পঞ্চৱগ্গো

কম্মৱগ্গৱণ্ণনা

৪৮৩. কম্মৱগ্গে ঠপিতউপোসথপৱাৰণানং কত্তিকমাসে সামগ্গিযা কতায সামগ্গীপৱাৰণং মুঞ্চিত্ৱা উপোসথং কাতুং ন ৱট্টতীতি আহ ‘‘ঠপেত্ৱা কত্তিকমাস’’ন্তি. সচে পন তেসং নানাসীমাসু মহাপৱাৰণায ৱিসুং পৱাৰিতানং কত্তিকমাসব্ভন্তৰে সামগ্গী হোতি, সামগ্গীউপোসথো এৱ তেহি কত্তব্বো, ন পৱাৰণা. একস্মিং ৱস্সে কতপৱাৰণানং পুন পৱাৰণায অৱিহিতত্তা. সামগ্গীদিৱসোতি অনুপোসথদিৱসে সামগ্গীকৰণং সন্ধায ৱুত্তং. সচে পন চাতুদ্দসিযং, পন্নৰসিযং ৱা সঙ্ঘো সামগ্গিং কৰোতি, তদা সামগ্গীউপোসথদিৱসো ন হোতি, চাতুদ্দসীপন্নৰসীউপোসথোৱ হোতি. উপৰি পৱাৰণাযপি এসেৱ নযো.

পচ্চুক্কড্ঢিত্ৱা ঠপিতদিৱসোতি ভণ্ডনকাৰকেহি উপদ্দুতা ৱা কেনচিদেৱ কৰণীযেন পৱাৰণাসঙ্গহং ৱা কত্ৱা ঠপিতো কাড়পক্খচাতুদ্দসীদিৱসোৱ. দ্ৱে চ পুণ্ণমাসিযোতি পুব্ব-কত্তিকপুণ্ণমা, পচ্ছিমকত্তিকপুণ্ণমা চাতি দ্ৱে পুণ্ণমাসিযো. এৱং চতুব্বিধম্পীতি পুণ্ণমাসীদ্ৱযেন সদ্ধিং সামগ্গীপৱাৰণং, চাতুদ্দসীপৱাৰণঞ্চ সম্পিণ্ডেত্ৱা ৱুত্তং. ইদঞ্চ পকতিচাৰিত্তৱসেন ৱুত্তং. তথাৰূপপচ্চযে পন সতি উভিন্নং পুণ্ণমাসীনং পুৰিমা দ্ৱে চাতুদ্দসিযোপি কাড়পক্খচাতুদ্দসিযা অনন্তৰা পন্নৰসীপীতি ইমেপি তযো দিৱসা পৱাৰণাদিৱসা এৱাতি ইমং সত্তৱিধম্পি পৱাৰণাদিৱসং ঠপেত্ৱা অঞ্ঞস্মিং দিৱসে পৱাৰেতুং ন ৱট্টতি.

৪৮৪. অনুস্সাৱনকম্মং কত্ৱাতি পঠমং অনুস্সাৱনং সাৱেত্ৱা ‘‘এসা ঞত্তী’’তি অনুস্সাৱনানন্তৰমেৱ সকলং ঞত্তিং ৱত্ৱা, পৰিযোসানে ‘‘এসা ঞত্তী’’তি ৱত্ৱাতি অধিপ্পাযো.

৪৮৫. য্ৱাযন্তি ব্যঞ্জনপ্পভেদো অধিপ্পেতো. দসধা ব্যঞ্জনবুদ্ধিযা পভেদোতি এত্থ দসধা দসৱিধেন ব্যঞ্জনানং পভেদোতি যোজেতব্বং. কেনাযং পভেদোতি আহ ‘‘ব্যঞ্জনবুদ্ধিযা’’তি. যথাধিপ্পেতত্থব্যঞ্জনতো ব্যঞ্জনসঙ্খাতানং অক্খৰানং জনিকা বুদ্ধি ব্যঞ্জনবুদ্ধি, তায ব্যঞ্জনবুদ্ধিযা, অক্খৰসমুট্ঠাপকচিত্তভেদেনেৱাতি অত্থো. যং ৱা সংযোগপৰং কত্ৱা ৱুচ্চতি, ইদম্পি গৰুকন্তি যোজনা.

