অট্ঠাৰসৱস্সা কুমাৰিভূতা এৱং ৱদেহীতি ৱত্তব্বা – ‘‘পাণাতিপাতা ৱেৰমণিং দ্ৱে ৱস্সানি অৱীতিক্কম্ম সমাদানং সমাদিযামি…পে… ৱিকালভোজনা ৱেৰমণিং দ্ৱে ৱস্সানি অৱীতিক্কম্ম সমাদানং সমাদিযামী’’তি.

অথ খো ভগৱা তা ভিক্খুনিযো অনেকপৰিযাযেন ৱিগৰহিত্ৱা দুব্ভৰতায…পে… এৱঞ্চ পন, ভিক্খৱে, ভিক্খুনিযো ইমং সিক্খাপদং উদ্দিসন্তু –

১১২৬. ‘‘যা পন ভিক্খুনী পৰিপুণ্ণৱীসতিৱস্সং কুমাৰিভূতং দ্ৱে ৱস্সানি ছসু ধম্মেসু অসিক্খিতসিক্খং ৱুট্ঠাপেয্য, পাচিত্তিয’’ন্তি.

১১২৭. যা পনাতি যা যাদিসা…পে… ভিক্খুনীতি…পে… অযং ইমস্মিং অত্থে অধিপ্পেতা ভিক্খুনীতি.

পৰিপুণ্ণৱীসতিৱস্সা নাম পত্তৱীসতিৱস্সা. কুমাৰিভূতা নাম সামণেৰী ৱুচ্চতি. দ্ৱে ৱস্সানীতি দ্ৱে সংৱচ্ছৰানি. অসিক্খিতসিক্খা নাম সিক্খা ৱা ন দিন্না হোতি, দিন্না ৱা সিক্খা কুপিতা. ৱুট্ঠাপেয্যাতি উপসম্পাদেয্য.

১১২৮. ধম্মকম্মে ধম্মকম্মসঞ্ঞা ৱুট্ঠাপেতি, আপত্তি পাচিত্তিযস্স. ধম্মকম্মে ৱেমতিকা ৱুট্ঠাপেতি, আপত্তি পাচিত্তিযস্স. ধম্মকম্মে অধম্মকম্মসঞ্ঞা ৱুট্ঠাপেতি, আপত্তি পাচিত্তিযস্স.

অধম্মকম্মে ধম্মকম্মসঞ্ঞা, আপত্তি দুক্কটস্স. অধম্মকম্মে ৱেমতিকা, আপত্তি দুক্কটস্স. অধম্মকম্মে অধম্মকম্মসঞ্ঞা, আপত্তি দুক্কটস্স.

১১২৯. অনাপত্তি পৰিপুণ্ণৱীসতিৱস্সং কুমাৰিভূতং দ্ৱে ৱস্সানি ছসু ধম্মেসু সিক্খিতসিক্খং ৱুট্ঠাপেতি, উম্মত্তিকায, আদিকম্মিকাযাতি.

দুতিযসিক্খাপদং নিট্ঠিতং.

৩. ততিযসিক্খাপদং

১১৩০. তেন সমযেন বুদ্ধো ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তেন খো পন সমযেন ভিক্খুনিযো পৰিপুণ্ণৱীসতিৱস্সং কুমাৰিভূতং দ্ৱে ৱস্সানি ছসু ধম্মেসু সিক্খিতসিক্খং সঙ্ঘেন অসম্মতং ৱুট্ঠাপেন্তি. ভিক্খুনিযো এৱমাহংসু – ‘‘এথ সিক্খমানা, ইমং জানাথ, ইমং দেথ, ইমং আহৰথ, ইমিনা অত্থো, ইমং কপ্পিযং কৰোথা’’তি. তা এৱমাহংসু – ‘‘ন মযং, অয্যে, সিক্খমানা; ভিক্খুনিযো ময’’ন্তি. যা তা ভিক্খুনিযো অপ্পিচ্ছা…পে… তা উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম ভিক্খুনিযো পৰিপুণ্ণৱীসতিৱস্সং কুমাৰিভূতং দ্ৱে ৱস্সানি ছসু ধম্মেসু সিক্খিতসিক্খং সঙ্ঘেন অসম্মতং ৱুট্ঠাপেস্সন্তী’’তি…পে… সচ্চং কিৰ, ভিক্খৱে, ভিক্খুনিযো পৰিপুণ্ণৱীসতিৱস্সং কুমাৰিভূতং দ্ৱে ৱস্সানি ছসু ধম্মেসু সিক্খিতসিক্খং সঙ্ঘেন অসম্মতং ৱুট্ঠাপেন্তীতি? ‘‘সচ্চং, ভগৱা’’তি. ৱিগৰহি বুদ্ধো ভগৱা…পে… কথঞ্হি নাম, ভিক্খৱে, ভিক্খুনিযো পৰিপুণ্ণৱীসতিৱস্সং কুমাৰিভূতং দ্ৱে ৱস্সানি ছসু ধম্মেসু সিক্খিতসিক্খং সঙ্ঘেন অসম্মতং ৱুট্ঠাপেস্সন্তি! নেতং, ভিক্খৱে, অপ্পসন্নানং ৱা পসাদায…পে… ৱিগৰহিত্ৱা…পে… ধম্মিং কথং কত্ৱা ভিক্খূ আমন্তেসি – ‘‘অনুজানামি, ভিক্খৱে, পৰিপুণ্ণৱীসতিৱস্সায কুমাৰিভূতায দ্ৱে ৱস্সানি ছসু ধম্মেসু সিক্খিতসিক্খায ৱুট্ঠানসম্মুতিং দাতুং. এৱঞ্চ পন, ভিক্খৱে, দাতব্বা. তায পৰিপুণ্ণৱীসতিৱস্সায কুমাৰিভূতায দ্ৱে ৱস্সানি ছসু ধম্মেসু সিক্খিতসিক্খায সঙ্ঘং উপসঙ্কমিত্ৱা একংসং উত্তৰাসঙ্গং কৰিত্ৱা ভিক্খুনীনং পাদে ৱন্দিত্ৱা উক্কুটিকং নিসীদিত্ৱা অঞ্জলিং পগ্গহেত্ৱা এৱমস্স ৱচনীযো – অহং, অয্যে, ইত্থন্নামা ইত্থন্নামায অয্যায পৰিপুণ্ণৱীসতিৱস্সা কুমাৰিভূতা দ্ৱে ৱস্সানি ছসু ধম্মেসু সিক্খিতসিক্খা সঙ্ঘং ৱুট্ঠানসম্মুতিং যাচামী’’তি. দুতিযম্পি যাচিতব্বা. ততিযম্পি যাচিতব্বা. ব্যত্তায ভিক্খুনিযা পটিবলায সঙ্ঘো ঞাপেতব্বো –

