৯. ছত্তুপাহনৱগ্গো

১. পঠমসিক্খাপদং

১১৭৮. তেন সমযেন বুদ্ধো ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তেন খো পন সমযেন ছব্বগ্গিযা ভিক্খুনিযো ছত্তুপাহনং ধাৰেন্তি. মনুস্সা উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম ভিক্খুনিযো ছত্তুপাহনং ধাৰেস্সন্তি, সেয্যথাপি গিহিনিযো কামভোগিনিযো’’তি! অস্সোসুং খো ভিক্খুনিযো তেসং মনুস্সানং উজ্ঝাযন্তানং খিয্যন্তানং ৱিপাচেন্তানং. যা তা ভিক্খুনিযো অপ্পিচ্ছা…পে… তা উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম ছব্বগ্গিযা ভিক্খুনিযো ছত্তুপাহনং ধাৰেস্সন্তী’’তি…পে… সচ্চং কিৰ, ভিক্খৱে, ছব্বগ্গিযা ভিক্খুনিযো ছত্তুপাহনং ধাৰেন্তীতি? ‘‘সচ্চং, ভগৱা’’তি. ৱিগৰহি বুদ্ধো ভগৱা…পে… কথঞ্হি নাম, ভিক্খৱে, ছব্বগ্গিযা ভিক্খুনিযো ছত্তুপাহনং ধাৰেস্সন্তি! নেতং, ভিক্খৱে, অপ্পসন্নানং ৱা পসাদায…পে… এৱঞ্চ পন, ভিক্খৱে, ভিক্খুনিযো ইমং সিক্খাপদং উদ্দিসন্তু –

‘‘যা পন ভিক্খুনী ছত্তুপাহনং ধাৰেয্য, পাচিত্তিয’’ন্তি.

এৱঞ্চিদং ভগৱতা ভিক্খুনীনং সিক্খাপদং পঞ্ঞত্তং হোতি.

১১৭৯. তেন খো পন সমযেন অঞ্ঞতৰা ভিক্খুনী গিলানা হোতি. তস্সা ৱিনা ছত্তুপাহনং ন ফাসু হোতি…পে… ভগৱতো এতমত্থং আৰোচেসুং…পে… অনুজানামি, ভিক্খৱে, গিলানায ভিক্খুনিযা ছত্তুপাহনং. এৱঞ্চ পন, ভিক্খৱে, ভিক্খুনিযো ইমং সিক্খাপদং উদ্দিসন্তু –

১১৮০. ‘‘যা পন ভিক্খুনী অগিলানা ছত্তুপাহনং ধাৰেয্য, পাচিত্তিয’’ন্তি.

১১৮১. যা পনাতি যা যাদিসা…পে… ভিক্খুনীতি…পে… অযং ইমস্মিং অত্থে অধিপ্পেতা ভিক্খুনীতি.

অগিলানা নাম যস্সা ৱিনা ছত্তুপাহনং ফাসু হোতি.

গিলানা নাম যস্সা ৱিনা ছত্তুপাহনং ন ফাসু হোতি.

ছত্তং নাম তীণি ছত্তানি – সেতচ্ছত্তং, কিলঞ্জচ্ছত্তং, পণ্ণচ্ছত্তং মণ্ডলবদ্ধং সলাকবদ্ধং. ধাৰেয্যাতি সকিম্পি ধাৰেতি, আপত্তি পাচিত্তিযস্স.

১১৮২. অগিলানা অগিলানসঞ্ঞা ছত্তুপাহনং ধাৰেতি, আপত্তি পাচিত্তিযস্স. অগিলানা ৱেমতিকা ছত্তুপাহনং ধাৰেতি, আপত্তি পাচিত্তিযস্স. অগিলানা গিলানসঞ্ঞা ছত্তুপাহনং ধাৰেতি, আপত্তি পাচিত্তিযস্স.

ছত্তং ধাৰেতি ন উপাহনং, আপত্তি দুক্কটস্স. উপাহনং ধাৰেতি ন ছত্তং, আপত্তি দুক্কটস্স. গিলানা অগিলানসঞ্ঞা, আপত্তি দুক্কটস্স. গিলানা ৱেমতিকা, আপত্তি দুক্কটস্স. গিলানা গিলানসঞ্ঞা, অনাপত্তি.

১১৮৩. অনাপত্তি গিলানায, আৰামে আৰামূপচাৰে ধাৰেতি, আপদাসু, উম্মত্তিকায, আদিকম্মিকাযাতি.

