চোদনাকণ্ডং

অনুৱিজ্জককিচ্চৱণ্ণনা

৩৬০. পাড়িযং যং খো ত্ৱন্তিআদীসু ত্ৱং, আৱুসো, যং ইমং ভিক্খুং চোদেসি, তং কিম্হি দোসে চোদেসি, কতৰায ৱিপত্তিযা চোদেসীতি অত্থো. এৱং সব্বত্থ.

৩৬১. অসুদ্ধপৰিসঙ্কিতোতি অসুদ্ধায অট্ঠানে উপ্পন্নায পৰিসঙ্কায পৰিসঙ্কিতো. তেনাহ ‘‘অমূলকপৰিসঙ্কিতো’’তি.

৩৬৪. পাড়িযং উপোসথো সামগ্গত্থাযাতি ৱিসুদ্ধানং ভিক্খূনং অঞ্ঞোঞ্ঞনিৰপেক্খো অহুত্ৱা উপোসথো উপোসথট্ঠানং সন্নিপতিত্ৱা ‘‘পাৰিসুদ্ধিং আযস্মন্তো আৰোচেথ, পৰিসুদ্ধেত্থাযস্মন্তো, পৰিসুদ্ধো অহং আৱুসো’’তিআদিনা অঞ্ঞমঞ্ঞং পৰিসুদ্ধিৱীমংসনাৰোচনৱসেন অযুত্তে ৱিৱজ্জেত্ৱা যুত্তেহেৱ কাযচিত্তসামগ্গীকৰণত্থায.

ৱিসুদ্ধায পৱাৰণাতি দিট্ঠসুতাদীহি অঞ্ঞমঞ্ঞং কথাপেত্ৱা ৱিসুদ্ধিসম্পাদনত্থাযাতি অত্থো. উভো এতেতি আমিসপুগ্গলনিস্সযনে এতে উভো.

অনুৱিজ্জককিচ্চৱণ্ণনা নিট্ঠিতা.