সমথভেদং

অধিকৰণপৰিযাযৱাৰৱণ্ণনা

২৯৩. ছট্ঠে পৰিযাযৱাৰে অলোভো পুব্বঙ্গমোতিআদি সাসনট্ঠিতিযা অৱিপৰীততো ধম্মৱাদিস্স ৱিৱাদং সন্ধায ৱুত্তং. অট্ঠাৰস ভেদকৰৱত্থূনি ঠানানীতি ধম্মাদীসু অধম্মোতিআদিনা গহেত্ৱা দীপনানি ইধেৱ ভেদকৰৱত্থূনি, তানি এৱ কাযকলহাদিৱিৱাদস্স কাৰণত্তা ঠানানি, ওকাসত্তা ৱত্থূনি, আধাৰত্তা ভূমিযোতি চ ৱুত্তানি. অব্যাকতহেতূতি অসেক্খানং ৱিৱাদং সন্ধায ৱুত্তং. দ্ৱাদস মূলানীতি কোধো উপনাহো, মক্খো পলাসো, ইস্সা মচ্ছৰিযং, মাযা সাঠেয্যং, পাপিচ্ছতা মহিচ্ছতা, সন্দিট্ঠিপৰামাসিতা আধানগ্গাহীদুপ্পটিনিস্সজ্জিতানীতি ইমেসং ছন্নং যুগড়ানং ৱসেন ছ ধম্মা চেৱ লোভাদযো ছ হেতূ চাতি দ্ৱাদস ধম্মা ৱিৱাদাধিকৰণস্স মূলানি.

২৯৪. চুদ্দস মূলানীতি তানেৱ দ্ৱাদস কাযৱাচাহি সদ্ধিং চুদ্দস অনুৱাদাধিকৰণস্স মূলানি.

২৯৫. পথৱীখণনাদীসু পণ্ণত্তিৱজ্জেসু কুসলাব্যাকতচিত্তমূলিকা আপত্তি হোতীতি দস্সেতুং ‘‘অলোভো পুব্বঙ্গমো’’তিআদি ৱুত্তং. সত্ত আপত্তিক্খন্ধা ঠানানীতিআদি সত্তন্নং আপত্তিক্খন্ধানং পটিচ্ছাদনপচ্চযা আপত্তিসম্ভৱতো ৱুত্তং. ‘‘আপত্তাধিকৰণপচ্চযা চতস্সো আপত্তিযো আপজ্জতী’’তি (পৰি. ২৯০) হি ৱুত্তং. ‘‘ছ হেতূ’’তি ইদং কুসলানং আপত্তিহেতুৱোহাৰস্স অযুত্ততায ৱুত্তং, ন পন কুসলহেতূনং অভাৱতো. ‘‘অলোভো পুব্বঙ্গমো’’তি হি আদি ৱুত্তং. আপত্তিহেতৱো এৱ হি পুব্বঙ্গমনামেন ৱুত্তা.

২৯৬. চত্তাৰি কম্মানি ঠানানীতিআদীসু অপলোকনৱাচা, ঞত্তিআদিৱাচাযো চ কম্মানীতি ৱুত্তং. তা এৱ হি একসীমাযং সামগ্গিমুপগতানং কম্মপ্পত্তানং অনুমতিযা সাৱনকিৰিযানিপ্ফত্তিসঙ্খাতস্স সঙ্ঘগণকিচ্চসভাৱস্স কিচ্চাধিকৰণস্স অধিট্ঠানাভাৱেন ‘‘ঠানৱত্থুভূমিযো’’তি ৱুচ্চন্তি. একং মূলং সঙ্ঘোতি যেভুয্যৱসেন ৱুত্তং. গণঞত্তিঅপলোকনানঞ্হি গণোপি মূলন্তি. ঞত্তিতো ৱাতি ঞত্তিঞত্তিদুতিযঞত্তিচতুত্থকম্মৱাচানং ঞত্তিৰূপত্তা, ঞত্তিপুব্বকত্তা চ ৱুত্তং. কম্মঞত্তিকম্মৱাচাঞত্তিৱসেন হি দুৱিধাসু ঞত্তীসু অনুস্সাৱনাপি কম্মমূলকন্ত্ৱেৱ সঙ্গয্হন্তি. ঞত্তিৱিভাগো চাযং উপৰি আৱি ভৱিস্সতি.