পঠমসিক্খাপদং নিট্ঠিতং.

২. দুতিযসিক্খাপদং

১১৮৪. তেন সমযেন বুদ্ধো ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তেন খো পন সমযেন ছব্বগ্গিযা ভিক্খুনিযো যানেন যাযন্তি. মনুস্সা উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম ভিক্খুনিযো যানেন যাযিস্সন্তি, সেয্যথাপি গিহিনিযো কামভোগিনিযো’’তি! অস্সোসুং খো ভিক্খুনিযো তেসং মনুস্সানং উজ্ঝাযন্তানং খিয্যন্তানং ৱিপাচেন্তানং. যা তা ভিক্খুনিযো অপ্পিচ্ছা…পে. … তা উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম ছব্বগ্গিযা ভিক্খুনিযো যানেন যাযিস্সন্তী’’তি…পে… সচ্চং কিৰ, ভিক্খৱে, ছব্বগ্গিযা ভিক্খুনিযো যানেন যাযন্তীতি? ‘‘সচ্চং, ভগৱা’’তি. ৱিগৰহি বুদ্ধো ভগৱা…পে… কথঞ্হি নাম, ভিক্খৱে, ছব্বগ্গিযা ভিক্খুনিযো যানেন যাযিস্সন্তি! নেতং, ভিক্খৱে, অপ্পসন্নানং ৱা পসাদায…পে… এৱঞ্চ পন, ভিক্খৱে, ভিক্খুনিযো ইমং সিক্খাপদং উদ্দিসন্তু –

‘‘যা পন ভিক্খুনী যানেন যাযেয্য, পাচিত্তিয’’ন্তি.

এৱঞ্চিদং ভগৱতা ভিক্খুনীনং সিক্খাপদং পঞ্ঞত্তং হোতি.

১১৮৫. তেন খো পন সমযেন অঞ্ঞতৰা ভিক্খুনী গিলানা হোতি, ন সক্কোতি পদসা গন্তুং…পে… ভগৱতো এতমত্থং আৰোচেসুং…পে… অনুজানামি, ভিক্খৱে, গিলানায ভিক্খুনিযা যানং. এৱঞ্চ পন, ভিক্খৱে, ভিক্খুনিযো ইমং সিক্খাপদং উদ্দিসন্তু –

১১৮৬. ‘‘যা পন ভিক্খুনী অগিলানা যানেন যাযেয্য, পাচিত্তিয’’ন্তি.

১১৮৭. যা পনাতি যা যাদিসা…পে… ভিক্খুনীতি…পে… অযং ইমস্মিং অত্থে অধিপ্পেতা ভিক্খুনীতি.

অগিলানা নাম সক্কোতি পদসা গন্তুং.

গিলানা নাম ন সক্কোতি পদসা গন্তুং.

যানং নাম ৱয্হং ৰথো সকটং সন্দমানিকা সিৱিকা পাটঙ্কী.

যাযেয্যাতি সকিম্পি যানেন যাযতি, আপত্তি পাচিত্তিযস্স.

১১৮৮. অগিলানা অগিলানসঞ্ঞা যানেন যাযতি, আপত্তি পাচিত্তিযস্স. অগিলানা ৱেমতিকা যানেন যাযতি, আপত্তি পাচিত্তিযস্স. অগিলানা গিলানসঞ্ঞা যানেন যাযতি, আপত্তি পাচিত্তিযস্স.

গিলানা অগিলানসঞ্ঞা, আপত্তি দুক্কটস্স. গিলানা ৱেমতিকা, আপত্তি দুক্কটস্স. গিলানা গিলানসঞ্ঞা, অনাপত্তি.

১১৮৯. অনাপত্তি গিলানায, আপদাসু, উম্মত্তিকায, আদিকম্মিকাযাতি.

দুতিযসিক্খাপদং নিট্ঠিতং.