১১৩১. ‘‘সুণাতু মে, অয্যে, সঙ্ঘো. অযং ইত্থন্নামা ইত্থন্নামায অয্যায পৰিপুণ্ণৱীসতিৱস্সা কুমাৰিভূতা দ্ৱে ৱস্সানি ছসু ধম্মেসু সিক্খিতসিক্খা সঙ্ঘং ৱুট্ঠানসম্মুতিং যাচতি. যদি সঙ্ঘস্স পত্তকল্লং সঙ্ঘো ইত্থন্নামায পৰিপুণ্ণৱীসতিৱস্সায কুমাৰিভূতায দ্ৱে ৱস্সানি ছসু ধম্মেসু সিক্খিতসিক্খায ৱুট্ঠানসম্মুতিং দদেয্য. এসা ঞত্তি.

‘‘সুণাতু মে, অয্যে, সঙ্ঘো. অযং ইত্থন্নামা ইত্থন্নামায অয্যায পৰিপুণ্ণৱীসতিৱস্সা কুমাৰিভূতা দ্ৱে ৱস্সানি ছসু ধম্মেসু সিক্খিতসিক্খা সঙ্ঘং ৱুট্ঠানসম্মুতিং যাচতি. সঙ্ঘো ইত্থন্নামায পৰিপুণ্ণৱীসতিৱস্সায কুমাৰিভূতায দ্ৱে ৱস্সানি ছসু ধম্মেসু সিক্খিতসিক্খায ৱুট্ঠানসম্মুতিং দেতি. যস্সা অয্যায খমতি ইত্থন্নামায পৰিপুণ্ণৱীসতিৱস্সায কুমাৰিভূতায দ্ৱে ৱস্সানি ছসু ধম্মেসু সিক্খিতসিক্খায ৱুট্ঠানসম্মুতিযা দানং, সা তুণ্হস্স; যস্সা নক্খমতি, সা ভাসেয্য.

‘‘দিন্না সঙ্ঘেন ইত্থন্নামায পৰিপুণ্ণৱীসতিৱস্সায কুমাৰিভূতায দ্ৱে ৱস্সানি ছসু ধম্মেসু সিক্খিতসিক্খায ৱুট্ঠানসম্মুতি. খমতি সঙ্ঘস্স, তস্মা তুণ্হী, এৱমেতং ধাৰযামী’’তি.

১১৩২. ‘‘যা পন ভিক্খুনী পৰিপুণ্ণৱীসতিৱস্সং কুমাৰিভূতং দ্ৱে ৱস্সানি ছসু ধম্মেসু সিক্খিতসিক্খং সঙ্ঘেন অসম্মতং ৱুট্ঠাপেয্য, পাচিত্তিয’’ন্তি.

১১৩৩. যা পনাতি যা যাদিসা…পে… ভিক্খুনীতি…পে… অযং ইমস্মিং অত্থে অধিপ্পেতা ভিক্খুনীতি.

পৰিপুণ্ণৱীসতিৱস্সা নাম পত্তৱীসতিৱস্সা. কুমাৰিভূতা নাম সামণেৰী ৱুচ্চতি. দ্ৱে ৱস্সানীতি দ্ৱে সংৱচ্ছৰানি. সিক্খিতসিক্খা নাম ছসু ধম্মেসু সিক্খিতসিক্খা. অসম্মতা নাম ঞত্তিদুতিযেন কম্মেন ৱুট্ঠানসম্মুতি ন দিন্না হোতি. ৱুট্ঠাপেয্যাতি উপসম্পাদেয্য.

১১৩৪. ধম্মকম্মে ধম্মকম্মসঞ্ঞা ৱুট্ঠাপেতি, আপত্তি পাচিত্তিযস্স. ধম্মকম্মে ৱেমতিকা ৱুট্ঠাপেতি, আপত্তি পাচিত্তিযস্স. ধম্মকম্মে অধম্মকম্মসঞ্ঞা ৱুট্ঠাপেতি, আপত্তি পাচিত্তিযস্স.

১১৩৫. অনাপত্তি পৰিপুণ্ণৱীসতিৱস্সং কুমাৰিভূতং দ্ৱে ৱস্সানি ছসু ধম্মেসু সিক্খিতসিক্খং সঙ্ঘেন সম্মতং ৱুট্ঠাপেতি, উম্মত্তিকায, আদিকম্মিকাযাতি.

ততিযসিক্খাপদং নিট্ঠিতং.

৪. চতুত্থসিক্খাপদং

১১৩৬. তেন সমযেন বুদ্ধো ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তেন খো পন সমযেন ভিক্খুনিযো ঊনদ্ৱাদসৱস্সা ৱুট্ঠাপেন্তি. তা বালা হোন্তি অব্যত্তা ন জানন্তি কপ্পিযং ৱা অকপ্পিযং ৱা. সদ্ধিৱিহাৰিনিযোপি বালা হোন্তি অব্যত্তা; ন জানন্তি কপ্পিযং ৱা অকপ্পিযং ৱা. যা তা ভিক্খুনিযো অপ্পিচ্ছা…পে… তা উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম ভিক্খুনিযো ঊনদ্ৱাদসৱস্সা ৱুট্ঠাপেস্সন্তী’’তি…পে… সচ্চং কিৰ, ভিক্খৱে, ভিক্খুনিযো ঊনদ্ৱাদসৱস্সা ৱুট্ঠাপেন্তীতি? ‘‘সচ্চং, ভগৱা’’তি. ৱিগৰহি বুদ্ধো ভগৱা…পে… কথঞ্হি নাম, ভিক্খৱে, ভিক্খুনিযো ঊনদ্ৱাদসৱস্সা ৱুট্ঠাপেস্সন্তি! নেতং, ভিক্খৱে, অপ্পসন্নানং ৱা পসাদায…পে… এৱঞ্চ পন, ভিক্খৱে, ভিক্খুনিযো ইমং সিক্খাপদং উদ্দিসন্তু –

১১৩৭. ‘‘যা পন ভিক্খুনী ঊনদ্ৱাদসৱস্সা ৱুট্ঠাপেয্য, পাচিত্তিয’’ন্তি.