তত্থ আযস্মতোতিআদীসু যানি অনন্তৰিতানি স-কাৰম-কাৰাদিব্যঞ্জনানি ‘‘সংযোগো’’তি ৱুচ্চন্তি, সো সংযোগো পৰো যস্স অ-কাৰাদিনো, সো সংযোগপৰো নাম. ৰস্সন্তি অকাৰাদিব্যঞ্জনৰহিতং সৰং. অসংযোগপৰন্তি ‘‘যস্স নক্খমতী’’তিআদীসু য-কাৰ ন-কাৰাদিব্যঞ্জনসহিতসৰং সন্ধায ৱুত্তং. ত-কাৰস্স থ-কাৰং অকত্ৱা ৱগ্গন্তৰে সিথিলমেৱ কত্ৱা ‘‘সুণাটু মে’’তিআদিং ৱদন্তোপি দুৰুত্তং কৰোতিযেৱ ঠপেত্ৱা অনুৰূপং আদেসং. যঞ্হি ‘‘সচ্চিকত্থপৰমত্থেনা’’তি ৱত্তব্বে ‘‘সচ্চিকট্ঠপৰমট্ঠেনা’’তি চ ‘‘অত্থকথা’’তি ৱত্তব্বে ‘‘অট্ঠকথা’’তি চ তত্থ তত্থ ৱুচ্চতি, তাদিসং পাড়িঅট্ঠকথাসু দিট্ঠপযোগং, তদনুৰূপঞ্চ ৱত্তুং ৱট্টতি, ততো অঞ্ঞং ন ৱট্টতি. তেনাহ ‘‘অনুক্কমাগতং পৱেণিং অৱিনাসেন্তেনা’’তিআদি.

দীঘে ৱত্তব্বে ৰস্সন্তিআদীসু ‘‘ভিক্খূন’’ন্তি ৱত্তব্বে ‘‘ভিক্খুন’’ন্তি ৱা ‘‘বহূসূ’’তি ৱত্তব্বে ‘‘বহুসূ’’তি ৱা ‘‘নক্খমতী’’তি ৱত্তব্বে ‘‘ন খমতী’’তি ৱা ‘‘উপসম্পদাপেক্খো’’তি ৱত্তব্বে ‘‘উপসম্পদাপেখো’’তি ৱা এৱং অনুৰূপট্ঠানেসু এৱ দীঘৰস্সাদি ৰস্সদীঘাদিৱসেন পৰিৱত্তেতুং ৱট্টতি, ন পন ‘‘নাগো’’তি ৱত্তব্বে ‘‘নগো’’তি ৱা ‘‘সঙ্ঘো’’তি ৱত্তব্বে ‘‘সঘো’’তি ৱা ‘‘তিস্সো’’তি ৱত্তব্বে ‘‘তিসো’’তি ৱা ‘‘যাচতী’’তি ৱত্তব্বে ‘‘যাচন্তী’’তি ৱা এৱং অননুৰূপট্ঠানেসু ৱত্তুং. সম্বন্ধং, পন ৱৱত্থানঞ্চ সব্বথাপি ৱট্টতীতি গহেতব্বং.

৪৮৬. সেসসীমাসুপীতি অতিমহতীআদীসু দসসুপি.