৩. ততিযসিক্খাপদং

১১৯০. তেন সমযেন বুদ্ধো ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তেন খো পন সমযেন অঞ্ঞতৰা ভিক্খুনী অঞ্ঞতৰিস্সা ইত্থিযা কুলূপিকা হোতি. অথ খো সা ইত্থী তং ভিক্খুনিং এতদৱোচ – ‘‘হন্দায্যে, ইমং সঙ্ঘাণিং অমুকায নাম ইত্থিযা দেহী’’তি. অথ খো সা ভিক্খুনী – ‘‘সচাহং পত্তেন আদায গচ্ছামি ৱিস্সৰো মে ভৱিস্সতী’’তি পটিমুঞ্চিত্ৱা অগমাসি. তস্সা ৰথিকায সুত্তকে ছিন্নে ৱিপ্পকিৰিযিংসু. মনুস্সা উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম ভিক্খুনিযো সঙ্ঘাণিং ধাৰেস্সন্তি, সেয্যথাপি গিহিনিযো কামভোগিনিযো’’তি! অস্সোসুং খো ভিক্খুনিযো তেসং মনুস্সানং উজ্ঝাযন্তানং খিয্যন্তানং ৱিপাচেন্তানং. যা তা ভিক্খুনিযো অপ্পিচ্ছা…পে. … তা উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম ভিক্খুনী সঙ্ঘাণিং ধাৰেস্সতী’’তি…পে… সচ্চং কিৰ, ভিক্খৱে, ভিক্খুনী সঙ্ঘাণিং ধাৰেতী’’তি [ধাৰেসীতি (ক.)]? ‘‘সচ্চং, ভগৱা’’তি. ৱিগৰহি বুদ্ধো ভগৱা…পে… কথঞ্হি নাম, ভিক্খৱে, ভিক্খুনী সঙ্ঘাণিং ধাৰেস্সতি! নেতং, ভিক্খৱে, অপ্পসন্নানং ৱা পসাদায…পে… এৱঞ্চ পন, ভিক্খৱে, ভিক্খুনিযো ইমং সিক্খাপদং উদ্দিসন্তু –

১১৯১. ‘‘যা পন ভিক্খুনী সঙ্ঘাণিং ধাৰেয্য, পাচিত্তিয’’ন্তি.

১১৯২. যা পনাতি যা যাদিসা…পে… ভিক্খুনীতি…পে… অযং ইমস্মিং অত্থে অধিপ্পেতা ভিক্খুনীতি.

সঙ্ঘাণি নাম যা কাচি কটূপগা.

ধাৰেয্যাতি সকিম্পি ধাৰেতি, আপত্তি পাচিত্তিযস্স.

১১৯৩. অনাপত্তি আবাধপ্পচ্চযা, কটিসুত্তকং ধাৰেতি, উম্মত্তিকায, আদিকম্মিকাযাতি.

ততিযসিক্খাপদং নিট্ঠিতং.

৪. চতুত্থসিক্খাপদং

১১৯৪. তেন সমযেন বুদ্ধো ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তেন খো পন সমযেন ছব্বগ্গিযা ভিক্খুনিযো ইত্থালঙ্কাৰং ধাৰেন্তি. মনুস্সা উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম ভিক্খুনিযো ইত্থালঙ্কাৰং ধাৰেস্সন্তি, সেয্যথাপি গিহিনিযো কামভোগিনিযো’’তি! অস্সোসুং খো ভিক্খুনিযো তেসং মনুস্সানং উজ্ঝাযন্তানং খিয্যন্তানং ৱিপাচেন্তানং. যা তা ভিক্খুনিযো অপ্পিচ্ছা…পে… তা উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম ছব্বগ্গিযা ভিক্খুনিযো ইত্থালঙ্কাৰং ধাৰেস্সন্তী’’তি …পে… সচ্চং কিৰ, ভিক্খৱে, ছব্বগ্গিযা ভিক্খুনিযো ইত্থালঙ্কাৰং ধাৰেন্তীতি? ‘‘সচ্চং, ভগৱা’’তি. ৱিগৰহি বুদ্ধো ভগৱা…পে… কথঞ্হি নাম, ভিক্খৱে, ছব্বগ্গিযা ভিক্খুনিযো ইত্থালঙ্কাৰং ধাৰেস্সন্তি! নেতং, ভিক্খৱে, অপ্পসন্নানং ৱা পসাদায…পে… এৱঞ্চ পন, ভিক্খৱে, ভিক্খুনিযো ইমং সিক্খাপদং উদ্দিসন্তু –

১১৯৫. ‘‘যা পন ভিক্খুনী ইত্থালঙ্কাৰং ধাৰেয্য, পাচিত্তিয’’ন্তি.

১১৯৬. যা পনাতি যা যাদিসা…পে… ভিক্খুনীতি…পে… অযং ইমস্মিং অত্থে অধিপ্পেতা ভিক্খুনীতি.

ইত্থালঙ্কাৰো নাম সীসূপগো গীৱূপগো হত্থূপগো পাদূপগো কটূপগো. ধাৰেয্যাতি সকিম্পি ধাৰেতি, আপত্তি পাচিত্তিযস্স.