১১৩৮. যা পনাতি যা যাদিসা…পে… ভিক্খুনীতি…পে… অযং ইমস্মিং অত্থে অধিপ্পেতা ভিক্খুনীতি.

ঊনদ্ৱাদসৱস্সা নাম অপ্পত্তদ্ৱাদসৱস্সা.

ৱুট্ঠাপেয্যাতি উপসম্পাদেয্য.

১১৩৯. অনাপত্তি পৰিপুণ্ণদ্ৱাদসৱস্সা ৱুট্ঠাপেতি, উম্মত্তিকায, আদিকম্মিকাযাতি.

চতুত্থসিক্খাপদং নিট্ঠিতং.

৫. পঞ্চমসিক্খাপদং

১১৪০. তেন সমযেন বুদ্ধো ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তেন খো পন সমযেন ভিক্খুনিযো পৰিপুণ্ণদ্ৱাদসৱস্সা সঙ্ঘেন অসম্মতা ৱুট্ঠাপেন্তি. তা বালা হোন্তি অব্যত্তা; ন জানন্তি কপ্পিযং ৱা অকপ্পিযং ৱা. সদ্ধিৱিহাৰিনিযোপি বালা হোন্তি অব্যত্তা; ন জানন্তি কপ্পিযং ৱা অকপ্পিযং ৱা. যা তা ভিক্খুনিযো অপ্পিচ্ছা…পে… তা উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম ভিক্খুনিযো পৰিপুণ্ণদ্ৱাদসৱস্সা সঙ্ঘেন অসম্মতা ৱুট্ঠাপেস্সন্তী’’তি…পে… সচ্চং কিৰ, ভিক্খৱে, ভিক্খুনিযো পৰিপুণ্ণদ্ৱাদসৱস্সা সঙ্ঘেন অসম্মতা ৱুট্ঠাপেন্তীতি? ‘‘সচ্চং, ভগৱা’’তি. ৱিগৰহি বুদ্ধো ভগৱা…পে… কথঞ্হি নাম, ভিক্খৱে, ভিক্খুনিযো পৰিপুণ্ণদ্ৱাদসৱস্সা সঙ্ঘেন অসম্মতা ৱুট্ঠাপেস্সন্তি! নেতং, ভিক্খৱে, অপ্পসন্নানং ৱা পসাদায…পে… ৱিগৰহিত্ৱা…পে… ধম্মিং কথং কত্ৱা ভিক্খূ আমন্তেসি – ‘‘অনুজানামি, ভিক্খৱে, পৰিপুণ্ণদ্ৱাদসৱস্সায ভিক্খুনিযা ৱুট্ঠাপনসম্মুতিং দাতুং. এৱঞ্চ পন, ভিক্খৱে, দাতব্বা. তায পৰিপুণ্ণদ্ৱাদসৱস্সায ভিক্খুনিযা সঙ্ঘং উপসঙ্কমিত্ৱা একংসং উত্তৰাসঙ্গং কৰিত্ৱা ৱুড্ঢানং ভিক্খুনীনং পাদে ৱন্দিত্ৱা উক্কুটিকং নিসীদিত্ৱা অঞ্জলিং পগ্গহেত্ৱা এৱমস্স ৱচনীযো – অহং, অয্যে, ইত্থন্নামা পৰিপুণ্ণদ্ৱাদসৱস্সা ভিক্খুনী সঙ্ঘং ৱুট্ঠাপনসম্মুতিং যাচামী’’তি. দুতিযম্পি যাচিতব্বা. ততিযম্পি যাচিতব্বা. সা ভিক্খুনী সঙ্ঘেন পৰিচ্ছিন্দিতব্বা – ‘‘ব্যত্তাযং ভিক্খুনী লজ্জিনী’’তি. সচে বালা চ হোতি অলজ্জিনী চ, ন দাতব্বা. সচে বালা হোতি লজ্জিনী, ন দাতব্বা. সচে ব্যত্তা হোতি অলজ্জিনী, ন দাতব্বা. সচে ব্যত্তা চ হোতি লজ্জিনী চ, দাতব্বা. এৱঞ্চ পন, ভিক্খৱে, দাতব্বা. ব্যত্তায ভিক্খুনিযা পটিবলায সঙ্ঘো ঞাপেতব্বো –

১১৪১. ‘‘সুণাতু মে, অয্যে, সঙ্ঘো. অযং ইত্থন্নামা পৰিপুণ্ণদ্ৱাদসৱস্সা ভিক্খুনী সঙ্ঘং ৱুট্ঠাপনসম্মুতিং যাচতি. যদি সঙ্ঘস্স পত্তকল্লং, সঙ্ঘো ইত্থন্নামায পৰিপুণ্ণদ্ৱাদসৱস্সায ভিক্খুনিযা ৱুট্ঠাপনসম্মুতিং দদেয্য. এসা ঞত্তি.

‘‘সুণাতু মে, অয্যে, সঙ্ঘো. অযং ইত্থন্নামা পৰিপুণ্ণদ্ৱাদসৱস্সা ভিক্খুনী সঙ্ঘং ৱুট্ঠাপনসম্মুতিং যাচতি. সঙ্ঘো ইত্থন্নামায পৰিপুণ্ণদ্ৱাদসৱস্সায ভিক্খুনিযা ৱুট্ঠাপনসম্মুতিং দেতি. যস্সা অয্যায খমতি ইত্থন্নামায পৰিপুণ্ণদ্ৱাদসৱস্সায ভিক্খুনিযা ৱুট্ঠাপনসম্মুতিযা দানং, সা তুণ্হস্স; যস্সা নক্খমতি, সা ভাসেয্য.

‘‘দিন্না সঙ্ঘেন ইত্থন্নামায পৰিপুণ্ণদ্ৱাদসৱস্সায ভিক্খুনিযা ৱুট্ঠাপনসম্মুতি. খমতি সঙ্ঘস্স, তস্মা তুণ্হী, এৱমেতং ধাৰযামী’’তি.