৪৮৮. চতুৱগ্গকৰণেতি চতুৱগ্গেন সঙ্ঘেন কত্তব্বে. অনিস্সাৰিতাতি উপোসথট্ঠপনাদিনা ৱা লদ্ধিনানাসংৱাসকভাৱেন ৱা ন বহিকতা. অট্ঠকথাযঞ্হি ‘‘অপকতত্তস্সাতি উক্খিত্তকস্স ৱা, যস্স ৱা উপোসথপৱাৰণা ঠপিতা হোন্তী’’তি (পৰি. অট্ঠ. ৪২৫) ৱুত্তত্তা ঠপিতউপোসথপৱাৰণো ভিক্খু অপকতত্তো এৱাতি গহেতব্বং. পৰিসুদ্ধসীলাতি পাৰাজিকং অনাপন্না অধিপ্পেতা. পৰিৱাসাদিকম্মেসু পন গৰুকট্ঠাপি অপকতত্তা এৱাতি গহেতব্বং. অৱসেসা…পে… ছন্দাৰহাৱ হোন্তীতি সঙ্ঘতো হত্থপাসং ৱিজহিত্ৱা ঠিতে সন্ধায ৱুত্তং. অৱিজহিত্ৱা ঠিতা পন ছন্দাৰহা ন হোন্তি, তেপি চতুৱগ্গাদিতো অধিকা হত্থপাসং ৱিজহিত্ৱাৱ ছন্দাৰহা হোন্তি. তস্মা সঙ্ঘতো হত্থপাসং ৱিজহিত্ৱা ঠিতেনেৱ ছন্দো ৱা পাৰিসুদ্ধি ৱা দাতব্বা.

কম্মৱগ্গৱণ্ণনা নিট্ঠিতা.

অপলোকনকম্মকথাৱণ্ণনা

৪৯৬. এতৰহি সচেপি সামণেৰোতিআদীসু বুদ্ধাদীনং অৱণ্ণভাসনম্পি অকপ্পিযাদিং কপ্পিযাদিভাৱেন দীপনম্পি দিট্ঠিৱিপত্তিযঞ্ঞেৱ পৱিসতি. তেনেৱ ৱক্খতি ‘‘তং লদ্ধিং নিস্সজ্জাপেতব্বো’’তি. ভিক্খূনম্পি এসেৱ নযো. মিচ্ছাদিট্ঠিকোতি বুদ্ধৱচনাধিপ্পাযং ৱিপৰীততো গণ্হন্তো, সো এৱ অন্তগ্গাহিকায দিট্ঠিযা সমন্নাগতোতি চ ৱুত্তো. কেচি পন ‘‘সস্সতুচ্ছেদানং অঞ্ঞতৰদিট্ঠিযা সমন্নাগতো’’তি ৱদন্তি, তং ন যুত্তং, সস্সতুচ্ছেদগ্গাহস্স সামণেৰানং লিঙ্গনাসনায কাৰণত্তেন হেট্ঠা অট্ঠকথাযমেৱ (মহাৱ. অট্ঠ. ১০৮) ৱুত্তত্তা, ইধ চ দণ্ডকম্মনাসনায এৱ অধিপ্পেতত্তা.

তস্সাপি দাতব্বোতি ৱিজ্জমানং মুখৰাদিভাৱং নিস্সায অপ্পটিপুচ্ছিত্ৱাপি পটিঞ্ঞং অগ্গহেত্ৱাপি আপত্তিং অনাৰোপেত্ৱাপি দেসিতাযপি আপত্তিযা খুংসনাদিতো অনোৰমন্তস্স দাতব্বোৱ. ওৰমন্তস্স পন খমাপেন্তস্স ন দাতব্বো.