১১৯৭. অনাপত্তি আবাধপচ্চযা, উম্মত্তিকায, আদিকম্মিকাযাতি.

চতুত্থসিক্খাপদং নিট্ঠিতং.

৫. পঞ্চমসিক্খাপদং

১১৯৮. তেন সমযেন বুদ্ধো ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তেন খো পন সমযেন ছব্বগ্গিযা ভিক্খুনিযো গন্ধৱণ্ণকেন নহাযন্তি. মনুস্সা উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম ভিক্খুনিযো গন্ধৱণ্ণকেন নহাযিস্সন্তি, সেয্যথাপি গিহিনিযো কামভোগিনিযো’’তি! অস্সোসুং খো ভিক্খুনিযো তেসং মনুস্সানং উজ্ঝাযন্তানং খিয্যন্তানং ৱিপাচেন্তানং. যা তা ভিক্খুনিযো অপ্পিচ্ছা…পে… তা উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম ছব্বগ্গিযা ভিক্খুনিযো গন্ধৱণ্ণকেন নহাযিস্সন্তী’’তি…পে… সচ্চং কিৰ, ভিক্খৱে, ছব্বগ্গিযা ভিক্খুনিযো গন্ধৱণ্ণকেন নহাযন্তীতি? ‘‘সচ্চং, ভগৱা’’তি. ৱিগৰহি বুদ্ধো ভগৱা…পে… কথঞ্হি নাম, ভিক্খৱে, ছব্বগ্গিযা ভিক্খুনিযো গন্ধৱণ্ণকেন নহাযিস্সন্তি! নেতং, ভিক্খৱে, অপ্পসন্নানং ৱা পসাদায…পে… এৱঞ্চ পন, ভিক্খৱে, ভিক্খুনিযো ইমং সিক্খাপদং উদ্দিসন্তু –

১১৯৯. ‘‘যা পন ভিক্খুনী গন্ধৱণ্ণকেন নহাযেয্য, পাচিত্তিয’’ন্তি.

১২০০. যা পনাতি যা যাদিসা…পে… ভিক্খুনীতি…পে… অযং ইমস্মিং অত্থে অধিপ্পেতা ভিক্খুনীতি.

গন্ধো নাম যো কোচি গন্ধো. ৱণ্ণকং নাম যং কিঞ্চি ৱণ্ণকং. নহাযেয্যাতি নহাযতি. পযোগে দুক্কটং, নহানপৰিযোসানে আপত্তি পাচিত্তিযস্স.

১২০১. অনাপত্তি আবাধপ্পচ্চযা, উম্মত্তিকায, আদিকম্মিকাযাতি.

পঞ্চমসিক্খাপদং নিট্ঠিতং.

৬. ছট্ঠসিক্খাপদং

১২০২. তেন সমযেন বুদ্ধো ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তেন খো পন সমযেন ছব্বগ্গিযা ভিক্খুনিযো ৱাসিতকেন পিঞ্ঞাকেন নহাযন্তি. মনুস্সা উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম ভিক্খুনিযো ৱাসিতকেন পিঞ্ঞাকেন নহাযিস্সন্তি, সেয্যথাপি গিহিনিযো কামভোগিনিযো’’তি! অস্সোসুং খো ভিক্খুনিযো তেসং মনুস্সানং উজ্ঝাযন্তানং খিয্যন্তানং ৱিপাচেন্তানং. যা তা ভিক্খুনিযো অপ্পিচ্ছা…পে… তা উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম ছব্বগ্গিযা ভিক্খুনিযো ৱাসিতকেন পিঞ্ঞাকেন নহাযিস্সন্তী’’তি…পে… সচ্চং কিৰ, ভিক্খৱে, ছব্বগ্গিযা ভিক্খুনিযো ৱাসিতকেন পিঞ্ঞাকেন নহাযন্তীতি? ‘‘সচ্চং, ভগৱা’’তি. ৱিগৰহি বুদ্ধো ভগৱা…পে… কথঞ্হি নাম, ভিক্খৱে, ছব্বগ্গিযা ভিক্খুনিযো ৱাসিতকেন পিঞ্ঞাকেন নহাযিস্সন্তি! নেতং, ভিক্খৱে, অপ্পসন্নানং ৱা পসাদায…পে… এৱঞ্চ পন, ভিক্খৱে, ভিক্খুনিযো ইমং সিক্খাপদং উদ্দিসন্তু –

১২০৩. ‘‘যা পন ভিক্খুনী ৱাসিতকেন পিঞ্ঞাকেন নহাযেয্য, পাচিত্তিয’’ন্তি.