১১৪২. ‘‘যা পন ভিক্খুনী পৰিপুণ্ণদ্ৱাদসৱস্সা সঙ্ঘেন অসম্মতা ৱুট্ঠাপেয্য, পাচিত্তিয’’ন্তি.

১১৪৩. যা পনাতি যা যাদিসা…পে… ভিক্খুনীতি…পে… অযং ইমস্মিং অত্থে অধিপ্পেতা ভিক্খুনীতি.

পৰিপুণ্ণদ্ৱাদসৱস্সা নাম পত্তদ্ৱাদসৱস্সা.

অসম্মতা নাম ঞত্তিদুতিযেন কম্মেন ৱুট্ঠাপনসম্মুতি ন দিন্না হোতি. ৱুট্ঠাপেয্যাতি উপসম্পাদেয্য.

১১৪৪. ধম্মকম্মে ধম্মকম্মসঞ্ঞা ৱুট্ঠাপেতি, আপত্তি পাচিত্তিযস্স. ধম্মকম্মে ৱেমতিকা ৱুট্ঠাপেতি, আপত্তি পাচিত্তিযস্স. ধম্মকম্মে অধম্মকম্মসঞ্ঞা ৱুট্ঠাপেতি, আপত্তি পাচিত্তিযস্স.

১১৪৫. অনাপত্তি পৰিপুণ্ণদ্ৱাদসৱস্সা সঙ্ঘেন সম্মতা ৱুট্ঠাপেতি, উম্মত্তিকায, আদিকম্মিকাযাতি.

পঞ্চমসিক্খাপদং নিট্ঠিতং.

৬. ছট্ঠসিক্খাপদং

১১৪৬. তেন সমযেন বুদ্ধো ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তেন খো পন সমযেন চণ্ডকাড়ী ভিক্খুনী ভিক্খুনিসঙ্ঘং উপসঙ্কমিত্ৱা ৱুট্ঠাপনসম্মুতিং যাচতি. অথ খো ভিক্খুনিসঙ্ঘো চণ্ডকাড়িং ভিক্খুনিং পৰিচ্ছিন্দিত্ৱা – ‘‘অলং তাৱ তে, অয্যে, ৱুট্ঠাপিতেনা’’তি, ৱুট্ঠাপনসম্মুতিং ন অদাসি. চণ্ডকাড়ী ভিক্খুনী ‘সাধূ’তি পটিস্সুণি. তেন খো পন সমযেন ভিক্খুনিসঙ্ঘো অঞ্ঞাসং ভিক্খুনীনং ৱুট্ঠাপনসম্মুতিং দেতি. চণ্ডকাড়ী ভিক্খুনী উজ্ঝাযতি খিয্যতি ৱিপাচেতি – ‘‘অহমেৱ নূন বালা, অহমেৱ নূন অলজ্জিনী; যং সঙ্ঘো অঞ্ঞাসং ভিক্খুনীনং ৱুট্ঠাপনসম্মুতিং দেতি, ময্হমেৱ ন দেতী’’তি. যা তা ভিক্খুনিযো অপ্পিচ্ছা…পে… তা উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম অয্যা চণ্ডকাড়ী – ‘অলং তাৱ তে, অয্যে, ৱুট্ঠাপিতেনা’তি ৱুচ্চমানা ‘সাধূ’তি পটিস্সুণিত্ৱা পচ্ছা খীযনধম্মং আপজ্জিস্সতী’’তি…পে… সচ্চং কিৰ, ভিক্খৱে, ‘চণ্ডকাড়ী ভিক্খুনী অলং তাৱ তে অয্যে ৱুট্ঠাপিতেনা’তি ৱুচ্চমানা ‘‘সাধূ’’তি পটিস্সুণিত্ৱা পচ্ছা খীযনধম্মং আপজ্জতীতি [আপজ্জীতি (ক.)]? ‘‘সচ্চং, ভগৱা’’তি. ৱিগৰহি বুদ্ধো ভগৱা…পে… কথঞ্হি নাম, ভিক্খৱে, চণ্ডকাড়ী ভিক্খুনী – ‘‘অলং তাৱ তে, অয্যে, ৱুট্ঠাপিতেনা’’তি ৱুচ্চমানা ‘সাধূ’তি পটিস্সুণিত্ৱা পচ্ছা খীযনধম্মং আপজ্জিস্সতি! নেতং, ভিক্খৱে, অপ্পসন্নানং ৱা পসাদায…পে… এৱঞ্চ পন, ভিক্খৱে, ভিক্খুনিযো ইমং সিক্খাপদং উদ্দিসন্তু –

১১৪৭. ‘‘যা পন ভিক্খুনী – ‘অলং তাৱ তে, অয্যে, ৱুট্ঠাপিতেনা’তি ৱুচ্চমানা ‘সাধূ’তি পটিস্সুণিত্ৱা পচ্ছা খীযনধম্মং আপজ্জেয্য, পাচিত্তিয’’ন্তি.

১১৪৮. যা পনাতি যা যাদিসা…পে… ভিক্খুনীতি…পে… অযং ইমস্মিং অত্থে অধিপ্পেতা ভিক্খুনীতি.

অলং তাৱ তে অয্যে ৱুট্ঠাপিতেনাতি অলং তাৱ তে, অয্যে, উপসম্পাদিতেন. ‘সাধূ’তি পটিস্সুণিত্ৱা পচ্ছা খীযনধম্মং আপজ্জতি, আপত্তি পাচিত্তিযস্স.

১১৪৯. অনাপত্তি পকতিযা ছন্দা দোসা মোহা ভযা কৰোন্তং খিয্যতি, উম্মত্তিকায, আদিকম্মিকাযাতি.

ছট্ঠসিক্খাপদং নিট্ঠিতং.