ব্ৰহ্মদণ্ডস্স দানন্তি খৰদণ্ডস্স উক্কট্ঠদণ্ডস্স দানং. তজ্জনীযাদিকম্মে হি কতে ওৱাদানুসাসনিপ্পদানপটিক্খেপো নত্থি. দিন্নব্ৰহ্মদণ্ডে পন তস্মিং সদ্ধিং তজ্জনীযাদিকম্মকতেহি পটিক্খিত্তম্পি কাতুং ন ৱট্টতি, ‘‘নেৱ ৱত্তব্বো’’তিআদিনা আলাপসল্লাপাদিমত্তস্সাপি নকাৰেন পটিক্খিত্তত্তা. তঞ্হি দিস্ৱা ভিক্খূ গীৱং পৰিৱত্তেত্ৱা ওলোকনমত্তম্পি ন কৰোন্তি, এৱং ৱিৱজ্জেতব্বং নিম্মদনকৰণত্থমেৱ তস্স দণ্ডস্স অনুঞ্ঞাতত্তা. তেনেৱ ছন্নত্থেৰোপি উক্খেপনীযাদিকম্মকতোপি অভাযিত্ৱা ব্ৰহ্মদণ্ডে দিন্নে ‘‘সঙ্ঘেনাহং সব্বথা ৱিৱজ্জিতো’’তি মুচ্ছিতো পপতি. যো পন ব্ৰহ্মদণ্ডকতেন সদ্ধিং ঞত্ৱা সংসট্ঠো অৱিৱজ্জেত্ৱা ৱিহৰতি, তস্স দুক্কটমেৱাতি গহেতব্বং অঞ্ঞথা ব্ৰহ্মদণ্ডৱিধানস্স নিৰত্থকতাপসঙ্গতো. তেনাতি ব্ৰহ্মদণ্ডকতেন. যথা তজ্জনীযাদিকম্মকতেহি, এৱমেৱ ততো অধিকম্পি সঙ্ঘংআৰাধেন্তেন সম্মাৱত্তিতব্বং. তঞ্চ ‘‘সোৰতো নিৱাতৱুত্তী’’তিআদিনা সৰূপতো দস্সিতমেৱ. তেনাহ ‘‘সম্মাৱত্তিত্ৱা খমাপেন্তস্স ব্ৰহ্মদণ্ডো পটিপ্পস্সম্ভেতব্বো’’তি.

যং তং ভগৱতা অৱন্দিযকম্মং অনুঞ্ঞাতন্তি সম্বন্ধো. ‘‘তস্স ভিক্খুনো দণ্ডকম্মং কাতু’’ন্তি সামঞ্ঞতো অনুঞ্ঞাতপ্পকাৰং দস্সেত্ৱা পুন ৱিসেসতো অনুঞ্ঞাতপ্পকাৰং দস্সেতুং ‘‘অথ খো’’তিআদিপাড়ি উদ্ধটাতি ৱেদিতব্বং. ইমস্স অপলোকনকম্মস্স ঠানং হোতীতি অপলোকনকম্মস্স সামঞ্ঞস্স পৱত্তিট্ঠানং হোতীতি. ৱিসেসব্যতিৰেকেন অৱিজ্জমানম্পি তদঞ্ঞত্থ অপ্পৱত্তিং দস্সেতুং ৱিসেসনিস্সিতং ৱিয ৱোহৰীযতি. ‘‘কম্মঞ্ঞেৱ লক্খণ’’ন্তি ইমিনা ওসাৰণাদিৱসেন গহিতাৱসেসানং সব্বেসং অপলোকনকম্মস্স সামঞ্ঞলক্খণৱসেন গহিতত্তা কম্মঞ্ঞেৱ লক্খণমস্সাতি কম্মলক্খণন্তি নিব্বচনং দস্সেতি. ইদঞ্চ ৱুত্তাৱসেসানং কম্মানং নিট্ঠানট্ঠানং, সঙ্খাৰক্খন্ধধম্মাযতনানি ৱিয ৱুত্তাৱসেসখন্ধাযতনানন্তি দট্ঠব্বং. তেনেৱ ৱক্খতি ‘‘অযং পনেত্থ পাড়িমুত্তকোপি কম্মলক্খণৱিনিচ্ছযো’’তিআদি (পৰি. অট্ঠ. ৪৯৫-৪৯৬). যথা চেত্থ, এৱং উপৰি ঞত্তিকম্মাদীসুপি কম্মলক্খণং ৱুত্তন্তি ৱেদিতব্বং. তস্স কৰণন্তি অৱন্দিযকম্মস্স কৰণৱিধানং.

‘‘ন ৱন্দিতব্বো’’তি ইমিনা ৱন্দন্তিযা দুক্কটন্তি দস্সেতীতি দট্ঠব্বং. সঙ্ঘেন কতং কতিকং ঞত্ৱা মদ্দনং ৱিয হি সঙ্ঘসম্মুতিং অনাদৰেন অতিক্কমন্তস্স আপত্তি এৱ হোতি.

