সমুট্ঠানসীসৱণ্ণনা

২৫৭. পাড়িযং নিব্বানঞ্চেৱ পঞ্ঞত্তীতি এত্থ যস্মা সঙ্খতধম্মে উপাদায পঞ্ঞত্তা সম্মুতিসচ্চভূতা পুগ্গলাদিপঞ্ঞত্তি পৰমত্থতো অৱিজ্জমানত্তা উপ্পত্তিৱিনাসযুত্তৱত্থুধম্মনিযতেন অনিচ্চদুক্খলক্খণদ্ৱযেন যুত্তাতি ৱত্তুং অযুত্তা, কাৰকৱেদকাদিৰূপেন পন পৰিকপ্পিতেন অত্তসভাৱেন ৱিৰহিতত্তা ‘‘অনত্তা’’তি ৱত্তুং যুত্তা. তস্মা অযং পঞ্ঞত্তিপি অসঙ্খতত্তসামঞ্ঞতো ৱত্থুভূতেন নিব্বানেন সহ ‘‘অনত্তা ইতি নিচ্ছযা’’তি ৱুত্তা. অৱিজ্জমানাপি হি সম্মুতি কেনচি পচ্চযেন অকতত্তা অসঙ্খতা এৱাতি.

কৰুণাসীতলত্তং, পঞ্ঞাপভাসিতত্তঞ্চ ভগৱতো দস্সেতুং ‘‘বুদ্ধচন্দে, বুদ্ধাদিচ্চে’’তি এতং উভযং ৱুত্তং. হাযতি এতেনাতি হানি, দুক্খস্স হানি দুক্খহানি, সব্বদুক্খাপনূদনকাৰণন্তি অত্থো. পিটকে তীণি দেসযীতি যস্মা অঞ্ঞেপি মহাৱীৰা সম্মাসম্বুদ্ধা সদ্ধম্মং দেসযন্তি, তস্মা অঙ্গীৰসো পিটকানি তীণি দেসযীতি যোজনা. মহাগুণন্তি মহানিসংসং. এৱং নীযতি সদ্ধম্মোতি যদি ৱিনযপৰিযত্তি অপৰিহীনা তিট্ঠতি, এৱং সতি পটিপত্তিপটিৱেধসদ্ধম্মোপি নীযতি পৱত্তীযতি, ন পৰিহাযতীতি অত্থো.

ৱিনযপৰিযত্তি পন কথং তিট্ঠতীতি আহ ‘‘উভতো চা’’তিআদি. পৰিৱাৰেন গন্থিতা তিট্ঠতীতি যোজেতব্বং. তস্সেৱ পৰিৱাৰস্সাতি তস্মিং এৱ পৰিৱাৰে. সমুট্ঠানং নিযতো কতন্তি একচ্চং সমুট্ঠানেন নিযতং কতং. তস্মিং পৰিৱাৰে কিঞ্চি সিক্খাপদং নিযতসমুট্ঠানং অঞ্ঞেহি অসাধাৰণং, তং পকাসিতন্তি অত্থো.

সম্ভেদং নিদানঞ্চঞ্ঞন্তি সম্ভেদো সিক্খাপদানং অঞ্ঞমঞ্ঞসমুট্ঠানেন সংকিণ্ণতা, নিদানঞ্চ পঞ্ঞত্তিট্ঠানং, অঞ্ঞং পুগ্গলাদিৱত্থাদি চ. সুত্তে দিস্সন্তি উপৰীতি হেট্ঠা ৱুত্তে, উপৰি ৱক্খমানে চ পৰিৱাৰসুত্তে এৱ দিস্সন্তি. যস্মা চ এৱং, তস্মা সকলসাসনাধাৰস্স ৱিনযস্স ঠিতিহেতুভূতং পৰিৱাৰং সিক্খেতি, এৱমেত্থ যোজনা দট্ঠব্বা.

সম্ভিন্নসমুট্ঠানানীতি অঞ্ঞেহি সাধাৰণসমুট্ঠানানি. আদিম্হি তাৱ পুৰিমনযেতি সব্বপঠমে পঞ্ঞত্তিৱাৰে আগতনযং সন্ধায ৱদতি, তত্থ পন পঞ্ঞত্তিৱাৰে ‘‘পঠমং পাৰাজিকং কত্থ পঞ্ঞত্তন্তি, ৱেসালিযং পঞ্ঞত্ত’’ন্তিআদিনা (পৰি. ১) নিদানম্পি দিস্সতি এৱ. পৰতোতি আগতভাৱং পন সন্ধায পৰতো আগতে সুত্তে দিস্সতীতি ৱেদিতব্বন্তি ৱুত্তং. তস্সাতি উভতোৱিভঙ্গপৰিযাপন্নস্স সিক্খাপদস্স.

২৫৮. অনিযতা পঠমিকাতি আপত্তিং অপেক্খিত্ৱাৱ ইত্থিলিঙ্গং কতং, পঠমানিযতং সিক্খাপদন্তি অত্থো. পাড়িযং নানুবন্ধে পৱত্তিনিন্তি ৱুট্ঠাপিতং পৱত্তিনিং অননুবন্ধনসিক্খাপদং.

২৬০. এড়কলোমসিক্খাপদৱত্থুস্মিং ‘‘ভিক্খুনিযো এড়কলোমানি ধোৱন্তিযো ৰজন্তিযো ৱিজটেন্তিযো ৰিঞ্চন্তি উদ্দেসং পৰিপুচ্ছ’’ন্তি (পাৰা. ৫৭৬) আগতত্তা ইমং ৰিঞ্চন্তি-পদং গহেত্ৱা সিক্খাপদং উপলক্খিতন্তি দস্সেন্তো ‘‘ৱিভঙ্গে ‘ৰিঞ্চন্তি উদ্দেস’ন্তি আগতং এড়কলোমধোৱাপনসিক্খাপদ’’ন্তি আহ.

ৱস্সিকসাটিকসিক্খাপদন্তি অসমযে ৱস্সিকসাটিকপৰিযেসনসিক্খাপদং (পাৰা. ৬২৬ আদযো). ৰতনসিক্খাপদন্তি ৰতনং ৱা ৰতনসম্মতং ৱা পটিসামনসিক্খাপদং (পাচি. ৫০২ আদযো).

২৬৫. পাড়িযং বুদ্ধঞাণেনাতি পটিৱিদ্ধসব্বঞ্ঞুতঞ্ঞাণেন.

২৬৭. ‘‘ন দেসেন্তি তথাগতা’’তি এতেন ছত্তপাণিস্স ধম্মদেসনাপটিক্খেপং দস্সেতি.

২৬৯. অকতন্তি অঞ্ঞেহি অমিস্সীকতং, নিযতসমুট্ঠানন্তি অত্থো. অকতন্তি ৱা পুব্বে অনাগতং, অভিনৱন্তি অত্থো.

২৭০. সমুট্ঠানঞ্হি সঙ্খেপন্তি এত্থ সঙ্খিপন্তি সঙ্গয্হন্তি সদিসসমুট্ঠানানি এত্থাতি সঙ্খেপো, সমুট্ঠানসীসং. নেতি ৱিনেতি কাযৱচীদুচ্চৰিতন্তি নেত্তি, ৱিনযপাড়ি, সা এৱ ধম্মোতি নেত্তিধম্মোতি আহ ‘‘ৱিনযপাড়িধম্মস্সা’’তি.

সমুট্ঠানসীসৱণ্ণনা নিট্ঠিতা.