৭. সত্তমসিক্খাপদং

১১৫০. তেন সমযেন বুদ্ধো ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তেন খো পন সমযেন অঞ্ঞতৰা সিক্খমানা থুল্লনন্দং ভিক্খুনিং উপসঙ্কমিত্ৱা উপসম্পদং যাচি. থুল্লনন্দা ভিক্খুনী তং সিক্খমানং – ‘‘সচে মে ত্ৱং, অয্যে, চীৱৰং দস্সসি এৱাহং তং ৱুট্ঠাপেস্সামী’’তি ৱত্ৱা, নেৱ ৱুট্ঠাপেতি ন ৱুট্ঠাপনায উস্সুক্কং কৰোতি. অথ খো সা সিক্খমানা ভিক্খুনীনং এতমত্থং আৰোচেসি. যা তা ভিক্খুনিযো অপ্পিচ্ছা…পে… তা উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম অয্যা থুল্লনন্দা সিক্খমানং – ‘সচে মে ত্ৱং, অয্যে, চীৱৰং দস্সসি এৱাহং তং ৱুট্ঠাপেস্সামী’তি ৱত্ৱা, নেৱ ৱুট্ঠাপেস্সতি ন ৱুট্ঠাপনায উস্সুক্কং কৰিস্সতী’’তি…পে… সচ্চং কিৰ, ভিক্খৱে, থুল্লনন্দা ভিক্খুনী সিক্খমানং – ‘‘সচে মে ত্ৱং, অয্যে, চীৱৰং দস্সসি এৱাহং তং ৱুট্ঠাপেস্সামী’’তি ৱত্ৱা, নেৱ ৱুট্ঠাপেতি ন ৱুট্ঠাপনায উস্সুক্কং কৰোতীতি? ‘‘সচ্চং, ভগৱা’’তি. ৱিগৰহি বুদ্ধো ভগৱা…পে… কথঞ্হি নাম, ভিক্খৱে, থুল্লনন্দা ভিক্খুনী সিক্খমানং – ‘‘সচে মে ত্ৱং, অয্যে, চীৱৰং দস্সসি এৱাহং তং ৱুট্ঠাপেস্সামী’’তি ৱত্ৱা, নেৱ ৱুট্ঠাপেস্সতি ন ৱুট্ঠাপনায উস্সুক্কং কৰিস্সতি! নেতং, ভিক্খৱে, অপ্পসন্নানং ৱা পসাদায…পে… এৱঞ্চ পন, ভিক্খৱে, ভিক্খুনিযো ইমং সিক্খাপদং উদ্দিসন্তু –

১১৫১. ‘‘যা পন ভিক্খুনী সিক্খমানং – ‘সচে মে ত্ৱং, অয্যে, চীৱৰং দস্সসি, এৱাহং তং ৱুট্ঠাপেস্সামী’তি ৱত্ৱা, সা পচ্ছা অনন্তৰাযিকিনী নেৱ ৱুট্ঠাপেয্য ন ৱুট্ঠাপনায উস্সুক্কং কৰেয্য, পাচিত্তিয’’ন্তি.

১১৫২. যা পনাতি যা যাদিসা…পে… ভিক্খুনীতি…পে… অযং ইমস্মিং অত্থে অধিপ্পেতা ভিক্খুনীতি.

সিক্খমানা নাম দ্ৱে ৱস্সানি ছসু ধম্মেসু সিক্খিতসিক্খা.

সচে মে ত্ৱং অয্যে চীৱৰং দস্সসি এৱাহং তং ৱুট্ঠাপেস্সামীতি এৱাহং তং উপসম্পাদেস্সামি.

সা পচ্ছা অনন্তৰাযিকিনীতি অসতি অন্তৰাযে.

নেৱ ৱুট্ঠাপেয্যাতি ন সযং ৱুট্ঠাপেয্য.

ন ৱুট্ঠাপনায উস্সুক্কং কৰেয্যাতি ন অঞ্ঞং আণাপেয্য. ‘‘নেৱ ৱুট্ঠাপেস্সামি ন ৱুট্ঠাপনায উস্সুক্কং কৰিস্সামী’’তি ধুৰং নিক্খিত্তমত্তে আপত্তি পাচিত্তিযস্স.

১১৫৩. অনাপত্তি সতি অন্তৰাযে, পৰিযেসিত্ৱা ন লভতি, গিলানায, আপদাসু, উম্মত্তিকায, আদিকম্মিকাযাতি.

সত্তমসিক্খাপদং নিট্ঠিতং.

৮. অট্ঠমসিক্খাপদং

১১৫৪. তেন সমযেন বুদ্ধো ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তেন খো পন সমযেন অঞ্ঞতৰা সিক্খমানা থুল্লনন্দং ভিক্খুনিং উপসঙ্কমিত্ৱা উপসম্পদং যাচি. থুল্লনন্দা ভিক্খুনী তং সিক্খমানং ‘‘সচে মং ত্ৱং, অয্যে, দ্ৱে ৱস্সানি অনুবন্ধিস্সসি এৱাহং তং ৱুট্ঠাপেস্সামী’’তি ৱত্ৱা, নেৱ ৱুট্ঠাপেতি ন ৱুট্ঠাপনায উস্সুক্কং কৰোতি. অথ খো সা সিক্খমানা ভিক্খুনীনং এতমত্থং আৰোচেসি. যা তা ভিক্খুনিযো অপ্পিচ্ছা…পে… তা উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম অয্যা থুল্লনন্দা সিক্খমানং – সচে মং ত্ৱং, অয্যে, দ্ৱে ৱস্সানি অনুবন্ধিস্সসি এৱাহং তং ৱুট্ঠাপেস্সামীতি ৱত্ৱা, নেৱ ৱুট্ঠাপেস্সতি ন ৱুট্ঠাপনায উস্সুক্কং কৰিস্সতী’’তি…পে… সচ্চং কিৰ, ভিক্খৱে, থুল্লনন্দা ভিক্খুনী সিক্খমানং – ‘‘সচে মং ত্ৱং অয্যে দ্ৱে ৱস্সানি অনুবন্ধিস্সসি এৱাহং তং ৱুট্ঠাপেস্সামী’’তি ৱত্ৱা, নেৱ ৱুট্ঠাপেতি ন ৱুট্ঠাপনায উস্সুক্কং কৰোতীতি? ‘‘সচ্চং, ভগৱা’’তি. ৱিগৰহি বুদ্ধো ভগৱা…পে… কথঞ্হি নাম, ভিক্খৱে, থুল্লনন্দা ভিক্খুনী সিক্খমানং – ‘‘সচে মং ত্ৱং, অয্যে, দ্ৱে ৱস্সানি অনুবন্ধিস্সসি এৱাহং তং ৱুট্ঠাপেস্সামী’’তি ৱত্ৱা, নেৱ ৱুট্ঠাপেস্সতি ন ৱুট্ঠাপনায উস্সুক্কং কৰিস্সতি! নেতং, ভিক্খৱে, অপ্পসন্নানং ৱা পসাদায…পে… এৱঞ্চ পন, ভিক্খৱে, ভিক্খুনিযো ইমং সিক্খাপদং উদ্দিসন্তু –

১১৫৫. ‘‘যা পন ভিক্খুনী সিক্খমানং – ‘সচে মং ত্ৱং অয্যে দ্ৱে ৱস্সানি অনুবন্ধিস্সসি এৱাহং তং ৱুট্ঠাপেস্সামী’তি ৱত্ৱা, সা পচ্ছা অনন্তৰাযিকিনী নেৱ ৱুট্ঠাপেয্য ন ৱুট্ঠাপনায উস্সুক্কং কৰেয্য, পাচিত্তিয’’ন্তি.