১২০৪. যা পনাতি যা যাদিসা…পে… ভিক্খুনীতি…পে… অযং ইমস্মিং অত্থে অধিপ্পেতা ভিক্খুনীতি.

ৱাসিতকং নাম যং কিঞ্চি গন্ধৱাসিতকং. পিঞ্ঞাকং নাম তিলপিট্ঠং ৱুচ্চতি. নহাযেয্যাতি নহাযতি. পযোগে দুক্কটং, নহানপৰিযোসানে আপত্তি পাচিত্তিযস্স.

১২০৫. অনাপত্তি আবাধপ্পচ্চযা, পকতিপিঞ্ঞাকেন নহাযতি, উম্মত্তিকায, আদিকম্মিকাযাতি.

ছট্ঠসিক্খাপদং নিট্ঠিতং.

৭. সত্তমসিক্খাপদং

১২০৬. তেন সমযেন বুদ্ধো ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তেন খো পন সমযেন ভিক্খুনিযো ভিক্খুনিযা উম্মদ্দাপেন্তিপি পৰিমদ্দাপেন্তিপি. মনুস্সা ৱিহাৰচাৰিকং আহিণ্ডন্তা পস্সিত্ৱা উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম ভিক্খুনিযো ভিক্খুনিযা উম্মদ্দাপেস্সন্তিপি পৰিমদ্দাপেস্সন্তিপি সেয্যথাপি গিহিনিযো কামভোগিনিযো’’তি! অস্সোসুং খো ভিক্খুনিযো তেসং মনুস্সানং উজ্ঝাযন্তানং খিয্যন্তানং ৱিপাচেন্তানং. যা তা ভিক্খুনিযো অপ্পিচ্ছা…পে… তা উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম ভিক্খুনিযো ভিক্খুনিযা উম্মদ্দাপেস্সন্তিপি পৰিমদ্দাপেস্সন্তিপী’’তি…পে… সচ্চং কিৰ, ভিক্খৱে, ভিক্খুনিযো ভিক্খুনিযা উম্মদ্দাপেন্তিপি পৰিমদ্দাপেন্তিপীতি? ‘‘সচ্চং, ভগৱা’’তি. ৱিগৰহি বুদ্ধো ভগৱা…পে… কথঞ্হি নাম, ভিক্খৱে, ভিক্খুনিযো ভিক্খুনিযা উম্মদ্দাপেস্সন্তিপি পৰিমদ্দাপেস্সন্তিপি! নেতং, ভিক্খৱে, অপ্পসন্নানং ৱা পসাদায…পে… এৱঞ্চ পন, ভিক্খৱে, ভিক্খুনিযো ইমং সিক্খাপদং উদ্দিসন্তু –

১২০৭. ‘‘যা পন ভিক্খুনী ভিক্খুনিযা উম্মদ্দাপেয্য ৱা পৰিমদ্দাপেয্য ৱা, পাচিত্তিয’’ন্তি.

১২০৮. যা পনাতি যা যাদিসা…পে… ভিক্খুনীতি…পে… অযং ইমস্মিং অত্থে অধিপ্পেতা ভিক্খুনীতি.

ভিক্খুনিযাতি অঞ্ঞায ভিক্খুনিযা. উম্মদ্দাপেয্য ৱাতি উম্মদ্দাপেতি [উব্বট্টাপেতি (সী.)], আপত্তি পাচিত্তিযস্স. পৰিমদ্দাপেয্য ৱাতি সম্বাহাপেতি, আপত্তি পাচিত্তিযস্স.

১২০৯. অনাপত্তি গিলানায, আপদাসু, উম্মত্তিকায, আদিকম্মিকাযাতি.

সত্তমসিক্খাপদং নিট্ঠিতং.