ভিক্খুসঙ্ঘস্সাপি পনেতং লব্ভতিযেৱাতি অৱন্দিযকম্মস্স উপলক্খণমত্তেন গহিতত্তা ভিক্খুসঙ্ঘস্সাপি কম্মলক্খণং লব্ভতি এৱ.

সলাকদানট্ঠানং সলাকগ্গং নাম. যাগুভত্তানং ভাজনট্ঠানানি যাগগ্গভত্তগ্গানি নাম. এতেসুপি হি ঠানেসু সব্বো সঙ্ঘো উপোসথে ৱিয সন্নিপতিতো, কম্মঞ্চ ৱগ্গকম্মং ন হোতি, ‘‘মযমেতং ন জানিম্হা’’তি পচ্ছা খিয্যন্তাপি ন হোন্তি. খণ্ডসীমায পন কতে খিয্যন্তি. সঙ্ঘিকপচ্চযঞ্হি অচ্ছিন্নচীৱৰাদীনং দাতুং অপলোকেন্তেহি উপচাৰসীমট্ঠানং সব্বেসং অনুমতিং গহেত্ৱাৱ কাতব্বং. যো পন ৱিসভাগপুগ্গলো ধম্মিকং অপলোকনং পটিবাহতি, তং উপাযেন বহিউপচাৰসীমাগতং ৱা কত্ৱা খণ্ডসীমং ৱা পৱিসিত্ৱা কাতুং ৱট্টতি.

যং সন্ধায ‘‘অপলোকনকম্মং কৰোতী’’তি সামঞ্ঞতো দস্সেতি, তং অপলোকনকম্মং সৰূপতো দস্সেতুমাহ ‘‘অচ্ছিন্নচীৱৰং’’ইচ্চাদি. যদি অপলোকেত্ৱাৱ চীৱৰং দাতব্বং, কিং পন অপ্পমত্তকৱিস্সজ্জকসম্মুতিযাতি আহ ‘‘অপ্পমত্তকৱিস্সজ্জনকেন পনা’’তিআদি. নাড়ি ৱা উপড্ঢনাড়ি ৱাতি দিৱসে দিৱসে অপলোকেত্ৱা দাতব্বস্স পমাণদস্সনং. তেন যাপনমত্তমেৱ অপলোকেতব্বং, ন অধিকন্তি দস্সেতি. একদিৱসংযেৱ ৱাতিআদি দসৱীসতিদিৱসানং একস্মিং দিৱসেযেৱ দাতব্বপৰিচ্ছেদদস্সনং, তেন যাৱ জীৱন্তি ৱা যাৱ ৰোগা ৱুট্ঠহতীতি ৱা এৱং অপলোকেতুং ন ৱট্টতীতি দস্সেতি. ইণপলিবোধন্তি ইণৱত্থুং দাতুং ৱট্টতীতি সম্বন্ধো. তঞ্চ ইণাযিকেহি পলিবুদ্ধস্স লজ্জিপেসলস্স সাসনুপকাৰকস্স পমাণযুত্তমেৱ কপ্পিযভণ্ডং নিযমেত্ৱা অপলোকেত্ৱা দাতব্বং, ন পন সহস্সং ৱা সতসহস্সং ৱা মহাইণং. তাদিসঞ্হি ভিক্খাচৰিযৱত্তেন সব্বেহি ভিক্খূহি তাদিসস্স ভিক্খুনো পৰিযেসিত্ৱা দাতব্বং.

উপনিক্খেপতোতি চেতিযপটিজগ্গনত্থায ৱড্ঢিযা পযোজেত্ৱা কপ্পিযকাৰকেহি ঠপিতৱত্থুতো. সঙ্ঘিকেনপীতি ন কেৱলঞ্চ তত্ৰুপ্পাদতো পচ্চযদাযকেহি চতুপচ্চযত্থায সঙ্ঘস্স দিন্নৱত্থুনাপীতি অত্থো.