‘‘ইমে সত্ত সমথা…পে… পৰিযাযেনা’’তি ইদং পুচ্ছাৱচনং. ‘‘সিযা’’তি ইদং ৱিসজ্জনং. ‘‘কথঞ্চ সিযা’’তি ইদং পুন পুচ্ছা. ৱিৱাদাধিকৰণস্স দ্ৱে সমথাতিআদি পুন ৱিসজ্জনং. তত্থ ‘‘ৱত্থুৱসেনা’’তি ইদং ‘‘সত্ত সমথা দস সমথা হোন্তী’’তি ইমস্স কাৰণৱচনং. ‘‘পৰিযাযেনা’’তি ইদং ‘‘দস সমথা সত্ত সমথা হোন্তী’’তি ইমস্স কাৰণৱচনং. চতুব্বিধাধিকৰণসঙ্খাতৱত্থুৱসেন চ দেসনাক্কমসঙ্খাতপৰিযাযৱসেন চাতি অত্থো.

অধিকৰণপৰিযাযৱাৰৱণ্ণনা নিট্ঠিতা.

সাধাৰণৱাৰাদিৱণ্ণনা

২৯৭. সত্তমে সাধাৰণৱাৰে সাধাৰণাতি ৱিৱাদাধিকৰণস্স ৱূপসমনকিচ্চসাধাৰণা. এৱং সব্বত্থ.

২৯৮. অট্ঠমে তব্ভাগিযৱাৰে তব্ভাগিযাতি ৱিৱাদাধিকৰণস্স ৱূপসমনতো তপ্পক্খিকা.

সাধাৰণৱাৰাদিৱণ্ণনা নিট্ঠিতা.

সমথাসমথস্সসাধাৰণৱাৰৱণ্ণনা

২৯৯. নৱমে সমথাসমথসাধাৰণৱাৰে ‘‘সব্বে সমথা একতোৱ অধিকৰণং সমেন্তি উদাহু নানা’’তি পুচ্ছন্তেন ‘‘সমথা সমথস্স সাধাৰণা, সমথা সমথস্স অসাধাৰণা’’তি ৱুত্তং. ৱিৱাদাদিঅধিকৰণক্কমেন তব্বূপসমহেতুভূতে সমথে উদ্ধৰন্তো ‘‘যেভুয্যসিকা’’তিআদিমাহ. সম্মুখাৱিনযং ৱিনা কস্সচি সমথস্স অসম্ভৱা সেসা ছপি সমথা সম্মুখাৱিনযস্স সাধাৰণা ৱুত্তা, তেসং পন ছন্নং অঞ্ঞমঞ্ঞাপেক্খাভাৱতো তে অঞ্ঞমঞ্ঞং অসাধাৰণা ৱুত্তা. তব্ভাগিযৱাৰেপি এসেৱ নযো.

সমথাসমথস্সসাধাৰণৱাৰৱণ্ণনা নিট্ঠিতা.

সমথসম্মুখাৱিনযৱাৰাদিৱণ্ণনা

৩০১-৩. একাদসমৱাৰেপি সম্মুখাৱিনযোতিআদি পুচ্ছা. যেভুয্যসিকা সতিৱিনযোতিআদি ৱিসজ্জনং. এৱং ৱিনযৱাৰে কুসল-ৱাৰে ততো পৰেসুপি পুচ্ছাৱিসজ্জনপৰিচ্ছেদো ৱেদিতব্বো.