১১৫৬. যা পনাতি যা যাদিসা…পে… ভিক্খুনীতি…পে… অযং ইমস্মিং অত্থে অধিপ্পেতা ভিক্খুনীতি.

সিক্খমানা নাম দ্ৱে ৱস্সানি ছসু ধম্মেসু সিক্খিতসিক্খা.

সচে মং ত্ৱং অয্যে দ্ৱে ৱস্সানি অনুবন্ধিস্সসীতি দ্ৱে সংৱচ্ছৰানি উপট্ঠহিস্সসি.

এৱাহং তং ৱুট্ঠাপেস্সামীতি এৱাহং তং উপসম্পাদেস্সামি.

সা পচ্ছা অনন্তৰাযিকিনীতি অসতি অন্তৰাযে.

নেৱ ৱুট্ঠাপেয্যাতি ন সযং ৱুট্ঠাপেয্য.

ন ৱুট্ঠাপনায উস্সুক্কং কৰেয্যাতি ন অঞ্ঞং আণাপেয্য. ‘‘নেৱ ৱুট্ঠাপেস্সামি ন ৱুট্ঠাপনায উস্সুক্কং কৰিস্সামী’’তি ধুৰং নিক্খিত্তমত্তে আপত্তি পাচিত্তিযস্স.

১১৫৭. অনাপত্তি সতি অন্তৰাযে, পৰিযেসিত্ৱা ন লভতি, গিলানায, আপদাসু, উম্মত্তিকায, আদিকম্মিকাযাতি.

অট্ঠমসিক্খাপদং নিট্ঠিতং.

৯. নৱমসিক্খাপদং

১১৫৮. তেন সমযেন বুদ্ধো ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তেন খো পন সমযেন থুল্লনন্দা ভিক্খুনী পুৰিসসংসট্ঠং কুমাৰকসংসট্ঠং চণ্ডিং সোকাৱাসং [সোকৱস্সং (সী.) সোকাৱস্সং (স্যা.)] চণ্ডকাড়িং সিক্খমানং ৱুট্ঠাপেতি. যা তা ভিক্খুনিযো অপ্পিচ্ছা…পে… তা উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম অয্যা থুল্লনন্দা পুৰিসসংসট্ঠং কুমাৰকসংসট্ঠং চণ্ডিং সোকাৱাসং [সোকৱস্সং (সী.) সোকাৱস্সং (স্যা.)] চণ্ডকাড়িং সিক্খমানং ৱুট্ঠাপেস্সতী’’তি…পে… সচ্চং কিৰ, ভিক্খৱে, থুল্লনন্দা ভিক্খুনী পুৰিসসংসট্ঠং কুমাৰকসংসট্ঠং চণ্ডিং সোকাৱাসং [সোকৱস্সং (সী.) সোকাৱস্সং (স্যা.)] চণ্ডকাড়িং সিক্খমানং ৱুট্ঠাপেতীতি [ৱুট্ঠাপেসীতি (ক.)]? ‘‘সচ্চং, ভগৱা’’তি. ৱিগৰহি বুদ্ধো ভগৱা…পে… কথঞ্হি নাম, ভিক্খৱে, থুল্লনন্দা ভিক্খুনী পুৰিসসংসট্ঠং কুমাৰকসংসট্ঠং চণ্ডিং সোকাৱাসং চণ্ডকাড়িং সিক্খমানং ৱুট্ঠাপেস্সতি! নেতং, ভিক্খৱে, অপ্পসন্নানং ৱা পসাদায…পে… এৱঞ্চ পন, ভিক্খৱে, ভিক্খুনিযো ইমং সিক্খাপদং উদ্দিসন্তু –

১১৫৯. ‘‘যা পন ভিক্খুনী পুৰিসসংসট্ঠং কুমাৰকসংসট্ঠং চণ্ডিং সোকাৱাসং সিক্খমানং ৱুট্ঠাপেয্য, পাচিত্তিয’’ন্তি.

১১৬০. যা পনাতি যা যাদিসা…পে… ভিক্খুনীতি…পে… অযং ইমস্মিং অত্থে অধিপ্পেতা ভিক্খুনীতি.

পুৰিসো নাম পত্তৱীসতিৱস্সো. কুমাৰকো নাম অপ্পত্তৱীসতিৱস্সো. সংসট্ঠা নাম অননুলোমিকেন কাযিকৱাচসিকেন সংসট্ঠা. চণ্ডী নাম কোধনা ৱুচ্চতি.

সোকাৱাসা নাম পৰেসং দুক্খং উপ্পাদেতি, সোকং আৱিসতি. সিক্খমানা নাম দ্ৱে ৱস্সানি ছসু ধম্মেসু সিক্খিতসিক্খা. ৱুট্ঠাপেয্যাতি উপসম্পাদেয্য.

‘‘ৱুট্ঠাপেস্সামী’’তি গণং ৱা আচৰিনিং ৱা পত্তং ৱা চীৱৰং ৱা পৰিযেসতি, সীমং ৱা সম্মন্নতি, আপত্তি দুক্কটস্স. ঞত্তিযা দুক্কটং. দ্ৱীহি কম্মৱাচাহি দুক্কটা. কম্মৱাচাপৰিযোসানে উপজ্ঝাযায আপত্তি পাচিত্তিযস্স; গণস্স চ আচৰিনিযা চ আপত্তি দুক্কটস্স.