৮-৯-১০. অট্ঠম-নৱম-দসমসিক্খাপদং

১২১০. তেন সমযেন বুদ্ধো ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তেন খো পন সমযেন ভিক্খুনিযো সিক্খমানায উম্মদ্দাপেন্তিপি পৰিমদ্দাপেন্তিপি…পে… সামণেৰিযা উম্মদ্দাপেন্তিপি পৰিমদ্দাপেন্তিপি…পে… গিহিনিযা উম্মদ্দাপেন্তিপি পৰিমদ্দাপেন্তিপি. মনুস্সা ৱিহাৰচাৰিকং আহিণ্ডন্তা পস্সিত্ৱা উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম ভিক্খুনিযো গিহিনিযা উম্মদ্দাপেস্সন্তিপি পৰিমদ্দাপেস্সন্তিপি, সেয্যথাপি গিহিনিযো কামভোগিনিযো’’তি! অস্সোসুং খো ভিক্খুনিযো তেসং মনুস্সানং উজ্ঝাযন্তানং খিয্যন্তানং ৱিপাচেন্তানং. যা তা ভিক্খুনিযো অপ্পিচ্ছা…পে… তা উজ্ঝাযন্তি খিয্যন্তি ৱিপাচেন্তি – কথঞ্হি নাম ভিক্খুনিযো গিহিনিযা উম্মদ্দাপেস্সন্তিপি পৰিমদ্দাপেস্সন্তিপীতি…পে… সচ্চং কিৰ, ভিক্খৱে, ভিক্খুনিযো গিহিনিযা উম্মদ্দাপেন্তিপি পৰিমদ্দাপেন্তিপীতি? ‘‘সচ্চং, ভগৱা’’তি. ৱিগৰহি বুদ্ধো ভগৱা…পে… কথঞ্হি নাম, ভিক্খৱে, ভিক্খুনিযো গিহিনিযা উম্মদ্দাপেস্সন্তিপি পৰিমদ্দাপেস্সন্তিপি! নেতং, ভিক্খৱে, অপ্পসন্নানং ৱা পসাদায…পে… এৱঞ্চ পন, ভিক্খৱে, ভিক্খুনিযো ইমং সিক্খাপদং উদ্দিসন্তু –

১২১১. ‘‘যা পন ভিক্খুনী (সিক্খমানায…পে… সামণেৰিযা…পে…) গিহিনিযা উম্মদ্দাপেয্য ৱা পৰিমদ্দাপেয্য ৱা, পাচিত্তিয’’ন্তি.

১২১২. যা পনাতি যা যাদিসা…পে… ভিক্খুনীতি…পে… অযং ইমস্মিং অত্থে অধিপ্পেতা ভিক্খুনীতি.

সিক্খমানা নাম দ্ৱে ৱস্সানি ছসু ধম্মেসু সিক্খিতসিক্খা.

সামণেৰী নাম দসসিক্খাপদিকা.

গিহিনী নাম অগাৰিনী ৱুচ্চতি.

উম্মদ্দাপেয্য ৱাতি উম্মদ্দাপেতি, আপত্তি পাচিত্তিযস্স.

পৰিমদ্দাপেয্য ৱাতি সম্বাহাপেতি, আপত্তি পাচিত্তিযস্স.

১২১৩. অনাপত্তি গিলানায [আবাধপ্পচ্চযা (ক.)], আপদাসু, উম্মত্তিকায, আদিকম্মিকাযাতি.

অট্ঠম নৱম দসমসিক্খাপদানি নিট্ঠিতানি.

১১. একাদসমসিক্খাপদং

১২১৪. তেন সমযেন বুদ্ধো ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তেন খো পন সমযেন ভিক্খুনিযো ভিক্খুস্স পুৰতো অনাপুচ্ছা আসনে নিসীদন্তি. ভিক্খূ উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম ভিক্খুনিযো ভিক্খুস্স পুৰতো অনাপুচ্ছা আসনে নিসীদিস্সন্তী’’তি…পে… সচ্চং কিৰ, ভিক্খৱে, ভিক্খুনিযো ভিক্খুস্স পুৰতো অনাপুচ্ছা আসনে নিসীদন্তীতি? ‘‘সচ্চং, ভগৱা’’তি. ৱিগৰহি বুদ্ধো ভগৱা…পে… কথঞ্হি নাম, ভিক্খৱে, ভিক্খুনিযো ভিক্খুস্স পুৰতো অনাপুচ্ছা আসনে নিসীদিস্সন্তি! নেতং, ভিক্খৱে, অপ্পসন্নানং ৱা পসাদায…পে… এৱঞ্চ পন, ভিক্খৱে, ভিক্খুনিযো ইমং সিক্খাপদং উদ্দিসন্তু –

১২১৫. ‘‘যা পন ভিক্খুনী ভিক্খুস্স পুৰতো অনাপুচ্ছা আসনে নিসীদেয্য, পাচিত্তিয’’ন্তি.