সঙ্ঘভত্তং কাতুং ন ৱট্টতীতি মহাদানং দেন্তেহিপি কৰিযমানং সঙ্ঘভত্তং ৱিয কাৰেতুং ন ৱট্টতীতি অধিপ্পাযো.

‘‘যথাসুখং পৰিভুঞ্জিতুং ৰুচ্চতী’’তি ৱুত্তত্তা অত্তনো পৰিভোগপ্পহোনকং অপ্পং ৱা বহুং ৱা গহেতব্বং, অধিকং পন গহেতুং ন লভতি. উপোসথদিৱসেতি নিদস্সনমত্তং, যস্মিং কিস্মিঞ্চি দিৱসেপি কতং সুকতমেৱ হোতি. কৰোন্তেন ‘‘যং ইমস্মিং ৱিহাৰে অন্তোসীমায সঙ্ঘসন্তকং…পে… যথাসুখং পৰিভুঞ্জিতুং ময্হং ৰুচ্চতী’’তি এৱং কতিকা কাতব্বা, তথা দ্ৱীহি তীহিপি ‘‘আযস্মন্তানং ৰুচ্চতী’’তি ৱচনমেৱ হেত্থ ৱিসেসো. তেসম্পীতি ৰুক্খানং. সা এৱ কতিকাতি ৱিসুং কতিকা ন কাতব্বাতি অত্থো.

তেসন্তি ৰুক্খানং. সঙ্ঘো সামীতি সম্বন্ধো. পুৰিমৱিহাৰেতি পুৰিমে যথাসুখং পৰিভোগত্থায কতকতিকে ৱিহাৰে. পৰিৱেণানি কত্ৱা জগ্গন্তীতি যত্থ অৰক্খিযমানে ফলাফলানি, ৰুক্খা চ ৱিনস্সন্তি, তাদিসং ঠানং সন্ধায ৱুত্তং, তত্থ সঙ্ঘস্স কতিকা ন পৱত্তীতি অধিপ্পাযো. যে পন ৰুক্খা বীজানি ৰোপেত্ৱা আদিতো পট্ঠায পটিজগ্গিতা, তেপি দসমভাগং দত্ৱা ৰোপকেহেৱ পৰিভুঞ্জিতব্বা. তেহীতি জগ্গকেহি.

তত্থাতি তস্মিং ৱিহাৰে. মূলেতি আদিকালে, পুব্বেতি অত্থো. দীঘা কতিকাতি অপৰিচ্ছিন্নকালা যথাসুখং পৰিভোগত্থায কতিকা. নিক্কুক্কুচ্চেনাতি ‘‘অভাজিতমিদ’’ন্তি কুক্কুচ্চং অকত্ৱাতি অত্থো. খিয্যনমত্তমেৱেতন্তি তেন খিয্যনেন বহুং খাদন্তানং দোসো নত্থি অত্তনো পৰিভোগপ্পমাণস্সেৱ গহিতত্তা, খিয্যন্তেপি অত্তনো পহোনকং গহেত্ৱা খাদিতব্বন্তি অধিপ্পাযো.

গণ্হথাতি ন ৱত্তব্বাতি তথাৱুত্তে তেনেৱ ভিক্খুনা দিন্নং ৱিয মঞ্ঞেয্যুং, তং নিস্সায মিচ্ছাজীৱসম্ভৱো হোতীতি ৱুত্তং. তেনাহ ‘‘অনুৱিচৰিত্ৱা’’তিআদি. উপড্ঢভাগোতি একভিক্খুনো পটিৱীসতো উপড্ঢভাগো. দেন্তেন চ ‘‘এত্তকং দাতুং সঙ্ঘো অনুঞ্ঞাসী’’তি এৱং অত্তানং পৰিমোচেত্ৱা যথা তে সঙ্ঘে এৱ পসীদন্তি, এৱং ৱত্ৱা দাতব্বং.

