১. পঠমসিক্খাপদং

১০৬৭. তেন সমযেন বুদ্ধো ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তেন খো পন সমযেন ভিক্খুনিযো গব্ভিনিং ৱুট্ঠাপেন্তি. সা পিণ্ডায চৰতি. মনুস্সা এৱমাহংসু – ‘‘দেথায্যায ভিক্খং, গৰুভাৰা [গৰুগব্ভা (স্যা.)] অয্যা’’তি. মনুস্সা উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম ভিক্খুনিযো গব্ভিনিং ৱুট্ঠাপেস্সন্তী’’তি! অস্সোসুং খো ভিক্খুনিযো তেসং মনুস্সানং উজ্ঝাযন্তানং খিয্যন্তানং ৱিপাচেন্তানং. যা তা ভিক্খুনিযো অপ্পিচ্ছা…পে… তা উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম ভিক্খুনিযো গব্ভিনিং ৱুট্ঠাপেস্সন্তী’’তি…পে… সচ্চং কিৰ, ভিক্খৱে, ভিক্খুনিযো গব্ভিনিং ৱুট্ঠাপেন্তীতি? ‘‘সচ্চং, ভগৱা’’তি. ৱিগৰহি বুদ্ধো ভগৱা…পে… কথঞ্হি নাম, ভিক্খৱে, ভিক্খুনিযো গব্ভিনিং ৱুট্ঠাপেস্সন্তি! নেতং, ভিক্খৱে, অপ্পসন্নানং ৱা পসাদায…পে… এৱঞ্চ পন, ভিক্খৱে, ভিক্খুনিযো ইমং সিক্খাপদং উদ্দিসন্তু –

১০৬৮. ‘‘যা পন ভিক্খুনী গব্ভিনিং ৱুট্ঠাপেয্য, পাচিত্তিয’’ন্তি.

১০৬৯. যা পনাতি যা যাদিসা…পে… ভিক্খুনীতি…পে… অযং ইমস্মিং অত্থে অধিপ্পেতা ভিক্খুনীতি.

গব্ভিনী নাম আপন্নসত্তা ৱুচ্চতি. ৱুট্ঠাপেয্যাতি উপসম্পাদেয্য.

‘‘ৱুট্ঠাপেস্সামী’’তি গণং ৱা আচৰিনিং ৱা পত্তং ৱা চীৱৰং ৱা পৰিযেসতি, সীমং ৱা সম্মন্নতি, আপত্তি দুক্কটস্স. ঞত্তিযা দুক্কটং. দ্ৱীহি কম্মৱাচাহি দুক্কটা. কম্মৱাচাপৰিযোসানে উপজ্ঝাযায আপত্তি পাচিত্তিযস্স. গণস্স চ আচৰিনিযা চ আপত্তি দুক্কটস্স.

১০৭০. গব্ভিনিযা গব্ভিনিসঞ্ঞা ৱুট্ঠাপেতি, আপত্তি পাচিত্তিযস্স. গব্ভিনিযা ৱেমতিকা ৱুট্ঠাপেতি, আপত্তি দুক্কটস্স. গব্ভিনিযা অগব্ভিনিসঞ্ঞা ৱুট্ঠাপেতি, অনাপত্তি. অগব্ভিনিযা গব্ভিনিসঞ্ঞা, আপত্তি দুক্কটস্স. অগব্ভিনিযা ৱেমতিকা, আপত্তি দুক্কটস্স. অগব্ভিনিযা অগব্ভিনিসঞ্ঞা, অনাপত্তি.

১০৭১. অনাপত্তি গব্ভিনিং অগব্ভিনিসঞ্ঞা ৱুট্ঠাপেতি, অগব্ভিনিং অগব্ভিনিসঞ্ঞা ৱুট্ঠাপেতি, উম্মত্তিকায, আদিকম্মিকাযাতি.

পঠমসিক্খাপদং নিট্ঠিতং.