তত্থ সম্মুখাৱিনযো সিযা কুসলোতিআদীসু তস্মিং তস্মিং ৱিনযকম্মে, ৱিৱাদাদিম্হি চ নিযুত্তপুগ্গলানং সমুপ্পজ্জনককুসলাদীনং ৱসেন সম্মুখাৱিনযাদীনং, ৱিৱাদাদীনঞ্চ কুসলাদিভাৱো তেন তেন উপচাৰেন ৱুত্তো. যস্মা পনেতস্স সম্মুখাৱিনযো নাম সঙ্ঘসম্মুখতাদযো হোন্তি, তেসঞ্চ অনৱজ্জসভাৱত্তা অকুসলে ৱিজ্জমানেপি অকুসলত্তূপচাৰো ন যুত্তো আপত্তাধিকৰণস্স অকুসলত্তূপচাৰো ৱিয, তস্মা নত্থি সম্মুখাৱিনযো অকুসলোতি অত্থো.

৩০৪. ততো পৰেসু যত্থ যেভুয্যসিকা লব্ভতি, তত্থ সম্মুখাৱিনযো লব্ভতীতিআদি সম্মুখাৱিনযস্স ইতৰেহি সমথেহি নিযমেন সংসট্ঠতং, ইতৰেসং পন ছন্নং অঞ্ঞমঞ্ঞং সংসগ্গাভাৱঞ্চ দস্সেতুং ৱুত্তং.

সমথসম্মুখাৱিনযৱাৰাদিৱণ্ণনা নিট্ঠিতা.

সংসট্ঠৱাৰাদিৱণ্ণনা

৩০৬. অধিকৰণন্তি ৱা সমথাতি ৱা ইমে ধম্মা সংসট্ঠাতিআদি সমথানং অধিকৰণেসু এৱ যথাৰহং পৱত্তিং, অধিকৰণানি ৱিনা তেসং ৱিসুং অট্ঠানঞ্চ দস্সেতুং ৱুত্তং. ৱিনিব্ভুজিত্ৱা নানাকৰণং পঞ্ঞাপেতুন্তি অধিকৰণতো সমথেহি ৱিযোজেত্ৱা অসংসট্ঠে কত্ৱা নানাকৰণং অঞ্ঞমঞ্ঞং অসংসট্ঠতায ঠিতভাৱসঙ্খাতং নানত্তং পঞ্ঞাপেতুং অধিকৰণৱূপসমক্খণে এৱ তেসং অসংসগ্গং পঞ্ঞাপেতুং কিং সক্কাতি পুচ্ছতি.

অধিকৰণন্তিআদি গাৰয্হৱাদদস্সনং. সো মা হেৱন্তি যো এৱং ৱদতি, সো ‘‘মা এৱং ৱদা’’তি ৱচনীযো অস্স, ন চ লব্ভতি সমথানং অঞ্ঞত্ৰ অধিকৰণা ৱূপসমলক্খণন্তি পহানাৱত্থানসঙ্খাতং নানাকৰণং পটিক্খিপতি. লক্খণতো পন অধিকৰণেহি সমথানং নানাকৰণং অত্থেৱাতি দট্ঠব্বং. সমথা অধিকৰণেহি সম্মন্তীতি অপলোকনাদীহি চতূহি কিচ্চাধিকৰণেহি সব্বেপি সমথা নিট্ঠানং গচ্ছন্তি, নাঞ্ঞেহীতি ইমমত্থং সন্ধায ৱুত্তং. তেনেৱ ৱক্খতি ‘‘সম্মুখাৱিনযো ৱিৱাদাধিকৰণেন ন সম্মতি. অনুৱাদ…পে… আপত্তাধিকৰণেন ন সম্মতি, কিচ্চাধিকৰণেন সম্মতী’’তিআদি (পৰি. ৩১১).

৩০৭-৩১৩. ৱিৱাদাধিকৰণং কতিহি সমথেহি সম্মতীতিআদিকো সম্মতিৱাৰো. তদনন্তৰো সম্মতিনসম্মতিৱাৰো চ অধিকৰণেহি সমথানং সংসট্ঠতং, ৱিসংসট্ঠতঞ্চ দস্সেতুং ৱুত্তো. সমথা সমথেহি সম্মন্তীতিআদিকো সমথাধিকৰণৱাৰো সমথানং অঞ্ঞমঞ্ঞং, অধিকৰণেহি চ অধিকৰণানঞ্চ অঞ্ঞমঞ্ঞং, সমথেহি চ ৱূপসমাৱূপসমং দস্সেতুং ৱুত্তো.