১১৬১. অনাপত্তি অজানন্তী ৱুট্ঠাপেতি, উম্মত্তিকায, আদিকম্মিকাযাতি.

নৱমসিক্খাপদং নিট্ঠিতং.

১০. দসমসিক্খাপদং

১১৬২. তেন সমযেন বুদ্ধো ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তেন খো পন সমযেন থুল্লনন্দা ভিক্খুনী মাতাপিতূহিপি সামিকেনপি অননুঞ্ঞাতং সিক্খমানং ৱুট্ঠাপেতি. মাতাপিতৰোপি সামিকোপি উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম অয্যা থুল্লনন্দা অম্হেহি অননুঞ্ঞাতং সিক্খমানং ৱুট্ঠাপেস্সতী’’তি! অস্সোসুং খো ভিক্খুনিযো মাতাপিতূনম্পি সামিকস্সপি উজ্ঝাযন্তানং খিয্যন্তানং ৱিপাচেন্তানং. যা তা ভিক্খুনিযো অপ্পিচ্ছা…পে… তা উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম অয্যা থুল্লনন্দা মাতাপিতূহিপি সামিকেনপি অননুঞ্ঞাতং সিক্খমানং ৱুট্ঠাপেস্সতী’’তি…পে… সচ্চং কিৰ, ভিক্খৱে, থুল্লনন্দা ভিক্খুনী, মাতাপিতূহিপি সামিকেনপি অননুঞ্ঞাতং সিক্খমানং ৱুট্ঠাপেতীতি? ‘‘সচ্চং, ভগৱা’’তি. ৱিগৰহি বুদ্ধো ভগৱা…পে… কথঞ্হি নাম, ভিক্খৱে, থুল্লনন্দা ভিক্খুনী মাতাপিতূহিপি সামিকেনপি অননুঞ্ঞাতং সিক্খমানং ৱুট্ঠাপেস্সতি! নেতং, ভিক্খৱে, অপ্পসন্নানং ৱা পসাদায…পে… এৱঞ্চ পন, ভিক্খৱে, ভিক্খুনিযো ইমং সিক্খাপদং উদ্দিসন্তু –

১১৬৩. ‘‘যা পন ভিক্খুনী মাতাপিতূহি ৱা সামিকেন ৱা অননুঞ্ঞাতং সিক্খমানং ৱুট্ঠাপেয্য, পাচিত্তিয’’ন্তি.

১১৬৪. যা পনাতি যা যাদিসা…পে… ভিক্খুনীতি…পে… অযং ইমস্মিং অত্থে অধিপ্পেতা ভিক্খুনীতি.

মাতাপিতৰো নাম জনকা ৱুচ্চন্তি. সামিকো নাম যেন পৰিগ্গহিতা হোতি. অননুঞ্ঞাতাতি অনাপুচ্ছা. সিক্খমানা নাম দ্ৱে ৱস্সানি ছসু ধম্মেসু সিক্খিতসিক্খা. ৱুট্ঠাপেয্যাতি উপসম্পাদেয্য.

ৱুট্ঠাপেস্সামীতি গণং ৱা আচৰিনিং ৱা পত্তং ৱা চীৱৰং ৱা পৰিযেসতি, সীমং ৱা সম্মন্নতি, আপত্তি দুক্কটস্স. ঞত্তিযা দুক্কটং. দ্ৱীহি কম্মৱাচাহি দুক্কটা. কম্মৱাচাপৰিযোসানে উপজ্ঝাযায আপত্তি পাচিত্তিযস্স. গণস্স চ আচৰিনিযা চ আপত্তি দুক্কটস্স.

১১৬৫. অনাপত্তি অজানন্তী ৱুট্ঠাপেতি, অপলোকেত্ৱা ৱুট্ঠাপেতি, উম্মত্তিকায, আদিকম্মিকাযাতি.

দসমসিক্খাপদং নিট্ঠিতং.

১১. একাদসমসিক্খাপদং

১১৬৬. তেন সমযেন বুদ্ধো ভগৱা ৰাজগহে ৱিহৰতি ৱেড়ুৱনে কলন্দকনিৱাপে. তেন খো পন সমযেন থুল্লনন্দা ভিক্খুনী – ‘‘সিক্খমানং ৱুট্ঠাপেস্সামী’’তি থেৰে ভিক্খূ সন্নিপাতেত্ৱা পহূতং খাদনীযং ভোজনীযং পস্সিত্ৱা – ‘‘ন তাৱাহং, অয্যা, সিক্খমানং ৱুট্ঠাপেস্সামী’’তি থেৰে ভিক্খূ উয্যোজেত্ৱা দেৱদত্তং কোকালিকং কটমোদকতিস্সকং খণ্ডদেৱিযা পুত্তং সমুদ্দদত্তং সন্নিপাতেত্ৱা সিক্খমানং ৱুট্ঠাপেসি. যা তা ভিক্খুনিযো অপ্পিচ্ছা…পে… তা উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম অয্যা থুল্লনন্দা পাৰিৱাসিকছন্দদানেন সিক্খমানং ৱুট্ঠাপেস্সতী’’তি…পে… সচ্চং কিৰ, ভিক্খৱে, থুল্লনন্দা ভিক্খুনী পাৰিৱাসিকছন্দদানেন সিক্খমানং ৱুট্ঠাপেতীতি [ৱুট্ঠাপেসীতি (ক.)]? ‘‘সচ্চং, ভগৱা’’তি. ৱিগৰহি বুদ্ধো ভগৱা…পে… কথঞ্হি নাম, ভিক্খৱে, থুল্লনন্দা ভিক্খুনী পাৰিৱাসিকছন্দদানেন সিক্খমানং ৱুট্ঠাপেস্সতি! নেতং, ভিক্খৱে, অপ্পসন্নানং ৱা পসাদায…পে… এৱঞ্চ পন, ভিক্খৱে, ভিক্খুনিযো ইমং সিক্খাপদং উদ্দিসন্তু –

১১৬৭. ‘‘যা পন ভিক্খুনী পাৰিৱাসিকছন্দদানেন সিক্খমানং ৱুট্ঠাপেয্য, পাচিত্তিয’’ন্তি.

১১৬৮. যা পনাতি যা যাদিসা…পে… ভিক্খুনীতি…পে… অযং ইমস্মিং অত্থে অধিপ্পেতা ভিক্খুনীতি.

