অন্তৰপেয্যালং

কতিপুচ্ছাৱাৰৱণ্ণনা

২৭১. কতি আপত্তিযোতি পাৰাজিকাদীসু পঞ্চসু আপত্তীসু মেথুনাদিন্নাদানাদিঅন্তোগধভেদং অপেক্খিত্ৱা জাতিৱসেন একত্তং আৰোপেত্ৱা পুচ্ছা কতা. কতি আপত্তিক্খন্ধাতি অন্তোগধভেদং অপেক্খিত্ৱা পচ্চেকং ৰাসট্ঠেনাতি এত্তকমেৱেত্থ ভেদো. ৱিনীতানিযেৱ ৱিনীতৱত্থূনীতি আপত্তিতো ৱিৰমণানি এৱ অৱিপ্পটিসাৰপামোজ্জাদিধম্মানং কাৰণত্তা ৱত্থূনীতি ৱিনীতৱত্থূনি, তানি এত্থ অত্থতো ৱিৰতিআদিঅনৱজ্জধম্মা এৱ. ৱেৰং মণতীতি ৱেৰহেতুত্তা ‘‘ৱেৰ’’ন্তি লদ্ধনামং ৰাগাদিঅকুসলপক্খং ৱিনাসেতি.

ধম্মস্সৱনগ্গং ভিন্দিত্ৱা গচ্ছতীতি বহূসু একতো নিসীদিত্ৱা ধম্মং সুণন্তেসু তং ধম্মস্সৱনসমাগমং কোপেত্ৱা উট্ঠায গচ্ছতি. অনাদৰোৱাতি তুস্সিতব্বট্ঠানে তুট্ঠিং, সংৱিজিতব্বট্ঠানে সংৱেগঞ্চ অপৱেদেন্তো এৱ. কাযপাগব্ভিযন্তি উন্নতিৱসেন পৱত্তনকাযানাচাৰং.

২৭৪. মেত্তায সম্ভূতং মেত্তং, কাযকম্মং. উভযেহিপীতি নৱকেহি, থেৰেহি চ. পিযং কৰোতীতি তং পুগ্গলং পেমট্ঠানং কৰোতি, কেসন্তি আহ ‘‘সব্ৰহ্মচাৰীন’’ন্তি.

পুগ্গলং পটিৱিভজিত্ৱা ভুঞ্জতীতি পকতেন সম্বন্ধো. তমেৱ পুগ্গলপটিৱিভাগং দস্সেতুং ‘‘অসুকস্সা’’তিআদি ৱুত্তং.

ভুজিস্সভাৱকৰণতোতি তণ্হাদাসব্যতো মোচেত্ৱা সমথৱিপস্সনাসু সেৰিৱিহাৰিতাকৰণতোতি অত্থো. নিয্যাতীতি পৱত্ততি. সম্মাদুক্খক্খযায সংৱত্ততীতি অত্থো.

কতিপুচ্ছাৱাৰৱণ্ণনা নিট্ঠিতা.

ছআপত্তিসমুট্ঠানৱাৰৱণ্ণনা

২৭৬. পঠমেন আপত্তিসমুট্ঠানেনাতি কেৱলং কাযেন. পাৰাজিকাপত্তিযা একন্তসচিত্তকসমুট্ঠানত্তা ‘‘ন হীতি ৱত্তব্ব’’ন্তি ৱুত্তং. সঙ্ঘাদিসেসাদীনং দুক্কটপৰিযোসানানং পঞ্চন্নং অচিত্তকানম্পি সম্ভৱতো ‘‘সিযা’’তি ৱুত্তং, আপজ্জনং সিযা ভৱেয্যাতি অত্থো. হীনুক্কট্ঠেহি জাতিআদীহি ওমসনে এৱ দুব্ভাসিতস্স পঞ্ঞত্তত্তা সা একন্তৱাচাচিত্তসমুট্ঠানা এৱাতি.

