খন্ধকপুচ্ছাৱাৰো

পুচ্ছাৱিস্সজ্জনাৱণ্ণনা

৩২০. উপসম্পদক্খন্ধকন্তি পব্বজ্জাখন্ধকং (মহাৱ. ৮৪). সহ নিদ্দেসেনাতি সনিদ্দেসং. ‘‘সন্নিদ্দেস’’ন্তি ৱা পাঠো, সো এৱত্থো. নিদানেন চ নিদ্দেসেন চ সদ্ধিন্তি এত্থ পঞ্ঞত্তিট্ঠানপুগ্গলাদিপ্পকাসকং নিদানৱচনং নিদানং নাম, তন্নিদানং পটিচ্চ নিদ্দিট্ঠসিক্খাপদানি নিদ্দেসো নাম, তেহি অৱযৱভূতেহি সহিতং তংসমুদাযভূতং খন্ধকং পুচ্ছামীতি অত্থো. উত্তমানি পদানীতি আপত্তিপঞ্ঞাপকানি ৱচনানি অধিপ্পেতানি. তেসং…পে… কতি আপত্তিযো হোন্তীতি তেহি ৱচনেহি পঞ্ঞত্তা কতি আপত্তিক্খন্ধা হোন্তীতি অত্থো. ননু আপত্তিযো নাম পুগ্গলানঞ্ঞেৱ হোন্তি, ন পদানং, কস্মা পন ‘‘সমুক্কট্ঠপদানং কতি আপত্তিযো’’তি সামিৱসেন নিদ্দেসো কতোতি আহ ‘‘যেন যেন হি পদেনা’’তিআদি. পাড়িযং উপোসথন্তিআদি উপোসথক্খন্ধকাদীনঞ্ঞেৱ (মহাৱ. ১৩২ আদযো) গহণং.

পুচ্ছাৱিস্সজ্জনাৱণ্ণনা নিট্ঠিতা.