১. অনুসযৱাৰৱণ্ণনা

৩. পৱত্তাৱিৰামৱসেনাতি অনুসযপ্পৱত্তিযা অৱিৰামৱসেন, অৱিচ্ছেদৱসেনাতি অত্থো. কথং পন কুসলাব্যাকতচিত্তক্খণে অনুসযানং পৱত্তীতি আহ ‘‘মগ্গেনেৱ…পে… পুব্বে’’তি.

২০. চিত্তচেতসিকানঞ্চ ঠানং নাম চিত্তুপ্পাদোতি আহ ‘‘একস্মিং চিত্তুপ্পাদে’’তি. তেসং তেসং পুগ্গলানন্তি পুথুজ্জনাদীনং পুগ্গলানং. পকতিযা সভাৱেন. সভাৱসিদ্ধা হি দুক্খায ৱেদনায কামৰাগস্স অননুসযনট্ঠানতা. এৱং সেসেসুপি যথাৰহং ৱত্তব্বং. ৱক্খতি হি ‘‘পকতিযা দুক্খাদীনং কামৰাগাদীনং অননুসযনট্ঠানতং সন্ধায ৱুত্ত’’ন্তি. পহানেনাতি তস্স তস্স অনুসযস্স সমুচ্ছিন্দনেন. তিণ্ণং পুগ্গলানন্তি পুথুজ্জনসোতাপন্নসকদাগামীনং. দ্ৱিন্নং পুগ্গলানন্তি অনাগামিঅৰহন্তানং. এত্থাতি এতস্মিং পুগ্গলোকাসৱাৰে. পুৰিমনযেতি ‘‘তিণ্ণং পুগ্গলান’’ন্তিআদিকে পুৰিমস্মিং ৱিস্সজ্জননযে. ওকাসন্তি উপ্পত্তিট্ঠানং, ইধ পন দুক্খৱেদনা ৱেদিতব্বা. পচ্ছিমনযেতি ‘‘দ্ৱিন্নং পুগ্গলান’’ন্তিআদিকে ৱিস্সজ্জননযে. অনোকাসতা অননুসযনট্ঠানতা.

অনুসযৱাৰৱণ্ণনা নিট্ঠিতা.