দুতিযসমুট্ঠাননযে ৱাচায এৱ সমাপজ্জিতব্বপাটিদেসনীযস্স অভাৱা ‘‘ন হী’’তি ৱুত্তং.

ততিযে পন ৱোসাসমানৰূপং ভিক্খুনিং কাযৱাচাহি অনপসাদনপচ্চযা পাটিদেসনীযসম্ভৱতো ‘‘সিযা’’তি ৱুত্তং.

ওমসনে পাচিত্তিযস্স অদিন্নাদানসমুট্ঠানত্তেপি তপ্পচ্চযা পঞ্ঞত্তস্স দুব্ভাসিতস্স পঞ্চমেনেৱ সমুপ্পত্তীতি দস্সেতুং চতুত্থৱাৰে ‘‘দুব্ভাসিতং আপজ্জেয্যাতি ন হীতি ৱত্তব্ব’’ন্তি ৱত্ৱা পঞ্চমৱাৰে ‘‘সিযাতি ৱত্তব্ব’’ন্তি ৱুত্তং. কাযৱিকাৰেনেৱ ওমসন্তস্স পনেত্থ দুব্ভাসিতভাৱেপি কাযকীড়াভাৱাভাৱতো দুক্কটমেৱাতি দট্ঠব্বং.

ছট্ঠৱাৰে পন ৱিজ্জমানোপি কাযো দুব্ভাসিতস্স অঙ্গং ন হোতি, পঞ্চমসমুট্ঠানে এৱ ছট্ঠম্পি পৱিসতীতি দস্সেতুং ‘‘ন হী’’তি পটিক্খিত্তং, ন পন তত্থ সব্বথা দুব্ভাসিতেন অনাপত্তীতি দস্সেতুং. ন হি দৱকম্যতায কাযৱাচাহি ওমসন্তস্স দুব্ভাসিতাপত্তি ন সম্ভৱতি. যঞ্হি পঞ্চমেনেৱ সমাপজ্জতি, তং ছট্ঠেনপি সমাপজ্জতি এৱ ধম্মদেসনাপত্তি ৱিযাতি গহেতব্বং. সেসং সমুট্ঠানৱাৰে সুৱিঞ্ঞেয্যমেৱ.

ছআপত্তিসমুট্ঠানৱাৰৱণ্ণনা নিট্ঠিতা.

কতাপত্তিৱাৰৱণ্ণনা

২৭৭. দুতিযে পন কতিৱাৰে পঠমসমুট্ঠানেন আপজ্জিতব্বানং আপত্তীনং লহুদস্সনসুখত্থং কুটিকাৰাদীনি এৱ সমুদ্ধটানি, ন অঞ্ঞেসং অভাৱা, সঞ্চৰিত্তাদীনম্পি ৱিজ্জমানত্তা. এৱং দুতিযসমুট্ঠানাদীসুপি. ‘‘কপ্পিযসঞ্ঞী’’তি ইমিনা অচিত্তকত্তং দস্সেতি. ‘‘কুটিং কৰোতী’’তি ইমিনা ৱচীপযোগাভাৱং. উভযেনাপি কেৱলং কাযেনেৱ দুক্কটাদীনং সম্ভৱং দস্সেতি. এৱং উপৰিপি যথানুৰূপং কাতব্বং.

‘‘একেন সমুট্ঠানেন সমুট্ঠহন্তী’’তি ইদং ইধ ৱিসেসেত্ৱা দস্সিতানং কাযতোৱ সমুট্ঠিতানং ৱসেন ৱুত্তং, অৱিসেসতো পন তা আপত্তিযো ইতৰসমুট্ঠানেহিপি যথাৰহং সমুট্ঠহন্তি এৱ. এৱং উপৰিপি.

‘‘তিণৱত্থাৰকেন চা’’তি ইদং সঙ্ঘাদিসেসৱজ্জিতানং চতুন্নং আপত্তীনং ৱসেন ৱুত্তং.

