২. দুতিযসিক্খাপদং

১০৭২. তেন সমযেন বুদ্ধো ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তেন খো পন সমযেন ভিক্খুনিযো পাযন্তিং ৱুট্ঠাপেন্তি. সা পিণ্ডায চৰতি. মনুস্সা এৱমাহংসু – ‘‘দেথায্যায ভিক্খং, সদুতিযিকা অয্যা’’তি. মনুস্সা উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম ভিক্খুনিযো পাযন্তিং ৱুট্ঠাপেস্সন্তী’’তি! অস্সোসুং খো ভিক্খুনিযো তেসং মনুস্সানং উজ্ঝাযন্তানং খিয্যন্তানং ৱিপাচেন্তানং. যা তা ভিক্খুনিযো অপ্পিচ্ছা…পে… তা উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম ভিক্খুনিযো পাযন্তিং ৱুট্ঠাপেস্সন্তী’’তি…পে… সচ্চং কিৰ, ভিক্খৱে, ভিক্খুনিযো পাযন্তিং ৱুট্ঠাপেন্তীতি? ‘‘সচ্চং, ভগৱা’’তি. ৱিগৰহি বুদ্ধো ভগৱা…পে… কথঞ্হি নাম, ভিক্খৱে, ভিক্খুনিযো পাযন্তিং ৱুট্ঠাপেস্সন্তি! নেতং, ভিক্খৱে, অপ্পসন্নানং ৱা পসাদায…পে… এৱঞ্চ পন, ভিক্খৱে, ভিক্খুনিযো ইমং সিক্খাপদং উদ্দিসন্তু –

১০৭৩. ‘‘যা পন ভিক্খুনী পাযন্তিং ৱুট্ঠাপেয্য, পাচিত্তিয’’ন্তি.

১০৭৪. যা পনাতি যা যাদিসা…পে… ভিক্খুনীতি…পে… অযং ইমস্মিং অত্থে অধিপ্পেতা ভিক্খুনীতি.

পাযন্তী নাম মাতা ৱা হোতি [হোতু (ক.)] ধাতি [ধাতী (সী. স্যা.)] ৱা.

ৱুট্ঠাপেয্যাতি উপসম্পাদেয্য.

‘‘ৱুট্ঠাপেস্সামী’’তি গণং ৱা আচৰিনিং ৱা পত্তং ৱা চীৱৰং ৱা পৰিযেসতি, সীমং ৱা সম্মন্নতি, আপত্তি দুক্কটস্স. ঞত্তিযা দুক্কটং. দ্ৱীহি কম্মৱাচাহি দুক্কটা. কম্মৱাচাপৰিযোসানে উপজ্ঝাযায আপত্তি পাচিত্তিযস্স. গণস্স চ আচৰিনিযা চ আপত্তি দুক্কটস্স.

১০৭৫. পাযন্তিযা পাযন্তিসঞ্ঞা ৱুট্ঠাপেতি, আপত্তি পাচিত্তিযস্স. পাযন্তিযা ৱেমতিকা ৱুট্ঠাপেতি, আপত্তি দুক্কটস্স. পাযন্তিযা অপাযন্তিসঞ্ঞা ৱুট্ঠাপেতি, অনাপত্তি. অপাযন্তিযা পাযন্তিসঞ্ঞা, আপত্তি দুক্কটস্স. অপাযন্তিযা ৱেমতিকা, আপত্তি দুক্কটস্স. অপাযন্তিযা অপাযন্তিসঞ্ঞা, অনাপত্তি.

১০৭৬. অনাপত্তি পাযন্তিং অপাযন্তিসঞ্ঞা ৱুট্ঠাপেতি, অপাযন্তিং অপাযন্তিসঞ্ঞা ৱুট্ঠাপেতি, উম্মত্তিকায, আদিকম্মিকাযাতি.

দুতিযসিক্খাপদং নিট্ঠিতং.