১২১৬. যা পনাতি যা যাদিসা…পে… ভিক্খুনীতি…পে… অযং ইমস্মিং অত্থে অধিপ্পেতা ভিক্খুনীতি.

ভিক্খুস্স পুৰতোতি উপসম্পন্নস্স পুৰতো. অনাপুচ্ছাতি অনপলোকেত্ৱা. আসনে নিসীদেয্যাতি অন্তমসো ছমাযপি নিসীদতি, আপত্তি পাচিত্তিযস্স.

১২১৭. অনাপুচ্ছিতে অনাপুচ্ছিতসঞ্ঞা আসনে নিসীদতি, আপত্তি পাচিত্তিযস্স. অনাপুচ্ছিতে ৱেমতিকা আসনে নিসীদতি, আপত্তি পাচিত্তিযস্স. অনাপুচ্ছিতে আপুচ্ছিতসঞ্ঞা আসনে নিসীদতি, আপত্তি পাচিত্তিযস্স.

আপুচ্ছিতে অনাপুচ্ছিতসঞ্ঞা, আপত্তি দুক্কটস্স. আপুচ্ছিতে ৱেমতিকা, আপত্তি দুক্কটস্স. আপুচ্ছিতে আপুচ্ছিতসঞ্ঞা, অনাপত্তি.

১২১৮. অনাপত্তি আপুচ্ছা আসনে নিসীদতি, গিলানায, আপদাসু, উম্মত্তিকায, আদিকম্মিকাযাতি.

একাদসমসিক্খাপদং নিট্ঠিতং.

১২. দ্ৱাদসমসিক্খাপদং

১২১৯. তেন সমযেন বুদ্ধো ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তেন খো পন সমযেন ভিক্খুনিযো অনোকাসকতং ভিক্খুং পঞ্হং পুচ্ছন্তি. ভিক্খূ উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম ভিক্খুনিযো অনোকাসকতং ভিক্খুং পঞ্হং পুচ্ছিস্সন্তী’’তি…পে… সচ্চং কিৰ, ভিক্খৱে, ভিক্খুনিযো অনোকাসকতং ভিক্খুং পঞ্হং পুচ্ছন্তীতি? ‘‘সচ্চং, ভগৱা’’তি. ৱিগৰহি বুদ্ধো ভগৱা…পে… কথঞ্হি নাম, ভিক্খৱে, ভিক্খুনিযো অনোকাসকতং ভিক্খুং পঞ্হং পুচ্ছিস্সন্তি! নেতং, ভিক্খৱে, অপ্পসন্নানং ৱা পসাদায…পে… এৱঞ্চ পন, ভিক্খৱে, ভিক্খুনিযো ইমং সিক্খাপদং উদ্দিসন্তু –

১২২০. ‘‘যা পন ভিক্খুনী অনোকাসকতং ভিক্খুং পঞ্হং পুচ্ছেয্য, পাচিত্তিয’’ন্তি.

১২২১. যা পনাতি যা যাদিসা…পে… ভিক্খুনীতি…পে… অযং ইমস্মিং অত্থে অধিপ্পেতা ভিক্খুনীতি.

অনোকাসকতন্তি অনাপুচ্ছা. ভিক্খুন্তি উপসম্পন্নং. পঞ্হং পুচ্ছেয্যাতি সুত্তন্তে ওকাসং কাৰাপেত্ৱা ৱিনযং ৱা অভিধম্মং ৱা পুচ্ছতি, আপত্তি পাচিত্তিযস্স. ৱিনযে ওকাসং কাৰাপেত্ৱা সুত্তন্তং ৱা অভিধম্মং ৱা পুচ্ছতি, আপত্তি পাচিত্তিযস্স. অভিধম্মে ওকাসং কাৰাপেত্ৱা সুত্তন্তং ৱা ৱিনযং ৱা পুচ্ছতি, আপত্তি পাচিত্তিযস্স.

১২২২. অনাপুচ্ছিতে অনাপুচ্ছিতসঞ্ঞা পঞ্হং পুচ্ছতি, আপত্তি পাচিত্তিযস্স. অনাপুচ্ছিতে ৱেমতিকা পঞ্হং পুচ্ছতি, আপত্তি পাচিত্তিযস্স. অনাপুচ্ছিতে আপুচ্ছিতসঞ্ঞা পঞ্হং পুচ্ছতি, আপত্তি পাচিত্তিযস্স.

আপুচ্ছিতে অনাপুচ্ছিতসঞ্ঞা, আপত্তি দুক্কটস্স. আপুচ্ছিতে ৱেমতিকা, আপত্তি দুক্কটস্স. আপুচ্ছিতে আপুচ্ছিতসঞ্ঞা, অনাপত্তি.