৩১৪. সমুট্ঠাপেতিৱাৰো পন অধিকৰণেহি অধিকৰণানং উপ্পত্তিপ্পকাৰদস্সনত্থং ৱুত্তো. ন কতমং অধিকৰণন্তি অত্তনো সম্ভৱমত্তেন একম্পি অধিকৰণং ন সমুট্ঠাপেতীতি অত্থো. কথঞ্চৰহি সমুট্ঠাপেতীতি আহ ‘‘অপি চা’’তিআদি. তত্থ জাযন্তীতি অনন্তৰমেৱ অনুপ্পজ্জিত্ৱা পৰম্পৰপচ্চযা জাযন্তীতি অধিপ্পাযো. ‘‘ধম্মো অধম্মো’’তিআদিনা উভিন্নং পুগ্গলানং ৱিৱাদপচ্চযা অঞ্ঞমঞ্ঞখেমভঙ্গা হোন্তি, তপ্পচ্চযা তেসং পক্খং পৰিযেসনেন কলহং ৱড্ঢন্তানং ৱিৱাদো কঞ্চি মহাপৰিসং সঙ্ঘপৰিণাযকং লজ্জিং আগম্ম ৱূপসমং গচ্ছতি. তথা অৱূপসমন্তে পন ৱিৱাদো কমেন ৱড্ঢিত্ৱা সকলেপি সঙ্ঘে ৱিৱাদং সমুট্ঠাপেতি, ততো অনুৱাদাদীনীতি এৱং পৰম্পৰক্কমেন ৱূপসমকাৰণাভাৱে চত্তাৰি অধিকৰণানি জাযন্তি. তং সন্ধাযাহ ‘‘সঙ্ঘো ৱিৱদতি ৱিৱাদাধিকৰণ’’ন্তি. সঙ্ঘস্স ৱিৱদতো যো ৱিৱাদো, তং ৱিৱাদাধিকৰণং হোতীতি অত্থো. এস নযো সেসেসুপি.

সংসট্ঠৱাৰাদিৱণ্ণনা নিট্ঠিতা.

ভজতিৱাৰৱণ্ণনা

৩১৮. তদনন্তৰৱাৰে পন ৱিৱাদাধিকৰণং চতুন্নং অধিকৰণানন্তিআদি অধিকৰণানং ৱুত্তনযেন অঞ্ঞমঞ্ঞপচ্চযত্তেপি সংসগ্গভাৱদস্সনত্থং ৱুত্তং. ৱিৱাদাধিকৰণং চতুন্নং অধিকৰণানং ৱিৱাদাধিকৰণং ভজতীতিআদীসু ৱিৱাদাধিকৰণং চতূসু অধিকৰণেসু ৱিৱাদাধিকৰণভাৱমেৱ ভজতি, নাঞ্ঞাধিকৰণভাৱং, চতূসু অধিকৰণেসু ৱিৱাদাধিকৰণত্তমেৱ নিস্সিতং ৱিৱাদাধিকৰণমেৱ পৰিযাপন্নং ৱিৱাদাধিকৰণভাৱেনেৱ সঙ্গহিতন্তি এৱমত্থো গহেতব্বো.

৩১৯. ৱিৱাদাধিকৰণং সত্তন্নং সমথানং কতি সমথে ভজতীতিআদি পন চতুন্নং অধিকৰণানং ৱূপসমনে সতি নিযতসমথে দস্সেতুং ৱুত্তং. তত্থ কতি সমথে ভজতীতি অত্তনো উপসমত্থায কিত্তকে সমথে উপগচ্ছতি, কিত্তকে সমথে আগম্ম ৱূপসমং গচ্ছতীতি অত্থো. কতি সমথপৰিযাপন্নন্তি অত্তানং ৱূপসমেতুং কতিসু সমথেসু তেহি সমানৱসেন পৱিট্ঠং. কতিহি সমথেহি সঙ্গহিতন্তি ৱূপসমং কৰোন্তেহি কতিহি সমথেহি ৱূপসমকৰণত্থং সঙ্গহিতং.

ভজতিৱাৰৱণ্ণনা নিট্ঠিতা.