অপচ্চাসীসন্তেনাতি গিলানগমিকিস্সৰাদীনং অনুঞ্ঞাতপুগ্গলানম্পি অত্তনো সন্তকং দেন্তেন অপচ্চাসীসন্তেনেৱ দাতব্বং, অননুঞ্ঞাতপুগ্গলানং পন অপচ্চাসীসন্তেনাপি দাতুং ন ৱট্টতীতি. সঙ্ঘিকমেৱ যথাকতিতায দাপেতব্বং. অত্তনো সন্তকম্পি পচ্চযদাযকাদী সযমেৱ ৱিস্সাসেন গণ্হন্তি, ন ৱাৰেতব্বা, লদ্ধকপ্পিযন্তি তুণ্হী ভৱিতব্বং. পুব্বে ৱুত্তমেৱাতি ‘‘কুদ্ধো হি সো ৰুক্খেপি ছিন্দেয্যা’’তিআদিনা তুণ্হীভাৱে কাৰণং পুব্বে ৱুত্তমেৱ. তেহি কতঅনত্থাভাৱেপি কাৰুঞ্ঞেন তুণ্হী ভৱিতুং ৱট্টতি, ‘‘গণ্হথা’’তিআদি পন ৱত্তুং ন ৱট্টতি.

গৰুভণ্ডত্তা…পে… ন দাতব্বন্তি জীৱৰুক্খানং আৰামট্ঠানীযত্তা, দাৰূনঞ্চ গেহসম্ভাৰানুপগতত্তা ‘‘সব্বং ত্ৱমেৱ গণ্হা’’তি দাতুং ন ৱট্টতীতি ৱুত্তং. অকতাৱাসং ৱা কত্ৱাতি পুব্বে অৱিজ্জমানং সেনাসনং কত্ৱা জগ্গিতকালে ফলৱাৰে সম্পত্তে.

অপলোকনকম্মকথাৱণ্ণনা নিট্ঠিতা.

অত্থৱসৱগ্গাদিৱণ্ণনা

৪৯৮. ৱিপাকদুক্খসঙ্খাতানং সম্পৰাযিকৱেৰানন্তি এত্থ পাণাতিপাতাদিৱেৰেন নিব্বত্তত্তা, ৱেৰপ্পত্তিযা হেতুত্তা চ ‘‘ৱিপাকদুক্খৱেদনা’’তি ৱুত্তা. পাণাতিপাতাদিপঞ্চৱেৰৱিনিমুত্তানম্পি অকুসলানং ৱেৰেহি সহ একতো সঙ্গণ্হনত্থং ‘‘দসঅকুসলকম্মপথপ্পভেদান’’ন্তি পুন ৱুত্তং.

৪৯৯-৫০০. তং কম্মন্তি তজ্জনীযাদিকম্মমেৱ, সত্তা আপত্তিক্খন্ধা পঞ্ঞত্তং নামাতি সম্বন্ধো. অন্তৰা কেনচি অপঞ্ঞত্তে সিক্খাপদেতি ইমস্মিং কপ্পে আদিতো পট্ঠায যাৱ অম্হাকং ভগৱতো অভিসম্বোধি, তাৱ অন্তৰাকালে ককুসন্ধাদিং ঠপেত্ৱা কেনচি অপঞ্ঞত্তে সিক্খাপদেতি অত্থো. ৱিনীতকথা সিক্খাপদন্তি ৱিনীতৱত্থূনি এৱ. তানি হি তংতংসিক্খাকোট্ঠাসানং পকাসনতো ‘‘সিক্খাপদ’’ন্তি চ আপত্তিঅনাপত্তীনং অনুপঞ্ঞাপনতো ‘‘অনুপঞ্ঞত্ত’’ন্তি চ ৱুচ্চন্তি.

অত্থৱসৱগ্গাদিৱণ্ণনা নিট্ঠিতা.

সঙ্গহৱগ্গৱণ্ণনানযো নিট্ঠিতো.

