সেদমোচনগাথা

অৱিপ্পৱাসপঞ্হাৱণ্ণনা

৪৭৯. সেদমোচনগাথাসু অকপ্পিযসম্ভোগোতি অনুপসম্পন্নেহি সদ্ধিং কাতুং পটিক্খিত্তো উপোসথাদিসংৱাসো এৱ ৱুত্তো. পঞ্হা মেসাতি এত্থ ম-কাৰো পদসন্ধিকৰো. এসাতি চ লিঙ্গৱিপল্লাসৱসেন ৱুত্তং, পঞ্হো এসোতি অত্থো. পঞ্হ-সদ্দো ৱা দ্ৱিলিঙ্গো দট্ঠব্বো. তেনাহ ‘‘এসা পঞ্হা’’তিআদি.

গৰুভণ্ডং সন্ধাযাতি গৰুভণ্ডেন গৰুভণ্ডপৰিৱত্তনং সন্ধায. দসাতি দস অৱন্দিযপুগ্গলে. একাদসেতি অভব্বপুগ্গলে. সিক্খায অসাধাৰণোতি খুৰভণ্ডং ধাৰেতুং অনুঞ্ঞাতসিক্খাপদেন ভিক্খূহি অসাধাৰণসিক্খাপদোতি অত্থো.

উব্ভক্খকে ন ৱদামীতি অক্খতো উদ্ধং সীসে ঠিতমুখমগ্গেপি পাৰাজিকং সন্ধায ন ৱদামি. অধোনাভিন্তি নাভিতো হেট্ঠা ঠিতৱচ্চপস্সাৱমগ্গেপি ৱিৱজ্জিয অঞ্ঞস্মিং সৰীৰপ্পদেসে মেথুনধম্মপচ্চযা কথং পাৰাজিকো সিযাতি অত্থো.

ছেজ্জৱত্থুন্তি পাৰাজিকং.

অৱিপ্পৱাসপঞ্হাৱণ্ণনা নিট্ঠিতা.

পাৰাজিকাদিপঞ্হাৱণ্ণনা

৪৮০. দুস্সকুটিআদীনীতি আদি-সদ্দেন অচ্ছতৰতিপুপট্টাদীহি, তিণপণ্ণাদীহি চ পটিচ্ছন্নকুটিযো সঙ্গণ্হাতি. তাদিসায হি কুটিযা বহি ঠত্ৱা অন্তো ঠিতায ইত্থিযা মগ্গে দুস্সাদিনা সন্থতং কত্ৱা পৱেসেন্তোপি পাৰাজিকো সিযা. লিঙ্গপৰিৱত্তং সন্ধায ৱুত্তাতি লিঙ্গে পৰিৱত্তে পটিগ্গহণস্স ৱিজহনতো পুন অপ্পটিগ্গহেত্ৱা পৰিভুঞ্জনাপত্তিং সন্ধায ৱুত্তং.

পাড়িযং ভিক্খূ সিযা ৱীসতিযা সমাগতাতি ৱীসতিযা সঙ্খাতায ভিক্খূ সমাগতা, এতেন সব্বকম্মাৰহতং সঙ্ঘস্স দস্সেতি.

নিৱত্থোতি গাথায অন্তৰৱাসকেন নিৱত্থো উত্তৰাসঙ্গেন দিগুণং কত্ৱা পাৰুতসঙ্ঘাটিযো. ইতি তানি তীণিপি চীৱৰানি কাযে গতানেৱ ভিক্খুনিযা বিন্দুমত্তং কাড়কং উদকেন ধোৱিতমত্তে নিস্সগ্গিযানি হোন্তীতি অত্থো.

ইত্থিং হনেতি গাথায ন মাতুভূতং ইত্থিং হনেয্য, ন পিতুভূতং পুৰিসং হনেয্য. অনৰিযন্তি তঞ্চ অনৰহন্তমেৱ হনেয্য, এতেন অৰহন্তঘাতকোপি ন হোতীতি দস্সেতি. অনন্তৰং ফুসেতি আনন্তৰিযং ফুসতীতি অত্থো.

৪৮১. সুপ্পতিট্ঠিত-নিগ্ৰোধসদিসন্তি যোজনৱিত্থতং ৰুক্খং সন্ধায ৱুত্তং.

সত্তৰসকেসূতি ভিক্খুনীনং পঞ্ঞত্তসত্তৰসসঙ্ঘাদিসেসেসু.

পাৰাজিকাদিপঞ্হাৱণ্ণনা নিট্ঠিতা.