পাৰিৱাসিকছন্দদানেনাতি ৱুট্ঠিতায পৰিসায. সিক্খমানা নাম দ্ৱে ৱস্সানি ছসু ধম্মেসু সিক্খিতসিক্খা. ৱুট্ঠাপেয্যাতি উপসম্পাদেয্য.

১১৬৯. অনাপত্তি অৱুট্ঠিতায পৰিসায ৱুট্ঠাপেতি, উম্মত্তিকায, আদিকম্মিকাযাতি.

একাদসমসিক্খাপদং নিট্ঠিতং.

১২. দ্ৱাদসমসিক্খাপদং

১১৭০. তেন সমযেন বুদ্ধো ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তেন খো পন সমযেন ভিক্খুনিযো অনুৱস্সং ৱুট্ঠাপেন্তি, উপস্সযো ন সম্মতি. মনুস্সা [মনুস্সা ৱিহাৰচাৰিকং আহিণ্ডন্তা পস্সিত্ৱা (সী.)] উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম ভিক্খুনিযো অনুৱস্সং ৱুট্ঠাপেস্সন্তি, উপস্সযো ন সম্মতী’’তি! অস্সোসুং খো ভিক্খুনিযো তেসং মনুস্সানং উজ্ঝাযন্তানং খিয্যন্তানং ৱিপাচেন্তানং. যা তা ভিক্খুনিযো অপ্পিচ্ছা…পে… তা উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম ভিক্খুনিযো অনুৱস্সং ৱুট্ঠাপেস্সন্তী’’তি…পে… সচ্চং কিৰ, ভিক্খৱে, ভিক্খুনিযো অনুৱস্সং ৱুট্ঠাপেন্তীতি? ‘‘সচ্চং, ভগৱা’’তি. ৱিগৰহি বুদ্ধো ভগৱা…পে… কথঞ্হি নাম, ভিক্খৱে, ভিক্খুনিযো অনুৱস্সং ৱুট্ঠাপেস্সন্তি! নেতং, ভিক্খৱে, অপ্পসন্নানং ৱা পসাদায…পে… এৱঞ্চ পন, ভিক্খৱে, ভিক্খুনিযো ইমং সিক্খাপদং উদ্দিসন্তু –

১১৭১. ‘‘যা পন ভিক্খুনী অনুৱস্সং ৱুট্ঠাপেয্য, পাচিত্তিয’’ন্তি.

১১৭২. যা পনাতি যা যাদিসা…পে… ভিক্খুনীতি…পে… অযং ইমস্মিং অত্থে অধিপ্পেতা ভিক্খুনীতি.

অনুৱস্সন্তি অনুসংৱচ্ছৰং. ৱুট্ঠাপেয্যাতি উপসম্পাদেয্য.

১১৭৩. অনাপত্তি একন্তৰিকং ৱুট্ঠাপেতি, উম্মত্তিকায, আদিকম্মিকাযাতি.

দ্ৱাদসমসিক্খাপদং নিট্ঠিতং.

১৩. তেৰসমসিক্খাপদং

১১৭৪. তেন সমযেন বুদ্ধো ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তেন খো পন সমযেন ভিক্খুনিযো একং ৱস্সং দ্ৱে ৱুট্ঠাপেন্তি. উপস্সযো তথেৱ ন সম্মতি. মনুস্সা [মনুস্সা ৱিহাৰচাৰিকং আহিণ্ডন্তা পস্সিত্ৱা (সী.)] তথেৱ উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম ভিক্খুনিযো একং ৱস্সং দ্ৱে ৱুট্ঠাপেস্সন্তি! উপস্সযো তথেৱ ন সম্মতী’’তি! অস্সোসুং খো ভিক্খুনিযো তেসং মনুস্সানং উজ্ঝাযন্তানং খিয্যন্তানং ৱিপাচেন্তানং. যা তা ভিক্খুনিযো অপ্পিচ্ছা…পে… তা উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম ভিক্খুনিযো একং ৱস্সং দ্ৱে ৱুট্ঠাপেস্সন্তী’’তি…পে… সচ্চং কিৰ, ভিক্খৱে, ভিক্খুনিযো একং ৱস্সং দ্ৱে ৱুট্ঠাপেন্তীতি? ‘‘সচ্চং, ভগৱা’’তি. ৱিগৰহি বুদ্ধো ভগৱা…পে… কথঞ্হি নাম, ভিক্খৱে, ভিক্খুনিযো একং ৱস্সং দ্ৱে ৱুট্ঠাপেস্সন্তি! নেতং, ভিক্খৱে, অপ্পসন্নানং ৱা পসাদায…পে… এৱঞ্চ পন, ভিক্খৱে, ভিক্খুনিযো ইমং সিক্খাপদং উদ্দিসন্তু –

১১৭৫. ‘‘যা পন ভিক্খুনী একং ৱস্সং দ্ৱে ৱুট্ঠাপেয্য, পাচিত্তিয’’ন্তি.

১১৭৬. যা পনাতি যা যাদিসা…পে… ভিক্খুনীতি…পে… অযং ইমস্মিং অত্থে অধিপ্পেতা ভিক্খুনীতি.

একং ৱস্সন্তি একং সংৱচ্ছৰং. দ্ৱে ৱুট্ঠাপেয্যাতি দ্ৱে উপসম্পাদেয্য.

‘‘দ্ৱে ৱুট্ঠাপেস্সামী’’তি গণং ৱা আচৰিনিং ৱা পত্তং ৱা চীৱৰং ৱা পৰিযেসতি, সীমং ৱা সম্মন্নতি, আপত্তি দুক্কটস্স. ঞত্তিযা দুক্কটং. দ্ৱীহি কম্মৱাচাহি দুক্কটা. কম্মৱাচাপৰিযোসানে উপজ্ঝাযায আপত্তি পাচিত্তিযস্স. গণস্স চ আচৰিনিযা চ আপত্তি দুক্কটস্স.

১১৭৭. অনাপত্তি একন্তৰিকং একং ৱুট্ঠাপেতি, উম্মত্তিকায, আদিকম্মিকাযাতি.

তেৰসমসিক্খাপদং নিট্ঠিতং.

কুমাৰীভূতৱগ্গো অট্ঠমো.