ইতি মহাৱগ্গো, পঞ্ঞত্তিৱগ্গো, সঙ্গহৱগ্গোতি তীহি মহাৱগ্গেহি পটিমণ্ডিতো পৰিৱাৰোতি ৱেদিতব্বো.

ইতি সমন্তপাসাদিকায ৱিনযট্ঠকথায ৱিমতিৱিনোদনিযং

পৰিৱাৰৱণ্ণনানযো নিট্ঠিতো.

নিগমনকথাৱণ্ণনা

অৱসানগাথাসু উভতোৱিভঙ্গ-খন্ধক-পৰিৱাৰেহি ৱিভত্তত্তা ৱিভাগপটিদেসনা যস্মিং ৱিনযপিটকে. সো উভতোৱিভঙ্গ-খন্ধক-পৰিৱাৰৱিভত্তদেসনো আহাতি যোজনা. তস্সাতি ৱিনযপিটকস্স.

সত্থু মহাবোধীতি দক্খিণসাখং সন্ধায ৱদতি. যং পধানঘৰং নাম পৰিৱেণং, তত্থ চাৰুপাকাৰেন সঞ্চিতং পৰিক্খিত্তং যং পাসাদং কাৰযি, তত্ৰ তস্মিং মহানিগমসামিনো পাসাদে ৱসতাতি যোজেতব্বা.

বুদ্ধসিৰিং উদ্দিসিত্ৱা নিস্সায, তস্স ৱা অজ্ঝেসনম্পি পটিচ্চ যা ইদ্ধা পৰিপুণ্ণৱিনিচ্ছযতায সমিদ্ধা ৱিনযসংৱণ্ণনা আৰদ্ধাতি যোজনা.

সিৰিনিৱাসস্সাতি সিৰিযা নিৱাসনট্ঠানভূতস্স সিৰিপালনামকস্স ৰঞ্ঞো. জযসংৱচ্ছৰেতি ৱিজযযুত্তে সংৱচ্ছৰে. আৰদ্ধকালদস্সনত্থং পুন ‘‘জযসংৱচ্ছৰে অযং আৰদ্ধা’’তি ৱুত্তং.

কালে ৱস্সন্তি যুত্তকালে ৱস্সনসীলো. দেৱোতি মেঘো.

নিগমনকথাৱণ্ণনা নিট্ঠিতা.

নিগমনকথা

এত্তাৱতা চ আৰদ্ধা, ৱিনযট্ঠকথায যা;

ৱণ্ণনা নাতিৱিত্থিণ্ণা, পৰিপুণ্ণৱিনিচ্ছযা.

পঞ্ঞাসভাণৱাৰায, তন্তিযা পৰিমাণতো;

সমিজ্ঝনিট্ঠিপৰমা, যা ৱিমতিৱিনোদনী.

অনন্তৰাযেন কতা, অযং নিট্ঠমুপাগতা;

যং তং নিট্ঠং তথা সব্বে, পাণিনো সমনোৰথা.

থেৰেহি ৱিনযঞ্ঞূহি, সুচিসল্লেখৱুত্তিহি;

অৱিস্সত্থাতিৱিত্থিণ্ণ-গন্থভীৰূ হিপত্থিতং.

কৰোন্তেন মযা এৱং, ৱিনযঅত্থৱণ্ণনং;

যং পত্তং কুসলং তেন, পত্ৱা সম্বোধিমুত্তমং.

ৱিনযত্থং পকাসেত্ৱা, যো সোপাযেন লক্খণং;

সোপাযং ৱিমতিচ্ছেদ-ঞাণচক্খুপদাযকং.

ৱিৰদ্ধত্থৱিপল্লাস-গন্থৱিত্থাৰহানিযা;

ৱিসুদ্ধিং পাপযিস্সামি, সত্তে সংসাৰদুক্খতো.

লোকিযেহি চ ভোগেহি, গুণেহি নিখিলা পজা;

সব্বেহি সহিতা হোন্তু, ৰতা সম্বুদ্ধসাসনেতি.

ৱিমতিৱিনোদনীটীকা নিট্ঠিতা.