২৭৯. সংৱিদহিত্ৱা কুটিং কৰোতীতি ৱাচায সংৱিদহতি, সযঞ্চ কাযেন কৰোতীতি অত্থো.

কতাপত্তিৱাৰৱণ্ণনা নিট্ঠিতা.

আপত্তিসমুট্ঠানগাথাৱণ্ণনা

২৮৩. ততিযো পন গাথাৱাৰো দুতিযৱাৰেন ৱুত্তমেৱত্থং সঙ্গহেত্ৱা দস্সেতুং ৱুত্তো. তত্থ কাযোৱ কাযিকোতি ৱত্তব্বে ৱচনৱিপল্লাসেন ‘‘কাযিকা’’তি ৱুত্তং. তেনাহ ‘‘তেন সমুট্ঠিতা’’তি, কাযো সমুট্ঠানং অক্খাতোতি অত্থো.

ৱিৱেকদস্সিনাতি সব্বসঙ্খতৱিৱিত্তত্তা, ততো ৱিৱিত্তহেতুত্তা চ নীৱৰণৱিৱেকঞ্চ নিব্বানঞ্চ দস্সনসীলেন. ৱিভঙ্গকোৱিদাতি উভতোৱিভঙ্গকুসলাতি আলপনং. ইধ পনেৱং অঞ্ঞো পুচ্ছন্তো নাম নত্থি, উপালিত্থেৰো সযমেৱ অত্থং পাকটং কাতুং পুচ্ছাৱিসজ্জনঞ্চ অকাসীতি ইমিনা নযেন সব্বত্থ অত্থো ৱেদিতব্বো.

আপত্তিসমুট্ঠানগাথাৱণ্ণনা নিট্ঠিতা.

ৱিপত্তিপচ্চযৱাৰৱণ্ণনা

২৮৪. চতুত্থে পন ৱিপত্তিপচ্চযৱাৰে সীলৱিপত্তিপচ্চযাতি সীলৱিপত্তিপঅচ্ছাদনপচ্চযা.

২৮৬. দিট্ঠিৱিপত্তিপচ্চযাতি দিট্ঠিৱিপত্তিযা অপ্পটিনিস্সজ্জনপচ্চযা.

২৮৭. আজীৱৱিপত্তিপচ্চযাতি এত্থ আগম্ম জীৱন্তি এতেনাতি আজীৱো, চতুপচ্চযো, সোৱ মিচ্ছাপত্তিযা ৱিপন্নত্তা ৱিপত্তীতি আজীৱৱিপত্তি, তস্সা আজীৱৱিপত্তিযা হেতু, তদুপ্পাদনতপৰিভোগনিমিত্তন্তি অত্থো.

ৱিপত্তিপচ্চযৱাৰৱণ্ণনা নিট্ঠিতা.

অধিকৰণপচ্চযৱাৰৱণ্ণনা

২৯১. পঞ্চমে অধিকৰণপচ্চযৱাৰে কিচ্চাধিকৰণপচ্চযাতি অপলোকনৱচনঞত্তিকম্মৱাচাসঙ্খতকম্মৱাচাপচ্চযা. পঞ্চাতি এত্থ অধম্মিককতিকাদিং অপলোকেত্ৱা কৰোন্তানং অনিমিত্তন্তি অত্থো. পঞ্চমে অধিকৰণপচ্চযৱাৰে কিচ্চাধিকৰণপচ্চযা অপলোকনাৱসানে দুক্কটং, অধিপ্পাযাদিনা ঞত্তিকম্মাদিং কৰোন্তানং থুল্লচ্চযাদি চ সঙ্গয্হতীতি দট্ঠব্বং. অৱসেসা আপত্তিযোতি সোতাপত্তিফলসমাপত্তিআদযো. ‘‘নত্থঞ্ঞা আপত্তিযো’’তি ইদং ৱিপত্তিআদিভাগিনিযো সাৱজ্জাপত্তিযো সন্ধায ৱুত্তং.

অধিকৰণপচ্চযৱাৰৱণ্ণনা নিট্ঠিতা.