১২২৩. অনাপত্তি ওকাসং কাৰাপেত্ৱা পুচ্ছতি, অনোদিস্স ওকাসং কাৰাপেত্ৱা যত্থ কত্থচি পুচ্ছতি, উম্মত্তিকায, আদিকম্মিকাযাতি.

দ্ৱাদসমসিক্খাপদং নিট্ঠিতং.

১৩. তেৰসমসিক্খাপদং

১২২৪. তেন সমযেন বুদ্ধো ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তেন খো পন সমযেন অঞ্ঞতৰা ভিক্খুনী অসঙ্কচ্চিকা [অসঙ্কচ্ছিকা (স্যা.)] গামং পিণ্ডায পাৱিসি. তস্সা ৰথিকায ৱাতমণ্ডলিকা সঙ্ঘাটিযো উক্খিপিংসু. মনুস্সা উক্কুট্ঠিং অকংসু – ‘‘সুন্দৰা অয্যায থনুদৰা’’তি. সা ভিক্খুনী তেহি মনুস্সেহি উপ্পণ্ডিযমানা মঙ্কু অহোসি. অথ খো সা ভিক্খুনী উপস্সযং গন্ত্ৱা ভিক্খুনীনং এতমত্থং আৰোচেসি. যা তা ভিক্খুনিযো অপ্পিচ্ছা…পে… তা উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম ভিক্খুনী অসঙ্কচ্চিকা গামং পৱিসিস্সতী’’তি…পে… সচ্চং কিৰ, ভিক্খৱে, ভিক্খুনী অসঙ্কচ্চিকা গামং পাৱিসীতি? ‘‘সচ্চং, ভগৱা’’তি. ৱিগৰহি বুদ্ধো ভগৱা…পে… কথঞ্হি নাম, ভিক্খৱে, ভিক্খুনী অসঙ্কচ্চিকা গামং পৱিসিস্সতি! নেতং, ভিক্খৱে, অপ্পসন্নানং ৱা পসাদায…পে… এৱঞ্চ পন, ভিক্খৱে, ভিক্খুনিযো ইমং সিক্খাপদং উদ্দিসন্তু –

১২২৫. ‘‘যা পন ভিক্খুনী অসঙ্কচ্চিকা [অসঙ্কচ্ছিকা (স্যা.)] গামং পৱিসেয্য, পাচিত্তিয’’ন্তি.

১২২৬. যা পনাতি যা যাদিসা…পে… ভিক্খুনীতি…পে… অযং ইমস্মিং অত্থে অধিপ্পেতা ভিক্খুনীতি.

অসঙ্কচ্চিকাতি ৱিনা সঙ্কচ্চিকং.

সঙ্কচ্চিকং নাম অধক্খকং উব্ভনাভি, তস্স পটিচ্ছাদনত্থায.

গামং পৱিসেয্যাতি পৰিক্খিত্তস্স গামস্স পৰিক্খেপং অতিক্কামেন্তিযা আপত্তি পাচিত্তিযস্স. অপৰিক্খিত্তস্স গামস্স উপচাৰং ওক্কমন্তিযা আপত্তি পাচিত্তিযস্স.

১২২৭. অনাপত্তি অচ্ছিন্নচীৱৰিকায, নট্ঠচীৱৰিকায, গিলানায, অস্সতিযা, অজানন্তিযা, আপদাসু, উম্মত্তিকায, আদিকম্মিকাযাতি.

তেৰসমসিক্খাপদং নিট্ঠিতং.

ছত্তুপাহনৱগ্গো নৱমো.

উদ্দিট্ঠা খো, অয্যাযো, ছসট্ঠিসতা পাচিত্তিযা ধম্মা. তত্থায্যাযো পুচ্ছামি – ‘‘কচ্চিত্থ পৰিসুদ্ধা’’? দুতিযম্পি পুচ্ছামি – ‘‘কচ্চিত্থ পৰিসুদ্ধা’’? ততিযম্পি পুচ্ছামি – ‘‘কচ্চিত্থ পৰিসুদ্ধা’’? পৰিসুদ্ধেত্থায্যাযো, তস্মা তুণ্হী, এৱমেতং ধাৰযামীতি.

খুদ্দকং সমত্তং.

ভিক্খুনিৱিভঙ্গে পাচিত্তিযকণ্ডং নিট্ঠিতং.